စံးထီၣ်ပတြၢၤ
မ်ယစံးထီၣ်ပတြၢၤ ယဟိဝၤယွၤ လၢယသးဒီဖျၢၣ်ညါတက့ၢ်.+
၂ ယကစံးထီၣ်ပတြၢၤ ယဟိဝၤယွၤ လၢယတၢ်အိၣ်မူဒီတစိၤလီၤ.
ဒီးဖဲယအိၣ်မူဒံးအခါ ယကသးဝံၣ် စံးထီၣ်ပတြၢၤ ယကစၢ်ယွၤလီၤ.
၃ တဘၣ်နာ်န့ၢ် ပဒိၣ်ဖးဒိၣ်တဖၣ်
ဒီးပှၤဟီၣ်ခိၣ်ဖိ လၢအအုၣ်က့ၤခီၣ်က့ၤတၢ် တသ့ဘၣ်န့ၣ်တဂ့ၤ.+
၄ ဖဲပှၤတဂၤသံအခါ အဝဲကဲထီၣ်ကဒါက့ၤ ဟီၣ်ခိၣ်ကမူၣ်လီၤ.+
ဖဲတၢ်တနံၤန့ၣ် အတၢ်ဆိကမိၣ် ဟးဂီၤကွံာ်ဝဲလီၤ.+
၅ ပှၤလၢ စီၤယၤကိာ် အကစၢ်ယွၤ မၤစၢၤအီၤန့ၣ် ကသးခုဝဲလီၤ.+
ပှၤလၢအမုၢ်လၢ်တၢ်လၢ ယဟိဝၤယွၤ အအိၣ်န့ၣ် ကသးခုဝဲလီၤ.+
၆ အဝဲမ့ၢ်ပှၤလၢ အတ့လီၤမူခိၣ်, ဟီၣ်ခိၣ်,
ပီၣ်လဲၣ် ဒီးတၢ်အိၣ်လၢအပူၤ ကိးမံၤဒဲး+
ဒီးအမ့ၢ်ပှၤလၢ အသးတီ ထီဘိလီၤ.+
၇ အဝဲမ့ၢ်ပှၤလၢ အစံၣ်ညီၣ်န့ၢ်တၢ်လၢ ပှၤလၢအဘၣ် တၢ်မၤနၢၤအီၣ်ဃီၣ်အီၤတဖၣ်အဂီၢ် တီတီလိၤလိၤ
ဒီးအမ့ၢ်ပှၤလၢ အဟ့ၣ်လီၤ တၢ်အီၣ်လၢ ပှၤလၢအလီၤဘဲတဖၣ်လီၤ.+
ယဟိဝၤယွၤ မၤထူၣ်ဖျဲးထီၣ် ပှၤဃိာ်ဖိတဖၣ်လီၤ.*+
၈ ပှၤလၢအမဲာ်တထံၣ်တၢ်ဘၣ်န့ၣ် ယဟိဝၤယွၤ ဒုးထံၣ်ထီၣ်က့ၤဝဲ,+
ပှၤလၢအသကူးလီၤအသးတဖၣ်န့ၣ် ယဟိဝၤယွၤ ဒုးဆၢထၢၣ်ဝဲ ဘျၢဘျၢ+
ဒီးယဟိဝၤယွၤ အဲၣ်ပှၤတီပှၤလိၤလီၤ.
၉ ယဟိဝၤယွၤ ဒီသဒၢဝဲ ပှၤထံဂၤကီၢ်ဂၤဖိ
ဒီးအဝဲဆီၣ်ထွဲမၤစၢၤ ပှၤဖိၣ်ဃဲဖိ ဒီးမုၣ်ကမဲလီၤ.+
မ့မ့ၢ် ပှၤအၢပှၤသီ အတၢ်ကူၣ်ထီၣ်ဖးလီၤန့ၣ် အဝဲမၤတံာ်တာ်ဝဲလီၤ.+
၁၀ ယဟိဝၤယွၤ ကကဲစီၤပၤ လီၤထူလီၤယိာ်,+
စံယိၣ်ဧၢ, နကစၢ်ယွၤ ကကဲစီၤပၤ အစိၤစိၤအဃၣ်ဃၣ်လီၤ.
ဟါလ့ၤလူယၤ.*