အ့ၤစတၢ်

၁ တၢ်မၤအသးတဖၣ်အံၤ ဟဲကဲထီၣ်အသးလၢ စီၤအဃၤၡဝ့ရိၣ်* အစိၤလီၤ. စီၤအဃၤၡဝ့ရိၣ်​ တဂၤအံၤ ပၢဝဲ ကီၢ်ရ့ၣ်​ ၁၂၇ ဘ့ၣ်,+ စးထီၣ်လၢ ကီၢ်အ့ဒံယါ တုၤလၢ ကီၢ်အဲၤသံအီးပးလီၤ.* ၂ ဖဲန့ၣ်အဆၢကတီၢ် စီၤပၤ အဃၤၡဝ့ရိၣ်​ ဆ့ၣ်နီၤလၢ စီၤပၤအလီၢ်ပစိာ်အလိၤ လၢနီ* ၡူၡၣ်အပူၤ+ ၃ ဒီးဘၣ်ဖဲအဝဲပၢတၢ် သၢနံၣ်တနံၣ်န့ၣ်​ အမၤဝဲ တၢ်အီၣ်အမူးလၢ အပဒိၣ်​ ဒီးအခ့အပှၤခဲလၢာ် အဂီၢ်လီၤ. ဖဲန့ၣ်န့ၣ်​ ဖၢၡၢၣ်+ ဒီးမၤဒဲ+ အသုးခိၣ်သုးနၢ်တဖၣ်, ပှၤဒိၣ်ပှၤပှၢ်တဖၣ်​ ဒီးကီၢ်ရ့ၣ်​ အပဒိၣ်တဖၣ်​ ဟဲဝဲလၢ တၢ်အီၣ်အမူးလီၤ. ၄ ဒီးစီၤပၤ ဒုးနဲၣ်​ ပှၤသ့ၣ်တဖၣ်န့ၣ်လၢ အဘီအမုၢ်လၢ အဒိၣ်စိဒိၣ်ကမီၤ အတၢ်ထူးတၢ်တီၤတဖၣ်​ ဒီးအဝဲပာ်ဖျါထီၣ်​ တၢ်လၤကပီၤ ဒီးတၢ်ကဟုကညီၢ် ဒိၣ်ဒိၣ်မုၢ်မုၢ်လၢ အအိၣ်ဒီးအီၤ လၢအသီ ၁၈၀ အတီၢ်ပူၤလီၤ. ၅ ဖဲမုၢ်နံၤတဖၣ်န့ၣ်​ ပှဲၤထီၣ်အခါ စီၤပၤမၤဝဲ တၢ်အီၣ်အမူးနွံသီ လၢပှၤခဲလၢာ်လၢ အအိၣ်လၢ နီၡူၡၣ်အပူၤ စးထီၣ်လၢ ပှၤအဒိၣ်​ တုၤလီၤလၢ ပှၤအဆံးတဖၣ်​ အဂီၢ်လီၤ. ဒီးအဝဲမၤဝဲ မူးအံၤလၢ တၢ်ပျီလၢ အအိၣ်လၢ စီၤပၤအနီ အကရၢၢ်ပူၤလီၤ. ၆ ဖဲန့ၣ်န့ၣ်​ အိၣ်ဒီး တၢ်ကယၢကယဲ လၢအမ့ၢ် ယၣ်ဘျးသဒၢလၢ အလွဲၢ်လါအဲး ဒီးအလွဲၢ်ဝါတဖၣ်လီၤ. ဒီးပှၤစၢထီၣ်​ ယၣ်ဘျးသဒၢတဖၣ်​ လၢပျံၤလၢအညၣ်ဂ့ၤ ဒီးသိဆူၣ်​ အလုၣ်လၢ အလွဲၢ်လုး လၢပှၤဂိာ်လီၤအီၤလၢ စ့ညၣ်အကွီၤအပူၤလီၤ. စ့ညၣ်အကွီၤတဖၣ်အံၤ အိၣ်လၢ ထူၣ်လၢၢ်ဝါကံၣ်ဃ့တဖၣ်​ အလိၤလီၤ. ဒီးဖဲန့ၣ်န့ၣ်​ အိၣ်ဝဲစ့ၢ်ကီးဒီး လီၢ်ဆ့ၣ်နီၤတဖၣ်လၢ ပှၤတ့ထီၣ်အီၤလၢ ထူဒီးစ့ညၣ်​ ဒီးပှၤပာ်လီၤအီၤလၢ လၢၢ်ဒါခိၣ်လၢ ပှၤတ့အီၤဒီးလၢၢ်ဂီၤ, လၢၢ်ဝါကံၣ်ဃ့, ပလဲ ဒီးလၢၢ်သူကံၣ်ဃ့လီၤ.

၇ ပှၤပာ်လီၤစပံးထံလၢ ထံခွးထူတဖၣ်အပူၤ ဒီးထံခွးတဖျၢၣ်ဒီးတဖျၢၣ်န့ၣ်​ လီၤဆီလိာ်အသးလီၤ. ဒီးစီၤပၤ အစပံးထံတဖၣ်​ အိၣ်ဝဲဒီဒူၣ်​ ခီဖျိလၢ စီၤပၤ အတၢ်အိၣ်တၢ်ယၢၤ အဃိလီၤ. ၈ ဒီးစီၤပၤ ရဲၣ်ကျဲၤပာ်စၢၤဝဲလၢ အပဒိၣ်တဖၣ်​ လၢအနီပူၤ ကိးဂၤဒဲးန့ၣ်​ မၤဝဲဖဲ အဝဲသ့ၣ်​ အဲၣ်ဒိးမၤဝဲအသိး သ့လီၤ. အဃိ ဘၣ်ဃးဒီး တၢ်အီစပံးထံန့ၣ်​ ဒ်တၢ်သိၣ်တၢ်သီ အိၣ်ဝဲအသိး ပှၤတမၢဆူၣ်​ ပှၤဂၤလၢ အကဘၣ်အီဝဲ ထဲလဲၣ်ထဲလဲၣ်​ နီတဂၤဘၣ်.

၉ နီၢ်ပၤမုၣ်ဝးၡတံၤ+ စ့ၢ်ကီး မၤဝဲတၢ်အီၣ်အမူးလၢ ပှၤပိာ်မုၣ်အဂီၢ် လၢစီၤပၤ အဃၤၡဝ့ရိၣ်​ အဟံၣ်လီၤ.

၁၀ စီၤမဟူမၣ်, စီၤဘံးစသၤ, စီၤဃၤဘရိနၤ,+ စီၤဘံးကသၤ, စီၤအဘၤကသၤ, စီၤစ့သၢ် ဒီးစီၤကၤရကၣ်န့ၣ်​ မ့ၢ်ဝဲ စီၤပၤ အဃၤၡဝ့ရိၣ်​ အပဒိၣ်​ ဒီးအခ့အပှၤလၢ အနာ်န့ၢ်ဝဲ တဖၣ်လီၤ. ဖဲနွံသီတသီန့ၣ်​ စီၤပၤ အသးဖှံထီၣ်လၢ စပံးထံအဃိလီၤ. အဃိ အဝဲမၢဝဲ အပှၤနွံဂၤန့ၣ်​ ၁၁ လဲၤကိးန့ၢ်အီၤ နီၢ်ပၤမုၣ်​ ဝးၡတံၤ လၢအဖၢၣ်ဝဲ နီၢ်ပၤမုၣ်​ အခိၣ်ဖၢၣ်* ဒ်သိး အကဒုးနဲၣ်​ ပှၤကမျၢၢ် ဒီးပဒိၣ်တဖၣ်လၢ နီၢ်ပၤမုၣ်​ အတၢ်ဃံတၢ်လၤ, မ့ၢ်လၢ နီၢ်ပၤမုၣ်န့ၣ်​ ဒိၣ်တၢ်ဂ့ၤဒိၣ်မး အဃိလီၤ. ၁၂ ဒီးဖဲစီၤပၤ အပဒိၣ်တဖၣ်​ လဲၤကိး နီၢ်ပၤမုၣ်​ ဝးၡတံၤအခါ နီၢ်ပၤမုၣ်​ ဂ့ၢ်လိာ်ဝဲ စီၤပၤ အတၢ်ကလုၢ် တဲာ်တဲာ်ဖျုဖျုလီၤ. အဃိ စီၤပၤ သးပှံၢ်ထီၣ်​ တၢ်ဒိၣ်မး ဒီးအသူၣ်ဒိၣ်သးဖျိးတၢ်လီၤ.

၁၃ ဒီးစီၤပၤတဲတၢ်ဒီး ပှၤကူၣ်ဘၣ်ကူၣ်သ့ လၢအသ့ၣ်ညါနၢ်ပၢၢ် လုၢ်လၢ်ထူသနူလၢ အပူၤကွံာ်တဖၣ်လီၤ. (ထီဘိန့ၣ်​ စီၤပၤ တၢၣ်ပီၣ်လိာ်သးဒီး အဝဲသ့ၣ်​ မ့ၢ်လၢ အဝဲသ့ၣ်​ နၢၤဝဲတၢ်သိၣ်တၢ်သီ ဒီးနၢ်ပၢၢ် တၢ်မူးတၢ်ရၢ် အဃိလီၤ. ၁၄ ပှၤလၢအရ့ဒီး စီၤပၤအဘူးကတၢၢ်န့ၣ်​ မ့ၢ်ဝဲ စီၤကၢ်ၡနၤ, စီၤၡ့သၢ်, စီၤအၤဒမါသၤ, စီၤတၢ်ၡံၣ်, စီၤမ့ရ့ာ်, စီၤမၢ်စနၤ ဒီးစီၤမမူကၣ်လီၤ. အဝဲသ့ၣ်မ့ၢ်ဝဲ ဖၢၡၢၣ်ဒီးမၤဒဲ အပဒိၣ်နွံဂၤ+ လၢအလဲၤလၢ စီၤပၤအအိၣ်ထီဘိ ဒီးအဝဲသ့ၣ်​ အိၣ်ဒီး လီၢ်လၤဖးဒိၣ်လၢ ဘီမုၢ်အပူၤလီၤ.) ၁၅ ဒီးစီၤပၤတဲဝဲလၢ “ယမၢ ပဒိၣ်တဖၣ်​ လဲၤကိးနီၢ်ပၤမုၣ်​ ဝးၡတံၤ ဘၣ်ဆၣ်​ နီၢ်ဝးၡတံၤ တဒိကနၣ်​ ယၤ, စီၤပၤ အဃၤၡဝ့ရိၣ်​ အကလုၢ်ဘၣ်အဃိ ဒ်တၢ်သိၣ်တၢ်သီ အိၣ်ဝဲအသိးန့ၣ်​ ပကဘၣ်မၤအီၤ ဒ်လဲၣ်.”

၁၆ ဒီးလၢ စီၤပၤဒီးပဒိၣ်တဖၣ်​ အမဲာ်ညါန့ၣ်​ စီၤမမူကၣ်​ တဲဝဲလၢ “တၢ်လၢနီၢ်ပၤမုၣ်​ ဝးၡတံၤ မၤဝဲန့ၣ်​ တမ့ၢ်လၢ အမၤကမၣ်ဘၣ်ထဲ စီၤပၤတဂၤဘၣ်.+ အမၤကမၣ်ဘၣ်စ့ၢ်ကီး ပဒိၣ်ပပှၢ်တဖၣ်​ ဒီးပှၤခဲလၢာ်လၢ အအိၣ်လၢ စီၤပၤ အဃၤၡဝ့ရိၣ်​ အကီၢ်ရ့ၣ်​ ကိးဘ့ၣ်ဒဲး အပူၤလီၤ. ၁၇ တၢ်လၢနီၢ်ပၤမုၣ်​ မၤဝဲန့ၣ်​ ပှၤမုၣ်ပှၢ်တဖၣ်​ ကနၢ်ဟူဘၣ်ဝဲ ကိးဂၤဒဲးလီၤ. ဒီးအဝဲသ့ၣ်​ ကဆိကမိၣ်ဆံး အဝၤ ဒီးကတဲဝဲလၢ ‘စီၤပၤ အဃၤၡဝ့ရိၣ်​ မၢနီၢ်ပၤမုၣ်​ ဝးၡတံၤ ဟဲလၢအအိၣ်​ သနာ်က့ အဝဲ တလဲၤလၢ အအိၣ်ဘၣ်.’ ၁၈ စးထီၣ်လၢ တနံၤညါအံၤ ဖၢၡၢၣ်ဒီးမၤဒဲ အနီၢ်ပၤမုၣ်တဖၣ်လၢ အသ့ၣ်ညါထွဲတၢ်လၢ နီၢ်ပၤမုၣ်တဂၤအံၤ မၤဝဲန့ၣ်​ အဝဲသ့ၣ်​ ကတဲက့ၤ အဝၤတဖၣ်​ ဒီးအကကဲထီၣ်​ တၢ်တပာ်ကဲတၢ်ဘၣ်​ ဒီးတၢ်သူၣ်ဒိၣ်သးဖျိးလီၤ. ၁၉ မ့ၢ်ဘၣ်​ စီၤပၤအသးန့ၣ်​ မ်စီၤပၤထုးထီၣ်​ တၢ်သိၣ်တၢ်သီ လၢနီၢ်ပၤမုၣ်​ ဝးၡတံၤ ဟဲလၢ စီၤပၤအဃၤၡဝ့ရိၣ်​ အမဲာ်ညါ တန့ၢ် နီတဘျီလၢၤဘၣ်​ န့ၣ်တက့ၢ်. ဒီးမ် တၢ်သိၣ်တၢ်သီအံၤ ဘၣ်တၢ်ကွဲးနီၣ်အီၤလၢ ဖၢၡၢၣ်ဒီးမၤဒဲ အဘီမုၢ် အတၢ်သိၣ်တၢ်သီလၢ ပှၤဆီတလဲအီၤ တန့ၢ်ဘၣ်တဖၣ်​ အကျါတက့ၢ်.+ ဝံၤဒီး မ်စီၤပၤ ဟ့ၣ်လီၤကွံာ် နီၢ်ပၤမုၣ်​ အလီၢ်အလၤ လၢပိာ်မုၣ်လၢ အဂ့ၤဒိၣ်န့ၢ်အီၤတဂၤအအိၣ်​ န့ၣ်တက့ၢ်. ၂၀ ဖဲပှၤလၢအအိၣ်လၢ စီၤပၤအဘီအမုၢ်လၢ အဒိၣ်အလဲၢ်အံၤ အပူၤခဲလၢာ် နၢ်ဟူဘၣ်ဝဲ စီၤပၤ အတၢ်သိၣ်တၢ်သီအံၤအခါ ပှၤမုၣ်ပှၢ်ကိးဂၤဒဲး စးထီၣ်လၢ အဒိၣ်​ တုၤလၢအဆံးန့ၣ်​ ကပာ်ကဲအဝၤလီၤ.”

၂၁ စီၤပၤ ဒီးပဒိၣ်တဖၣ်​ ဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤ ဒီးစီၤပၤ မၤဝဲဒ် စီၤမမူကၣ်​ တဲဝဲအသိးလီၤ. ၂၂ အဃိ စီၤပၤဆှၢလီၤ လံာ်ပရၢတဖၣ်လၢ စီၤပၤ အကီၢ်ရ့ၣ်ခဲလၢာ်အပူၤ+ ဒ်ကီၢ်ရ့ၣ်​ တဘ့ၣ်စုာ်စုာ် အတၢ်ကွဲးလံာ်ကွဲးလဲၢ် အကျိၤအကျဲ အိၣ်ဝဲအသိး ဒီးဒ်ပှၤတကလုာ်စုာ်စုာ် အနီၢ်ကစၢ်အကျိာ် အိၣ်ဝဲအသိးလီၤ. ဒီးလံာ်ပရၢ တဲဝဲလၢ ဝၤကိးဂၤဒဲး ကဘၣ်မ့ၢ်ဟံၣ်ခိၣ်* လၢအနီၢ်ကစၢ် အဟံၣ်အပူၤ ဒီးကဘၣ်တဲတၢ်ဒီး အဟံၣ်ဖိဃီဖိလၢ အပှၤကလုာ်အကျိာ်လီၤ.

၂ ဖဲတၢ်မၤအသးသ့ၣ်တဖၣ်န့ၣ်​ ဝံၤအလီၢ်ခံ ဒီးဖဲစီၤပၤအဃၤၡဝ့ရိၣ်+ အသးခုၣ်လီၤအခါ အဝဲ သ့ၣ်နီၣ်ထီၣ်က့ၤ တၢ်လၢနီၢ်ဝးၡတံၤ မၤဝဲဒီး+ အတၢ်ဆၢတဲာ် လၢတၢ်ကစံၣ်ညီၣ်အီၤ ဒ်လဲၣ်န့ၣ်လီၤ.+ ၂ ဒီးစီၤပၤ အခ့အပှၤလၢ အနာ်န့ၢ်ဝဲတဖၣ်န့ၣ်​ တဲဝဲလၢ “မ်ပှၤဃုန့ၢ် စီၤပၤလၢ မုၣ်ကနီၤဖိလၢ အဒိၣ်တၢ်ဂ့ၤတဖၣ်​ တက့ၢ်. ၃ မ်စီၤပၤ ဃုထၢထီၣ်​ ပှၤလၢအအိၣ်လၢ အကီၢ်ရ့ၣ်ခဲလၢာ်အပူၤ+ ဒ်သိး အကဟဲကိးဝဲ မုၣ်ကနီၤဖိလၢ အဒိၣ်တၢ်ဂ့ၤ ကိးဂၤဒဲး ဆူပှၤပိာ်မုၣ်အဟံၣ်​ လၢအအိၣ်လၢ နီ* ၡူၡၣ်တက့ၢ်. ဒီးမ်ပှၤပာ် အဝဲသ့ၣ်လၢ စီၤဟ့က့ၤ အတၢ်ကွၢ်ထွဲ အဖီလာ် ဒီးမ်ပှၤ မၤဃံမၤလၤထီၣ်* အဝဲသ့ၣ်တက့ၢ်. စီၤဟ့က့ၤ+ မ့ၢ်ဝဲ စီၤပၤ အခ့အပှၤ* ဒီးပှၤလၢအကွၢ်ထွဲ ပှၤပိာ်မုၣ်တဖၣ်လီၤ. ၄ ဒီးပိာ်မုၣ်သးစၢ် လၢစီၤပၤ ဘၣ်သူၣ်ဘၣ်သးအီၤ ဒိၣ်ကတၢၢ်တဂၤန့ၣ်​ ကကဲထီၣ်ဘၣ်​ နီၢ်ပၤမုၣ်လၢ နီၢ်ဝးၡတံၤ အလီၢ်လီၤ.”+ စီၤပၤ ဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤ ဒီးအဝဲမၤဝဲ ဒ်န့ၣ်လီၤ.

၅ လၢနီၡူၡၣ်+ အပူၤန့ၣ်​ အိၣ်ဝဲဒီး ပှၤယူဒၤဖိတဂၤလၢ အမ့ၢ်ဝဲ စီၤမၢ်ဒကဲၤလီၤ.+ စီၤမၢ်ဒကဲၤမ့ၢ်ဝဲ စီၤယၤအံၢ် အဖိခွါ, စီၤယၤအံၢ် မ့ၢ်ဝဲ စီၤၡံမံၤ အဖိခွါ ဒီးစီၤၡံမံၤ မ့ၢ်ဝဲ စီၤကံၣ်​ အဖိခွါလီၤ. ဒီးစီၤမၢ်ဒကဲၤ ပၣ်ဃုာ်လၢ ဘံၣ်ယၤမံၣ်အဒူၣ်ကျါလီၤ.+ ၆ ဖဲဘၤဘူၤလိၣ်​ အစီၤပၤ နဘူၤကးန့စၢ် ဖီၣ်ဝဲယူဒၤ အစီၤပၤ ယံးကၤနံယၤ*+ လၢဝ့ၢ်ယရူၤၡလ့ၣ်​ အခါ အဝဲ* ပၣ်ဃုာ်လၢ ပှၤဂီၢ်မုၢ်လၢ အဘၣ်တၢ်က့ၤဖီၣ်အီၤတဖၣ်​ အကျါလီၤ. ၇ မ့ၢ်လၢ နီၢ်ဟဒးစၤ အမိၢ်အပၢ် တအိၣ်လၢၤဘၣ်အဃိ စီၤမၢ်ဒကဲၤ မ့ၢ်ပှၤလၢ အကွၢ်ထွဲက့ၤအီၤလီၤ. နီၢ်ဟဒးစၤန့ၣ်​ မ့ၢ်ဝဲ နီၢ်အ့ၤစတၢ် ဒီးမ့ၢ်ဝဲ စီၤမၢ်ဒကဲၤ အဖါတံၢ် အဖိမုၣ်လီၤ.+ ပိာ်မုၣ်သးစၢ်တဂၤအံၤ အက့ၢ်အဂီၤဂ့ၤမး ဒီးဒိၣ်တၢ်ဂ့ၤမးလီၤ. ဖဲနီၢ်အ့ၤစတၢ် အမိၢ်အပၢ် သံဝဲအခါ စီၤမၢ်ဒကဲၤန့ၣ်​ ကွၢ်လုၢ်ဖိအီၤ ဒ်အဖိမုၣ်တဂၤ အသိးလီၤ. ၈ ဖဲစီၤပၤ ဟ့ၣ်လီၤတၢ်ကလုၢ် ဒီးပှၤဘိးဘၣ်သ့ၣ်ညါလီၤ အတၢ်သိၣ်တၢ်သီဝံၤအခါ ပှၤဟဲကိးဖှိၣ်​ ပိာ်မုၣ်သးစၢ်အါဂၤ ဖဲနီၡူၡၣ်​ လၢစီၤဟ့က့ၤ အတၢ်ကွၢ်ထွဲ အဖီလာ်လီၤ. ဒီးနီၢ်အ့ၤစတၢ်စ့ၢ်ကီး ပှၤလဲၤကိးအီၤလၢ စီၤပၤအနီပူၤ ဒီးအအိၣ်ဝဲလၢ စီၤဟ့က့ၤ+ လၢအမ့ၢ် ပှၤကွၢ်ထွဲ ပှၤပိာ်မုၣ်တဖၣ်န့ၣ်​ အတၢ်ကွၢ်ထွဲ အဖီလာ်လီၤ.

၉ ဒီးစီၤဟ့က့ၤ ဘၣ်သူၣ်ဘၣ်သးဝဲ ပိာ်မုၣ်သးစၢ်တဂၤအံၤ ဒီးပာ်ဖျါထီၣ်​ တၢ်အဲၣ်လၢအတီ လၢအဖီခိၣ်လီၤ. အဃိ တဘျီဃီန့ၣ်​ စီၤဟ့က့ၤ ရဲၣ်ကျဲၤဝဲလၢ ပှၤကမၤဃံမၤလၤအီၤ+ ဒီးရဲၣ်ကျဲၤန့ၢ်အီၤ တၢ်အီၣ်တၢ်အီ လီၤလီၤဆီဆီတဖၣ်​ ဒီးဟ့ၣ်လီၤအီၤ ပိာ်မုၣ်သးစၢ်နွံဂၤ လၢစီၤပၤ အနီပူၤလီၤ. ဒီးစီၤဟ့က့ၤ ဒုးအိၣ်က့ၤအီၤ ဒီးအပျဲၢ်မုၣ်သးစၢ်တဖၣ်အံၤလၢ တၢ်လီၢ်လၢ အဂ့ၤကတၢၢ်လၢ ပှၤပိာ်မုၣ်အဟံၣ်ပူၤလီၤ. ၁၀ ဒီးနီၢ်အ့ၤစတၢ် တတဲဘၣ်​ ပှၤဂၤလၢ အပှၤကလုာ်+ ဒီးအဘူးအတံၢ်အဂ့ၢ် နီတမံၤဘၣ်, မ့ၢ်လၢ စီၤမၢ်ဒကဲၤ+ တဲပာ်စၢၤအီၤလၢ အတဘၣ်တဲ ပှၤနီတဂၤဘၣ်​ အဃိလီၤ.+ ၁၁ တနံၤဘၣ်တနံၤန့ၣ်​ စီၤမၢ်ဒကဲၤ ဟးဝ့ၤဝီၤလၢ ပှၤပိာ်မုၣ်တဖၣ်​ အဟံၣ်​ အတၢ်ပျီ အမဲာ်ညါ ဒ်သိး ကသ့ၣ်ညါဘၣ်ဝဲလၢ မ့ၢ်နီၢ်အ့ၤစတၢ် အိၣ်ဘၣ်ဝဲ မုာ်မုာ်ခုၣ်ခုၣ်ဧါ ဒီးမ့ၢ်တၢ်မၤအသးဒီးအီၤ ဒ်လဲၣ်ဒ်လဲၣ်န့ၣ်လီၤ.

၁၂ ပှၤပိာ်မုၣ်သးစၢ်တဖၣ်န့ၣ်​ ဘၣ်မၤဃံမၤလၤထီၣ်အသးလၢ မူရၣ်အသိ ဃုလါ+ ဒီးသ့ၣ်စရံအသိ+ ဒီးသိအဂုၤအဂၤတဖၣ်​ ဃုလါလီၤ. ဒီးပှၤမၤဃံမၤလၤထီၣ်​ ပှၤပိာ်မုၣ်တဖၣ်န့ၣ်​ ဒ်တၢ်ဟံးစုနဲၣ်ကျဲ အိၣ်ဝဲအသိး ၁၂ လါ ဝံၤအလီၢ်ခံန့ၣ်​ ပှၤပိာ်မုၣ်​ သးစၢ်တဖၣ်အံၤ ဘၣ်လဲၤဝဲလၢ စီၤပၤအဃၤၡဝ့ရိၣ်အအိၣ်​ တဂၤတကလဲးလီၤ. ၁၃ ဒီးတၢ်ဆၢကတီၢ်ဘၣ်ဝဲလၢ ပိာ်မုၣ်သးစၢ်တဖၣ်​ ကလဲၤဝဲလၢ စီၤပၤအအိၣ်လီၤ. ဖဲအဟးထီၣ်လၢ ပှၤပိာ်မုၣ်အဟံၣ်​ ဒီးကလဲၤဝဲလၢ စီၤပၤအနီပူၤအခါ တၢ်လၢ အဃ့ဝဲ တမံၤဂ့ၤတမံၤဂ့ၤန့ၣ်​ ပှၤကဘၣ်ဟ့ၣ်လီၤအီၤလီၤ. ၁၄ ဖဲဟါခီ အဆၢကတီၢ် အဝဲကဘၣ်လဲၤလၢ စီၤပၤအအိၣ်​ ဒီးဖဲမုၢ်ဝါထီၣ်​ အဆၢကတီၢ်န့ၣ်​ အကဘၣ်​ ဟဲက့ၤလၢ ပှၤပိာ်မုၣ်အဟံၣ်​ ခံဖျၢၣ်တဖျၢၣ်​ လၢစီၤပၤအခ့အပှၤ* စီၤၡၤၡကး လၢအမ့ၢ် ပှၤလၢ အကွၢ်ထွဲ စီၤပၤအသံၣ်မါတဖၣ်* အတၢ်ကွၢ်ထွဲ အဖီလာ်လီၤ.+ ဒီးမ့တမ့ၢ်လၢ စီၤပၤ ဘၣ်သူၣ်ဘၣ်သးအီၤ လီၤလီၤဆီဆီ ဒီးကိးထီၣ်အီၤလၢ အမံၤဘၣ်န့ၣ်​ အဝဲ တဘၣ်လဲၤကဒီးလၢ စီၤပၤအအိၣ်လၢၤဘၣ်.+

၁၅ ဖဲတၢ်ဆၢကတီၢ်ဘၣ်လၢ နီၢ်အ့ၤစတၢ် ကဘၣ်လဲၤလၢ စီၤပၤအအိၣ်အခါ အဝဲဃ့ထဲတၢ်လၢ စီၤဟ့က့ၤ လၢအမ့ၢ် စီၤပၤအခ့အပှၤလၢ အကွၢ်ထွဲ ပှၤပိာ်မုၣ်တဖၣ်န့ၣ်* ဟ့ၣ်ကူၣ်အီၤ ဒီးအဝဲတဃ့တၢ်အဂုၤအဂၤ နီတမံၤဘၣ်. နီၢ်အ့ၤစတၢ်န့ၣ်​ မ့ၢ်ဝဲ စီၤအဘံဃယ့းလး အဖိမုၣ်​ ဒီးစီၤအဘံဃယ့းလး မ့ၢ်ဝဲ စီၤမၢ်ဒကဲၤ အဖါတံၢ် ဒီးစီၤမၢ်ဒကဲၤ လုၢ်ဖိ နီၢ်အ့ၤစတၢ်လီၤ.+ (ပှၤကိးဂၤဒဲးလၢ အထံၣ်ဘၣ်​ နီၢ်အ့ၤစတၢ်န့ၣ်​ အဝဲသ့ၣ်​ ဘၣ်သူၣ်ဘၣ်သးအီၤလီၤ.) ၁၆ ဖဲစီၤပၤ စီၤအဃၤၡဝ့ရိၣ်​ ပၢတၢ် နွံနံၣ်တနံၣ်,+ တဆံလါတလါ လၢအမ့ၢ် လါတ့ဘ့း* န့ၣ်​ ပှၤလဲၤကိး နီၢ်အ့ၤစတၢ်လၢ စီၤပၤအဟံၣ်လီၤ. ၁၇ ဒီးစီၤပၤ အဲၣ်ဝဲ နီၢ်အ့ၤစတၢ် ဒိၣ်န့ၢ်ဒံး ပိာ်မုၣ်အဂၤခဲလၢာ်လီၤ. ဒီးအဝဲ ဘၣ်သူၣ်ဘၣ်သးဝဲ နီၢ်အ့ၤစတၢ် ဒီးပာ်လုၢ်ပာ်ပှ့ၤအီၤ ဒိၣ်န့ၢ်ဒံး မုၣ်ကနီၤ အဂၤကိးဂၤဒဲးလီၤ. အဃိ စီၤပၤ ဒုးဖၢၣ်ထီၣ်အီၤ နီၢ်ပၤမုၣ်အခိၣ်ဖၢၣ်* ဒီးဒုးကဲထီၣ်အီၤလၢ နီၢ်ပၤမုၣ်+ လၢနီၢ်ပၤမုၣ်​ ဝးၡတံၤ အလီၢ်လီၤ.+ ၁၈ စီၤပၤ မၤဝဲ တၢ်အီၣ်အမူးဖးဒိၣ်လၢ အပဒိၣ်ဒီး အခ့အပှၤခဲလၢာ်အဂီၢ် ဒီးလီၤဆီဒၣ်တၢ်လၢ နီၢ်အ့ၤစတၢ် အဂီၢ်လီၤ. ဒီးစီၤပၤဘိးဘၣ်သ့ၣ်ညါဝဲ တၢ်ထူၣ်ဖျဲးလၢ ပှၤလၢအအိၣ်လၢ ကီၢ်ရ့ၣ်တဖၣ်အပူၤအဂီၢ် ဒီးဟ့ၣ်လီၤတၢ်ဟ့ၣ်တဖၣ်​ ဒ်စီၤပၤ အတၢ်အိၣ်တၢ်ယၢၤ အိၣ်ဝဲအသိးလီၤ.

၁၉ ဖဲပှၤလဲၤဆှၢ မုၣ်ကနီၤတဖၣ်+ တပူၤဃီ ခံဘျီတဘျီအခါ စီၤမၢ်ဒကဲၤ ဆ့ၣ်နီၤဝဲလၢအလီၢ် ဖဲစီၤပၤအဟံၣ်​ အတြဲၤလီၤ. ၂၀ ဒ်စီၤမၢ်ဒကဲၤ တဲပာ်စၢၤ နီၢ်အ့ၤစတၢ်အသိး နီၢ်အ့ၤစတၢ် တတဲဘၣ်ပှၤဂၤလၢ အဘူးအတံၢ်တဖၣ်​ ဒီးအပှၤကလုာ်အဂ့ၢ် နီတမံၤဘၣ်.+ နီၢ်အ့ၤစတၢ် ဆဲးဒိကနၣ်​ စီၤမၢ်ဒကဲၤ အကလုၢ် ဒ်အမၤဝဲဖဲအအိၣ်လၢ စီၤမၢ်ဒကဲၤ အတၢ်ကွၢ်ထွဲ အဖီလာ်အခါ အသိးလီၤ.+

၂၁ ဖဲန့ၣ်အဆၢကတီၢ် စီၤမၢ်ဒကဲၤ ကဲပဒိၣ်ဖဲ စီၤပၤအဟံၣ်အတြဲၤလီၤ. ဒီးစီၤပၤအပဒိၣ်​ စီၤဘံးကသၤနၤ ဒီးစီၤတ့ရ့ၣ်​ လၢအမ့ၢ် ပှၤခိးတြဲၤဖိ ခံဂၤန့ၣ်​ သးဒိၣ်ထီၣ်တၢ် ဒီးကူၣ်ထီၣ်ဝဲလၢ ကမၤသံ စီၤပၤ အဃၤၡဝ့ရိၣ်လီၤ. ၂၂ ဘၣ်ဆၣ်​ စီၤမၢ်ဒကဲၤ သ့ၣ်ညါထီၣ်ဝဲ ဒီးတဲဘၣ်ဝဲ နီၢ်ပၤမုၣ်​ အ့ၤစတၢ် တဘျီဃီလီၤ. ဒီးနီၢ်ပၤမုၣ်​ လဲၤတဲန့ၢ်အီၤ စီၤပၤလီၤ. ၂၃ အဃိ ပှၤဃုသ့ၣ်ညါ တၢ်ဂ့ၢ်တခါအံၤ ဒီးလၢခံ ပှၤထံၣ်ဝဲလၢ အမ့ၢ်ဝဲတီဝဲအဃိ ပှၤဘျးထီၣ်​ ပိာ်ခွါခံဂၤအံၤလၢ သ့ၣ်တၢၣ်အလိၤလီၤ. ဒီးတၢ်ဂ့ၢ်တဖၣ်အံၤ ခဲလၢာ်န့ၣ်​ ပှၤကွဲးနီၣ်ကွဲးဃါအီၤလၢ တၢ်စံၣ်စိၤတဲစိၤ အလံာ်ပူၤလၢ စီၤပၤအမဲာ်ညါလီၤ.+

၃ ဖဲန့ၣ်အလီၢ်ခံ စီၤပၤအဃၤၡဝ့ရိၣ်​ ပာ်ထီၣ်ထီ ပှၤအၤကးဖိ+ စီၤဟးမဒၤသၤ အဖိခွါ စီၤဟၤမၣ်+ ဒီးဟ့ၣ်အီၤ လီၢ်လၤထီန့ၢ်ဒံး ပဒိၣ်အဂၤခဲလၢာ်လီၤ.+ ၂ စီၤပၤအခ့အပှၤခဲလၢာ်လၢ အအိၣ်ဖဲ စီၤပၤအဟံၣ်တြဲၤန့ၣ်​ ကဘၣ်ဆုးလီၤအခိၣ်​ ဒီးထိၣ်လီၤပှီၤအသးလၢ စီၤဟၤမၣ်​ အမဲာ်ညါ မ့ၢ်လၢ စီၤပၤဟ့ၣ်လီၤတၢ်ကလုၢ်လၢ ပှၤကမၤဝဲ ဒ်န့ၣ်အဃိလီၤ. ဘၣ်ဆၣ်​ စီၤမၢ်ဒကဲၤ တဆုးလီၤအခိၣ်ဘၣ်​ ဒီးတထိၣ်လီၤပှီၤအသးဘၣ်. ၃ အဃိ စီၤပၤအခ့အပှၤလၢ အအိၣ်ဖဲ စီၤပၤအဟံၣ်တြဲၤန့ၣ်​ သံကွၢ် စီၤမၢ်ဒကဲၤလၢ “ဘၣ်မနုၤအဃိ နတမၤဒ် စီၤပၤ အတၢ်ကလုၢ် အသိးဘၣ်လဲၣ်.” ၄ အဝဲသ့ၣ်တဲ စီၤမၢ်ဒကဲၤ တနံၤဘၣ်တနံၤ ဘၣ်ဆၣ်​ စီၤမၢ်ဒကဲၤ တဒိကနၣ်​ အဝဲသ့ၣ်ဘၣ်​ ဒီးတဲအဝဲသ့ၣ်လၢ အမ့ၢ် ပှၤယူဒၤဖိလီၤ.+ ဒီးအဝဲသ့ၣ်​ တဲဘၣ်စီၤဟၤမၣ်​ ဒ်သိး အဝဲသ့ၣ်​ ကသ့ၣ်ညါလၢ မ့ၢ်တၢ်ကဟ့ၣ်အခွဲးလၢ စီၤမၢ်ဒကဲၤ မၤဝဲဒ်အံၤဧါ တဟ့ၣ်ဝဲဘၣ်ဧါန့ၣ်လီၤ.+

၅ ဖဲစီၤဟၤမၣ်​ ထံၣ်ဝဲလၢ စီၤမၢ်ဒကဲၤ တဆုးလီၤအခိၣ်​ ဒီးတထိၣ်လီၤပှီၤအသးဘၣ်​ အခါ စီၤဟၤမၣ်​ သးပှံၢ်ထီၣ်တၢ် ဒိၣ်မးလီၤ.+ ၆ ဘၣ်ဆၣ်​ စီၤပၤအခ့အပှၤတဖၣ်န့ၣ်​ တဲဘၣ်အီၤ ဘၣ်ဃးဒီး စီၤမၢ်ဒကဲၤ အပှၤကလုာ် အဂ့ၢ်အဃိ စီၤဟၤမၣ်​ မ့ၢ်မၤသံဘၣ်​ ထဲစီၤမၢ်ဒကဲၤ တဂၤန့ၣ်​ အသးတမံ နီတစဲးဘၣ်. စီၤဟၤမၣ်​ ဃုကျဲလၢ အကမၤသံ စီၤမၢ်ဒကဲၤ အပှၤကလုာ် လၢအမ့ၢ် ပှၤယူဒၤဖိလၢ အအိၣ်ဝဲလၢ စီၤအဃၤၡဝ့ရိၣ်​ အဘီမုၢ်ဒီဘ့ၣ်ညါအပူၤ ကိးဂၤဒဲးလီၤ.

၇ ဖဲစီၤအဃၤၡဝ့ရိၣ်​ ပၢတၢ် ၁၂ နံၣ်တနံၣ်,+ လါအဆိကတၢၢ်တလါ လၢအမ့ၢ် လါနံစၣ်န့ၣ်* အဝဲသ့ၣ်​ ကွံာ်လီၤဝဲ ပူရး+ (မ့ၢ်ဝဲ တၢ်ဖး) လၢစီၤဟၤမၣ်​ အမဲာ်ညါ ဒ်သိး ကပာ်ပနီၣ်ဝဲ မုၢ်နံၤမုၢ်သီလၢ အဂ့ၤကတၢၢ် လၢအဝဲသ့ၣ်​ ကမၤဝဲဒ်န့ၣ်​ အဂီၢ်လီၤ. ဒီးပူရးအံၤ လီၤဖဲ လါ ၁၂ လါတလါ လၢအမ့ၢ် လါအးဒၢ်လီၤ.*+ ၈ ဝံၤဒီး စီၤဟၤမၣ်​ တဲစီၤပၤ အဃၤၡဝ့ရိၣ်လၢ “ပှၤအိၣ်ဝဲတဒူၣ်လၢ အရၤလီၤအသး ဒီးအိၣ်ပြံပြါလၢ နဘီမုၢ် အကီၢ်ရ့ၣ်​ ကိးဘ့ၣ်ဒဲးအပူၤ+ လၢပှၤဂီၢ်မုၢ်တဖၣ်​ အကျါလီၤ.+ ဒီးအဝဲသ့ၣ်​ အတၢ်သိၣ်တၢ်သီတဖၣ်န့ၣ်​ လီၤဆီဒီး ပှၤအဂၤခဲလၢာ်လီၤ. အဝဲသ့ၣ်တဒိကနၣ်စီၤပၤ အတၢ်သိၣ်တၢ်သီတဖၣ်​ စ့ၢ်ကီးဘၣ်. အဃိ နမ့ၢ်ပျဲအဝဲသ့ၣ်​ ဒ်အံၤန့ၣ်​ တဂ့ၤလၢနဂီၢ်ဘၣ်. ၉ မ့ၢ်ဘၣ်​ စီၤပၤအသးန့ၣ်​ မၢပှၤကွဲးလီၤ တၢ်သိၣ်တၢ်သီလၢ ပှၤကမၤသံကွံာ် အဝဲသ့ၣ်တက့ၢ်. ဒီးယကဟ့ၣ်လီၤ ပဒိၣ်တဖၣ်လၢ စ့ညၣ်အတၤလၣ်* ၁၀,၀၀၀ ဒ်သိး အဝဲသ့ၣ်​ ကဖၢနုာ်ဝဲလၢ စီၤပၤ အတၢ်လုၢ်ဒိၣ်ပှ့ၤဒိၣ်အလီၢ် အဂီၢ်လီၤ.”

၁၀ ဒီးစီၤပၤ ဘ့ၣ်လီၤအပသံး+ ဒီးဟ့ၣ်လီၤဝဲ ပှၤအၤကးဖိ+ စီၤဟးမဒၤသၤ အဖိခွါ စီၤဟၤမၣ်+ လၢအမ့ၢ် ပှၤယူဒၤဖိ အဒုၣ်အဒါလီၤ. ၁၁ စီၤပၤတဲဘၣ်​ စီၤဟၤမၣ်လၢ “စ့ညၣ်ဒီး ပှၤဂီၢ်မုၢ်သ့ၣ်တဖၣ်န့ၣ်​ အိၣ်လၢနစုပူၤလီၤ. နမၤအဝဲသ့ၣ်​ ဖဲနအဲၣ်ဒိးမၤအသိး သ့လီၤ.” ၁၂ ဖဲလါအဆိကတၢၢ်တလါ, လါထီၣ်​ ၁၃ သီတသီန့ၣ်​ ပှၤကိးန့ၢ် စီၤပၤအနဲၣ်ရွဲၣ်တဖၣ်လီၤ.+ ဒီးအဝဲသ့ၣ်​ ကွဲးလီၤဝဲ+ စီၤဟၤမၣ်​ အတၢ်ကတိၤ ဆူစီၤပၤ အပဒိၣ်ဖးဒိၣ်တဖၣ်, ပဒိၣ်လၢအပၢ ကီၢ်ရ့ၣ်တဖၣ်​ ဒီးပှၤအကလုာ်ကလုာ် အပဒိၣ်တဖၣ်​ အအိၣ်လီၤ. အဝဲသ့ၣ်ကွဲးဝဲ ဒ်ကီၢ်ရ့ၣ်​ တဘ့ၣ်စုာ်စုာ် အတၢ်ကွဲးလံာ်ကွဲးလဲၢ် အကျိၤအကျဲ အိၣ်ဝဲအသိး ဒီးဒ်ပှၤတကလုာ်စုာ်စုာ် အနီၢ်ကစၢ်ကျိာ် အိၣ်ဝဲအသိးလီၤ. ဒီးအဝဲသ့ၣ်ကွဲးဝဲလၢ စီၤပၤအဃၤၡဝ့ရိၣ်​ အမံၤ ဒီးပှၤစဲပနီၣ်အီၤလၢ စီၤပၤအပသံးလီၤ.+

၁၃ ပှၤစိာ်တၢ်ကစီၣ်ဖိတဖၣ်​ လဲၤဆှၢဝဲ လံာ်ပရၢတဖၣ်အံၤလၢ စီၤပၤအကီၢ်ရ့ၣ်​ ခဲလၢာ်အပူၤလီၤ. လၢလံာ်ပရၢအပူၤန့ၣ်​ အိၣ်ဒီးတၢ်ကလုၢ်လၢ ပှၤကဘၣ်​ မၤသံ, မၤလီၤတူာ်ကွံာ် ဒီးမၤဟးဂီၤ ပှၤယူဒၤဖိခဲလၢာ် လၢအမ့ၢ် ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ပှၤဖိသၣ်မ့ၢ်ဂ့ၤ, ပှၤပိာ်မုၣ်မ့ၢ်ဂ့ၤ လၢတနံၤဃီအတီၢ်ပူၤလီၤ. ပှၤကဘၣ်မၤဒ်န့ၣ်​ ဖဲလါ ၁၂ လါတလါ လၢအမ့ၢ် လါအးဒၢ် ထီၣ်​ ၁၃ သီတသီလီၤ.+ ဒီးပှၤကဘၣ်ဟံးန့ၢ် အဝဲသ့ၣ်​ အတၢ်ဖိတၢ်လံၤတဖၣ်လီၤ.+ ၁၄ ကီၢ်ရ့ၣ်ကိးဘ့ၣ်ဒဲးန့ၣ်​ ကဘၣ်ပာ်ပနီၣ်​ လံာ်အံၤ ဒ်တၢ်သိၣ်တၢ်သီအသိး ဒီးပှၤကဘၣ်​ ဘိးဘၣ်သ့ၣ်ညါအီၤလၢ ပှၤဂီၢ်မုၢ်တဖၣ်အအိၣ်​ ဒ်သိး အဝဲသ့ၣ်​ ကအိၣ်ကတဲာ်ကတီၤအသးလၢ တၢ်တနံၤန့ၣ်​ အဂီၢ်လီၤ. ၁၅ ဒီးပှၤစိာ်တၢ်ကစီၣ်ဖိတဖၣ်န့ၣ်​ ဟးထီၣ်ဝဲချ့ချ့+ ဒ်စီၤပၤမၤလိာ်ဝဲအသိး ဒီးလၢနီ* ၡူၡၣ်+ အပူၤစ့ၢ်ကီး ပှၤပာ်လီၤဝဲ တၢ်သိၣ်တၢ်သီ ဒ်အံၤလီၤ. ဝံၤဒီးစီၤပၤဒီးစီၤဟၤမၣ်န့ၣ်​ ဆ့ၣ်နီၤအီသကိးတၢ်လီၤ. ဘၣ်ဆၣ်​ ပှၤအိၣ်လၢ ဝ့ၢ်ၡူၡၣ်အပူၤန့ၣ်​ မ့ၢ်လၢ အဝဲသ့ၣ်​ တသ့ၣ်ညါ တၢ်ကဲထီၣ်အသး ဒ်လဲၣ်ဒ်လဲၣ်အဃိ အဝဲသ့ၣ်​ အခိၣ်နူာ်ဘံဘူဝဲလီၤ.

၄ ဖဲစီၤမၢ်ဒကဲၤ+ သ့ၣ်ညါထီၣ်ဝဲ တၢ်မၤအသးတဖၣ်အံၤအခါ+ အဝဲဖှီညာ် အဆ့ကၤ ဒီးသိးထီၣ်ဝဲ ထၢၣ်တၢ်ကံးညာ် ဒီးဖှံလီၤဝဲဖၣ်ဆါလၢ အလိၤလီၤ. ဒီးအဝဲလဲၤလၢ ဝ့ၢ်ပူၤ ဒီးဟီၣ်ကိးပသူထီၣ်​ ဖးဒိၣ်​ လၢတၢ်သူၣ်အုးသးအုး အပူၤလီၤ. ၂ အဝဲလဲၤဝဲ တုၤလၢ စီၤပၤအဟံၣ်အတြဲၤ ဒီးအိၣ်ပတုာ်ဝဲဖဲန့ၣ်​ မ့ၢ်လၢ ပှၤလၢအသိးဝဲ ထၢၣ်တၢ်ကံးညာ်န့ၣ်* လဲၤနုာ်လီၤလၢ စီၤပၤ အဟံၣ်အတြဲၤတန့ၢ်ဘၣ်​ အဃိလီၤ. ၃ ဖဲစီၤပၤအကလုၢ် ဒီးအတၢ်သိၣ်တၢ်သီ လဲၤတုၤလၢ ကယဲၢ်ကီၢ်ရ့ၣ်လၢ+ ပှၤယူဒၤဖိတဖၣ်​ အိၣ်ဝဲအလီၢ်အခါ ပှၤယူဒၤဖိတဖၣ်​ သးအုးဖးဒိၣ်, ဒုၣ်တၢ်အီၣ်တၢ်အီ+ ဒီးဟီၣ်ဝဲယၢၤဝဲလီၤ. ဒီးအဝဲသ့ၣ်အါဂၤ မံနီၤလၢ ထၢၣ်တၢ်ကံးညာ်အလိၤ ဒီးလၢဖၣ်ဆါအကျါလီၤ.+ ၄ ဖဲနီၢ်အ့ၤစတၢ် အပျဲၢ်မုၣ်​ ဒီးအခ့အပှၤ* တဖၣ်​ ဟဲတဲဘၣ်အီၤ တၢ်ဂ့ၢ်တခါအံၤအခါ အသူၣ်ကိၢ်သးဂီၤတၢ် ဒိၣ်မးလီၤ. ဒီးအဝဲ ဆှၢလီၤန့ၢ် စီၤမၢ်ဒကဲၤ တၢ်ကူတၢ်ကၤ ဒ်သိး စီၤမၢ်ဒကဲၤ သုတသိးဝဲ ထၢၣ်တၢ်ကံးညာ်လၢၤ တဂ့ၤအဂီၢ်လီၤ. ဘၣ်ဆၣ်​ စီၤမၢ်ဒကဲၤ တတူၢ်လိာ်ဝဲဘၣ်. ၅ အဃိ နီၢ်အ့ၤစတၢ် ကိးန့ၢ် စီၤဟၤတး လၢအမ့ၢ် စီၤပၤအခ့အပှၤ* တဂၤ လၢစီၤပၤဃုထၢထီၣ်အီၤလၢ ကမၤန့ၢ်တၢ်လၢ နီၢ်အ့ၤစတၢ်အဂီၢ်လီၤ. ဒီးနီၢ်အ့ၤစတၢ် မၢစီၤဟၤတး လဲၤလၢ စီၤမၢ်ဒကဲၤ အအိၣ်​ ဒ်သိး ကသ့ၣ်ညါဝဲ တၢ်အိၣ်သးအဂီၢ်န့ၣ်လီၤ.

၆ အဃိ စီၤဟၤတး လဲၤလၢ စီၤမၢ်ဒကဲၤ အအိၣ်​ လၢဝ့ၢ်အတၢ်ဆါတၢ်ပှ့ၤအလီၢ် လၢအအိၣ်လၢ စီၤပၤအဟံၣ်အတြဲၤ အမဲာ်ညါန့ၣ်လီၤ. ၇ စီၤမၢ်ဒကဲၤ တဲဘၣ်အီၤ တၢ်လၢအမၤအသး ဒီးအီၤခဲလၢာ် ဒီးဘၣ်ဃးဒီး ကျိၣ်စ့လၢ+ စီၤဟၤမၣ်​ အၢၣ်လီၤဝဲလၢ ကဟ့ၣ်လီၤဝဲလၢ စီၤပၤ အတၢ်လုၢ်ဒိၣ်ပှ့ၤဒိၣ်အလီၢ် ဒ်သိး ကမၤသံ ပှၤယူဒၤဖိအဂီၢ်လီၤ.+ ၈ ဒီးအဝဲဟ့ၣ်လီၤအီၤ လံာ်လၢ အအိၣ်ဒီးတၢ်သိၣ်တၢ်သီလၢ အဘၣ်တၢ်ထုးထီၣ်အီၤလၢ ဝ့ၢ်ၡူၡၣ်အပူၤလၢ+ အဘၣ်ဃးဒီး တၢ်ကမၤသံ ပှၤယူဒၤဖိတဖၣ်လီၤ. ဒီးစီၤဟၤတး ကဘၣ်က့ၤဟ့ၣ်လီၤ နီၢ်အ့ၤစတၢ် လံာ်တဘ့ၣ်အံၤ ဒီးကဘၣ်တဲဘၣ်အီၤ+ လၢတၢ်အိၣ်အသး ဒီးကဘၣ်မၢ အလဲၤဃ့ကညး စီၤပၤ လၢကပာ်ဖျါထီၣ်​ တၢ်သးကညီၤ လၢအပှၤကလုာ်တဖၣ်​ အဖီခိၣ်အဂီၢ်လီၤ.

၉ စီၤဟၤတး က့ၤလၢ နီၢ်အ့ၤစတၢ်အအိၣ်​ ဒီးတဲဘၣ်​ နီၢ်အ့ၤစတၢ် တၢ်လၢ စီၤမၢ်ဒကဲၤ တဲအီၤန့ၣ်လီၤ. ၁၀ ဒီးနီၢ်အ့ၤစတၢ် မၢစီၤဟၤတး လဲၤတဲ စီၤမၢ်ဒကဲၤလၢ+ ၁၁ “စီၤပၤအခ့အပှၤခဲလၢာ် ဒီးပှၤလၢ အအိၣ်လၢ စီၤပၤ အကီၢ်ရ့ၣ်တဖၣ်အပူၤ သ့ၣ်ညါဝဲလၢ ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, စီၤပၤမ့ၢ်တကိးအီၤဘၣ်​ ဒီးအမ့ၢ်လဲၤနုာ်လီၤဝဲလၢ စီၤပၤ အကရၢၢ်လၢ အကိပူၤတတီၤန့ၣ်+ ဒ်တၢ်သိၣ်တၢ်သီ အိၣ်ဝဲအသိး အဝဲ ကဘၣ်သံလီၤ. ဘၣ်ဆၣ်​ အကအိၣ်မူဘၣ်ဝဲ ထဲလၢ စီၤပၤမ့ၢ်ယူာ်ဃီၤဝဲ အနီၣ်ထိးဘိထူဆူ အအိၣ်လီၤ.+ ဒီးခဲအံၤ စီၤပၤတကိးယၤဘၣ်န့ၣ်​ အိၣ်ဝဲ အသီ ၃၀ လံ.”

၁၂ ဖဲပှၤတဲဘၣ်​ စီၤမၢ်ဒကဲၤ တၢ်လၢ နီၢ်အ့ၤစတၢ် တဲဘၣ်အီၤအခါ ၁၃ စီၤမၢ်ဒကဲၤ တဲဆၢက့ၤ နီၢ်အ့ၤစတၢ်လၢ “မ့ၢ်လၢ နအိၣ်လၢစီၤပၤအနီပူၤ အဃိ တဘၣ်ဆိကမိၣ်လၢ နတၢ်အိၣ်သး ကဂ့ၤဒိၣ်န့ၢ်ဒံး ပှၤယူဒၤဖိခဲလၢာ် ဒီးနကပူၤဖျဲးတဂ့ၤ. ၁၄ နမ့ၢ်အိၣ်ဘှ့ၣ်လၢ ဆၢကတီၢ်ခဲအံၤန့ၣ်​ တၢ်မၤစၢၤ ဒီးတၢ်မၤပူၤဖျဲး လၢပှၤယူဒၤဖိ အဂီၢ်န့ၣ်​ ကဟဲလၢ ကျဲအဂၤတဘိဘိလီၤ.+ ဘၣ်ဆၣ်မ့မ့ၢ် နၤဒီးနပၢ် အဒူၣ်ဖိထၢဖိတဖၣ်န့ၣ်​ ကတုၤလၢ တၢ်ဟးဂီၤလီၤ. ဘၣ်သ့ၣ်သ့ၣ်​ နကဲထီၣ်ဘၣ်နီၢ်ပၤမုၣ်​ ဒ်သိး နကမၤစၢၤဘၣ်တၢ်လၢ တၢ်အိၣ်သး ကီခဲဒ်အံၤအဃိဧါသၢၤ.”+

၁၅ ဒီးနီၢ်အ့ၤစတၢ် တဲဆၢက့ၤ စီၤမၢ်ဒကဲၤလၢ ၁၆ “လဲၤကိးဖှိၣ်​ ပှၤယူဒၤဖိခဲလၢာ် လၢအအိၣ်လၢ ဝ့ၢ်ၡူၡၣ်အပူၤ ဒီးဒုၣ်တၢ်အီၣ်လၢ+ ယဂီၢ်တက့ၢ်. လၢသၢနံၤဒီးသၢနၤ အတီၢ်ပူၤန့ၣ်​ တဘၣ်အီၣ်တၢ်အီတၢ် တဂ့ၤ.+ ယၤဒီးယပျဲၢ်မုၣ်တဖၣ်စ့ၢ်ကီး ပကဒုၣ်တၢ်အီၣ်လီၤ. ဒီးအမ့ၢ်ထီဒါလိာ်သးဒီး တၢ်သိၣ်တၢ်သီ သနာ်က့ ယကလဲၤလၢ စီၤပၤအအိၣ်လီၤ. ဒီးယမ့ၢ်ဘၣ်သံန့ၣ်​ ယကသံလီၤ.” ၁၇ အဃိ စီၤမၢ်ဒကဲၤ ဟးထီၣ်ဝဲ ဒီးမၤဝဲဒ် နီၢ်အ့ၤစတၢ် တဲအီၤအသိး ခဲလၢာ်လီၤ.

၅ ဖဲသၢသီတသီန့ၣ်+ နီၢ်အ့ၤစတၢ် ကၤထီၣ်ဝဲ နီၢ်ပၤမုၣ်အကူအသိး ဒီးလဲၤဆၢထၢၣ်ဝဲလၢ စီၤပၤအကရၢၢ် လၢအကိပူၤတတီၤလၢ စီၤပၤအဟံၣ်* မဲာ်ညါလီၤ. မ့မ့ၢ် စီၤပၤန့ၣ်​ ဆ့ၣ်နီၤဝဲလၢ အလီၢ်ပစိာ်အဖီခိၣ်​ လၢစီၤပၤ အဟံၣ်ပူၤလၢ အကွၢ်ဆၢၣ်မဲာ်လိာ်အသးဒီး ကျဲနုာ်လီၤအလီၢ်န့ၣ်လီၤ. ၂ ဖဲစီၤပၤထံၣ်ဘၣ်​ နီၢ်အ့ၤစတၢ် ဆၢထၢၣ်လၢ ကရၢၢ်ပူၤအခါ အသးခုဝဲလၢ အထံၣ်ဘၣ်​ နီၢ်အ့ၤစတၢ် အဃိလီၤ. ဒီးစီၤပၤယူာ်ဃီၤ အနီၣ်ထိးဘိထူ+ ဆူနီၢ်အ့ၤစတၢ် အအိၣ်လီၤ. ဒီးနီၢ်အ့ၤစတၢ် လဲၤသုးဘူးဃီၤအသး ဒီးထိးဝဲ နီၣ်ထိးဘိ အခိၣ်လီၤ.

၃ ဒီးစီၤပၤ သံကွၢ်အီၤလၢ “နီၢ်ပၤမုၣ်​ အ့ၤစတၢ်ဧၢ, ဘၣ်တမံၤမံၤဧါ. နအဲၣ်ဒိးဃ့ တၢ်မနုၤလဲၣ်. နမ့ၢ်ဃ့ ယဘီယမုၢ်တဝာ်ဒၣ်လဲာ် ယကဟ့ၣ်နၤလီၤ.” ၄ နီၢ်အ့ၤစတၢ် တဲဆၢအီၤလၢ “မ့ၢ်ဘၣ်​ စီၤပၤအသးန့ၣ်​ နၤဒီးစီၤဟၤမၣ်န့ၣ်+ ဟဲအီၣ်တၢ်အီၣ်​ လၢယကတဲာ်ကတီၤန့ၢ်နၤမီၤ.” ၅ အဃိ စီၤပၤတဲဘၣ်​ အခ့အပှၤတဖၣ်လၢ “ဒ်နီၢ်အ့ၤစတၢ် တဲဝဲအသိးန့ၣ်​ မၢစီၤဟၤမၣ်​ ဟဲမ့ၢ်ချ့.” အဃိ စီၤပၤ ဒီးစီၤဟၤမၣ်​ လဲၤအီၣ်တၢ်အီၣ်လၢ နီၢ်အ့ၤစတၢ် ကတဲာ်ကတီၤပာ်စၢၤဝဲလီၤ.

၆ လၢခံ ဖဲအဝဲသ့ၣ်​ အီစပံးထံအခါ စီၤပၤတဲ နီၢ်အ့ၤစတၢ်လၢ “နလီကီမနုၤလဲၣ်, ယကဟ့ၣ်နၤလီၤ. နအဲၣ်ဒိးဃ့ မနုၤလဲၣ်. နမ့ၢ်ဃ့ ယဘီယမုၢ်တဝာ်ဒၣ်လဲာ် ယကဟ့ၣ်နၤလီၤ.”+ ၇ နီၢ်အ့ၤစတၢ် တဲဆၢက့ၤဝဲလၢ “တၢ်လၢယအဲၣ်ဒိးဃ့န့ၣ်​ မ့ၢ်ဝဲဒ်အံၤလီၤ. ၈ စီၤပၤ မ့ၢ်ဘၣ်သူၣ်ဘၣ်သးယၤဒီး မ့ၢ်ဘၣ်​ စီၤပၤအသးလၢ အကဟ့ၣ်ယၤတၢ်လၢ ယဃ့ဒီး ကမၤဒ်ယဃ့အသိးန့ၣ်​ ခဲမုၢ်ဆ့ၣ်​ မ်စီၤပၤဒီးစီၤဟၤမၣ်​ ဟဲလၢ တၢ်အီၣ်အမူးလၢ ယကကတဲာ်တတီၤန့ၢ်သုတက့ၢ်. ဒီးခဲမုၢ်ဆ့ၣ်န့ၣ်​ ယကမၤဒ် စီၤပၤတဲအသိး ဒီးယကတဲဖျါထီၣ်​ တၢ်လၢ ယအဲၣ်ဒိးဃ့လီၤ.”

၉ ဖဲတၢ်တနံၤန့ၣ်​ စီၤဟၤမၣ်​ ဟးထီၣ်လၢ တၢ်သူၣ်ဖှံသးညီ ဒီးတၢ်သးခုအပူၤလီၤ. ဘၣ်ဆၣ်​ ဖဲအထံၣ်ဝဲ စီၤမၢ်ဒကဲၤလၢ စီၤပၤအဟံၣ်အတြဲၤ ဒီးထံၣ်ဘၣ်ဝဲလၢ စီၤမၢ်ဒကဲၤ တဆၢထၢၣ်​ ဒီးတပျံၤအီၤဘၣ်အခါ စီၤဟၤမၣ်​ သးပှံၢ်ထီၣ်​ စီၤမၢ်ဒကဲၤဒိၣ်မးလီၤ.+ ၁၀ ဘၣ်ဆၣ်​ စီၤဟၤမၣ်​ ကီၤအသး ဒီးက့ၤဝဲလၢ အဟံၣ်လီၤ. ဒီးအဝဲ ကိးန့ၢ် အသကိးတဖၣ်​ ဒီးအမါ နီၢ်စ့ရ့ၣ်လီၤ.+ ၁၁ ဒီးလၢအဝဲသ့ၣ်​ အမဲာ်ညါန့ၣ်​ စီၤဟၤမၣ်​ တဲဂ့ၤလီၤအသးလၢ အတၢ်ထူးတၢ်တီၤ အိၣ်ဝဲအါထဲလဲၣ်အဂ့ၢ် ဒီးအဖိခွါ အိၣ်အါထဲလဲၣ်အဂ့ၢ်+ ဒီးစီၤပၤဟ့ၣ်အီၤ အလီၢ်အလၤဒ်လဲၣ်​ ဒီးစီၤပၤ ပာ်ထီၣ်အီၤလၢ စီၤပၤ အပဒိၣ်ဖးဒိၣ်​ ဒီးအခ့အပှၤတဖၣ်​ အဖီခိၣ်အဂ့ၢ်လီၤ.+

၁၂ ဒီးစီၤဟၤမၣ်​ ဆဲးတဲဝဲလၢ “တကးဒံးဘၣ်​ နီၢ်ပၤမုၣ်​ အ့ၤစတၢ်န့ၣ်​ ကွဲမုာ်ယၤလၢ ယကလဲၤအီၣ်တၢ်ဒီးစီၤပၤ လၢတၢ်အီၣ်လၢ အဝဲကတဲာ်ကတီၤဝဲလီၤ.+ အဝဲတကွဲမုာ် ပှၤအဂၤ နီတဂၤဘၣ်. ဒီးခဲမုၢ်ဆ့ၣ်စ့ၢ်ကီး အဝဲကွဲမုာ်ယၤလၢ ယကလဲၤအီၣ်သကိးတၢ်ဒီး အီၤဒီးစီၤပၤလီၤ.+ ၁၃ ဘၣ်ဆၣ်​ ယမ့ၢ်ဘၣ်ထံၣ်ဒံး ပှၤယူဒၤဖိ စီၤမၢ်ဒကဲၤ လၢအဆ့ၣ်နီၤလၢစီၤပၤအဟံၣ်​ အတြဲၤန့ၣ်​ ယသးတမံ နီတစဲးဒံးဘၣ်.” ၁၄ အဃိ အမါ နီၢ်စ့ရ့ၣ်​ ဒီးအသကိးတဖၣ်​ တဲအီၤလၢ “မၢပှၤဆီလီၤ သ့ၣ်တၢၣ်တတၢၣ်လၢ အထီဝဲ အပျၢ်* ၅၀ တက့ၢ်. ဒီးခဲဂီၤကၢာ်န့ၣ်​ တဲဘၣ်စီၤပၤလၢ ပှၤကဘၣ်ဘျးထီၣ်​ စီၤမၢ်ဒကဲၤလၢ သ့ၣ်တၢၣ်အံၤအလိၤ+ ဝံၤဒီး လဲၤပိာ်လိာ်သးခံဒီးစီၤပၤ ဒီးအီၣ်သကိးတၢ်လၢ တၢ်သးခုအပူၤသၢၤ.” ဒီးစီၤဟၤမၣ်​ ဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤအဃိ အမၢပှၤဆီလီၤ သ့ၣ်တၢၣ်တတၢၣ်လီၤ.

၆ ဖဲတၢ်တနၤန့ၣ်​ စီၤပၤ မံတန့ၢ်ဘၣ်အဃိ အဝဲမၢ ပှၤဟဲစိာ်န့ၢ်အီၤ တၢ်စံၣ်စိၤတဲစိၤအလံာ်+ ဒီးပှၤဖးန့ၢ်အီၤလီၤ. ၂ ဒီးပှၤထံၣ်န့ၢ် တၢ်ကွဲးအသးလၢ အဘၣ်ဃးဒီး စီၤမၢ်ဒကဲၤ တဲဖျါထီၣ်ဝဲလၢ စီၤပၤအပဒိၣ်​ စီၤဘံးကသၤနၤ ဒီးစီၤတ့ရ့ၣ်​ လၢအမ့ၢ် ပှၤခိးတြဲၤဖိ ခံဂၤ ကူၣ်ထီၣ်ဝဲလၢ ကမၤသံ စီၤပၤအဃၤၡဝ့ရိၣ်​ အဂ့ၢ်လီၤ.+ ၃ ဒီးစီၤပၤ တဲဝဲလၢ “လၢတၢ်ဂ့ၢ်တခါအံၤအဃိန့ၣ်​ မ့ၢ်ပှၤမၤလၤကပီၤ စီၤမၢ်ဒကဲၤလၢ တၢ်တမံၤမံၤလံဧါ. ဒီးပှၤဟ့ၣ်လီၤအီၤ တၢ်မနုၤလဲၣ်.” ဖဲန့ၣ်န့ၣ်​ စီၤပၤ အခ့အပှၤလၢ အနာ်န့ၢ်ဝဲတဖၣ်​ တဲဝဲလၢ “ပှၤတမၤန့ၢ်အီၤ တၢ်နီတမံၤဘၣ်.”

၄ စီၤပၤ သံကွၢ်ဝဲလၢ “မတဂၤအိၣ်လၢ ကရၢၢ်ပူၤလဲၣ်.” ဖဲန့ၣ်အဆၢကတီၢ် ဘၣ်လၢ စီၤဟၤမၣ်​ ဟဲနုာ်လီၤဝဲလၢ စီၤပၤအဟံၣ်* အကရၢၢ် လၢတၢ်ချၢတတီၤ+ ဒ်သိး အကမၢ စီၤပၤဘျးထီၣ်​ စီၤမၢ်ဒကဲၤလၢ သ့ၣ်တၢၣ်လၢ အကတဲာ်ကတီၤပာ်စၢၤဝဲအလိၤ အဂီၢ်လီၤ.+ ၅ ဒီးစီၤပၤ အခ့အပှၤတဖၣ်​ တဲစီၤပၤလၢ “စီၤဟၤမၣ်+ ဆၢထၢၣ်လၢ ကရၢၢ်ပူၤလီၤ.” အဃိ စီၤပၤတဲဝဲလၢ “မၢအဟဲနုာ်လီၤသၢၤ.”

၆ ဖဲစီၤဟၤမၣ်​ ဟဲနုာ်လီၤဝဲအခါ စီၤပၤတဲအီၤလၢ “ပှၤလၢစီၤပၤ အဲၣ်ဒိးမၤလၤကပီၤအီၤ တဂၤန့ၣ်​ ပှၤကဘၣ်မၤန့ၢ်အီၤ တၢ်မနုၤလဲၣ်.” ဒီးစီၤဟၤမၣ်​ ဆိကမိၣ်လီၤအသးလၢ “ပှၤလၢ စီၤပၤ အဲၣ်ဒိးမၤလၤကပီၤအီၤ ဒိၣ်န့ၢ်ယၤန့ၣ်​ ကအိၣ်ဧါ.”+ ၇ အဃိ စီၤဟၤမၣ်​ တဲဘၣ်စီၤပၤလၢ “လၢပှၤတဂၤလၢစီၤပၤ အဲၣ်ဒိး မၤလၤကပီၤအီၤအဂီၢ်န့ၣ်​ ၈ မၢပှၤဟဲစိာ် စီၤပၤအတၢ်ကူတၢ်ကၤ+ ဒီးဟဲမူၤ စီၤပၤအကသ့ၣ်လၢအအိၣ်ဒီး စီၤလိၣ်စီၤပၤ အတၢ်ကယၢကယဲ လၢအခိၣ်လိၤတက့ၢ်. ၉ ဒီးတၢ်ကူတၢ်ကၤ ဒီးကသ့ၣ်တဒုန့ၣ်​ ပှၤကဘၣ်ဟ့ၣ်လီၤလၢ စီၤပၤအပဒိၣ်ဖးဒိၣ်​ တဂၤအအိၣ်လီၤ. ဒီးပှၤကဘၣ်ဒုးသိးထီၣ်​ ပှၤလၢ စီၤပၤအဲၣ်ဒိး မၤလၤကပီၤအီၤတဂၤအံၤ လၢတၢ်ကူတၢ်ကၤအဝဲန့ၣ်​ ဒီးဒုးဒိးထီၣ်အီၤ ကသ့ၣ်တဒုန့ၣ်လၢ ဝ့ၢ်အတၢ်ဆါတၢ်ပှ့ၤ အလီၢ်လီၤ. ဒီးလၢအမဲာ်ညါန့ၣ်​ အဝဲသ့ၣ်​ ကဘၣ်ကိးထီၣ်လၢ ‘ပှၤလၢ စီၤပၤအဲၣ်ဒိး မၤလၤကပီၤအီၤန့ၣ်​ ပှၤကဘၣ်မၤအီၤ ဒ်အံၤလီၤ.’”+ ၁၀ ဖဲန့ၣ်န့ၣ်​ စီၤပၤတဲဆၢ စီၤဟၤမၣ်လၢ “မၤမ့ၢ်ချ့, ဟံးထီၣ်တၢ်ကူတၢ်ကၤ ဒီးဟဲမူၤကသ့ၣ်​ ဝံၤဒီး ဒ်နတဲအသိးန့ၣ်​ လဲၤမၤပှၤယူဒၤဖိ စီၤမၢ်ဒကဲၤ လၢအဆ့ၣ်နီၤလၢ စီၤပၤအဟံၣ်​ အတြဲၤ ဒ်န့ၣ်တက့ၢ်. မၤအီၤဒ် နတဲအသိး လီၤတံၢ်လီၤဆဲးနီၤ.”

၁၁ အဃိ စီၤဟၤမၣ်​ ဟံးထီၣ်​ တၢ်ကူတၢ်ကၤ ဒီးဟဲမူၤကသ့ၣ်လီၤ. ဒီးအဝဲ ဒုးသိးထီၣ်ဝဲ စီၤမၢ်ဒကဲၤ+ ဒီးဒုးဒိးထီၣ်အီၤ ကသ့ၣ်​ လၢဝ့ၢ်အတၢ်ဆါတၢ်ပှ့ၤအလီၢ်လီၤ. ဒီးလၢစီၤမၢ်ဒကဲၤ အမဲာ်ညါန့ၣ်​ အဝဲကိးထီၣ်ဝဲလၢ “ပှၤလၢ စီၤပၤအဲၣ်ဒိး မၤလၤကပီၤအီၤန့ၣ်​ ပှၤကဘၣ်မၤအီၤ ဒ်အံၤလီၤ.” ၁၂ လၢခံ စီၤမၢ်ဒကဲၤ က့ၤကဒါက့ၤလၢ စီၤပၤအဟံၣ်​ အတြဲၤလီၤ. မ့မ့ၢ် စီၤဟၤမၣ်န့ၣ်​ ကးဘၢဃာ်အခိၣ်သၣ်ဃံ ဒီးကရီက့ၤလၢအဟံၣ်​ လၢတၢ်သူၣ်အုးသးအုးအပူၤလီၤ. ၁၃ ဒီးစီၤဟၤမၣ်​ တဲဘၣ်အမါ နီၢ်စ့ရ့ၣ်+ ဒီးအသကိးတဖၣ်​ တၢ်လၢ အကဲထီၣ်အသးဒီးအီၤ ခဲလၢာ်လီၤ. ဖဲန့ၣ်န့ၣ်​ အပှၤဟ့ၣ်ကူၣ်တၢ်တဖၣ်* ဒီးအမါ နီၢ်စ့ရ့ၣ်​ တဲအီၤလၢ “နလီၤလၢ စီၤမၢ်ဒကဲၤ အဖီလာ်လံ. အဝဲမ့မ့ၢ် ပှၤယူဒၤဖိ အကလုာ်န့ၣ်​ နမၤအီၤတနၢၤဘၣ်, နကျဲကကတၢၢ် သပှၢ်ကတၢၢ်လီၤ.”

၁၄ ဖဲအဝဲသ့ၣ်​ တဲတၢ်ဒီး စီၤဟၤမၣ်အခါ စီၤပၤအပဒိၣ်တဖၣ်​ ဟဲတုၤဝဲ ဒီးက့ၤကိးဝဲ စီၤဟၤမၣ်​ ဒ်သိး ကလဲၤအီၣ်ဝဲ တၢ်အီၣ်လၢ နီၢ်အ့ၤစတၢ် ကတဲာ်ကတီၤဝဲလီၤ.+

၇ စီၤပၤ ဒီးစီၤဟၤမၣ်န့ၣ်+ လဲၤအီၣ်သကိးတၢ်ဒီး နီၢ်ပၤမုၣ်​ အ့ၤစတၢ်လီၤ. ၂ ဒီးဖဲအဝဲသ့ၣ်​ အီစပံးထံအခါ စီၤပၤတဲဝဲ နီၢ်အ့ၤစတၢ်လၢ “နီၢ်ပၤမုၣ်​ အ့ၤစတၢ်ဧၢ, နလီကီမနုၤလဲၣ်, ယကဟ့ၣ်နၤလီၤ. နအဲၣ်ဒိးဃ့ မနုၤလဲၣ်. နမ့ၢ်ဃ့ ယဘီယမုၢ် တဝာ်ဒၣ်လဲာ် ယကဟ့ၣ်နၤလီၤ.”+ ၃ နီၢ်အ့ၤစတၢ် တဲဆၢဝဲလၢ “စီၤပၤဧၢ, နမ့ၢ်ဘၣ်သူၣ်ဘၣ်သးယၤ ဒီးမ့ၢ်ဘၣ်နသးန့ၣ်​ ယအဲၣ်ဒိးဃ့လၢ နကမၤပူၤဖျဲးယသးသမူ ဒီးယဃ့ကညးနၤလၢ နကမၤပူၤဖျဲး ယပှၤကလုာ်စ့ၢ်ကီးလီၤ.+ ၄ ယၤဒီး ယပှၤကလုာ်န့ၣ်​ ပှၤဆါလီၤကွံာ်ပှၤ+ ဒ်သိး ပှၤကမၤသံ, မၤလီၤတူာ်ကွံာ် ဒီးမၤဟးဂီၤပှၤ လၢာ်လၢာ်ဆ့ဆ့ အဂီၢ်လီၤ.+ ပှၤမ့ၢ်ဆါလီၤကွံာ်ပှၤ ဒ်ကုၢ်ပိာ်မုၣ်​ ဒီးကုၢ်ပိာ်ခွါတဖၣ်အသိးန့ၣ်​ ယတတဲတၢ်နီတမံၤဘၣ်. ဘၣ်ဆၣ်​ တၢ်ဂ့ၢ်ကီတခါအံၤ ကမၤဘၣ်ဒိ စီၤပၤအဃိ အတကြၢးကဲထီၣ်အသးဘၣ်.”

၅ စီၤပၤ အဃၤၡဝ့ရိၣ်​ တဲဆၢ နီၢ်ပၤမုၣ်​ အ့ၤစတၢ်လၢ “ပှၤလၢအမၤတၢ် ဒ်အံၤ ဘူၣ်တဂၤန့ၣ်​ မ့ၢ်မတဂၤလဲၣ်​ ဒီးအအိၣ်ဖဲလဲၣ်.” ၆ နီၢ်အ့ၤစတၢ် တဲဝဲလၢ “ဒုၣ်ဒါ လၢအသူၣ်အၢသးသီလၢ ယတဲန့ၣ်​ မ့ၢ်ဝဲ စီၤဟၤမၣ်​ တဂၤအံၤလီၤ.”

ဒီးစီၤဟၤမၣ်​ ပျံၤဝဲ စီၤပၤဒီးနီၢ်ပၤမုၣ်​ ဒိၣ်မးလီၤ. ၇ ဒီးလၢတၢ်သးဒိၣ်အပူၤ စီၤပၤ ဟးထီၣ်ဝဲဖဲန့ၣ်​ ဒီးလဲၤဝဲလၢ နီအတၤသၣ်လီၢ်ပူၤလီၤ. ဒီးစီၤဟၤမၣ်​ ဆၢထၢၣ်ဃ့ကညးဝဲ နီၢ်အ့ၤစတၢ် ဒ်သိး အသးသမူ ကပူၤဖျဲးအဂီၢ် မ့ၢ်လၢ အသ့ၣ်ညါဝဲလၢ စီၤပၤဆၢတဲာ်လီၤအသးလၢ အကစံၣ်ညီၣ်အီၤအဃိလီၤ. ၈ စီၤပၤ ဟဲက့ၤနုာ်လီၤလၢ ဟံၣ်ပူၤ ဖဲအဝဲသ့ၣ်​ အီစပံးထံအလီၢ် ဒီးထံၣ်ဘၣ်ဝဲလၢ စီၤဟၤမၣ်​ သကူးလီၤအသးလၢ လီၢ်ဆ့ၣ်နီၤလၢ နီၢ်အ့ၤစတၢ် အိၣ်ဝဲအလီၢ်လီၤ. ဒီးစီၤပၤ ကိးပသူထီၣ်ဝဲလၢ “နကဖီၣ်ဆူၣ်​ နီၢ်ပၤမုၣ်လၢ ယနီၢ်ကစၢ်အဟံၣ်ပူၤန့ၣ်.” ဖဲစီၤပၤတဲဝဲ တၢ်ကတိၤအံၤ ဝံၤအလီၢ်ခံ အဝဲသ့ၣ်​ ကးဘၢဝဲ စီၤဟၤမၣ်​ အမဲာ် တဘျီဃီလီၤ. ၉ ဒီးစီၤဃၤဘရိနၤ+ လၢအမ့ၢ် စီၤပၤ အပဒိၣ်တဂၤန့ၣ်​ တဲဝဲလၢ “စီၤဟၤမၣ်န့ၣ်​ ကတဲာ်ကတီၤစ့ၢ်ကီးဝဲ သ့ၣ်တၢၣ်တတၢၣ်လၢ ပှၤကဘျးထီၣ်​ စီၤမၢ်ဒကဲၤ+ လၢအမၤပူၤဖျဲး နသးသမူလီၤ.+ သ့ၣ်တၢၣ်တတၢၣ်အံၤ ထီဝဲ အပျၢ်* ၅၀ ဒီးအိၣ်ဆီလီၤအသးလၢ စီၤဟၤမၣ်​ အဟံၣ်ကပၤလီၤ.” ဒီးစီၤပၤတဲဝဲလၢ “ဘျးထီၣ်ကွံာ် စီၤဟၤမၣ်ဖဲန့ၣ်န့ၣ်.” ၁၀ အဃိ အဝဲသ့ၣ်​ ဘျးထီၣ်​ စီၤဟၤမၣ်လၢ သ့ၣ်တၢၣ်လၢ အဝဲကတဲာ်ကတီၤ ပာ်စၢၤဝဲလၢ စီၤမၢ်ဒကဲၤ အဂီၢ်အလိၤလီၤ. ဒီးစီၤပၤ အတၢ်သးဒိၣ်ထီၣ်န့ၣ်​ ခုၣ်လီၤဝဲလီၤ.

၈ ဖဲတၢ်တနံၤန့ၣ်​ စီၤပၤဟ့ၣ်လီၤဝဲ ပှၤယူဒၤဖိ အဒုၣ်အဒါ+ စီၤဟၤမၣ်+ အတၢ်ဖိတၢ်လံၤလၢ နီၢ်ပၤမုၣ်​ အ့ၤစတၢ်အအိၣ်လီၤ. ဒီးမ့ၢ်လၢ နီၢ်အ့ၤစတၢ် တဲဘၣ်စီၤပၤလၢ စီၤမၢ်ဒကဲၤ ဒီဘူးဒီတံၢ်ဒီးအီၤ ဒ်လဲၣ်ဒ်လဲၣ်​ အဃိ စီၤမၢ်ဒကဲၤ ဟဲဘၣ်လၢ စီၤပၤအမဲာ်ညါလီၤ.+ ၂ ဒီးစီၤပၤ ဘ့ၣ်လီၤကွံာ် အပသံးလၢ+ အဟံးန့ၢ်က့ၤဝဲလၢ စီၤဟၤမၣ်အအိၣ်​ ဒီးဟ့ၣ်လီၤက့ၤဝဲ စီၤမၢ်ဒကဲၤလီၤ. ဒီးစီၤဟၤမၣ်​ အတၢ်ဖိတၢ်လံၤခဲလၢာ်န့ၣ်​ နီၢ်အ့ၤစတၢ် အးလီၤဝဲလၢ စီၤမၢ်ဒကဲၤ အစုပူၤလီၤ.+

၃ ဒီးနီၢ်အ့ၤစတၢ် တဲကဒီးတၢ်ဒီး စီၤပၤလီၤ. ဒီးအဝဲ ထိၣ်လီၤပှီၤအသးလၢ စီၤပၤအခီၣ်ထံး ပှဲၤဒီးမဲာ်ထံမဲာ်နိ ဒီးဃ့ကညးစီၤပၤလၢ အကမၤဟးဂီၤကွံာ် ပှၤအၤကးဖိ စီၤဟၤမၣ်​ အတၢ်ကူၣ်အၢ လၢပှၤယူဒၤဖိတဖၣ်​ အဖီခိၣ်လီၤ.+ ၄ စီၤပၤ ယူာ်ဃီၤ အနီၣ်ထိးဘိထူ ဆူနီၢ်အ့ၤစတၢ်အအိၣ်အဃိ+ နီၢ်အ့ၤစတၢ် ဂဲၤဆၢထၢၣ်လၢ စီၤပၤအမဲာ်ညါလီၤ. ၅ နီၢ်အ့ၤစတၢ် တဲဝဲလၢ “မ့ၢ်ဘၣ်စီၤပၤအသး ဒီးစီၤပၤ မ့ၢ်ဘၣ်သူၣ်ဘၣ်သးယၤ ဒီးမ့ၢ်ကြၢးမ့ၢ်ဘၣ်လၢ စီၤပၤအမဲာ်ညါန့ၣ်​ မ်စီၤပၤ ထုးထီၣ်​ တၢ်သိၣ်တၢ်သီတခါ လၢကမၤဟးဂီၤက့ၤ တၢ်ကူၣ်ထီၣ်ဖးလီၤလၢ ပှၤအၢပှၤသီ စီၤဟၤမၣ်+ အလံာ်ပရၢတဖၣ်​ အပူၤတက့ၢ်. အဝဲမ့ၢ် ပှၤအၤကးဖိ+ စီၤဟးမဒၤသၤ အဖိခွါ ဒီးအဝဲကွဲး လံာ်ပရၢတဖၣ်န့ၣ်​ ဒ်သိး ကမၤဟးဂီၤ ပှၤယူဒၤဖိတဖၣ်လၢ အအိၣ်လၢ စီၤပၤ အကီၢ်ရ့ၣ်​ ကိးဘ့ၣ်ဒဲးအပူၤ အဂီၢ်လီၤ. ၆ ယပှၤကလုာ် ကထံၣ်ဘၣ်​ တၢ်နးတၢ်ဖှီၣ်​ ဒီးယဘူးယတံၢ်တဖၣ်​ ကဘၣ်တၢ်မၤဟးဂီၤကွံာ်အီၤန့ၣ်​ ယဆၢထၢၣ်ကွၢ်ဒ်န့ၣ်​ ကသ့ဒ်လဲၣ်.”

၇ အဃိ စီၤပၤအဃၤၡဝ့ရိၣ်​ တဲနီၢ်ပၤမုၣ်​ အ့ၤစတၢ် ဒီးပှၤယူဒၤဖိ စီၤမၢ်ဒကဲၤလၢ “မ့ၢ်လၢ စီၤဟၤမၣ်​ ကူၣ်အၢ ပှၤယူဒၤဖိတဖၣ်​ အဃိ ယဟ့ၣ်လီၤ အတၢ်ဖိတၢ်လံၤ ခဲလၢာ်လၢ နီၢ်အ့ၤစတၢ်+ အစုပူၤလံ ဒီးယဘျးထီၣ်​ စီၤဟၤမၣ်လၢ သ့ၣ်တၢၣ်လိၤလံ.+ ၈ မ့မ့ၢ် တၢ်သိၣ်တၢ်သီလၢ ပှၤကွဲးလီၤအီၤလၢ စီၤပၤအမံၤ ဒီးပှၤစဲပနီၣ်အီၤလၢ စီၤပၤအပသံးန့ၣ်​ ပှၤမၤဟးဂီၤကွံာ်အီၤ တန့ၢ်ဘၣ်. ဘၣ်ဆၣ်​ တၢ်လၢသုဆိကမိၣ်လၢ အကဂ့ၤ လၢပှၤယူဒၤဖိတဖၣ်​ အဂီၢ်န့ၣ်​ ခဲအံၤ သုကွဲးလီၤအီၤ လၢယမံၤ ဒီးစဲပနီၣ်အီၤလၢ ယပသံးသ့လီၤ.”+

၉ ဖဲန့ၣ်အခါ ပှၤကိးန့ၢ် စီၤပၤအနဲၣ်ရွဲၣ်တဖၣ်​ ဒီးအဘၣ်ဖဲလါစံဝၣ်* လၢအမ့ၢ် လါသၢလါတလါ, လါထီၣ်​ ၂၃ သီတသီန့ၣ်လီၤ. ဒီးတၢ်လၢစီၤမၢ်ဒကဲၤ မၤလိာ်ဝဲခဲလၢာ်န့ၣ်​ အဝဲသ့ၣ်ကွဲးလီၤဝဲဆူ ပှၤယူဒၤဖိတဖၣ်အအိၣ်​ ဒီးဆူ ပဒိၣ်ဖးဒိၣ်တဖၣ်,+ ပဒိၣ်တဖၣ်​ ဒီးကီၢ်ရ့ၣ်အပဒိၣ်တဖၣ်+ လၢအပၢ ကီၢ်ရ့ၣ်​ ၁၂၇ ဘ့ၣ်​ စးထီၣ်လၢ ကီၢ်အ့ဒံယါ တုၤလီၤလၢ ကီၢ်အဲၤသံအီးပး အအိၣ်လီၤ. အဝဲသ့ၣ်ကွဲးဝဲ ဒ်ကီၢ်ရ့ၣ်​ တဘ့ၣ်စုာ်စုာ် အတၢ်ကွဲးလံာ်ကွဲးလဲၢ် အကျိၤအကျဲ အိၣ်ဝဲအသိး ဒီးဒ်ပှၤတကလုာ်စုာ်စုာ် အနီၢ်ကစၢ်အကျိာ် အိၣ်ဝဲအသိးလီၤ. ဒီးအဝဲသ့ၣ်​ ကွဲးဝဲလၢ ပှၤယူဒၤဖိတဖၣ်အအိၣ်​ ဒ်ပှၤယူဒၤဖိ အတၢ်ကွဲးလံာ်ကွဲးလဲၢ် အကျိၤအကျဲ ဒီးအကျိာ် အိၣ်ဝဲအသိးလီၤ.

၁၀ အဝဲ ကွဲးလီၤဝဲလၢ စီၤပၤအဃၤၡဝ့ရိၣ်အမံၤ ဒီးစဲပနီၣ်ဝဲလၢ စီၤပၤအပသံးလီၤ.+ ဝံၤဒီး အဝဲမၢပှၤစိာ်တၢ်ကစီၣ်ဖိလၢ အဒိးကသ့ၣ်​ ဟးဆှၢဝဲလံာ်တဖၣ်အံၤလီၤ. ပှၤစိာ်တၢ်ကစီၣ်ဖိတဖၣ်​ ဒိးထီၣ်ဝဲ ကသ့ၣ်လၢအဃ့ၢ်ချ့ လၢပှၤဘုၣ်ဃာ်အီၤလၢ ပှၤကမၤဝဲ စီၤပၤ အတၢ်ဖံးတၢ်မၤအဂီၢ်လီၤ. ၁၁ လံာ်တဖၣ်န့ၣ်​ ပာ်ဖျါထီၣ်လၢ စီၤပၤဟ့ၣ်အခွဲးလၢ ပှၤယူဒၤဖိလၢအအိၣ်လၢ ဝ့ၢ်ကိးဖျၢၣ်ဒဲးအပူၤ ကပာ်ဖှိၣ်ထီၣ်အသးဒ်သိး ကဒီသဒၢ အသးသမူအဂီၢ်လီၤ. ဒီးပှၤတဖုဂ့ၤတဖုဂ့ၤ ဒီးကီၢ်ရ့ၣ်အသုးဖိ တဒူၣ်ဂ့ၤတဒူၣ်ဂ့ၤ လၢအဟဲဒုးပှၤယူဒၤဖိန့ၣ်​ ပှၤယူဒၤဖိ မၤသံ, မၤလီၤတူာ်ကွံာ် ဒီးမၤဟးဂီၤကွံာ် အဝဲသ့ၣ်​ ဃုာ်ဒီးပိာ်မုၣ်​ ဒီးဖိဒံဖိသၣ်သ့ဝဲ ဒီးဟံးန့ၢ်ပှၤတဖၣ်န့ၣ်​ အတၢ်ဖိတၢ်လံၤတဖၣ်​ သ့ဝဲစ့ၢ်ကီးလီၤ.+ ၁၂ ဖဲစီၤပၤအဃၤၡဝ့ရိၣ်​ အကီၢ်ရ့ၣ်ကိးဘ့ၣ်ဒဲးအပူၤန့ၣ်​ အဝဲဟ့ၣ်အခွဲးလၢ ပှၤကမၤဒ်အံၤ ဖဲလါအးဒၢ်* လၢအမ့ၢ် လါ ၁၂ လါတလါ, လါထီၣ်​ ၁၃ သီတသီ ဘၣ်ဝဲအခါန့ၣ်လီၤ.+ ၁၃ တၢ်ကွဲးအသးလၢ အအိၣ်လၢ လံာ်အံၤအပူၤန့ၣ်​ ပှၤကဘၣ်​ ပာ်ပနီၣ်အီၤဒ် တၢ်သိၣ်တၢ်သီအသိး လၢကီၢ်ရ့ၣ်​ ကိးဘ့ၣ်ဒဲးအပူၤလီၤ. ဒီးပှၤကဘၣ်​ ဘိးဘၣ်သ့ၣ်ညါအီၤလၢ ပှၤဂီၢ်မုၢ်ခဲလၢာ်အအိၣ်​ ဒ်သိး ပှၤယူဒၤဖိတဖၣ်​ ကအိၣ်ကတဲာ်ကတီၤအသး လၢကဒုး အဝဲသ့ၣ်အဒုၣ်အဒါတဖၣ်​ ဖဲတၢ်တနံၤန့ၣ်​ အဂီၢ်လီၤ.+ ၁၄ ဒ်စီၤပၤ မၤလိာ်ဝဲအသိး ပှၤစိာ်တၢ်ကစီၣ်ဖိတဖၣ်​ ဒိးထီၣ်ဝဲ ကသ့ၣ်လၢ ပှၤသူအီၤလၢ စီၤပၤအတၢ်ဖံးတၢ်မၤ အဂီၢ်ဒီး ဟးထီၣ်ဝဲတဘျီဃီ ဒီးလဲၤတၢ်ချ့ချ့လီၤ. ဒီးလၢနီ* ၡူၡၣ်+ အပူၤန့ၣ်​ ပှၤပာ်လီၤဝဲ တၢ်သိၣ်တၢ်သီတခါအံၤ စ့ၢ်ကီးလီၤ.

၁၅ စီၤမၢ်ဒကဲၤ ဟးထီၣ်လၢ စီၤပၤအမဲာ်ညါ ဒီးကူသိးဝဲဒီး တၢ်ကူတၢ်ကၤလၢ အလွဲၢ်လါအဲး ဒီးအလွဲၢ်ဝါ ဒီးတၢ်ကံးညာ်လၢ အညၣ်ဂ့ၤလၢ ပှၤတ့အီၤဒီး သိဆူၣ်လၢ အလွဲၢ်လုး ဒီးဖျီၣ်ဝဲ ခိၣ်သလုးထူ လၢအဖျါဃံဖျါလၤလီၤ.+ ပှၤလၢ အအိၣ်လၢ ဝ့ၢ်ၡူၡၣ်အပူၤန့ၣ်​ ကိးပသူထီၣ်ဝဲလၢ တၢ်သးခုအပူၤလီၤ. ၁၆ မ့ၢ်လၢ ပှၤယူဒၤဖိတဖၣ်​ အတၢ်မုၢ်လၢ် ကပီၤထီၣ်အဃိ အဝဲသ့ၣ်​ သးခုဝဲဒိၣ်မး ဒီးပှၤပာ်ကဲ အဝဲသ့ၣ်လီၤ. ၁၇ ဒီးလၢကယဲၢ်ကီၢ်ရ့ၣ်​ ဒီးဝ့ၢ်တဖၣ်လၢ စီၤပၤအကလုၢ် ဒီးအတၢ်သိၣ်တၢ်သီ လဲၤတုၤဝဲခဲလၢာ်အပူၤန့ၣ်​ ပှၤယူဒၤဖိတဖၣ်​ သးခုဒိၣ်မး ဒီးအဝဲသ့ၣ်​ မၤတၢ်သူၣ်ဖှံသးညီ ဒီးတၢ်အီၣ်တၢ်အီ အမူးတဖၣ်လီၤ. ဒီးလၢပှၤကလုာ်တဖၣ်အကျါ ပှၤအါဂၤ ပျံၤဝဲ ပှၤယူဒၤဖိတဖၣ်အဃိ+ အဝဲသ့ၣ်​ တဲလီၤအသး လၢအမ့ၢ် ပှၤယူဒၤဖိလီၤ.*

၉ ပှၤယူဒၤဖိ အဒုၣ်အဒါတဖၣ်​ မုၢ်လၢ်ဝဲလၢ ဖဲလါအးဒၢ်*+ လၢအမ့ၢ် လါ ၁၂ လါတလါ, လါထီၣ်​ ၁၃ သီန့ၣ်​ အဝဲသ့ၣ်ကမၤဟးဂီၤ ပှၤယူဒၤဖိတဖၣ်​ ဒ်စီၤပၤ မၤလိာ်ဝဲ ဒီးဟ့ၣ်လီၤဝဲ တၢ်သိၣ်တၢ်သီအသိးလီၤ.+ ဘၣ်ဆၣ်​ ဖဲမုၢ်နံၤဝဲန့ၣ်​ ဟဲတုၤအခါ တၢ်တကဲထီၣ်အသးဒ်န့ၣ်ဘၣ်. လၢတၢ်န့ၣ်အလီၢ် ပှၤယူဒၤဖိတဖၣ်​ မၤနၢၤကွံာ်ဝဲ ပှၤလၢ အသးဟ့အဝဲသ့ၣ်လီၤ.+ ၂ ပှၤယူဒၤဖိ လၢအအိၣ်လၢ စီၤပၤအဃၤၡဝ့ရိၣ်+ အကီၢ်ရ့ၣ်တဖၣ်အပူၤန့ၣ်​ အဝဲသ့ၣ်​ ပာ်ဖှိၣ်ထီၣ်အသး လၢအနီၢ်ကစၢ် အဝ့ၢ်ပူၤ ဒ်သိးကဒုးဆၢကဒါက့ၤ ပှၤလၢကမၤအၢမၤသီ အဝဲသ့ၣ်​ အဂီၢ်လီၤ. ဒီးမ့ၢ်လၢ ပှၤဂီၢ်မုၢ်ခဲလၢာ် ပျံၤပှၤယူဒၤဖိတဖၣ်အဃိ အဝဲသ့ၣ်တြီဆၢ ပှၤယူဒၤဖိ တန့ၢ်နီတဂၤဘၣ်.+ ၃ ဒီးကီၢ်ရ့ၣ်အပဒိၣ်တဖၣ်, ပဒိၣ်ဖးဒိၣ်တဖၣ်,+ ပဒိၣ်တဖၣ်​ ဒီးပှၤလၢ အမၤစီၤပၤ အတၢ်မၤတဖၣ်န့ၣ်​ မၤစၢၤဝဲ ပှၤယူဒၤဖိတဖၣ်​ မ့ၢ်လၢ အဝဲသ့ၣ်ပျံၤဝဲ စီၤမၢ်ဒကဲၤ အဃိလီၤ. ၄ စီၤမၢ်ဒကဲၤ အိၣ်ဒီး တၢ်စိတၢ်ကမီၤ+ လၢစီၤပၤအနီပူၤ ဒီးအစိကမီၤ ဒိၣ်ထီၣ်ဝဲကွ့ၢ်ကွ့ၢ် အဃိ အမံၤဟူထီၣ်သါလီၤဝဲလၢ ကီၢ်ရ့ၣ်ကိးဘ့ၣ်ဒဲးအပူၤလီၤ.

၅ ပှၤယူဒၤဖိတဖၣ်​ မၤဝဲ ဒုၣ်ဒါလၢ အသးဟ့ အဝဲသ့ၣ်​ ဒ်အအဲၣ်ဒိးမၤဝဲအသိး ခီဖျိ ကျီဝဲလၢနး ဒီးမၤသံအဝဲသ့ၣ်​ ဒီးမၤဟးဂီၤကွံာ် အဝဲသ့ၣ်ခဲလၢာ်လီၤ.+ ၆ လၢနီ* ၡူၡၣ်အပူၤန့ၣ်+ ပှၤယူဒၤဖိတဖၣ်​ မၤသံဒီးမၤဟးဂီၤဝဲ ပှၤပိာ်ခွါအဂၤ ၅၀၀ လီၤ. ၇ ဒီးအဝဲသ့ၣ်​ မၤသံစ့ၢ်ကီး စီၤပၡၤနဒၤသၤ, စီၤဒၤလဖိၣ်, စီၤအၤစပၤသၤ, ၈ စီၤပိၤရသး, စီၤအဒၤလယၤ, စီၤအရံၤဒသၤ, ၉ စီၤပၢ်မၤၡတၤ, စီၤအရံစဲၤ, စီၤအရံဒဲၤ ဒီးစီၤဝၤယစၤသၤ ၁၀ လၢအမ့ၢ် စီၤဟၤမၣ်​ အဖိခွါ အဂၤတဆံလီၤ. စီၤဟးမဒၤသၤ အဖိခွါ စီၤဟၤမၣ်န့ၣ်​ မ့ၢ်ဝဲ ပှၤယူဒၤဖိ အဒုၣ်အဒါလီၤ.+ ဖဲပှၤယူဒၤဖိမၤသံ ပှၤတဖၣ်အံၤဝံၤအခါ ပှၤယူဒၤဖိတဟံးန့ၢ် အဝဲသ့ၣ်​ အတၢ်စုလီၢ်ခီၣ်ခိၣ်​ နီတမံၤဘၣ်.+

၁၁ ဖဲတၢ်တနံၤန့ၣ်​ ပှၤတဲဘၣ်​ စီၤပၤလၢ ပှၤလၢအဘၣ်တၢ်မၤသံအီၤ လၢနီ* ၡူၡၣ်အပူၤန့ၣ်​ အိၣ်ပှဲၤဂၤလဲၣ်လီၤ.

၁၂ ဒီးစီၤပၤတဲဝဲ နီၢ်ပၤမုၣ်​ အ့ၤစတၢ်လၢ “လၢနီ* ၡူၡၣ်န့ၣ်​ ပှၤယူဒၤဖိတဖၣ်​ မၤသံဒီးမၤဟးဂီၤဝဲ ပှၤပိာ်ခွါ အဂၤ ၅၀၀ ဒီးစီၤဟၤမၣ်​ အဖိခွါတဖၣ်လံ. အဃိ မ့မ့ၢ်လၢ စီၤပၤအကီၢ်ရ့ၣ်လၢ+ အဂၤတဖၣ်န့ၣ်​ အဝဲသ့ၣ်​ မၤဝဲအါန့ၢ်အန့ၣ်​ လံဧါသၢၤ. ခဲအံၤန့ၣ်​ နအဲၣ်ဒိးဃ့ဒံး မနုၤလဲၣ်, ယကဟ့ၣ်နၤလီၤ. တၢ်လၢနဃ့န့ၣ်​ ယကဟ့ၣ်နၤလီၤ.” ၁၃ နီၢ်အ့ၤစတၢ် တဲဆၢဝဲလၢ “မ့ၢ်ဘၣ်စီၤပၤအသးန့ၣ်+ ခဲမုၢ်ဆ့ၣ်စ့ၢ်ကီး ပျဲပှၤယူဒၤဖိတဖၣ်လၢ အအိၣ်လၢ ဝ့ၢ်ၡူၡၣ်အပူၤ ကမၤဝဲဒ် အမၤဝဲလၢ တနံၤအံၤအသိး တက့ၢ်.+ ဒီးပျဲလၢ ပှၤကဘျးထီၣ်​ စီၤဟၤမၣ်အဖိခွါ အဂၤတဆံန့ၣ်​ လၢသ့ၣ်တၢၣ်လိၤတက့ၢ်.”+ ၁၄ အဃိ စီၤပၤ ဟ့ၣ်လီၤတၢ်ကလုၢ်လၢ ပှၤကမၤဝဲ ဒ်န့ၣ်လီၤ. ဒီးလၢဝ့ၢ်ၡူၡၣ်အပူၤန့ၣ်​ ပှၤပာ်လီၤဝဲ တၢ်သိၣ်တၢ်သီအံၤ ဒီးပှၤဘျးထီၣ်​ စီၤဟၤမၣ်အဖိခွါ အဂၤတဆံလီၤ.

၁၅ ဖဲလါအးဒၢ် ၁၄ သီတသီန့ၣ်+ ပှၤယူဒၤဖိတဖၣ်လၢ အအိၣ်လၢ ဝ့ၢ်ၡူၡၣ်အပူၤ ပာ်ဖှိၣ်ထီၣ်ကဒီးအသး ဒီးမၤသံဝဲ ပှၤပိာ်ခွါ အဂၤ ၃၀၀ လၢဝ့ၢ်ၡူၡၣ်အပူၤလီၤ. ဘၣ်ဆၣ်​ အဝဲသ့ၣ်​ တဟံးန့ၢ်ပှၤတဖၣ်န့ၣ်​ အတၢ်စုလီၢ်ခီၣ်ခိၣ်​ နီတမံၤဘၣ်.

၁၆ ပှၤယူဒၤဖိအဂၤ လၢအအိၣ်လၢ စီၤပၤအကီၢ်ရ့ၣ်တဖၣ်အပူၤစ့ၢ်ကီး ပာ်ဖှိၣ်ထီၣ်အသး ဒ်သိးကဒီသဒၢလီၤအသး အဂီၢ်လီၤ.+ အဝဲသ့ၣ်​ မၤနၢၤဝဲ အဒုၣ်အဒါတဖၣ်+ ဒီးမၤသံဝဲ ပှၤအဂၤ ၇၅,၀၀၀ လၢအမ့ၢ် ပှၤလၢအသးဟ့ အဝဲသ့ၣ်လီၤ. ဘၣ်ဆၣ်​ အဝဲသ့ၣ်​ တဟံးန့ၢ် ပှၤတဖၣ်န့ၣ်​ အတၢ်စုလီၢ်ခီၣ်ခိၣ်​ နီတမံၤဘၣ်. ၁၇ အဝဲသ့ၣ်​ မၤဝဲဒ်န့ၣ်ဖဲ လါအးဒၢ် ၁၃ သီတသီလီၤ. ဒီးဖဲ ၁၄ သီတသီန့ၣ်​ အဝဲသ့ၣ်​ အိၣ်ပတုာ်ဝဲ ဒီးအဝဲသ့ၣ်​ ပာ်ပနီၣ်ဝဲလၢ တၢ်သူၣ်ဖှံသးညီအမုၢ်နံၤလၢ ပှၤကအီၣ်သကိး အီသကိးတၢ် အဂီၢ်လီၤ.

၁၈ မ့မ့ၢ် ပှၤယူဒၤဖိလၢ အအိၣ်လၢ ဝ့ၢ်ၡူၡၣ်အပူၤန့ၣ်​ အဝဲသ့ၣ်​ ပာ်ဖှိၣ်ထီၣ်အသး လၢကဒီသဒၢလီၤအသး ဖဲ ၁၃ သီတသီ+ ဒီး ၁၄ သီတသီလီၤ.+ ဒီးဖဲ ၁၅ သီတသီန့ၣ်​ အဝဲသ့ၣ်​ အိၣ်ပတုာ်ဝဲ ဒီးအဝဲသ့ၣ်​ ပာ်ပနီၣ်ဝဲလၢ တၢ်သူၣ်ဖှံသးညီအမုၢ်နံၤလၢ ပှၤကအီၣ်သကိး အီသကိးတၢ်လီၤ. ၁၉ ဘၣ်ဆၣ်​ ပှၤယူဒၤဖိလၢ အအိၣ်လၢ ဝ့ၢ်အဂၤတဖၣ်​ လၢအတမ့ၢ် ဝ့ၢ်ၡူၡၣ်ဘၣ်န့ၣ်​ ပာ်ပနီၣ်ဝဲ လါအးဒၢ် ၁၄ သီတသီန့ၣ်​ ဒ်မုၢ်နံၤလၢ အဝဲသ့ၣ်​ ဘၣ်မၤတၢ်သူၣ်ဖှံသးညီ ဒီးတၢ်အီၣ်တၢ်အီ အမူးတဖၣ်+ ဒီးမ့ၢ်ဝဲ တၢ်ဆၢကတီၢ်လၢ အဝဲသ့ၣ်​ ကဆှၢဒုးအီၣ်လိာ်အသး တၢ်အီၣ်တၢ်အီလီၤ.+

၂၀ စီၤမၢ်ဒကဲၤ+ ကွဲးနီၣ်ဝဲ တၢ်မၤအသးသ့ၣ်တဖၣ်အံၤ ဒီးဆှၢလီၤဝဲ လံာ်ပရၢတဖၣ်ဆူ ပှၤယူဒၤဖိတဖၣ်​ လၢအအိၣ်လၢ စီၤပၤအဃၤၡဝ့ရိၣ်​ အကီၢ်ရ့ၣ်ခဲလၢာ်အပူၤ လၢတၢ်လီၢ်အဘူးမ့ၢ်ဂ့ၤ အယံၤမ့ၢ်ဂ့ၤ အအိၣ်လီၤ. ၂၁ လၢလံာ်ပရၢတဖၣ်အပူၤန့ၣ်​ စီၤမၢ်ဒကဲၤ မၤလိာ် အဝဲသ့ၣ်လၢ တနံၣ်ဘၣ်တနံၣ်န့ၣ်​ အဝဲသ့ၣ်​ ကဘၣ်မၤတၢ်သ့ၣ်နီၣ်​ ဖဲလါအးဒၢ် ၁၄ သီတသီ ဒီး ၁၅ သီတသီ, ၂၂ မ့ၢ်လၢ ဖဲမုၢ်နံၤခံသီအံၤ ပှၤယူဒၤဖိတဖၣ်​ ပူၤဖျဲးထီၣ်ဝဲလၢ အဒုၣ်အဒါတဖၣ်​ အစုပူၤ ဒီးဖဲတၢ်တလါန့ၣ်​ အဝဲသ့ၣ်​ အတၢ်သးအုး ကဲထီၣ်က့ၤ တၢ်သးခု ဒီးအဝဲသ့ၣ်​ အတၢ်ဟီၣ်တၢ်ယၢၤန့ၣ်+ ကဲထီၣ်က့ၤလၢ တၢ်မၤဘူၣ်မၤပွဲ အဃိလီၤ. ဖဲမုၢ်နံၤခံသီအံၤ အဝဲသ့ၣ်​ ဘၣ်မၤတၢ်သူၣ်ဖှံသးညီ လၢအပၣ်ဃုာ်ဒီး တၢ်အီၣ်တၢ်အီ အမူးတဖၣ်​ ဒီးမ့ၢ်ဝဲ တၢ်ဆၢကတီၢ်လၢ အဝဲသ့ၣ်​ ကဆှၢဒုးအီၣ်လိာ်သး တၢ်အီၣ်တၢ်အီ ဒီးဟ့ၣ်ဝဲ ပှၤဖှီၣ်ဖိယာ်ဖိ တၢ်ဟ့ၣ်တဖၣ်လီၤ.

၂၃ ဒီးပှၤယူဒၤဖိတဖၣ်​ တူၢ်လိာ်ဝဲလၢ ကမၤဝဲ မူးပွဲလၢ အဝဲသ့ၣ်မၤဝဲအံၤ ကိးနံၣ်ဒဲး ဒ်စီၤမၢ်ဒကဲၤ ကွဲးန့ၢ်အဝဲသ့ၣ်လံာ် အသိးလီၤ. ၂၄ ပှၤအၤကးဖိ+ စီၤဟးမဒၤသၤအဖိခွါ စီၤဟၤမၣ်+ လၢအမ့ၢ် ပှၤယူဒၤဖိခဲလၢာ် အဒုၣ်အဒါန့ၣ်​ ကူၣ်သံဝဲ ပှၤယူဒၤဖိတဖၣ်+ ဒီးကွံာ်လီၤပူရး+ လၢအမ့ၢ်တၢ်ဖး ဒ်သိး ကမၤပျံၤမၤဖုး ဒီးမၤဟးဂီၤ အဝဲသ့ၣ်​ အဂီၢ်လီၤ. ၂၅ ဘၣ်ဆၣ်​ ဖဲနီၢ်အ့ၤစတၢ် လဲၤလၢစီၤပၤအအိၣ်အခါ စီၤပၤဟ့ၣ်လီၤ တၢ်ကလုၢ်လၢ ပှၤကကွဲးဝဲလၢ+ “မ်စီၤဟၤမၣ်​ အတၢ်ကူၣ်အၢကူၣ်သီ ပှၤယူဒၤဖိန့ၣ်+ က့ၤလီၤဘၣ်လၢ အခိၣ်လိၤတက့ၢ်.” အဃိ ပှၤဘျးထီၣ်စီၤဟၤမၣ်​ ဒီးအဖိခွါတဖၣ်​ လၢသ့ၣ်တၢၣ်လိၤလီၤ.+ ၂၆ ဒီးအဝဲသ့ၣ်​ ကိးဝဲ မူးပွဲအံၤအမံၤလၢ ပူရံၣ်​ ခီဖျိလၢ ပူရး*+ အဃိလီၤ. ဒီးခီဖျိလၢ စီၤမၢ်ဒကဲၤ အလံာ်ပရၢ ဒီးတၢ်လၢ ပှၤယူဒၤဖိတဖၣ်​ ထံၣ်ဘၣ်ဝဲ ဒီးတၢ်လၢအကဲထီၣ်အသးဒီး အဝဲသ့ၣ်အဃိ ၂၇ ပှၤယူဒၤဖိတဖၣ်​ ဆၢတဲာ်လီၤအသးလၢ အဝဲသ့ၣ်​ ဒီးအစၢၤအသွဲၣ်တဖၣ်​ ဒီးပှၤလၢ အနုာ်လီၤပၣ်ဃုာ်လၢ အဝဲသ့ၣ်အကျါန့ၣ်+ ကမၤဝဲမူးပွဲအံၤ ခံသီလီၤ. ဒီးအဝဲသ့ၣ်​ ဆၢတဲာ်ဝဲလၢ တနံၣ်ဘၣ်တနံၣ်န့ၣ်​ ဖဲတၢ်ဆၢကတီၢ် အဝဲန့ၣ်ဟဲတုၤအခါ အဝဲသ့ၣ်ကမၤဝဲဒ် တၢ်ကွဲးအသး ဘၣ်ဃးဒီးမူးပွဲအံၤ အိၣ်ဝဲအသိး လီၤတံၢ်လီၤဆဲးလီၤ. ၂၈ မူးပွဲတခါအံၤ ပှၤကိးဒူၣ်ဒဲး ကဘၣ်သ့ၣ်နီၣ်​ ဒီးမၤအီၤတစိၤဘၣ်တစိၤ လၢကီၢ်ရ့ၣ်ကိးဘ့ၣ်ဒဲး ဒီးလၢဝ့ၢ်ကိးဖျၢၣ်ဒဲး အပူၤလီၤ. ပှၤယူဒၤဖိတဖၣ်​ တဘၣ်ပတုာ်မၤ ပူရံၣ်အမူး ဒီးအဝဲသ့ၣ်​ အစၢၤအသွဲၣ်တဖၣ်န့ၣ်​ ကဘၣ်ဆဲးမၤဝဲ တၢ်သ့ၣ်နီၣ်အံၤ ထီဘိလီၤ.

၂၉ ဒီးစီၤအဘံဃယ့းလး အဖိမုၣ်​ နီၢ်အ့ၤစတၢ် ဒီးပှၤယူဒၤဖိ စီၤမၢ်ဒကဲၤန့ၣ်​ သူဝဲအစိကမီၤ ဒီးကွဲးလံာ်ပရၢ ခံဘ့ၣ်တဘ့ၣ်လၢ အဘၣ်ဃးဒီး ပူရံၣ်အမူး ဒ်သိး ကပာ်ဂၢၢ်ပာ်ကျၢၤ မူးတခါအံၤအဂီၢ်လီၤ. ၃၀ ပှၤဆှၢလီၤ လံာ်ပရၢတဖၣ်လၢ ပှၤယူဒၤဖိခဲလၢာ် လၢအအိၣ်လၢ ကီၢ်ရ့ၣ်​ ၁၂၇ ဘ့ၣ်လၢ+ စီၤအဃၤၡဝ့ရိၣ်​ အဘီမုၢ်အပူၤလီၤ.+ လံာ်ပရၢတဖၣ်အံၤ အိၣ်ဒီးတၢ်ကတိၤလၢအမုာ် ဒီးတၢ်ကတိၤလၢ ပှၤနာ်န့ၢ်အီၤသ့လီၤ. ၃၁ ဒီးလံာ်ပရၢတဖၣ်အံၤ မ့ၢ်ဒ်သိး ကပာ်ဂၢၢ်ပာ်ကျၢၤဝဲလၢ ဖဲတၢ်ဆၢကတီၢ် ဘၣ်အခါ ပှၤယူဒၤဖိ ဒီးအဝဲသ့ၣ်​ အစၢၤအသွဲၣ်တဖၣ်​ ကဘၣ်မၤ ပူရံၣ်အမူး ဃုာ်ဒီးတၢ်ဒုၣ်တၢ်အီၣ်+ ဒီးတၢ်ဃ့ကညးတၢ်+ ဒ်စီၤမၢ်ဒကဲၤ ဒီးနီၢ်ပၤမုၣ်အ့ၤစတၢ် မၤလိာ်ဝဲအသိး+ ဒီးဒ်အဝဲသ့ၣ်​ ဆၢတဲာ်လီၤ အနီၢ်ကစၢ်အသး အသိးလီၤ.+ ၃၂ ဒီးနီၢ်အ့ၤစတၢ် အတၢ်မၤလိာ်န့ၣ်​ ပာ်ဂၢၢ်ပာ်ကျၢၤဝဲ တၢ်ဂ့ၢ်တဖၣ်အံၤလၢ အဘၣ်ဃးဒီး ပူရံၣ်အမူးအံၤ+ ဒီးဘၣ်တၢ်ကွဲးနီၣ်အီၤ လၢလံာ်ပူၤလီၤ.

၁၀ ပှၤလၢအအိၣ်လၢ ခိသူခိၣ်မ့ၢ်ဂ့ၤ ပှၤလၢအအိၣ်လၢ ကီးတဖၣ်လၢ ပီၣ်လဲၣ်ပူၤမ့ၢ်ဂ့ၤ စီၤပၤ အဃၤၡဝ့ရိၣ်​ ဒုးကဲကုၢ် အဝဲသ့ၣ်လီၤ.

၂ ဒီးအဝဲ ဒိၣ်စိဒိၣ်ကမီၤထဲလဲၣ်​ ဒီးအမၤတၢ် ကဲထီၣ်လိၣ်ထီၣ်ထဲလဲၣ်​ ဒီးစီၤပၤ ပာ်ထီၣ်ထီဝဲ+ စီၤမၢ်ဒကဲၤ+ ဒ်လဲၣ်ဒ်လဲၣ်​ အဂ့ၢ်န့ၣ်​ ပှၤကွဲးနီၣ်အီၤလၢ မၤဒဲဒီးဖၢၡၢၣ်+ အစီၤပၤ အတၢ်စံၣ်စိၤတဲစိၤ အလံာ်ပူၤလီၤ.+ ၃ စီၤပၤအဃၤၡဝ့ရိၣ်​ မ့ၢ်ပှၤအဒိၣ်ကတၢၢ် ဒီးပှၤယူဒၤဖိ စီၤမၢ်ဒကဲၤ မ့ၢ်ပှၤအဒိၣ်ကတၢၢ် ခံဂၤတဂၤလီၤ. စီၤမၢ်ဒကဲၤ မ့ၢ်ပှၤဖးဒိၣ်တဂၤ လၢပှၤယူဒၤဖိအကျါ ဒီးပှၤယူဒၤဖိအါတက့ၢ်န့ၣ်​ ပာ်ကဲအီၤလီၤ. အဝဲအိၣ်မူကဲဘျုးလၢ ပှၤယူဒၤဖိတဖၣ်အဂီၢ်ထီဘိ ဒီးမၤစၢၤဝဲဒ်သိး အဝဲသ့ၣ်​ အစၢၤအသွဲၣ်ခဲလၢာ် ကအိၣ်ဘၣ်ဝဲ မုာ်မုာ်ခုၣ်ခုၣ်အဂီၢ်လီၤ.