ယိၤအ့လး
၁ ယဟိဝၤယွၤ တဲဘၣ် စီၤပသူၤအ့လးအဖိခွါ စီၤယိၤအ့လးလၢ*
၂ “ပှၤသူၣ်က့သးပှၢ်သ့ၣ်ဧၢ, ဒိကနၣ်တက့ၢ်.
ပှၤထံဖိကီၢ်ဖိ ခဲလၢာ်သ့ၣ်ဧၢ, ဒိကနၣ် ထံထံတက့ၢ်.
ဖဲသုစိၤ ဒီးသုမိၢ်ပၢ်ဖံဖု လၢပျၢၤတဖၣ်အစိၤန့ၣ်
တၢ်ကဲထီၣ်အသးဒ်အံၤ တဘျီဘျီဧါ.+
၃ တဲဘၣ်နဖိခွါတဖၣ် လၢတၢ်ဂ့ၢ်အံၤ,
ဒီးမ်အဝဲသ့ၣ် တဲဘၣ်က့ၤ အဖိခွါတဖၣ်
ဒီးမ်အဖိခွါတဖၣ် တဲဘၣ်က့ၤ အစၢၤအသွဲၣ် လၢခံတဖၣ်တက့ၢ်.
၄ တၢ်လၢ ဒွဲၣ်လၢအအီၣ်ကွံာ်တၢ်တဖၣ် ပာ်တ့ၢ်ဝဲန့ၣ် ဒွဲၣ်လၢ အဒံးအိၣ်တဖၣ် အီၣ်ဝဲလီၤ.+
ဒီးတၢ်လၢ ဒွဲၣ်လၢအဒံးအိၣ်တဖၣ် ပာ်တ့ၢ်ဝဲန့ၣ် ဒွဲၣ်လၢ အဒံးတအိၣ်ဘၣ်တဖၣ်အီၣ်ဝဲ
ဒီးတၢ်လၢ ဒွဲၣ်လၢအဒံးတအိၣ်ဘၣ်တဖၣ် ပာ်တ့ၢ်ဝဲန့ၣ် ဒွဲၣ်အဂၤတဖၣ် အီၣ်ဝဲလီၤ.+
၅ ပှၤမူၤသံးဖိသ့ၣ်ဧၢ,+ ပၢၢ်ထီၣ် ဒီးဟီၣ်တက့ၢ်.
ပှၤအီစပံးထံဖိ ခဲလၢာ်သ့ၣ်ဧၢ, စပံးထံ အသီလၢသုဂီၢ်န့ၣ် တအိၣ်တ့ၢ်လၢၤဘၣ်အဃိ
သူၣ်အုးသးအုးတက့ၢ်.+
၆ ဒွဲၣ်တဖုလၢ အလီၤဂာ်ဒ် ပှၤတကလုာ်အသိးန့ၣ် ဟဲနုာ်လီၤလၢ ယကီၢ်ပူၤလံ. အဝဲသ့ၣ် အဂံၢ်ဆူၣ်ဘါဆူၣ် ဒီးအနီၣ်ဂံၢ်အါဝဲတုၤလၢပှၤဂံၢ်အီၤ တဘၣ်ဘၣ်.+
အမဲလီၤဂာ်ဒ် ခ့ယုၢ်အမဲအသိး+ ဒီးအခၣ်ဃံတဖၣ် လီၤဂာ်ဒ် ခ့ယုၢ်အခၣ်ဃံ အသိးလီၤ.
၇ ဒွဲၣ်တဖၣ်အံၤ မၤဟးဂီၤ ယစပံးမုၢ် ဒီးယချၢၣ်ဒၢထူၣ်န့ၣ် အိၣ်တ့ၢ်က့ၤထဲ အခိၣ်ဆၢၣ်
ဒီးကုၣ်ကွံာ်ဝဲ အဘ့ၣ်ခဲလၢာ်ခဲဆ့ ဒီးတၢၤကွံာ်ဝဲလီၤ.
သ့ၣ်ဒ့တဖၣ်န့ၣ် အဘ့ၣ်မး တအိၣ်တ့ၢ်လၢၤဘၣ်.
၈ သူၣ်အုးသးအုး ဒ်မုၣ်ကနီၤလၢ အသူၣ်အုးသးအုး ဒီးအကူထီၣ်သိးထီၣ် ထၢၣ်တၢ်ကံးညာ်
လၢအဘၣ်တူၢ်ၡူကွံာ် အတလးမူးပိာ်ခွါ အဃိန့ၣ်တက့ၢ်.
၉ ပှၤတဟဲစိာ် တၢ်လုၢ်ဘု+ ဒီးတၢ်လုၢ်စပံးထံ+ လၢယဟိဝၤယွၤ အဟံၣ်လၢၤဘၣ်.
ပှၤလုၢ်တၢ်ဒိၣ်လၢအမ့ၢ် ပှၤလၢအမၤယဟိဝၤယွၤ အတၢ်တဖၣ်န့ၣ် သူၣ်အုးသးအုးဝဲလီၤ.
၁၀ တၢ်မုၢ်တၢ်ဘိလၢ ဟီၣ်ခိၣ်လိၤန့ၣ် ဟးဂီၤကွံာ် ဒီးတၢ်တမဲထီၣ်လၢ ဟီၣ်ခိၣ်လိၤ နီတမံၤလၢၤဘၣ်.+
ဘုတဖၣ်, စပံးထံအသီတဖၣ် ဒီးသိတအိၣ်လၢၤဘၣ်.+
၁၁ မ့ၢ်လၢ စံာ်ပျီလၢ ပှၤကဘၣ်ကူးအီၤတဖၣ် ဟးဂီၤကွံာ်
ဒီးဘုကၠူၣ်ဒီးဘုမုယီၤတဖၣ် တအိၣ်ဘၣ်အဃိ
ပှၤမၤစံာ်ဖိတဖၣ် သူၣ်အုးသးအုး ဒီးပှၤသူၣ်စပံးမုၢ်တဖၣ် သူၣ်အုး သးအုးဝဲလီၤ.
၁၂ စပံးမုၢ် ဃ့ထီကွံာ်ဝဲ
ချၢၣ်ဒၢအထူၣ် လီၤညွံးလီၤဘဲ
ဒီးသလဲအထူၣ်, သ့ၣ်စူၣ်ပလိၣ် ဒီးဖီသၣ်အထူၣ်,
သ့ၣ်ထူၣ်ခဲလၢာ်လၢ အအိၣ်လၢ တၢ်ပျီပူၤန့ၣ် ဃ့ထီကွံာ်ဝဲလီၤ.+
ဒီးပှၤဂီၢ်မုၢ်တဖၣ် အတၢ်သးခု လီၤမၢ်ကွံာ်ဝဲလံ.
၁၃ မ့ၢ်လၢ ပှၤတဟဲစိာ် တၢ်လုၢ်ဘု+ ဒီးတၢ်လုၢ်စပံးထံ+ လၢသုကစၢ်ယွၤအဟံၣ် နီတဂၤလၢၤဘၣ်အဃိ
ပှၤလုၢ်တၢ်ဒိၣ်သ့ၣ်ဧၢ, ကူထီၣ်သိးထီၣ် ထၢၣ်တၢ်ကံးညာ် ဒီးဟီၣ်တက့ၢ်.
ပှၤလၢအမၤတၢ်လၢ တၢ်လုၢ်လီၢ်သ့ၣ်ဧၢ, ဟီၣ်တက့ၢ်.+
ပှၤလၢအမၤ ယကစၢ်ယွၤအတၢ်သ့ၣ်ဧၢ, ဟဲလၢတၢ်လုၢ်ဟံၣ် ဒီးသိး ထၢၣ်တၢ်ကံးညာ် ဒီတနၤညါတက့ၢ်.
၁၄ ဘိးဘၣ်သ့ၣ်ညါလီၤ တၢ်ဒုၣ်တၢ်အီၣ်အဂ့ၢ် ဒီးတၢ်အိၣ်ဖှိၣ်လီၤဆီအဂ့ၢ်တက့ၢ်.+
ပာ်ဖှိၣ်ထီၣ် ပှၤသူၣ်က့သးပှၢ်တဖၣ် ဒီးပှၤထံဖိကီၢ်ဖိခဲလၢာ်
လၢသုကစၢ် ယဟိဝၤယွၤအဟံၣ်+ ဒီးဃ့ကညး ယဟိဝၤယွၤ လၢကမၤစၢၤသုအဂီၢ် တက့ၢ်.
၁၅ တၢ်တနံၤန့ၣ် ကလီၤပျံၤ လီၤဖုးထဲလဲၣ်.
ယဟိဝၤယွၤ အမုၢ်နံၤန့ၣ် ဘူးထီၣ်လံ.+
ဒီးတၢ်မၤဟးဂီၤတၢ်လၢ အဟဲလၢ သ့တၢ်လၢာ်ကစၢ်အအိၣ်န့ၣ် ကဟဲတုၤလီၤ.
၁၆ တၢ်သူၣ်ခုသးခု ဒီးတၢ်သူၣ်ဖှံသးညီ လၢပကစၢ်ယွၤအဟံၣ်န့ၣ် တအိၣ်လၢၤဘၣ်.
ဒီးတၢ်အီၣ်တဖၣ်စ့ၢ်ကီး တအိၣ်လၢၤဘၣ်.
၁၇ တၢ်ချံတဖၣ် သွံးလီၤကွံာ်လၢ နီၣ်တရီာ်တၢ်တဖၣ် အဖီလာ်လီၤ.
တၢ်ပာ်ဖှိၣ်အလီၢ်တဖၣ် အိၣ်ခီလီလီလီၤ.
ဒီးမ့ၢ်လၢ ဘုတဖၣ်အိၣ်ထဲအသိၣ်အဃိ ဘုဖီတဖၣ် ဘၣ်တၢ်မၤလီၤပှီၢ်အီၤလံ.
၁၈ ဆၣ်ဖိကီၢ်ဖိအဒၢတဖၣ်ဒၣ်လဲာ် ကအုကစွါလီၤ.
ကျီၢ်တဖၣ် အသူၣ်အုးသးအုး ဒီးဟးဝ့ၤဝီၤ, မ့ၢ်လၢတၢ်အီၣ်ဆၣ်အလီၢ် တအိၣ်ဘၣ်အဃိလီၤ.
ဒီးသိတဖၣ်စ့ၢ်ကီး တူၢ်ဘၣ်တၢ်လီၤ.
၁၉ အိ ယဟိဝၤယွၤဧၢ, ယကကိးထီၣ်နၤ,+
မ့ၢ်လၢ မ့ၣ်အူအီၣ်ကွံာ် တၢ်အီၣ်ဆၣ်အလီၢ် လၢပှၢ်မုၢ်ကနၢအပူၤ
ဒီးမ့ၣ်အူလၣ်တဖၣ် အီၣ်ကွံာ်သ့ၣ်ထူၣ် ခဲလၢာ်လၢ အအိၣ်လၢ တၢ်ပျီပူၤ အဃိလီၤ.
၂၀ မ့ၢ်လၢ ထံကျိဖိတဖၣ် လီၤသံးကွံာ်
ဒီးမ့ၣ်အူအီၣ်ကွံာ် တၢ်အီၣ်ဆၣ်လီၢ် လၢပှၢ်လၢ်ကျါအဃိ
ဆၣ်ဖိကီၢ်ဖိလၢ အမံၤတဖၣ်ဒၣ်လဲာ် သးသယုၢ်ဘၣ်နၤလီၤ.”
၂ “အူထီၣ်ကွဲၤလၢ ကစၢၢ်စံယိၣ်+
ဒီးကိးပသူထီၣ်လၢ တၢ်ဒုးအတၢ် ကိးပသူထီၣ် လၢယကစၢၢ်စီဆှံ အလိၤတက့ၢ်.
မ့ၢ်လၢ ယဟိဝၤယွၤအမုၢ်နံၤ ဟဲဝဲ+ ဒီးဟဲဘူးထီၣ်လံအဃိ
မ်ပှၤလၢအအိၣ်လၢ ကီၢ်ပူၤခဲလၢာ် ကနိးကစုာ်တက့ၢ်.
၂ မုၢ်နံၤအဝဲန့ၣ် မ့ၢ်ဝဲ တၢ်ခံးဒီး တၢ်အၢၣ်အမုၢ်နံၤ,+
တၢ်အၢၣ်အုးဒီး တၢ်အၢၣ်ခံးသူ အမုၢ်နံၤ+
ဒီးကလီၤဂာ်ဒ် ဂီၤခီအတၢ်ကပီၤ ဆဲးကပြုၢ်လီၤလၢ ကစၢၢ်ကလိအလိၤ ကဒုကဒု အသိးလီၤ.
ပှၤအိၣ်ဝဲတကလုာ်လၢ အနီၣ်ဂံၢ်အါ ဒီးအဂံၢ်ဆူၣ်ဘါဆူၣ်လီၤ.+
လၢညါန့ၣ် ပှၤလၢအလီၤဂာ်ဒီး အဝဲသ့ၣ် တအိၣ်နီတဘျီဘၣ်.
ဒီးစိၤလၢအကဟဲတဖၣ်စ့ၢ်ကီး ပှၤလၢအလီၤဂာ်ဒီး အဝဲသ့ၣ်န့ၣ်
တဟဲအိၣ်ထီၣ်ကဒီး နီတဘျီလၢၤဘၣ်.
၃ လၢအဝဲသ့ၣ် အမဲာ်ညါန့ၣ် မ့ၣ်အူအီၣ်ကွံာ်တၢ်
ဒီးလၢအဝဲသ့ၣ်အလီၢ်ခံန့ၣ် မ့ၣ်အူလၣ် ပျ့ၢ်အီၣ်တၢ်လီၤ.+
တၢ်လီၢ်လၢ အအိၣ်လၢ အဝဲသ့ၣ်အမဲာ်ညါန့ၣ် လီၤဂာ်ဒ် ဧ့ၤဒ့ၣ်တၤသၣ်အလီၢ်+
ဘၣ်ဆၣ် ဖဲအဝဲသ့ၣ် ဟးထီၣ် ဝံၤအလီၢ်ခံန့ၣ် အလီၤဂာ်ဒ်သိးဒီး ပှၢ်မုၢ်ကနၢလၢ အအိၣ်သယုၢ်
ဒီးပှၤတပူၤဖျဲးဝဲ နီတဂၤဘၣ်.
၄ အဝဲသ့ၣ်အက့ၢ်အဂီၤ ဖျါလီၤဂာ်ဒ် ကသ့ၣ်အသိး
ဒီးဃ့ၢ်ဝဲဒ်သိး ကသ့ၣ်တဖၣ် လၢတၢ်ဒုးပျီပူၤလီၤ.+
၅ ဒီးဖဲအဝဲသ့ၣ် ဖုဝဲ* လၢကစၢၢ်ခိၣ်အခါ အသီၣ်လီၤဂာ် ဒ်သိးဒီး လ့ၣ်ကဟၣ်တဖၣ်အသီၣ်+
ဒီးလီၤဂာ်စ့ၢ်ကီး ဒ်မ့ၣ်အူအီၣ် လီၢ်ဘိ* အသီၣ် ပြီးပြီးပြးပြး အသိးလီၤ.
အဝဲသ့ၣ် လီၤဂာ်ဒီးပှၤလၢ အဂံၢ်ဆူၣ်ဘါဆူၣ် တဒူၣ်လၢ အဆီလီၤအသးလၢ ကဒုးတၢ် အဂီၢ်လီၤ.+
၆ လၢအဝဲသ့ၣ်အဃိ ပှၤဂီၢ်မုၢ်တဖၣ် ကသူၣ်ကိၢ်သးဂီၤတၢ်လီၤ.
ဒီးပှၤကိးဂၤဒဲး အမဲာ်ကထီၣ်ဂီၤလီၤ.
၇ အဝဲသ့ၣ် ဃ့ၢ်သဖှိဝဲဒ် ပှၤသုးဖိတဖၣ်အသိး
ဒီးထီၣ်ဝဲတၢ်ဒူၣ် ဒ်ပှၤသုးဖိတဖၣ်အသိး
ဒီးအဝဲသ့ၣ် ဆဲးလဲၤတၢ်ဘျၢဘျၢ
ဒီးတလဲၤတၢ်လၢ ကျဲအဂၤဘၣ်.
၈ အဝဲသ့ၣ် တဆီၣ်လိာ်အသးဘၣ်,
အလဲၤတၢ်ဘျၢဘျၢ
ဒီးတၢ်စုကဝဲၤ မ့ၢ်မၤလီၤဃံၢ် အဝဲသ့ၣ်တနီၤဒၣ်လဲာ်
ပှၤအဂၤတဖၣ်လၢ အဝဲသ့ၣ်အကျါန့ၣ် ဆဲးလဲၤတၢ်လီၤ.
၉ အဝဲသ့ၣ် ဃ့ၢ်နုာ်လၢ ဝ့ၢ်ပူၤ, ဃ့ၢ်လၢဝ့ၢ်ခိၣ်ဒူအလိၤ
အဝဲသ့ၣ်လဲၤထီၣ်လၢ ဟံၣ်ဒူၣ်တဖၣ်အလိၤ ဒီးနုာ်လီၤလၢပဲတြီဖိတဖၣ်အပူၤ ဒ်တၢ်ဘျၣ်အသိးလီၤ.
၁၀ ဖဲအဝဲသ့ၣ် လဲၤတၢ်အခါ ဟီၣ်ခိၣ်ကနိးဝဲ ဒီးမူခိၣ်ဟူးဝးဝဲလီၤ.
မုၢ်ဒီးလါ ခံးလီၤဝဲ+
ဒီးဆၣ်တဖၣ် တကပီၤလၢၤဘၣ်.
၁၁ မ့ၢ်လၢ ယဟိဝၤယွၤ အသုးဖိတဖၣ်န့ၣ် အိၣ်ဝဲအါမးအဃိ+ အဝဲကကိးထီၣ်လၢ အကလုၢ်ဖးဒိၣ်လၢ အသုးမုၢ် အမဲာ်ညါလီၤ.+
ပှၤလၢ အမၤထွဲဒ် အတၢ်ကတိၤအသိး တဂၤန့ၣ် မ့ၢ်ပှၤလၢ အဂံၢ်ဆူၣ်ဘါဆူၣ်လီၤ.
၁၂ ယဟိဝၤယွၤ တဲဝဲလၢ “အဃိ ခဲအံၤန့ၣ် ဟဲက့ၤလၢယအိၣ် လၢသုသးဒီဖျၢၣ်,+
ဒုၣ်တၢ်အီၣ်,+ သူၣ်အုးသးအုး ဒီးဟီၣ်တက့ၢ်.
၁၃ သုတဘၣ်ဖှီညာ်ထဲ သုတၢ်ကူတၢ်ကၤဘၣ်,+ ဖှီညာ်လၢသုသးဟီ.+
ဒီးဟဲက့ၤလၢ သုကစၢ် ယဟိဝၤယွၤအအိၣ်
မ့ၢ်လၢ အဝဲမ့ၢ်ပှၤလၢ အသးဂ့ၤ, အသးကညီၤတၢ်, တသးဒိၣ်ထီၣ်တၢ်ချ့ချ့ဘၣ်+ ဒီးအိၣ်ဒီး တၢ်အဲၣ်လၢအတီဒိၣ်မး+
ဒီးဘၣ်ဃးဒီး တၢ်နးတၢ်ဖှီၣ်လၢ အကဒုးလီၤဘၣ်သုန့ၣ် အဝဲကက့ၤ ဆိကမိၣ်ထံကဒါက့ၤလီၤ.*
၁၄ ဘၣ်သ့ၣ်သ့ၣ် အဝဲ ကဆီတလဲ အတၢ်ပာ်သူၣ်ပာ်သး ဒီးအဝဲ ကက့ၤဆိကမိၣ်ထံက့ၤတၢ်+
ဒီးကဆိၣ်ဂ့ၤသု
ဒ်သိး သုကလုၢ်ထီၣ်ဘၣ် တၢ်လုၢ်ဘု ဒီးတၢ်လုၢ်စပံးထံ လၢသုကစၢ် ယဟိဝၤယွၤ အအိၣ်လီၤ.
၁၅ အူထီၣ်ကွဲၤလၢ ကစၢၢ်စံယိၣ်,
ဘိးဘၣ်သ့ၣ်ညါလီၤ တၢ်ဒုၣ်တၢ်အီၣ်အဂ့ၢ် ဒီးတၢ်အိၣ်ဖှိၣ်လီၤဆီ အဂ့ၢ်တက့ၢ်.+
၁၆ ကိးဖှိၣ်ထီၣ် ပှၤဂီၢ်မုၢ် ဒီးပာ်စီဆှံ တၢ်အိၣ်ဖှိၣ်တက့ၢ်.+
ဒုးအိၣ်ဖှိၣ် ပှၤသူၣ်က့သးပှၢ် ဒီးဒုးအိၣ်ဖှိၣ် ပှၤဖိသၣ် ဒီးဖိသၣ်အီၣ်နုၢ်တဖၣ် တက့ၢ်.+
မ်တလးမူးပိာ်ခွါ ဒီးတလးမူးပိာ်မုၣ် ဟးထီၣ်လၢ အဒၢးပူၤတက့ၢ်.
၁၇ ပှၤလုၢ်တၢ်ဒိၣ် လၢအမ့ၢ် ယဟိဝၤယွၤ အခ့အပှၤတဖၣ်န့ၣ် မ်အဝဲသ့ၣ်ဟီၣ်လၢ
ဘျီၣ်ဒိၣ် ဒီးတၢ်လုၢ်လီၢ်+ အဘၢၣ်စၢၤ ဒီးမ်အဝဲသ့ၣ် တဲဝဲလၢ
‘အိ ယဟိဝၤယွၤဧၢ, သးကညီၤ နပှၤဂီၢ်မုၢ်တက့ၢ်.
တဘၣ်ပျဲ ပှၤကလုာ်တဖၣ် ပၢနပှၤဂီၢ်မုၢ်*
ဒီးတဘၣ်ဒုးကဲထီၣ် အဝဲသ့ၣ်လၢ တၢ်ဒုၣ်ဒွဲၣ်အလီၢ်တဂ့ၤ.
ပှၤမ့ၢ်တဲလၢ “အဝဲသ့ၣ် အကစၢ်ယွၤ အိၣ်ဖဲလဲၣ်”+ န့ၣ်မ့ၢ်အကကြၢးဧါ.’
၁၈ ယဟိဝၤယွၤ ကပာ်ဖျါထီၣ် တၢ်သးဆူၣ်လၢ အထံအကီၢ်အဂီၢ်
ဒီးကပာ်ဖျါထီၣ် တၢ်သးကညီၤလၢ အပှၤဂီၢ်မုၢ်အဖီခိၣ်လီၤ.+
၁၉ ယဟိဝၤယွၤကတဲ အပှၤဂီၢ်မုၢ်တဖၣ်လၢ
‘ယကဟ့ၣ်လီၤသု ဘုဒီးစပံးထံအသီ ဒီးသိဧိၤချါဧိၤ
ဒီးသုကအီၣ်ဘၣ်တၢ်ဘျဲဘျဲ+
ဒီးယတဟ့ၣ်အခွဲးလၢ သုကကဲထီၣ် တၢ်ဒုၣ်ဒွဲၣ်အလီၢ်လၢ ပှၤကလုာ်တဖၣ် အကျါလၢၤဘၣ်.+
၂၀ ယကနီဟးထီၣ်န့ၢ်သု ပှၤလၢ ကလံၤစိးတခီ
ဒီးယကနီကွံာ်အဝဲသ့ၣ် တုၤလီၤလၢ ပှၢ်မုၢ်ကနၢလၢ အဃ့ထီ ဒီးအအိၣ်သယုၢ်လီၤ.
အသုးဖိလၢ အလဲၤလၢ တၢ်မဲာ်ညါတဖၣ်န့ၣ် ယကနီကွံာ်အီၤလၢ ပီၣ်လဲၣ်လၢ မုၢ်ထီၣ်တခီ*
ဒီးအသုးဖိလၢ အအိၣ်လၢ လီၢ်ခံတဖၣ်န့ၣ် ယကနီကွံာ်အီၤလၢ ပီၣ်လဲၣ်လၢ မုၢ်နုာ်တခီလီၤ.*
ဒီးအဝဲသ့ၣ်အစိၣ် ကနၢအုၣ်
ဒီးအစိကနၢထီၣ်ဝဲလၢ ကီၢ်ပူၤလီၤ.+
ယကမၤတၢ်လၢ အလီၤလိၢ်လီၤလးတဖၣ်လီၤ.’
၂၁ အိ ထံကီၢ်ဧၢ, တဘၣ်ပျံၤတၢ်တဂ့ၤ.
မ့ၢ်လၢ ယဟိဝၤယွၤ ကမၤတၢ်လၢ အလီၤလိၢ်လီၤလးတဖၣ်အဃိ သးခု ဒီးသူၣ်ဖှံသးညီတက့ၢ်.
၂၂ တၢ်အီၣ်ဆၣ်အလီၢ်လၢ ပှၢ်မုၢ်ကနၢန့ၣ် ကလါထီၣ်က့ၤ,+
သ့ၣ်တဖၣ် ကသၣ်ထီၣ်က့ၤ+
ဒီးချၢၣ်ဒၢအထူၣ် ဒီးစပံးမုၢ် ကသၣ်ထီၣ်ဝဲ အါအါဂီၢ်ဂီၢ်အဃိ+
ဆၣ်ဖိကီၢ်ဖိလၢ တၢ်ပျီပူၤသ့ၣ်ဧၢ, ဘၣ်ယိၣ်တၢ်တဂ့ၤ.
၂၃ စံယိၣ်အဖိခွါသ့ၣ်ဧၢ, သးခု ဒီးသူၣ်ဖှံသးညီ ခီဖျိ တၢ်လၢသုကစၢ် ယဟိဝၤယွၤ ကမၤဝဲအဃိတက့ၢ်.+
အဝဲကဟ့ၣ်လီၤ မူခိၣ်ထံ ဘၣ်ဆၢ ဘၣ်ကတီၢ် ဒီးလၢလၢပှဲၤပှဲၤ
ဒီးအဝဲဒုးစူၤလီၤန့ၢ်သု မူခိၣ်ထံ အါအါဂီၢ်ဂီၢ်လီၤ.
ဖဲတၢ်ဂိၢ်ထီၣ်သီ ဒီးတၢ်ကိၢ်ထီၣ်သီ အဆၢကတီၢ်န့ၣ် အဝဲကဒုးစူၤလီၤ မူခိၣ်ထံ ဒ်လၢညါအသိးလီၤ.+
၂၅ တၢ်လၢ ဒွဲၣ်လၢအအီၣ်ကွံာ်တၢ်တဖၣ်, ဒွဲၣ်လၢ အဒံးအိၣ်တဖၣ်, ဒွဲၣ်လၢ အဒံးတအိၣ်ဘၣ်တဖၣ် ဒီးဒွဲၣ်အဂၤတဖၣ်
အီၣ်ကွံာ်ဝဲလၢ အနံၣ်တဖၣ် အတီၢ်ပူၤန့ၣ် ယကလိးက့ၤသုလီၤ.
ဒွဲၣ်တဖၣ်န့ၣ် မ့ၢ်ဝဲယသုးမုၢ်ဖးဒိၣ် လၢယဆှၢလီၤလၢ သုအိၣ်လီၤ.+
ဒီးယပှၤဂီၢ်မုၢ်တဖၣ်န့ၣ် တတူၢ်ဘၣ် တၢ်မဲာ်ဆှး နီတဘျီလၢၤဘၣ်.+
၂၇ ဒီးသုကသ့ၣ်ညါဘၣ်လၢ ယအိၣ်လၢ အံၣ်စရ့လးအကျါ+
ဒီးသုကသ့ၣ်ညါလၢ ယမ့ၢ် သုကစၢ် ယဟိဝၤယွၤ+ ဒီးကစၢ်ယွၤလၢ အဂုၤအဂၤ တအိၣ်နီတဂၤဘၣ်.
ဒီးယပှၤဂီၢ်မုၢ်တဖၣ်န့ၣ် တတူၢ်ဘၣ် တၢ်မဲာ်ဆှး နီတဘျီလၢၤဘၣ်.
၂၈ ဝံၤဒီး ယကလူလီၤ ယသးစီဆှံလၢ+ ပှၤအကလုာ်ကလုာ်အလိၤ
အဃိ သုဖိမုၣ်ဒီးသုဖိခွါတဖၣ် ကတဲတၢ်ဒ်ဝံအသိး
ဒီးသုပိာ်ခွါသးပှၢ်တဖၣ် ကမံမီၢ် တၢ်မံမီၢ်တဖၣ်
ဒီးသုပိာ်ခွါသးစၢ်တဖၣ် ကထံၣ် တၢ်ထံၣ်လၢညါခီတဖၣ်လီၤ.+
၂၉ တကးဒံးဘၣ် ဖဲမုၢ်နံၤတဖၣ်န့ၣ်အတီၢ်ပူၤ ယကလူလီၤ ယသးစီဆှံလၢ
ယကုၢ်ပိာ်မုၣ်တဖၣ် ဒီးယကုၢ် ပိာ်ခွါတဖၣ်အလိၤလီၤ.
၃၀ ဒီးယကပာ်ဖျါထီၣ် တၢ်လီၤလိၢ်လီၤလးတဖၣ် လၢမူခိၣ် ဒီးဟီၣ်ခိၣ်လီၤ.
တၢ်သ့ၣ်တဖၣ်န့ၣ် ကမ့ၢ်ဝဲ တၢ်သွံၣ်, မ့ၣ်အူ ဒီးမ့ၣ်အူခုၣ် လၢအခုၣ်ထီၣ်ဝဲလီၤ.+
၃၁ တချုးလၢ ယဟိဝၤယွၤ အမုၢ်နံၤ ဖးဒိၣ် လၢအပှဲၤဒီး တၢ်လၤကပီၤ ဘၣ်ဒံးဘၣ်န့ၣ်+
မုၢ်ကခံးလီၤ ဒီးလါကကဲထီၣ် တၢ်သွံၣ်လီၤ.+
၃၂ ဒီးပှၤလၢ အကိးထီၣ် ယဟိဝၤယွၤ အမံၤ ကိးဂၤဒဲးန့ၣ်ကတုၤလၢ တၢ်အုၣ်က့ၤခီၣ်က့ၤလီၤ.+
ဒ်ယဟိဝၤယွၤ တဲဝဲအသိး လၢကစၢၢ်စံယိၣ် ဒီးလၢဝ့ၢ်ယရူၤၡလ့ၣ်အပူၤန့ၣ် ပှၤလၢ အကပူၤဖျဲးတဖၣ် ကအိၣ်ဝဲလီၤ.+
ဒီးပှၤလၢ အပူၤဖျဲးမူဒံးတဖၣ်န့ၣ် မ့ၢ်ပှၤလၢ ယဟိဝၤယွၤ ကိးပာ်စၢၤဝဲလီၤ.”
၃ “ဖဲန့ၣ်အဆၢကတီၢ်
ယကဒုးဟဲက့ၤ ယူဒၤ ဒီးယရူၤၡလ့ၣ် အပှၤဂီၢ်မုၢ် လၢအဘၣ်တၢ်က့ၤဖီၣ်အီၤတဖၣ်လီၤ.+
၂ ဒီးယကပာ်ဖှိၣ် ပှၤကလုာ်တဖၣ် ခဲလၢာ်
ဒီးယကဒုးလဲၤလီၤ အဝဲသ့ၣ်လၢ ယဟိၤၡၤဖး* အတၢ်တြီၤပူၤလီၤ.
ဖဲန့ၣ်န့ၣ် ယကစံၣ်ညီၣ်အဝဲသ့ၣ်+
လၢယပှၤဂီၢ်မုၢ် ဒီးယတၢ်န့ၢ်သါ လၢအမ့ၢ် ပှၤအံၣ်စရ့လးဖိအဂီၢ်လီၤ.
လၢပှၤတဖၣ်န့ၣ်အဃိ ယပှၤဂီၢ်မုၢ် ပှၤအံၣ်စရ့လးဖိ ဘၣ်လီၤပြံလီၤပြါလၢ ပှၤကလုာ်တဖၣ်အကျါ
ဒီးပှၤတဖၣ်န့ၣ် နီၤဖးလီၤ ယထံယကီၢ်လၢ အဝဲသ့ၣ် အကျါဒၣ်ဝဲလီၤ.+
၃ ဒီးအဝဲသ့ၣ်ဖးတၢ် ဒ်သိး ကနီၤဖးလီၤ ယပှၤဂီၢ်မုၢ် လၢအဝဲသ့ၣ် အနီၢ်ကစၢ်အဂီၢ်လီၤ.+
အဝဲသ့ၣ် ဆါကွံာ် ဖိသၣ်ပိာ်ခွါ ဒ်သိးကဟ့ၣ်လီၤ ပိာ်မုၣ်ဆါလီၤအီၣ်သး အပှ့ၤအဂီၢ်
ဒီးအဝဲသ့ၣ် ဆါကွံာ် ဖိသၣ်ပိာ်မုၣ် ဒ်သိး ကန့ၢ်ဘၣ် စပံးထံအဂီၢ်လီၤ.
၄ ဝ့ၢ်စိၢ်, ဝ့ၢ်စံဒိၣ် ဒီးကီၢ်ဖလ့ၡသး အဟီၣ်ကဝီၤ ခဲလၢာ်သ့ၣ်ဧၢ,
သုသးတမုာ်ယၤဘၣ် ခီဖျိလၢ တၢ်ဂ့ၢ်မနုၤ အဃိလဲၣ်.
မ့ၢ်သုဟ့ၣ်ကၣ်ယၤလၢ တၢ်ဂ့ၢ်တမံၤမံၤ အဃိဧါ.
သုမ့ၢ်ဟ့ၣ်ကၣ်ယၤ ဒ်အံၤန့ၣ်
ယကဟ့ၣ်ကၣ်က့ၤသု ချ့ချ့ ဒ်သုမၤတ့ၢ်အသိးလီၤ.+
၅ သုဟံးန့ၢ် ယထူဒီးယစ့+
ဒီးယတၢ်လုၢ်ဒိၣ်ပှ့ၤဒိၣ်လၢ အဂ့ၤကတၢၢ်တဖၣ်န့ၣ် သုပာ်အီၤလၢ သုတၢ်လုၢ်ဟံၣ်တဖၣ် အပူၤလီၤ.
၆ ဒီးသုဆါကွံာ် ယူဒၤ ဒီးယရူၤၡလ့ၣ် အပှၤဂီၢ်မုၢ်လၢ ပှၤကြံးဖိတဖၣ်အအိၣ်+
ဒ်သိး သုကဒုးအိၣ်ယံၤထီၣ် အဝဲသ့ၣ် လၢအတၢ်လီၢ်တၢ်ကျဲအဂီၢ်လီၤ.
၇ လၢတၢ်န့ၣ်အဃိ ယကဒုးဟးထီၣ်က့ၤ ယပှၤဂီၢ်မုၢ် လၢတၢ်လီၢ်လၢ သုဆါလီၤကွံာ် အဝဲသ့ၣ်+
ဒီးယကဟ့ၣ်ကၣ်က့ၤသု လၢတၢ်လၢ သုမၤအီၤတဖၣ် အဃိလီၤ.
၈ ယကဆါလီၤကွံာ် သုဖိမုၣ်ဒီးသုဖိခွါတဖၣ် လၢယူဒၤအပှၤဂီၢ်မုၢ် အစုပူၤ+
ဒီးယူဒၤအပှၤဂီၢ်မုၢ် ကဆါလီၤကွံာ် အဝဲသ့ၣ်လၢ ပှၤၡဘၤဖိ လၢအမ့ၢ်ပှၤကလုာ် လၢအအိၣ်လၢ တၢ်လီၢ်လၢအယံၤလီၤ.
ယၤ ယဟိဝၤယွၤ တဲဝဲဒ်န့ၣ်လီၤ.
၉ ဘိးဘၣ်သ့ၣ်ညါလီၤ ပှၤကလုာ် တဖၣ်လၢ+
‘ကတဲာ်ကတီၤထီၣ်တၢ် လၢတၢ်ဒုးအဂီၢ် ဒီးမၢပှၤလၢ အဂံၢ်ဆူၣ်ဘါဆူၣ်တဖၣ် ဟူးထီၣ်ဂဲၤထီၣ်
ဒီးမ်ပှၤသုးဖိတဖၣ် လဲၤထီၣ် ဒုးတၢ်တက့ၢ်.+
၁၀ ပိာ်က့ၤ သုထဲၣ်ကနၣ်လၢနး ဒီးသုထါဂဲာ်လၢ ဘီတက့ၢ်.
မ်ပှၤလၢ အဂံၢ်စၢ်ဘါစၢ်န့ၣ် တဲလၢ “ယဂံၢ်ဆူၣ်ဘါဆူၣ်” တက့ၢ်.
၁၁ ပှၤကလုာ်လၢ အအိၣ်လၢ တၢ်လီၢ်ကိးတီၤဒဲးသ့ၣ်ဧၢ, ပာ်ဖှိၣ်ထီၣ်သုသး ဒီးဟဲမၤစၢၤလိာ်သး တဂၤဒီးတဂၤသၢၤ.’”+
အိ ယဟိဝၤယွၤဧၢ, ပျၢ်လီၤ နသုးမုၢ်ဂီၢ်မုၢ် လၢအဂံၢ်ဆူၣ်ဘါဆူၣ်တဖၣ် ဖဲတၢ်လီၢ်အဝဲန့ၣ်တက့ၢ်.
၁၂ “မ်ပှၤကလုာ်တဖၣ် ဟူးထီၣ်ဂဲၤထီၣ် ဒီးလဲၤလၢ ယဟိၤၡၤဖး အတၢ်တြီၤပူၤတက့ၢ်.
ယကဆ့ၣ်နီၤဖဲန့ၣ် ဒ်သိးယကစံၣ်ညီၣ် ပှၤကလုာ်လၢအအိၣ်လၢ တၢ်လီၢ်ကိးတီၤဒဲးလီၤ.+
၁၃ ကူးတၢ် အဆၢကတီၢ် ဘၣ်လံအဃိ သူထါဂဲာ်ဒီး ကူးတၢ်တက့ၢ်.
မ့ၢ်လၢစပံးထံအကျိး ပှဲၤဝဲလံအဃိ ဟဲလီၤယီၢ်စပံးသၣ်တက့ၢ်.+
ဒီးတၢ်ဒၢတဖၣ် ပှဲၤလီၤလာ် မ့ၢ်လၢ ပှၤကလုာ်တဖၣ် အတၢ်အၢတၢ်သီ အိၣ်ဝဲဒီဒူၣ် အဃိလီၤ.
၁၄ ပှၤဂီၢ်မုၢ်တဖၣ်, ပှၤဂီၢ်မုၢ်တဖၣ်န့ၣ် အိၣ်ဝဲလၢ တၢ်စံၣ်ညီၣ် အတၢ်တြီၤပူၤ,
မ့ၢ်လၢယဟိဝၤယွၤ အမုၢ်နံၤ လၢအကစံၣ်ညီၣ်တၢ်လၢ တၢ်စံၣ်ညီၣ် အတၢ်တြီၤပူၤန့ၣ် ဟဲဘူးထီၣ်လံ.+
၁၅ မုၢ်ဒီးလါ ကခံးလီၤ
ဒီးဆၣ်တဖၣ် တကပီၤလၢၤဘၣ်.
၁၆ ယဟိဝၤယွၤ ကကညီၤထီၣ် လၢစံယိၣ်
အဝဲ ကမၤဒိၣ်ထီၣ်အကလုၢ်လၢ ဝ့ၢ်ယရူၤၡလ့ၣ်လီၤ.
ဒီးမူခိၣ်ဒီး ဟီၣ်ခိၣ် ကဟူးဝးဝဲ
ဘၣ်ဆၣ် ယဟိဝၤယွၤ ကကဲထီၣ်တၢ်အိၣ်သဒၢအလီၢ်လၢ အပှၤဂီၢ်မုၢ်အဂီၢ်+
ဒီးကကဲထီၣ် တၢးလၢအကျၢၤ လၢအပှၤအံၣ်စရ့လးဖိ အဂီၢ်လီၤ.
၁၇ ဒီးသုကသ့ၣ်ညါဘၣ် လၢယမ့ၢ် သုကစၢ်ယဟိဝၤယွၤ လၢအအိၣ်လၢ ယကစၢၢ်စီဆှံ စံယိၣ်လီၤ.+
၁၈ ဖဲတၢ်တနံၤန့ၣ် စပံးထံအဆၢ ကလီၤစီၤဝဲလၢ ကစၢၢ်ကလိ တဖၣ်အလိၤ+
ဒီးတၢ်နုၢ်ထံ ကယွၤလီၤလၢ တၢ်လူၢ်တဖၣ် အလိၤလီၤ.
ဒီးယူဒၤ အထံကျိဖိခဲလၢာ်န့ၣ် ထံကယွၤလီၤဝဲလီၤ.
ထံထီၣ်ပၢၢ်လၢ အအိၣ်လၢ ယဟိဝၤယွၤအဟံၣ်န့ၣ် ကယွၤလီၤဝဲလီၤ.+
ဒီးကမၤဘၣ်စီၣ်ဝဲ ၡံးတံၣ်* အတၢ်တြီၤလီၤ.
၁၉ ဘၣ်ဆၣ် ကီၢ်အဲၤကူပတူး ကဘၣ် အိၣ်သယုၢ်+
ဒီးကီၢ်အဒိၣ် ကကဲထီၣ် ပှၢ်မုၢ်ကနၢ လၢအအိၣ်သယုၢ်,+
မ့ၢ်လၢ အဝဲသ့ၣ် မၤဆူၣ်မၤစိးဝဲ ယူဒၤအပှၤဂီၢ်မုၢ်+
ဒီးလူလီၤဝဲ ပှၤလၢအတၢ်ကမၣ် တအိၣ်ဘၣ်တဖၣ်အသွံၣ် လၢယူဒၤအပှၤဂီၢ်မုၢ် အကီၢ်ပူၤ အဃိလီၤ.+
၂၀ ပှၤကအိၣ်လၢ ယူဒၤအပူၤထီဘိ
ဒီးပှၤကအိၣ်လၢ ယရူၤၡလ့ၣ်အပူၤ တစိၤဘၣ်တစိၤလီၤ.+
၂၁ လၢညါန့ၣ် တၢ်သွံၣ်လီၤတီလၢ အဝဲသ့ၣ်အခိၣ်လိၤ ဘၣ်ဆၣ် တဘျီအံၤ ယကပာ်အဝဲသ့ၣ် ဒ်ပှၤလၢအတၢ်ကမၣ်တအိၣ်ဘၣ် အသိးလီၤ.+
ဒီးယၤ ယဟိဝၤယွၤ ကအိၣ်လၢ စံယိၣ်အပူၤလီၤ.”+
အခီပညီမ့ၢ်ဝဲ “ယဟိဝၤမ့ၢ် ကစၢ်ယွၤ.”
မ့ၢ်စ့ၢ်ကီး “စံၣ်ဝဲ.”
မ့ၢ်ဝဲ လီၢ်ခိၣ်ဆၢၣ်.
မ့ၢ်စ့ၢ်ကီး “သးအုး.”
အခီပညီလိၤလိၤ “တၢ်န့ၢ်သါ.”
မ့ၢ်ဝဲ ပီၣ်လဲၣ်သံ.
မ့ၢ်ဝဲ မဲးဒံးထၢၣ်ရ့နယၢၣ် ပီၣ်လဲၣ်.
မ့ၢ်စ့ၢ်ကီး “တလီ.”
အခီပညီမ့ၢ်ဝဲ “ယဟိဝၤ မ့ၢ်စံၣ်ညီၣ်ကွီၢ်.”
အခီပညီမ့ၢ်ဝဲ “သ့ၣ်ဖှ့ၡံးတၤ.”