ဃဘးကူာ်
၁ အဝဲအံၤမ့ၢ် တၢ်ကစီၣ်တခါလၢ ယၤ ဝံဃဘးကူာ်* ဒိးန့ၢ်ဘၣ်ဝဲလၢ တၢ်ထံၣ်လၢညါခီအပူၤလီၤ.
၂ အိ ယဟိဝၤယွၤဧၢ, ယကဘၣ် ဆဲးကိးထီၣ်နၤ ဆံးယံာ်ဒံးလဲၣ်, ဒီးနကနၢ်ဟူယၤ ဆံးယံာ်လဲၣ်.+
ယကဘၣ်ဆဲးဃ့နၤ တၢ်မၤစၢၤ ဆံးယံာ်ဒံးလဲၣ်. ဒီးနကမၤပူၤဖျဲး* ပှၤလၢ တၢ်မၤဆူၣ်မၤစိး ဆံးယံာ်လဲၣ်.+
၃ ဘၣ်မနုၤအဃိ နဒုးထံၣ်ယၤ တၢ်အၢတၢ်သီလဲၣ်.
ဘၣ်မနုၤအဃိ နဝံသးစူၤ ပှၤလၢအဆီၣ်တံၢ်မၤနၢၤတၢ်လဲၣ်.
ဘၣ်မနုၤအဃိ တၢ်ဂုာ်န့ၢ်ဆူၣ်တၢ် ဒီးတၢ်မၤဆူၣ်မၤစိး အိၣ်ဝဲလၢ ယမဲာ်ညါလဲၣ်.
ဒီးဘၣ်မနုၤအဃိ တၢ်အ့ၣ်လိာ်ဆိးက့ ဒီးတၢ်ထီဒုၣ်ထီဒါ အိၣ်ဝဲအါမးလဲၣ်.
၄ ပှၤတဒိကနၣ် တၢ်သိၣ်တၢ်သီ လၢၤဘၣ်.
ပှၤတစံၣ်ညီၣ်န့ၢ်တၢ်လၢ ပှၤဂၤအဂီၢ် တီတီလိၤလိၤ နီတဘျီလၢၤဘၣ်.
မ့ၢ်လၢ ပှၤအၢပှၤသီတဖၣ် အိၣ်ဝးတရံး ပှၤတီပှၤလိၤ အဃိ
တၢ်စံၣ်ညီၣ်တီ တအိၣ်လၢၤဘၣ်.+
၅ * “ကွၢ်ပှၤကလုာ်တဖၣ် ဒီးကွၢ်တၢ်လၢ ကကဲထီၣ်အသးဒီးအဝဲသ့ၣ် ထံထံတက့ၢ်.
ဒီးသုကအီဃာ် သုကိာ်ပူၤ လၢတၢ်ကမၢကမၣ်အပူၤ,
မ့ၢ်လၢ တၢ်လၢအလီၤကမၢကမၣ်တခါ ကဟဲကဲထီၣ်အသး လၢသုစိၤအဃိလီၤ.
ပှၤမ့ၢ်တဲဘၣ်သု တၢ်ဂ့ၢ်တခါအံၤသနာ်က့ တမ့ၢ်လၢ ကလီၤနာ်ဘၣ်သုဘၣ်.+
၆ ယကထိၣ်ဟူးထိၣ်ဂဲၤထီၣ် ပှၤက့ၤစ့းဖိတဖၣ်လီၤ.+
အဝဲသ့ၣ်န့ၣ် မ့ၢ်ပှၤတကလုာ်လၢ အတၢ်သးကညီၤ တအိၣ်ဘၣ် ဒီးကရီမၤတၢ်ဖဲ အခိၣ်တိၤလိၤလီၤ.
အဝဲသ့ၣ် ရၤလီၤအသးလၢ တၢ်လီၢ်ဖးလဲၢ်လၢ ဟီၣ်ခိၣ်ချၢ
ဒီးဟံးန့ၢ်ဆူၣ် ပှၤဂၤအတၢ်လီၢ်တၢ်ကျဲလၢ အတမ့ၢ် အဝဲသ့ၣ် အတၢ်ဘၣ်လီၤ.+
၇ အဝဲသ့ၣ်န့ၣ် လီၤပျံၤလီၤဖုးဒိၣ်မး ဒီးပှၤဘၣ်ပျံၤ အဝဲသ့ၣ်လီၤ.
အဝဲသ့ၣ် ထုးထီၣ်အနီၢ်ကစၢ် အ တၢ်သိၣ်တၢ်သီ ဒီးထံၣ်လီၤအသးလၢ အစိအကမီၤ ဒိၣ်ကတၢၢ်လီၤ.+
၈ အဝဲသ့ၣ် အကသ့ၣ်တဖၣ်န့ၣ် ဃ့ၢ်ချ့န့ၢ်ဒံး ခ့စံၣ်ပိၣ်
ဒီးအဒူန့ၢ်ဒံး ထွံၣ်မံၤလၢ မုၢ်နၤခီလီၤ.+
အဝဲသ့ၣ် အကသ့ၣ်ဒုးသုးတဖၣ်န့ၣ် ဃ့ၢ်သဖှိဆူညါ ကွ့ၢ်ကွ့ၢ်
ဒီးအဝဲသ့ၣ် အကသ့ၣ်တဖၣ်န့ၣ် ဟဲဝဲလၢ တၢ်လီၢ်ဖးယံၤလီၤ.
အဝဲသ့ၣ်တဖၣ်န့ၣ် လီၤဂာ်ဒ် လံာ်ကြီကြာ်လၢ အယူၤလီၤချ့ချ့ ဒ်သိး အကဖီၣ်စှီၤအီၣ်အဆၣ် အဂီၢ်လီၤ.+
၉ အဝဲသ့ၣ် အသးဆူၣ်လၢ ကမၤဆူၣ်မၤစိးတၢ်အဂီၢ်လီၤ.+
ဖဲအဝဲသ့ၣ် လဲၤတၢ်ဒ်သိးသိးအခါ အလီၤဂာ်ဒ် ကလံၤလၢ အဟဲလၢ မုၢ်ထီၣ်တခီလီၤ.+
ဒီးပှၤလၢ အဝဲသ့ၣ် ဖီၣ်န့ၢ်ဝဲတဖၣ်န့ၣ် အနီၣ်ဂံၢ်အါထဲသိးဒီး မဲးလီၤ.
၁၀ အဝဲသ့ၣ် တပာ်ကဲ စီၤပၤတဖၣ်ဘၣ်.
ဒီးအဝဲသ့ၣ် ပာ်ပူၣ်ထီၣ်ဟီၣ်ခိၣ် ဒ်သိး ကလဲၤထီၣ် မၤန့ၢ်ဝ့ၢ်တဖၣ် အဂီၢ်လီၤ.
၁၁ ဝံၤဒီး အဝဲသ့ၣ် လဲၤဆူညါ ဒ်ကလံၤအသိး ဒီးခီဂာ်ဝဲ တၢ်လီၢ်အဝဲန့ၣ်
ဘၣ်ဆၣ် အဝဲသ့ၣ် အတၢ်ကမၣ် ကအိၣ်ဝဲ+
မ့ၢ်လၢ အဝဲသ့ၣ် တဲဝဲလၢ အဝဲသ့ၣ် ဒိးန့ၢ်ဘၣ် တၢ်စိတၢ်ကမီၤလၢ အယွၤတဂၤအအိၣ် အဃိလီၤ.”+
၁၂ အိ ယဟိဝၤယွၤဧၢ, နအိၣ်မူလီၤထူလီၤယိာ်* တမ့ၢ်ဧီၤ.+
နမ့ၢ်ယကစၢ်ယွၤ လၢအစီဆှံတဂၤ ဒီးနတသံ နီတဘျီဘၣ်.+
အိ ယဟိဝၤယွၤဧၢ, နဃုထၢထီၣ် အဝဲသ့ၣ် လၢကစံၣ်ညီၣ်တၢ် အဂီၢ်လီၤ.
ယလၢၢ်ဧၢ,+ နပာ်လီၤဆီ အဝဲသ့ၣ် ဒ်သိးနကသိၣ်ဃီၣ်တၢ် အဂီၢ်လီၤ.+
၁၃ နမဲာ်ချံန့ၣ် စီဆှံဒိၣ်တလၢ လၢနကကွၢ် တၢ်အၢတၢ်သီ အဂီၢ်လီၤ.
ဒီးနဝံသးစူၤ တၢ်အၢတၢ်သီ တကဲဘၣ်.+
မ့မ့ၢ် ဒ်န့ၣ်န့ၣ် ဘၣ်မနုၤအဃိ နဝံသးစူၤ ပှၤလၢအသး တတီဘၣ်တဖၣ်လဲၣ်.+
ဒီးဖဲပှၤအၢပှၤသီတဂၤ မၤနၢၤပှၤလၢ အတီအလိၤဒိၣ်န့ၢ်ဒံးအီၤအခါ ဘၣ်မနုၤအဃိ နအိၣ်ဃိဒိလဲၣ်.+
၁၄ ဘၣ်မနုၤအဃိ နပာ် ပှၤဟီၣ်ခိၣ်ဖိ ဒ်ညၣ်ပီၣ်လဲၣ်အသိး
ဒီးဒ်ဆၣ်ဖိကီၢ်ဖိလၢထံကျါ လၢပှၤပၢအီၤ တအိၣ်ဘၣ် အသိးလဲၣ်.
၁၅ အဝဲ* တွံၢ်ထီၣ်အဝဲသ့ၣ်လၢ တခွဲကနၣ်
ဒီးဖီၣ်န့ၢ် အဝဲသ့ၣ် လၢအစၤအပူၤ
ဒီးပာ်ဖှိၣ်ထီၣ် အဝဲသ့ၣ်လၢ အတၢ်ဖီၣ်ညၣ် အပှာ်ဧိၤစၤဧိၤအပူၤလီၤ.
အဃိ အသးခုဝဲ ဒိၣ်မးလီၤ.+
၁၆ ဒီးအဝဲလုၢ်ထီၣ်တၢ်လၢ အစၤအအိၣ်
ဒီးလုၢ်ထီၣ်တၢ်လၢ အတၢ်ဖီၣ်ညၣ် အပှာ်ဧိၤစၤဧိၤအအိၣ်,
မ့ၢ်လၢ အဝဲ အီၣ်ဘၣ်တၢ်အီၣ်လၢ အဝံၣ်အသိ
ဒီးအဝံၣ်အဆၢလီၤဆီ ခီဖျိလၢ တၢ်သ့ၣ်တဖၣ်န့ၣ် အဃိလီၤ.
၁၇ မ့ၢ်အဝဲ ကဆဲးကွံာ်လီၤအစၤဧါ.
ဒီးမ့ၢ်အဝဲ ကဆဲးမၤသံ ပှၤကလုာ်တဖၣ် လၢတၢ်တသးကညီၤဘၣ် အပူၤဧါ.+
ယကခိးကွၢ်လၢ်လၢ မ့ၢ်အဝဲ* ကအဲၣ်ဒိး မၢယတဲတၢ်ဒ်လဲၣ်န့ၣ်လီၤ.
ဖဲအဝဲ သိၣ်က့ၤသီက့ၤယၤအခါ ယကဘၣ် က့ၤစံးဆၢက့ၤအီၤ ဒ်လဲၣ်.
၂ ဒီးယဟိဝၤယွၤ တဲဆၢယၤလၢ
“ကွဲးလီၤ တၢ်ထံၣ်လၢညါခီလၢ လၢၢ်ဘ့ၣ်ဘၣ်တဖၣ်အလိၤၡဲၡဲ+
ဒ်သိးပှၤလၢ အကဖးသီၣ်အီၤဒိၣ်ဒိၣ်တဂၤ ကဖးဘၣ်ဝဲ ဘျ့ဘျ့ဆှီဆှီအဂီၢ်တက့ၢ်.+
၃ တၢ်ထံၣ်လၢညါခီအံၤ ကလၢထီၣ်ပှဲၤထီၣ်ဖဲ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဘၣ်ဝဲအခါလီၤ.
ဒီးတၢ်ဆၢကတီၢ်အံၤ ကဟဲဝဲချ့ချ့ ဒီးတၢ်ထံၣ်လၢညါခီအံၤ တမ့ၢ်တၢ်လံၣ်တၢ်လီဘၣ်.
မ့ၢ်ဖျါလၢ အယံာ်ဝဲဘၣ်ဆၣ် ခိးကွၢ်လၢ်အီၤလၢ တၢ်သးဆူၣ် အပူၤတက့ၢ်.+
တၢ်ထံၣ်လၢညါခီအံၤ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်
ဒီးတစဲၤခံဘၣ်.
၄ ပှၤလၢအပာ်ထီၣ်ထီအသးတဂၤန့ၣ်
အသူၣ်တဘျၢသးတဘျၢဘၣ်.
ဘၣ်ဆၣ် ပှၤတီပှၤလိၤန့ၣ် ကမူဝဲလၢ အတၢ်သးတီ* အဃိလီၤ.+
၅ စပံးထံန့ၣ် ထိၣ်ဟူးထိၣ်ဂဲၤထီၣ် ပှၤတဂၤဂၤ လၢကမၤကြီတၢ်
အဃိ ပှၤလၢအပာ်ကဖၢလၢအသးတဂၤန့ၣ် တလဲၤတုၤလၢ အဖီတၢၣ်ဘၣ်.
ဒီးပှၤတဂၤအံၤ အတၢ်သူၣ်လီသးကွံန့ၣ် ဒိၣ်ဝဲဒ် တၢ်သွၣ်ခိၣ်* အသိးလီၤ.
ဒီးအဝဲလီၤဂာ်ဒ်သိးဒီး တၢ်သံ ဒီးတအိၣ်ဒီး တၢ်သူၣ်မံသးမံ နီတဘျီဘၣ်.
ဒီးအဆဲးပာ်ဖှိၣ်ထီၣ် ပှၤကလုာ်ခဲလၢာ်
ဒီးအပာ်ဖှိၣ်ထီၣ် ပှၤဟီၣ်ခိၣ်ဖိခဲလၢာ် လၢအဂီၢ်လီၤ.+
၆ ပှၤတဖၣ်အံၤခဲလၢာ် ကတဲဆဲးအဲးအီၤလၢ တၢ်ကတိၤဒိ, တၢ်ကတိၤလီၤဘၢ ဒီးတၢ်ပှိၤပှီၢ်တဖၣ် တမ့ၢ်ဧီၤ.+
အဝဲသ့ၣ် ကတဲဝဲလၢ
‘ပှၤတဂၤအံၤ ဟံးန့ၢ်ဒီးပာ်ဖှိၣ်တၢ်လၢ တမ့ၢ် အတၢ်ဘၣ်အဃိ အကဘၣ်နးဘၣ်ဖှီၣ်လီၤ.
အမၤဝဲဒ်န့ၣ် အဃိ မ့ၢ်ဒၣ်အမၤ အါထီၣ် အဒ့ၣ်အကမၢ်လီၤ.
အဝဲ ကဆဲးမၤဝဲဒ်န့ၣ် ယံာ်ဒံးထဲလဲၣ်.
၇ ပှၤလၢနကဘၣ်လိးက့ၤအီၤ နဒ့ၣ်ကမၢ်တဖၣ်န့ၣ် ကဆၢထၢၣ်သတူၢ်ကလာ် တမ့ၢ်ဧီၤ.
အဝဲသ့ၣ် ကပၢၢ်ထီၣ် ဒီးကတရုၤနၤဆူၣ်ဆူၣ်
ဒီးကဂုာ်န့ၢ်ဆူၣ်နၤလီၤ.+
၈ နဂုာ်န့ၢ်ဆူၣ် ပှၤအါကလုာ်
ဒီးနမၤသံပှၤဂၤ,
နမၤဟးဂီၤကီၢ်,+
ဝ့ၢ်တဖၣ် ဒီးပှၤဝ့ၢ်ဖိတဖၣ်အဃိ
ပှၤအဂၤ လၢအအိၣ်တ့ၢ်တဖၣ်န့ၣ် ကဂုာ်န့ၢ်ဆူၣ်နၤလီၤ.+
၉ ပှၤလၢအမၤတၢ်အၢတၢ်သီ ဒ်သိး အဒူၣ်ဖိထၢဖိ ကန့ၢ်ဘၣ်တၢ်အဂီၢ်
ဒီးအပာ်ထီၣ် အသွံလၢ တၢ်လီၢ်ထီၣ်ထီ
ဒ်သိးကပူၤဖျဲးလၢ တၢ်နးတၢ်ဖှီၣ်န့ၣ် ကဘၣ်နးဘၣ်ဖှီၣ်လီၤ.
၁၀ နကူၣ်ထီၣ်တၢ်န့ၣ် ကဲထီၣ် တၢ်လီၤမဲာ်ဆှးလၢ နဒူၣ်ဖိထၢဖိအဂီၢ်
ဒီးနမၤကမၣ်လီၤနသး ခီဖျိလၢ နမၤသံ ပှၤအါဂၤလီၤ.+
၁၁ လၢၢ်တဖျၢၣ်လၢအအိၣ်လၢ တၢ်ဒူၣ်ပူၤန့ၣ် ကကိးထီၣ်
ဒီးသ့ၣ်အဘိလၢ ဟံၣ်ခိၣ်ဒုးန့ၣ် ကစံးဆၢက့ၤတၢ်လီၤ.
၁၂ ပှၤလၢအလူလီၤ တၢ်သွံၣ်လၢ ကတ့ထီၣ် ဝ့ၢ်အဂီၢ်
ဒီးအမၤတၢ်တတီတလိၤ ဒ်သိးကမၤဂၢၢ်ကျၢၤထီၣ် ဝ့ၢ်အဂီၢ်န့ၣ် ကဘၣ်နးဘၣ်ဖှီၣ်လီၤ.
၁၃ အဝဲသ့ၣ် မၤတၢ်ဆူၣ်ဆူၣ်လၢ တၢ်လၢအကကဲထီၣ် မ့ၣ်အူဆၣ်အဂီၢ်
ဒီးပှၤကလုာ်တဖၣ်အံၤန့ၣ် မၤလီၤဘှံးအသးလၢ တၢ်ကလီကလီ အဂီၢ်လီၤ.+ ပှၤလၢအကဒုးကဲထီၣ် တၢ်ဒ်အံၤန့ၣ် အကဲ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တမ့ၢ်ဧီၤ.
၁၅ ပှၤလၢ အသူၣ်ဒိၣ်သးဖျိး
ဒီးဒုးအီမူၤ အသကိးတဖၣ်လၢသံး
ဒ်သိး ကထံၣ်ဘၣ် အဝဲသ့ၣ် အိၣ်ဘ့ၣ်ဆ့ အဂီၢ်န့ၣ် ကဘၣ်နးဘၣ်ဖှီၣ်လီၤ.
၁၆ လၢနကဒိးန့ၢ်ဘၣ် တၢ်လၤကပီၤအလီၢ် နကဒိးန့ၢ်ဘၣ် တၢ်မဲာ်ဆှး ဖးဒိၣ်လီၤ.
နၤစ့ၢ်ကီး နကအီဘၣ်တၢ် ဒီးနတဒိး တၢ်ကူးတရံးဘၣ်န့ၣ် ကအိၣ်ဖျါထီၣ်ဝဲလီၤ.
ခွးလၢ အအိၣ်လၢယဟိဝၤယွၤ အစုထွဲတခီအပူၤန့ၣ် ကဟဲတုၤလၢ နအိၣ်စ့ၢ်ကီး+
ဒီးတၢ်မဲာ်ဆှး ကကျၢၢ်ဘၢကွံာ် နတၢ်လၤတၢ်ကပီၤလီၤ.
၁၇ ဒ်နမၤဆူၣ်မၤစိး လဘၤနိၣ်အသိး တၢ်ကမၤဆူၣ်မၤစိးနၤ ဒ်န့ၣ်လီၤ.
ဒီးဒ်နမၤပျံၤမၤဖုး ဒီးမၤဟးဂီၤ ဆၣ်ဖိကီၢ်ဖိတဖၣ် အသိးန့ၣ် တၢ်ကမၤဟးဂီၤနၤ ဒ်န့ၣ်လီၤ.
၁၈ တၢ်ဂီၤတၢ်ဖှီၣ်လၢ ပှၤစိးပျၤအီၤန့ၣ်
အဘျုးကအိၣ်ဒ်လဲၣ်.
တၢ်ဂီၤတၢ်ဖှီၣ်ထး ဒီးပှၤလၢအသိၣ်လိ တၢ်လံၣ်တၢ်လီန့ၣ် အတကဲဘျုး နီတမံၤဘၣ်.
ပှၤလၢအတ့ထီၣ် ယွၤလၢအလုၢ်အပှ့ၤ တအိၣ်ဘၣ်တဖၣ်န့ၣ် နာ်အီၣ် ယွၤတဖၣ်အံၤ ကသ့ဒ်လဲၣ်.
တၢ်ဂီၤတၢ်ဖှီၣ်တဖၣ်အံၤန့ၣ် တဲတၢ်တသ့ နီတမံၤဘၣ်.+
၁၉ ပှၤလၢအတဲ သ့ၣ်အကူာ်အခီလၢ “ဆၢထၢၣ်သၢၤ”
ဒီးပှၤလၢအတဲ လၢၢ်လၢအတဲတၢ်တသ့ နီတမံၤဘၣ်လၢ “ဆၢထၢၣ် ဒီးသိၣ်လိပှၤသၢၤ” န့ၣ် ကဘၣ်နးဘၣ်ဖှီၣ်လီၤ.
၂၀ ဘၣ်ဆၣ် မ့မ့ၢ်ယဟိဝၤယွၤန့ၣ် အိၣ်လၢအတၢ်လုၢ်ဟံၣ်စီဆှံ အပူၤလီၤ.+
အဃိ ပှၤလၢအအိၣ်လၢ ဟီၣ်ခိၣ်ချၢ ခဲလၢာ်သ့ၣ်ဧၢ, အိၣ်ဘှ့ၣ်လၢ အမဲာ်ညါတက့ၢ်.’”+
၃ ဝံဃဘးကူာ် ဃ့ဘါထုကဖၣ်တၢ် ဒ်ထါဟီၣ်အသိးလၢ
၂ အိ ယဟိဝၤယွၤဧၢ, ယနၢ်ဟူဘၣ် နကစီၣ်လီၤ.
အိ ယဟိဝၤယွၤဧၢ, တၢ်လၢနမၤသ့ၣ်တဖၣ်န့ၣ် ဒုးကမၢကမၣ် ယၤလီၤ.
မၤကဒီးအီၤလၢ ပစိၤအံၤ* တက့ၢ်.
ဒီးပာ်ဖျါထီၣ်ကဒီး တၢ်သ့ၣ်တဖၣ်န့ၣ် လၢပစိၤအံၤ* တက့ၢ်.
ဖဲတၢ်သဘံၣ်သဘုၣ် အဆၢကတီၢ်န့ၣ် မ်နသ့ၣ်နီၣ်ထီၣ်က့ၤလၢ နကပာ်ဖျါထီၣ် တၢ်သးကညီၤအဂီၢ်တက့ၢ်.+
၃ ကစၢ်ယွၤ အိၣ်ဟဲလၢ တ့ၤမၣ် အဟီၣ်ကဝီၤ,
ပှၤလၢအစီဆှံတဂၤအံၤ အိၣ်ဟဲလၢ ကစၢၢ်ပၤရၣ်လီၤ.+ (စ့လၤ)*
အတၢ်ဒိၣ်တၢ်မုၢ်န့ၣ် လုၢ်ဘၢကွံာ် မူခိၣ်+
ဒီးဟီၣ်ခိၣ်ပှဲၤဝဲဒီး ပှၤလၢအစံးထီၣ်ပတြၢၤအီၤတဖၣ်လီၤ.
၄ ဒီးကစၢ်ယွၤ အတၢ်ကပြုၢ်ကပြီၤန့ၣ် လီၤဂာ်ဒ်သိးဒီး မုၢ် အတၢ်ကပီၤလီၤ.+
အတၢ်ဂံၢ်တၢ်ဘါ အိၣ်ခူသူၣ်ဝဲလၢ အစုပူၤ
ဒီးတၢ်ကပီၤအယဲၤခံခါန့ၣ် ဟဲကပြုၢ်ထီၣ် လၢအစုလီၤ.
၅ တၢ်ဆါသံသတြိာ် လဲၤဝဲလၢ ကစၢ်ယွၤအမဲာ်ညါ+
ဒီးတၢ်လိၤကိၢ်ဒိၣ်ဒိၣ်န့ၣ် ပိာ်ထီၣ် အခံလီၤ.
ကစၢၢ်လၢ အအိၣ်ပာ်စၢၤ ဖးယံာ်န့ၣ် လီၤသဘှံးကွံာ်
ဒီးတၢ်လူၢ်လၢပျၢၤတဖၣ် လီၤပှီၢ်ကွံာ်ဝဲလီၤ.+
အဝဲကမၤဝဲ ဒ်အမၤတ့ၢ်ဝဲ လၢပျၢၤအသိးလီၤ.
၇ ယထံၣ်ဘၣ် တၢ်ကီတၢ်ခဲတဖၣ်လၢ ကီၢ်ကူၤၡးအဒဲတဖၣ်အပူၤ
ဒီးကီၢ်မံးဒယၣ် အဒဲအတၢ်ကံးညာ်တဖၣ် ကနိးကစုာ်လီၤ.+
မ့ၢ်နသးပှံၢ်ထီၣ် ပီၣ်လဲၣ်ဧါ.+
နလ့ၣ်ကဟၣ်တဖၣ်န့ၣ် မၤနၢၤတ့ၢ်တၢ်လီၤ.*+
၉ နထုးထီၣ်နချံၣ် ဒီးနအိၣ်ကတဲာ်ကတီၤနသး လၢနကခးတၢ်အဂီၢ်လီၤ.
နနီၣ်တီၢ်တဖၣ်န့ၣ်* အိၣ်ကတဲာ်ကတီၤအသးလၢ ကမၤဝဲ ဒ်တၢ်အၢၣ်လီၤ အိၣ်ပာ်စၢၤဝဲအသိးလီၤ.
ဒီးနမၤလီၤဖးဟီၣ်ခိၣ် ခီဖျိလၢ ထံကျိတဖၣ်လီၤ.
၁၀ ဖဲကစၢၢ်ကလိတဖၣ် ထံၣ်နၤအခါ ဝံာ်ပကံးအသးလၢ အတူၢ်ဘၣ်တၢ် ဆါအဃိလီၤ.+
၁၁ မုၢ်ဒီးလါန့ၣ် အိၣ်ဂၢၢ်တပၢၢ်လၢ အလီၢ်ဒၣ်ဝဲ လၢမူခိၣ်လီၤ.+
ဒီးနပျၢ် လၢအကပြုၢ်ကပြီၤတဖၣ် လဲၤတၢ်+
ဒီးနဘီန့ၣ် ကပီၤဝဲမျးမျး ဒ်လီဝၢ်ဒံးအသိးလီၤ.
၁၂ နလဲၤတၢ် လၢဟီၣ်ခိၣ်ဒီဘ့ၣ်လၢ တၢ်သူၣ်ဒိၣ်သးဖျိးအပူၤ
ဒီးနယီၢ်တံၢ် ပှၤကလုာ်တဖၣ်လၢ တၢ်သးဒိၣ်ထီၣ် အပူၤလီၤ.
၁၃ နဟးထီၣ်ဒ်သိး နကအုၣ်က့ၤခီၣ်က့ၤ နပှၤဂီၢ်မုၢ် ဒီးနအုၣ်က့ၤခီၣ်က့ၤ နပှၤဒိးဖှူသးတဂၤလီၤ.
ဒီးနမၤသဘှံး ပှၤအၢပှၤသီအဟံၣ် အပှၤခိၣ်ပှၤနၢ်တဂၤ
ဒီးနမၤဟးဂီၤကွံာ် အဟံၣ်အခီၣ်ထံး တုၤလၢ အဖီခိၣ်ကတၢၢ်လီၤ. (စ့လၤ)
၁၄ အပှၤသုးဖိတဖၣ် အိၣ်ခိးခူသူၣ်တၢ်လၢ တၢ်သးခုအပူၤ ဒ်သိး ကမၤသံပှၤလၢ အဘၣ်နးဘၣ်ဖှီၣ်တဖၣ်လီၤ.
ဒီးဖဲအပှၤသုးဖိတဖၣ် ဟဲဒ်ကလံၤမုၢ် ဒ်သိးကမၤလီၤပြံလီၤပြါပှၤ* အခါ
နဆဲးဖျိ အဝဲသ့ၣ် အခိၣ်လၢအနီၢ်ကစၢ် အစုကဝဲၤတဖၣ်လီၤ.*
၁၅ နလဲၤခီဂာ် ပီၣ်လဲၣ်
ဒီးပီၣ်လဲၣ် အလပီဖးဒိၣ်တဖၣ်လၢ နကသ့ၣ်တဖၣ်လီၤ.
၁၆ ဖဲယနၢ်ဟူ တၢ်ဂ့ၢ်တခါအံၤအခါ ယသးကနိး
ဒီးယထးခိၣ် ကနိး ခီဖျိလၢ တၢ်ကစီၣ်တခါအံၤအဃိလီၤ.
ဘၣ်ဆၣ် ကစၢ်ယွၤ ကဒုးဝဲ ပှၤလၢ အထီဒါပှၤအဃိ
ဖဲယအိၣ်ခိး တၢ်ကိၢ်တၢ်ဂီၤ အမုၢ်နံၤဝဲန့ၣ်အခါ ယကပာ်ယသး ဂၢၢ်ဂၢၢ်လီၤ.+
၁၇ ချၢၣ်ဒၢထူၣ် မ့ၢ်တသၣ်ထီၣ်ဘၣ်,
ဒီးလၢစပံးမုၢ်တဖၣ်အလိၤ စပံးသၣ် မ့ၢ်တအိၣ်ဘၣ်,
ဒီးသ့ၣ်စၤယံးအထူၣ် မ့ၢ်တသၣ်ထီၣ်ဘၣ်,
ဒီးလၢစံာ်ပျီတဖၣ်အပူၤ တၢ်မ့ၢ်တမဲထီၣ်သၣ်ထီၣ် နီတမံၤဘၣ်,
ဒီးသိဒီးမဲာ်တဲးလဲးတဖၣ် မ့ၢ်လီၤမၢ်လၢ ကရၢအပူၤ,
ဒီးကျီၢ်တဖၣ် မ့ၢ်တအိၣ်လၢ ကျီၢ်ကရၢအပူၤ နီတဒုလၢၤဘၣ်သနာ်က့
၁၈ ယကသူၣ်ဖှံသးညီလၢ ယဟိဝၤယွၤအဃိလီၤ.
ဒီးယကသးခုလၢ ယတၢ်အုၣ်က့ၤ ခီၣ်က့ၤ အကစၢ်ယွၤအဃိလီၤ.+
၁၉ တၢ်ပၢကစၢ် ယဟိဝၤယွၤ မ့ၢ်ယဂံၢ်ယဘါလီၤ.+
အဝဲကဒုးဃ့ၢ်ယၤ ဒ်တၤဟိအသိး
ဒီးအဝဲကဒုးယီၢ်ယၤလၢ တၢ်လီၢ်လၢ အထီၣ်ထီတဖၣ်အလိၤ ကျၢၤကျၢၤလီၤ.+
လၢတၢ်သူၣ်ဝံၣ်သးဆၢအခိၣ်အဂီၢ်. ဒ့အီၤဃုာ်ဒီးယသီတူၢ်တဖၣ်.
ဘၣ်သ့ၣ်သ့ၣ် အခီပညီမ့ၢ်ဝဲ “ဖိးဟုဃံးဃံး.”
မ့ၢ်စ့ၢ်ကီး “မၤဘၣ်ဂီၢ်တၢ်.”
ဖျါလၢ ကစၢ်ယွၤစးထီၣ်တဲတၢ်.
အခီပညီလိၤလိၤ “အိၣ်ပာ်စၢၤ အစိၤစိၤအဃၣ်ဃၣ်.”
မ့ၢ်ဝဲ ဒုၣ်ဒါလၢအမ့ၢ် ပှၤက့ၤစ့းဖိ.
မ့ၢ်စ့ၢ်ကီး “တိာ်ဧိၤတာ်ဧိၤ.”
ဖျါလၢအဲၣ်ဒိးတဲဝဲ ကစၢ်ယွၤ.
ဘၣ်သ့ၣ်သ့ၣ် ကမ့ၢ် “တၢ်နာ်.”
လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
အခီပညီလိၤလိၤ “လၢနံၣ်တဖၣ်အပူၤ.”
အခီပညီလိၤလိၤ “လၢနံၣ်တဖၣ်အပူၤ.”
ကွၢ် တၢ်ကတိၤအခီပညီ.
မ့ၢ်စ့ၢ်ကီး “တၢ်အုၣ်က့ၤခီၣ်က့ၤ.”
ဘၣ်သ့ၣ်သ့ၣ် ကမ့ၢ် “ပျၢ်ဘိတဖၣ်.”
ဘၣ်သ့ၣ်သ့ၣ် အဲၣ်ဒိးတဲဝဲ လပီတဖၣ်.
အခီပညီလိၤလိၤ “ယၤ.” အဲၣ်ဒိးတဲဝဲ ပှၤတဒူၣ်ဃီ.
အခီပညီလိၤလိၤ “အနီၣ်တီၢ်တဖၣ်.”
အခီပညီလိၤလိၤ “တၢ်အုၣ်သံကျၣ်သံ ဟဲနုာ်လီၤလၢ ယဃံကျါ.”