စဖါနယၤ
၁ ဖဲစီၤအၤမိၣ်+ အဖိခွါ စီၤယိၤၡံယၤ+ လၢအမ့ၢ် ယူဒၤအစီၤပၤ အစိၤန့ၣ် ယဟိဝၤယွၤ ဟ့ၣ်လီၤတၢ်ကစီၣ်လၢ စီၤစဖါနယၤ* အအိၣ်လီၤ. စီၤစဖါနယၤ မ့ၢ်ဝဲ စီၤကူၤၡံ အဖိခွါ, စီၤကူၤၡံ မ့ၢ်ဝဲ စီၤကဒါလယၤ အဖိခွါ, စီၤကဒါလယၤ မ့ၢ်ဝဲ စီၤအမၤရယၤ အဖိခွါ ဒီးစီၤအမၤရယၤ မ့ၢ်ဝဲ စီၤဃံးစကံယၤ အဖိခွါလီၤ.
၂ ယဟိဝၤယွၤ တဲဝဲလၢ “ယကမၤလီၤမၢ်ကွံာ် တၢ်ခဲလၢာ်လၢ အအိၣ်လၢ ကီၢ်ပူၤလီၤ.”+
၃ ယဟိဝၤယွၤ တဲဝဲလၢ “ယကမၤလီၤမၢ်ကွံာ် ပှၤကညီဒီးဆၣ်ဖိကီၢ်ဖိ
ဒီးထိၣ်လၢမူခိၣ် ဒီးညၣ်လၢ ပီၣ်လဲၣ်ပူၤလီၤ.+
ဒီးယကမၤလီၤမၢ်ကွံာ် တၢ်လီၤဃံၢ်အလီၢ်*+ ဃုာ်ဒီးပှၤအၢပှၤသီ တဖၣ်လီၤ.
ဒီးယကမၤလီၤမၢ်ကွံာ် ပှၤဟီၣ်ခိၣ်ဖိ လၢကီၢ်ပူၤလီၤ.
၄ “ယကယၤထီၣ်ယစု ဒ်သိး ယကထီဒါယူဒၤအဘီမုၢ်
ဒီးဒ်သိး ယကထီဒါ ပှၤလၢအအိၣ်လၢ ဝ့ၢ်ယရူၤၡလ့ၣ်အပူၤတဖၣ် အဂီၢ်လီၤ.
ဒီးယကမၤဟးဂီၤကွံာ် တၢ်ခဲလၢာ် လၢအဘၣ်ထွဲဒီး ဘဧၤလး လၢအအိၣ်လၢ တၢ်လီၢ်ဖဲအံၤ+
ဒီးယကမၤလီၤမၢ်ကွံာ် ယွၤလၢအကမၣ် အပှၤလုၢ်တၢ်ဒိၣ်တဖၣ်အမံၤ ဒီးပှၤလုၢ်တၢ်ဒိၣ် အဂၤတဖၣ် အမံၤလီၤ.+
၅ ဒီးယကမၤဟးဂီၤကွံာ် ပှၤလၢအဘူၣ်ထီၣ်ဘါထီၣ် မူခိၣ်အသုးမုၢ်တဖၣ်* လၢဟံၣ်ခိၣ်ဒုးလီၤ.+
ဒီးပှၤလၢအဘူၣ်ထီၣ်ဘါထီၣ် ယဟိဝၤယွၤ ဒီးအၢၣ်လီၤဝဲလၢ ကတီဒီးအီၤ+
ဘၣ်ဆၣ် တကတီၢ်ဃီန့ၣ် အၢၣ်လီၤဝဲလၢ ကတီဒီး မၤလက့ၣ်* န့ၣ်ယကမၤဟးဂီၤကွံာ် အဝဲသ့ၣ်လီၤ.+
၆ ဒီးယကမၤဟးဂီၤကွံာ် ပှၤလၢအဃၣ်ကွံာ်အသး လၢယဟိဝၤယွၤ အအိၣ်+
ဒီးပှၤလၢအတဃု ယဟိဝၤယွၤ ဒီးတဃ့တၢ်ဟံးစုနဲၣ်ကျဲ လၢအအိၣ်ဘၣ်န့ၣ်လီၤ.”+
၇ မ့ၢ်လၢ ယဟိဝၤယွၤ အမုၢ်နံၤ ဘူးထီၣ်လံအဃိ အိၣ်ဘှ့ၣ်လၢ တၢ်ပၢကစၢ် ယဟိဝၤယွၤ အမဲာ်ညါတက့ၢ်.+
ယဟိဝၤယွၤ ကတဲာ်ကတီၤဝဲ တၢ်လုၢ်တခါ ဒီးပာ်စီဆှံဝဲ ပှၤလၢ အကွဲမုာ်ဝဲတဖၣ်လံ.
၈ “ဖဲယၤ, ယဟိဝၤယွၤ အတၢ်လုၢ်ထီၣ်တၢ် အနံၤန့ၣ် ယကစံၣ်ညီၣ် ပဒိၣ် ဖးဒိၣ်တဖၣ်,
စီၤပၤအဖိခွါတဖၣ်+ ဒီးပှၤလၢအကူကၤ ပှၤထံဂၤကီၢ်ဂၤ အတၢ်ကူ တၢ်ကၤတဖၣ် ကိးဂၤဒဲးလီၤ.
၉ ဒီးဖဲတၢ်တနံၤန့ၣ် ယကစံၣ်ညီၣ် ပှၤလၢအလဲၤထီၣ်ဝဲ ပျဲၢ်စီၢ်ခိၣ် ကိးဂၤဒဲး
ဒီးပှၤလၢ အမၤပှဲၤ အကစၢ်အဟံၣ်လၢ တၢ်မၤဆူၣ်မၤစိး ဒီးတၢ်လံၣ်တၢ်လီန့ၣ်လီၤ.”
၁၀ ယဟိဝၤယွၤ တဲဝဲလၢ “ဖဲတၢ်တနံၤန့ၣ်
တၢ်ဟီၣ်တၢ်ယၢၤ ကသီၣ်ထီၣ်ဝဲလၢ ညၣ်အတြဲၤ+
ဒီးတၢ်ဟီၣ်ကိးပသူ ကသီၣ်ထီၣ်ဝဲလၢ ဝ့ၢ်အတၢ်လီၢ် ခံတီၤတတီၤ+
ဒီးတၢ်ဘၣ်ထံးအသီၣ်ဖးဒိၣ် ကသီၣ်ထီၣ်ဝဲလၢ တၢ်လူၢ်တဖၣ် အကျါလီၤ.
၁၁ ပှၤဆါတၢ်ပှ့ၤတၢ်ဖိတဖၣ် ကသံခဲလၢာ်
ဒီးပှၤလၢ အစီၤကွၢ် စ့ညၣ်တဖၣ် စ့ၢ်ကီး တၢ်ကမၤဟးဂီၤကွံာ် အဝဲသ့ၣ် ကိးဂၤဒဲး အဃိ
ပှၤလၢအအိၣ်ဝဲလၢ မးကတ့ၣ် လီၢ်ကဝီၤပူၤသ့ၣ်ဧၢ, သုကဟီၣ် ကိးပသူလီၤ.
၁၂ ဖဲန့ၣ်အဆၢကတီၢ် ယကဒွဲၣ်ထီၣ် မ့ၣ်အူဒၢတဖၣ် ဒီးဃုကွၢ် တၢ်လၢ ယရူၤၡလ့ၣ်အပူၤ လီၤတံၢ်လီၤဆဲးလီၤ.
ဒီးယကစံၣ်ညီၣ် ပှၤလၢအသးမံဒၣ် အတၢ်လၢ အတဲလီၤ အနီၢ်ကစၢ်သးလၢ
‘တမ့ၢ်လၢ ယဟိဝၤယွၤ ကမၤတၢ်လၢအဂ့ၤဘၣ် ဒီးတမ့ၢ်လၢ အဝဲကမၤတၢ်လၢ အအၢ စ့ၢ်ကီးဘၣ်.’+
၁၃ အဝဲသ့ၣ် အတၢ်ထူးတၢ်တီၤန့ၣ် ကဘၣ်တၢ်ဂုာ်န့ၢ်အီၤ ဒီးမ့မ့ၢ် အဝဲသ့ၣ်အဟံၣ်န့ၣ် ကဘၣ်တၢ်မၤဟးဂီၤကွံာ်အီၤလီၤ.+
အဝဲသ့ၣ် ကသူၣ်ထီၣ် အဟံၣ်ဘၣ်ဆၣ် အဝဲသ့ၣ် တအိၣ်ဘၣ်လၢ အပူၤဘၣ်.
ဒီးအဝဲသ့ၣ် ကသူၣ်လီၤဝဲ စပံးကျီး ဘၣ်ဆၣ် တအီဘၣ် စပံးထံဘၣ်.+
၁၄ ယဟိဝၤယွၤ အမုၢ်နံၤဖးဒိၣ်န့ၣ် ဘူးထီၣ်လံ.+
အဘူးထီၣ်ဝဲ ဒီးအဟဲဝဲ ချ့ချ့လီၤ.+
ယဟိဝၤယွၤ အမုၢ်နံၤအသီၣ်န့ၣ် လီၤပျံၤလီၤဖုးလီၤ.+
ဒီးဖဲတၢ်တနံၤန့ၣ် ပှၤသုးဖိတဖၣ် ကဟီၣ်ကိးပသူထီၣ်လၢအကလုၢ် ဖးဒိၣ်လီၤ.+
၁၅ တၢ်တနံၤန့ၣ် မ့ၢ်ဝဲ တၢ်သးထီၣ် အမုၢ်နံၤ,+
တၢ်သူၣ်ကိၢ်သးဂီၤ ဒီးတၢ်ကီတၢ်ခဲ အမုၢ်နံၤ,+
ကလံၤမုၢ် ဒီးတၢ်မၤဟးဂီၤတၢ် အမုၢ်နံၤ,
တၢ်ခံး ဒီးတၢ်ခံးသူ အမုၢ်နံၤ,+
ဒီးတၢ်အၢၣ် ဒီးတၢ်အၢၣ်ခံးသူ အမုၢ်နံၤလီၤ.+
၁၆ ဒီးမ့ၢ်ဝဲ ကွဲၤသီၣ် ဒီးတၢ်ဒုးအတၢ်ကိးပသူထီၣ် အမုၢ်နံၤလီၤ.+
ဒီးအမ့ၢ်ဝဲ မုၢ်နံၤလၢ ပှၤကဒုး ဝ့ၢ်လၢအအိၣ်ဒီး အဒူၣ်လၢအကျၢၤတဖၣ် ဒီးတၢးထီလၢ အအိၣ်လၢ တၢ်နၢၣ်ထံးတဖၣ်လီၤ.+
၁၇ မ့ၢ်လၢ ပှၤဟီၣ်ခိၣ်ဖိတဖၣ် မၤကမၣ် ယဟိဝၤယွၤအဃိ+
ယကဒုးလီၤဘၣ် တၢ်ကိၢ်တၢ်ဂီၤ လၢအဝဲသ့ၣ်အလိၤ
ဒီးအဝဲသ့ၣ် ကဘၣ်ဟး ဒ်ပှၤမဲာ်တထံၣ်တၢ် အသိးလီၤ.+
အဝဲသ့ၣ် အသွံၣ်န့ၣ် ကဘၣ်တၢ်လူလီၤကွံာ်အီၤ ဒ်ဟီၣ်ခိၣ်ကမူၣ်အသိး
ဒီးအညၣ်န့ၣ် ကကဲထီၣ်ဒ်သိးဒီး တၢ်အ့ၣ်လီၤ.+
၁၈ ဖဲယဟိဝၤယွၤ အတၢ်သးဒိၣ် အမုၢ်နံၤန့ၣ် အဝဲသ့ၣ် အစ့ညၣ်မ့ၢ်ဂ့ၤ, အထူမ့ၢ်ဂ့ၤ မၤပူၤဖျဲး အဝဲသ့ၣ် တန့ၢ်ဘၣ်.+
ကစၢ်ယွၤ အတၢ်သးဆူၣ်လၢ အလီၤဂာ်ဒီးမ့ၣ်အူန့ၣ် ကအီၣ်ကွံာ်ကီၢ်* ဒီဘ့ၣ်+
မ့ၢ်လၢအဝဲကမၤဟးဂီၤကွံာ် ပှၤလၢအအိၣ်လၢ ကီၢ်ပူၤခဲလၢာ် သတူၢ်ကလာ် အဃိလီၤ.”+
၂ တချုးလၢ တၢ်ကလုၢ်လီၤဒံးဘၣ်
ဒီးတချုးလၢ မုၢ်နံၤဒံကွံာ်ဝဲ ဒ်ဖ့အသိးဒံးဘၣ်
ဒီးတချုးလၢ ယဟိဝၤယွၤ အတၢ်သးဒိၣ် လီၤဘၣ်လၢ သုဖီခိၣ်ဒံးဘၣ်+
ဒီးတချုးလၢ ယဟိဝၤယွၤ အတၢ်သးထီၣ် အမုၢ်နံၤ ဟဲဘၣ်သုဒံးဘၣ်န့ၣ်
၃ ကယဲၢ်ပှၤလၢ အအိၣ်ဒီး တၢ်ဆီၣ်လီၤသးလၢ
အမၤထွဲ ကစၢ်ယွၤ အတၢ်သိၣ်တၢ်သီလၢ အတီအလိၤတဖၣ်သ့ၣ်ဧၢ, ဃုယဟိဝၤယွၤတက့ၢ်.+
ဂုာ်ကျဲးစၢး မၤတၢ်တီတီလိၤလိၤ ဒီးပာ်ဖျါထီၣ် တၢ်ဆီၣ်လီၤသးတက့ၢ်.
ဖဲယဟိဝၤယွၤ အတၢ်သးထီၣ် အမုၢ်နံၤန့ၣ် ဘၣ်သ့ၣ်သ့ၣ် သုကဒိးန့ၢ်ဘၣ် တၢ်ဒီသဒၢလီၤ.+
၄ ဝ့ၢ်ဂါစၤ ကဘၣ်တၢ်ပာ်တ့ၢ်ကွံာ်အီၤ
ဒီးဝ့ၢ်အၤၡကလိၣ် ကဘၣ် အိၣ်သယုၢ်လီၤ.+
ဒီးပှၤလၢအအိၣ်လၢ ဝ့ၢ်အၤစဒိာ် အပူၤန့ၣ် ကဘၣ် တၢ်နီဟးထီၣ်ကွံာ်အီၤလၢ မုၢ်ထူၣ်အဆၢကတီၢ်
ဒီးဝ့ၢ်ဧ့ကြိၣ် ကဘၣ်တၢ်မၤဟးဂီၤကွံာ်အီၤ လၢာ်လၢာ်ဆ့ဆ့လီၤ.+
၅ “အိ ပှၤကရံသးဖိလၢ အအိၣ်လၢ ပီၣ်လဲၣ်နံၤသ့ၣ်ဧၢ,+
မ့ၢ်လၢ ယဟိဝၤယွၤ ပာ်ဒ့ၣ်ပာ်ကမၣ်သုအဃိလီၤ.
အိ ကီၢ်ကနၤဧၣ် လၢအမ့ၢ် ပှၤဖလ့ၡသးဖိ အတၢ်လီၢ်တၢ်ကျဲဧၢ, ယကမၤဟးဂီၤကွံာ်နၤ
ဒီးပှၤတအိၣ်လၢနပူၤ နီတဂၤလၢၤဘၣ်.
၆ ဒီးပီၣ်လဲၣ်နံၤ ကကဲထီၣ် တၢ်အီၣ်ဆၣ်အလီၢ်လၢ အအိၣ်ဒီး
ထံကမျၢတဖၣ်လၢ ပှၤကွၢ်သိတဖၣ်အဂီၢ် ဒီးအကအိၣ်ဒီး ကရၢတဖၣ်လၢ သိတဖၣ် အဂီၢ်လီၤ.
၇ ဒီးတၢ်လီၢ်အံၤ ကကဲထီၣ် ယူဒၤ အပှၤဂီၢ်မုၢ်* လၢအအိၣ်တ့ၢ်တဖၣ် အတၢ်လီၤ.+
ဒီးအဝဲသ့ၣ် ကအီၣ်တၢ်ဖဲန့ၣ်လီၤ.
ဖဲဟါလီၤခီ အဆၢကတီၢ်န့ၣ် အဝဲသ့ၣ် ကမံနီၤဝဲလၢ ဝ့ၢ်အၤၡကလိၣ် အဟံၣ်တဖၣ် အပူၤလီၤ.
အဝဲသ့ၣ် အကစၢ် ယဟိဝၤယွၤ ကသူၣ်အိၣ်သးအိၣ်က့ၤ အဝဲသ့ၣ်
ဒီးအဝဲ ကကိးဖှိၣ်က့ၤ အဝဲသ့ၣ် အပှၤလၢ အဘၣ်တၢ်က့ၤဖီၣ်အီၤ တဖၣ်လီၤ.”+
၈ “ယနၢ်ဟူ ပှၤမိၤအးဖိ+ ဒီးပှၤဧၣ်မိၣ်ဖိတဖၣ် အတၢ်ဒုၣ်ဒွဲၣ်လီၤ.+
အဝဲသ့ၣ် တဲဆဲးအဲး ယပှၤဂီၢ်မုၢ် ဒီးလၢတၢ်ပာ်ထီၣ်ထီသးအပူၤ အဝဲသ့ၣ် တဲဝဲလၢ အကဟံးန့ၢ် ယပှၤဂီၢ်မုၢ် အတၢ်လီၢ်တၢ်ကျဲလီၤ.”+
၉ ဒီးတၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “ဒ်ယမ့ၢ်ပှၤလၢအမူဝဲ သပှၢ်တၢၢ်အသိးန့ၣ် ယအၢၣ်လီၤလၢ
မိၤအး ကကဲထီၣ် ဒ်သိးဒီး ဝ့ၢ်စဒိၣ်+
ဒီးပှၤဧၣ်မိၣ်ဖိတဖၣ် ကကဲထီၣ်ဒ် ဝ့ၢ်ဂမိရၤအသိး သပှၢ်တၢၢ်လီၤ.+
ဒီးလးဆါအထူၣ် ကမဲထီၣ်ဖဲန့ၣ် ဒီးအဟီၣ်ခိၣ် ကအိၣ်ပှဲၤဒီး အံသၣ်တဖၣ် ဒီးကကဲထီၣ် တၢ်လီၢ်လၢ အအိၣ်သယုၢ် လီၤထူလီၤယိာ်လီၤ.+
ယပှၤဂီၢ်မုၢ်လၢ အအိၣ်တ့ၢ်တဖၣ် ကဂုာ်န့ၢ်ဆူၣ် အဝဲသ့ၣ်အတၢ်
ဒီးယပှၤကလုာ်လၢ အအိၣ်တ့ၢ်တဖၣ် ကမၤန့ၢ် အဝဲသ့ၣ် အတၢ်လီၢ် တၢ်ကျဲလီၤ.
၁၀ အဝဲသ့ၣ် ဒုၣ်ဒွဲၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အပှၤဂီၢ်မုၢ် ဒီးပာ်ထီၣ်ထီအသးလၢ အဝဲသ့ၣ် အဖီခိၣ်လီၤ.
လၢအဝဲသ့ၣ် အတၢ်ပာ်ထီၣ်ထီအသးအဃိ အဝဲသ့ၣ် ကတူၢ်ဘၣ်ဝဲ ဒ်န့ၣ်လီၤ.+
၁၁ ယၤ, ယဟိဝၤယွၤ ကကဲထီၣ် တၢ်လီၤပျံၤလီၤဖုးလၢ အဝဲသ့ၣ် အဂီၢ်လီၤ.
ဒီးယကမၤဟးဂီၤ ယွၤတဖၣ်လၢ ဟီၣ်ခိၣ်ချၢ ခဲလၢာ်လီၤ.
ပှၤကလုာ်တဖၣ် ခဲလၢာ်လၢ အအိၣ်လၢ ကီးတဖၣ်အပူၤန့ၣ် ကဘူၣ်ထီၣ်ဘါထီၣ်ယၤလၢ+
အနီၢ်ကစၢ် တဂၤစုာ်စုာ်အိၣ်ဝဲ အလီၢ်န့ၣ်လီၤ.
၁၂ ပှၤအဲၤသံအီးပးဖိသ့ၣ်ဧၢ, သုကသံ လၢယနးအဃိ စ့ၢ်ကီးလီၤ.+
၁၃ အဝဲ* ကယၤထီၣ်အစု လၢကလံၤစိးတခီ ဒီးကမၤဟးဂီၤကွံာ် ကီၢ်အၤၡူၢ်လီၤ.
ဒီးအဝဲ ကဒုးအိၣ်သယုၢ် ဝ့ၢ်နံၤနဝ့+ ဒ်မဲးမုၢ်ခိၣ် လၢအဃ့ထီ အသိးလီၤ.
၁၄ ဆၣ်ဖိကီၢ်ဖိအဖု ဒီးဆၣ်ဖိကီၢ်ဖိအမံၤ ကိးကလုာ်ဒဲး ကမံနီၤဝဲဖဲန့ၣ်လီၤ.
ထိၣ်ဒိၣ်ဖုၣ်ခီၣ်တဖၣ် ဒီးသူၣ်ကအိၣ်လၢ ဝ့ၢ်အတၢ်ထူၣ်အခိၣ်ထိးလၢ အလီၤပှီၢ်တဖၣ် အကျါ ဒီတနၤညါ.
ဒီးတၢ်ကလုၢ် ကသီၣ်ထီၣ်ဝဲလၢ ပဲတြီဖိအပူၤလီၤ.
မ့ၢ်လၢ သ့ၣ်ဆှိအ့ရ့းဘ့ၣ်ဘၣ်တဖၣ် ကဘၣ်တၢ်မၤဟးဂီၤကွံာ်အီၤအဃိ
ဖဲကျဲနုာ်လီၤအလီၢ်န့ၣ် ကအိၣ်ထဲ တၢ်ဟးဂူာ်ဟးဂီၤလီၤ.
၁၅ ဝ့ၢ်တဝ့ၢ်အံၤ မ့ၢ်ဝ့ၢ်လၢ အပာ်ထီၣ်ထီအသး ဒီးဆ့ၣ်နီၤဝဲလၢ တၢ်ဘံၣ်တၢ်ဘၢ အပူၤလီၤ.
ဝ့ၢ်တဝ့ၢ်အံၤ တဲလီၤအသးလၢ ‘ယမ့ၢ်နီၣ်ဂံၢ်တၢလီၤ. ပှၤဒ်သိးယၤ တအိၣ်ဘၣ်.’
အဃိ ဝ့ၢ်အံၤ ကကဲထီၣ် တၢ်လီၤကမၢကမၣ်လၢ ပှၤဂၤအဂီၢ်
ဒီးကကဲထီၣ် တၢ်လီၢ်လၢ ဆၣ်ဖိကီၢ်ဖိအမံၤတဖၣ် ကမံနီၤဝဲ အလီၢ်လီၤ.
ပှၤလၢ အလဲၤဘၣ်ကျဲ ဖဲန့ၣ်တဖၣ် ကဒုၣ်ဒွဲၣ်အီၤ ဒီးဂံၤဂုၤ အခိၣ်လီၤ.”*+
၃ ဝ့ၢ်* လၢအထီဒါက့ၤတၢ်, အဘၣ်အၢဘၣ်သီ ဒီးအဆီၣ်တံၢ်မၤနၢၤတၢ်န့ၣ် ကဘၣ်နးဘၣ်ဖှီၣ် သပှၢ်တၢၢ်လီၤ.+
၂ ပှၤဝ့ၢ်ဖိတဖၣ်န့ၣ် အတၢ်ဒိကနၣ် တအိၣ်ဘၣ်.+ အဝဲသ့ၣ် တတူၢ်လိာ် တၢ်သိၣ်က့ၤသီက့ၤ နီတစဲးဘၣ်.+
ဒီးအဝဲသ့ၣ် တနာ်န့ၢ် ယဟိဝၤယွၤဘၣ်+ ဒီးတသုးဘူးအသးဆူ အကစၢ်ယွၤအအိၣ် စ့ၢ်ကီးဘၣ်.+
၃ အဝဲသ့ၣ် အပဒိၣ်ဖးဒိၣ်တဖၣ်န့ၣ် မၤအသးဒ်သိးဒီး ခ့ယုၢ်လၢ အကညီၤတၢ် တဖၣ်လီၤ.+
အဝဲသ့ၣ် အစံၣ်ညီၣ်ကွီၢ်တဖၣ်န့ၣ် မၤအသးဒ် ထွံၣ်မံၤတဖၣ်လၢ မုၢ်နၤခီအသိးလီၤ.
တၢ်အဃံတဘိမး အဝဲသ့ၣ် တပာ်တ့ၢ်ဝဲ တုၤလၢဂီၤခီ ဒ်သိး ကအ့ၣ်အီၣ်ဝဲ အဂီၢ်ဘၣ်.
၄ အဝဲသ့ၣ်အဝံတဖၣ် ပာ်ထီၣ်ထီအသး ဒီးမ့ၢ်ပှၤလၢ အသးတတီဘၣ် တဖၣ်လီၤ.+
အပှၤလုၢ်တၢ်ဒိၣ်တဖၣ်န့ၣ် မၤဘၣ်အၢ တၢ်လၢအစီဆှံလီၤ.+
ဒီးအဝဲသ့ၣ် မၤကမၣ် တၢ်သိၣ်တၢ်သီလီၤ.+
၅ ယဟိဝၤယွၤ တီဝဲလိၤဝဲ ဒီးအိၣ်ဝဲလၢ ပှၤအိၣ်ဖဲန့ၣ်တဖၣ်အကျါ+ ဒီးတမၤကမၣ်တၢ် နီတမံၤဘၣ်.
ဒီးဒ်မုၢ်ဟဲထီၣ် ကိးနံၤဒဲးအသိး တဂီၤဘၣ်တဂီၤန့ၣ်
အဝဲတဲဖျါထီၣ် အတၢ်သိၣ်တၢ်သီတဖၣ် ထီဘိလီၤ.+
ဘၣ်ဆၣ် မ့မ့ၢ်ပှၤတတီတလိၤဘၣ်န့ၣ် တသ့ၣ်ညါ မဲာ်ဆှးဒံးဘၣ်.+
၆ “ယမၤဟးဂီၤကွံာ် ပှၤကလုာ်တဖၣ်လံ. ဒီးအဝဲသ့ၣ် အတၢးထီတဖၣ်လၢ အဝ့ၢ်ဒူၣ်အကပၤန့ၣ် ယဒုးအိၣ်သယုၢ်အီၤလီၤ.
ဒ်သိး ပှၤသုတလဲၤ ဖဲန့ၣ်တဂ့ၤအဂီၢ် ယမၤဟးဂီၤကွံာ် အဝဲသ့ၣ် အကျဲတဖၣ်လီၤ.
အဝဲသ့ၣ် အဝ့ၢ်တဖၣ်န့ၣ် ဟးဂီၤဝဲအဃိ ပှၤတအိၣ်လၢအပူၤ နီတဂၤလၢၤဘၣ်.+
၇ ယတဲပှၤဝ့ၢ်ဖိတဖၣ်လၢ* ‘သုကဘၣ်ပျံၤယၤ ဒီးတူၢ်လိာ် တၢ်သိၣ်က့ၤ သီက့ၤလီၤ.’+
သုမ့ၢ်မၤဒ်န့ၣ်န့ၣ် ယတစံၣ်ညီၣ်သု ခီဖျိလၢ သုတၢ်ဒဲးဘးခဲလၢာ် အဃိလၢၤဘၣ်+
ဒီးသုဝ့ၢ် တတုၤလၢတၢ်ဟးဂီၤ လၢၤဘၣ်.
ဘၣ်ဆၣ် သုသးဆူၣ်ဒိၣ်ထီၣ် လၢသုကမၤတၢ်အၢတၢ်သီလီၤ.+
၈ ယဟိဝၤယွၤ တဲဝဲလၢ ‘ဆဲးခိးကွၢ်လၢ်ယၤ+
တုၤလၢဆၢကတီၢ်ဖဲ ယဂဲၤဆၢထၢၣ်ဒုးတၢ် ဒီးဂုာ်န့ၢ်ဆူၣ်ပှၤတၢ် န့ၣ်တက့ၢ်.
ယတၢ်ဆၢတဲာ်န့ၣ် မ့ၢ်ဝဲလၢ ယကပာ်ဖှိၣ်ထီၣ် ပှၤကလုာ်တဖၣ် ဒီးဘီမုၢ်တဖၣ်
ဒီးယကပျၢ်လီၤ ယတၢ်သးထီၣ် ဒီးယတၢ်သးဒိၣ်ခဲလၢာ်လၢ အဝဲသ့ၣ် အဖီခိၣ်လီၤ.+
ဒီးယတၢ်သးဆူၣ်လၢ အလီၤဂာ်ဒီးမ့ၣ်အူန့ၣ် ကအီၣ်ဝဲ ဟီၣ်ခိၣ်ဒီဘ့ၣ်လီၤ.+
၉ ယကဆီတလဲ ပှၤဂီၢ်မုၢ်တဖၣ်အကျိာ် ဆူကျိာ်စီဆှံလီၤ.
အဃိ အဝဲသ့ၣ်ခဲလၢာ် ကကိးထီၣ် ယၤ, ယဟိဝၤယွၤအမံၤ
ဒီးကဘူၣ်ထီၣ်ဘါထီၣ်ယၤ ဃူဃူဖိးဖိးလီၤ.’+
၁၀ ယပှၤဂီၢ်မုၢ်လၢ အလီၤပြံလီၤပြါ လၢအဃ့ကညးတၢ်လၢ ယအိၣ်န့ၣ် ကအိၣ်ဟဲလၢ ကီၢ်အဲၤသံအီးပး အထံကျိတဖၣ် အဟီၣ်ကဝီၤ
ဒီးကဟဲစိာ်န့ၢ်ယၤ တၢ်ဟ့ၣ်လီၤ.+
ဖဲန့ၣ်အခါ ယကမၤလီၤမၢ်ကွံာ် ပှၤပာ်ကဖၢလၢအသး လၢအပတြၢၤလီၤအသးတဖၣ် လၢနပူၤလီၤ.
ဒီးနတပာ်ထီၣ်ထီနသးလၢ ယကစၢၢ်စီဆှံအလိၤ နီတဘျီလၢၤဘၣ်.+
၁၂ ပှၤလၢအပတီၢ်ဖုၣ်လၢ အဆီၣ်လီၤအသးန့ၣ် ယကပျဲလၢအဝဲသ့ၣ် ကအိၣ်လၢ နပူၤလီၤ.+
ဒီးအဝဲသ့ၣ် ကဃုတၢ်အိၣ်သဒၢအလီၢ် လၢယဟိဝၤယွၤ အမံၤပူၤလီၤ.
၁၃ ပှၤအံၣ်စရ့လးဖိလၢ အအိၣ်တ့ၢ်တဖၣ်န့ၣ်+ တမၤတၢ် တတီတလိၤလၢၤဘၣ်.+
အဝဲသ့ၣ် တတဲလံၣ်တဲလီတၢ်ဘၣ် ဒီးအပျ့ၤန့ၣ် တလံၣ်အီၣ်လီအီၣ် ပှၤဂၤလၢၤဘၣ်.
အဝဲသ့ၣ် ကအီၣ်တၢ်ဒီးကမံနီၤဝဲ ဒီးပှၤလၢအကမၤပျံၤ အဝဲသ့ၣ် တအိၣ်နီတဂၤလၢၤဘၣ်.”+
၁၄ အိ စံယိၣ်အဖိမုၣ်သ့ၣ်ဧၢ, ကိးပသူထီၣ်လၢ တၢ်သးခုအပူၤ,
အိ အံၣ်စရ့လးဧၢ, ကိးပသူထီၣ်လၢ တၢ်သူၣ်ဖှံသးညီအပူၤတက့ၢ်.+
အိ ယရူၤၡလ့ၣ် အဖိမုၣ်သ့ၣ်ဧၢ, သးခု ဒီးသူၣ်ဖှံသးညီ လၢာ်သူၣ်လၢာ်သးတက့ၢ်.+
၁၅ တၢ်သိၣ်ဃီၣ်လၢ နတူၢ်ဘၣ်အီၤန့ၣ် ယဟိဝၤယွၤကထုးထီၣ်ကွံာ်ဝဲလီၤ.+
အဝဲနီဟးထီၣ်ကွံာ် နဒုၣ်နဒါလံ.+
ယဟိဝၤယွၤ လၢအမ့ၢ် အံၣ်စရ့လး အစီၤပၤန့ၣ် အိၣ်ဒီးနၤလီၤ.+
နတလိၣ်ပျံၤလၢ တၢ်ကီတၢ်ခဲ ကဘၣ်နၤလၢၤဘၣ်.+
၁၆ ဖဲတၢ်တနံၤန့ၣ် တၢ်ကတဲဘၣ် ဝ့ၢ်ယရူၤၡလ့ၣ်လၢ
“အိ ဝ့ၢ်စံယိၣ်ဧၢ, တဘၣ်ပျံၤတၢ်တဂ့ၤ.+
ဒီးတဘၣ်ပျဲလၢ နသးဂံၢ်ဘါ* ကလီၤစၢ်တဂ့ၤ.”
၁၇ “ယၤ, ယဟိဝၤယွၤ အိၣ်ဒီးနၤ+
ဒီးဒ်ပှၤလၢအဂံၢ်ဆူၣ်ဘါဆူၣ်တဂၤအသိး ယကမၤပူၤဖျဲးနၤလီၤ.
ယကသးခုလၢ နဃိ လၢတၢ်သးခု ဖးဒိၣ်အပူၤလီၤ.+
ဒီးယပာ်ဖျါထီၣ် တၢ်အဲၣ်လၢ နဖီခိၣ်န့ၣ် ကကဲထီၣ် တၢ်သူၣ်မံသးမုာ်လၢယဂီၢ်လီၤ.*
ဒီးယကကိးပသူထီၣ်လၢ တၢ်သးခု အပူၤ လၢနဃိလီၤ.
၁၈ ဝ့ၢ်စံယိၣ်ဧၢ, ယကပာ်ဖှိၣ်ထီၣ်က့ၤ ပှၤလၢအသးအုး ခီဖျိလၢ အတဟဲထီၣ်ဘၣ် နဘူၣ်ဧိၤပွဲဧိၤတဖၣ် အဃိလီၤ.+
အဝဲသ့ၣ် တဟဲထီၣ်ဘၣ် ဘူၣ်ဧိၤပွဲဧိၤဘၣ်, မ့ၢ်လၢပှၤက့ၤဖီၣ်အဝဲသ့ၣ် ဒီးအဝဲသ့ၣ် ဘၣ်တူၢ်တၢ်ဒုၣ်ဒွဲၣ် အဃိလီၤ.+
၁၉ ဖဲန့ၣ် အဆၢကတီၢ် ယကထီဒါ ကယဲၢ်ပှၤလၢ အဆီၣ်တံၢ်မၤနၢၤ သုဝဲလၢအမ့ၢ် ယပှၤဂီၢ်မုၢ်လီၤ.+
ဒီးယကမၤဒ်သိး သုမံၤကဟူသၣ်ကဖျါ ဒီးသုကဘၣ်တၢ်ပတြၢၤသု
လၢကယဲၢ်ထံကီၢ်လၢ သုဒိးန့ၢ်ဘၣ် တၢ်မဲာ်ဆှးလၢ အပူၤလီၤ.
၂၀ ဖဲန့ၣ်အဆၢကတီၢ် ယကဟဲက့ၤကိးသု
ဒီးယကပာ်ဖှိၣ်ထီၣ်သု တပူၤဃီလီၤ.
ဖဲယပာ်ဖှိၣ်ထီၣ်က့ၤ သုဝဲလၢ အဘၣ်တၢ်က့ၤဖီၣ်အီၤတဖၣ်အခါ ယကမၤဒ်သိး သုမံၤကဟူသၣ်ကဖျါ ဒီးသုကဘၣ်တၢ်ပတြၢၤသု+ လၢကယဲၢ် ပှၤလၢအအိၣ်လၢ ဟီၣ်ခိၣ်ဒီဘ့ၣ် အကျါလီၤ.
ဒီးသုကထံၣ်ဘၣ် တၢ်မၤအသးအံၤလီၤ.” ယဟိဝၤယွၤ တဲဝဲဒ်န့ၣ်လီၤ.+
အခီပညီမ့ၢ်ဝဲ “ယဟိဝၤ ပာ်ခူသူၣ်ဝဲ (ပာ်လုၢ်ပာ်ပှ့ၤဝဲ).”
ဖျါလၢအဲၣ်ဒိးတဲဝဲ တၢ်ဖိတၢ်လံၤ မ့တမ့ၢ် တၢ်မၤလၢအဘၣ်ထွဲဒီး တၢ်ဂီၤတၢ်ဖှီၣ်.
ဖျါလၢအဲၣ်ဒိးတဲဝဲ မူဖျၢၣ်တဖၣ် ဒ်သိးဒီး မုၢ်, လါ ဒီးဆၣ်တဖၣ်.
ကွၢ် တၢ်ကတိၤအခီပညီ.
မ့ၢ်စ့ၢ်ကီး “ဟီၣ်ခိၣ်.”
အခီပညီလိၤလိၤ “ဟံၣ်.”
မ့ၢ်ဝဲ ကစၢ်ယွၤ.
အခီပညီလိၤလိၤ “ကွ့ကလံၤ ဒီးတရုၤအစုခိၣ်သၣ်.”
မ့ၢ်ဝဲ ဝ့ၢ်ယရူၤၡလ့ၣ်.
မ့ၢ်ဝဲ ဝ့ၢ်ယရူၤၡလ့ၣ်.
မ့ၢ်ဝဲ ဝ့ၢ်ယရူၤၡလ့ၣ်.
အခီပညီလိၤလိၤ “စု.”
အခီပညီလိၤလိၤ “အဝဲကအိၣ်ဘှ့ၣ်လၢ အတၢ်အဲၣ်အပူၤ.”