ဃးကဲ
၁ ဖဲစီၤပၤဒၤရယါဝ့ၣ် ပၢတၢ်ခံနံၣ်တနံၣ်, လါဃုလါတလါ, အဆိကတၢၢ်တသီန့ၣ် ယဟိဝၤယွၤ ဟ့ၣ်လီၤတၢ်ကစီၣ် လၢယူဒၤအပဒိၣ်ဖးဒိၣ် စီၤစရူဘၤဘ့လးအဂီၢ်+ ဒီးပှၤလုၢ်တၢ်ခိၣ် အဒိၣ်ကတၢၢ် စီၤယိၤၡူအဂီၢ်လီၤ. စီၤစရူဘၤဘ့လး မ့ၢ်ဝဲ စီၤၡၤလတံၤအ့လး အဖိခွါ ဒီးစီၤယိၤၡူမ့ၢ်ဝဲ စီၤယိၤစါဒး အဖိခွါလီၤ. ကစၢ်ယွၤ ဟ့ၣ်လီၤ တၢ်ကစီၣ်အံၤခီဖျိလၢ ဝံဃးကဲ*+ ဒီးတဲဝဲလၢ
၂ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ပှၤဂီၢ်မုၢ်တဖၣ်အံၤ တဲဝဲလၢ “တၢ်ဆၢကတီၢ် တဘၣ်လၢ ပှၤကတ့ထီၣ်* ယဟိဝၤယွၤ အဟံၣ်* ဒံးဘၣ်.”’”+
၃ ယဟိဝၤယွၤ ဟ့ၣ်လီၤကဒီး တၢ်ကစီၣ်လၢ ဝံဃးကဲ+ အအိၣ်လၢ ၄ “ခဲအံၤ မ့ၢ်တၢ်ဆၢကတီၢ်ဘၣ်လၢ သုကအိၣ်လၢ သုဟံၣ်ဃံဃံလၤလၤတဖၣ်အပူၤလံဧါ ဒီးမ့မ့ၢ်လၢ ယတၢ်လုၢ်ဟံၣ်န့ၣ် သုကပာ်ဟးဂီၤအီၤဒ်န့ၣ်လီၤဧါ.+ ၅ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဆိကမိၣ်ထံလီၤက့ၤ တၢ်လၢသုမၤသ့ၣ်တဖၣ်သၢၤ. ၆ သုဖှံလီၤ တၢ်ချံဒီဒူၣ် ဘၣ်ဆၣ် သုကူးဘၣ်ထဲ တစဲးဖိလီၤ.+ သုအီၣ်တၢ်ဘၣ်ဆၣ် သုအီၣ်ဘၣ်တၢ် တဘျဲဘၣ်. သုအီတၢ် ဘၣ်ဆၣ် သုစပံးထံ အိၣ်တယၢဘၣ်.* သုသိးထီၣ် တၢ်ကူတၢ်ကၤ ဘၣ်ဆၣ် သုတကလၢၤထီၣ် နီတဂၤဘၣ်. ပှၤလၢ အဒိးငါလီၤအသးတဖၣ်န့ၣ် ဖၢနုာ်လီၤအဘူးအလဲလၢ ထၢၣ်လၢ အပူၤဖျိလဲလဲ အပူၤလီၤ.’”
၇ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဆိကမိၣ်ထံလီၤက့ၤ တၢ်လၢသုမၤသ့ၣ်တဖၣ်သၢၤ.’
၈ “ယဟိဝၤယွၤ တဲဝဲလၢ ‘လဲၤထီၣ်လၢ ကစၢၢ်ခိၣ် ဒီးဟဲက့ၤစိာ် သ့ၣ်ဘၣ်တဖၣ်+ ဒီးတ့ထီၣ်ဟံၣ်လၢ+ ယကဘၣ်သူၣ်ဘၣ်သးအီၤ ဒီးအကကဲထီၣ် တၢ်လၤကပီၤ လၢယဂီၢ်တက့ၢ်.’”+
၉ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “‘သုမုၢ်လၢ်လၢ သုကဒိးန့ၢ်ဘၣ် တၢ်ဒီဒူၣ် ဘၣ်ဆၣ် သုဒိးန့ၢ်ဘၣ်ထဲ တစဲးဖိလီၤ. ဒီးဖဲသုဟဲက့ၤစိာ်အီၤလၢ ဟံၣ်ပူၤအခါ ယအူဖျိးကွံာ်အီၤလီၤ.+ တၢ်ကဲထီၣ်အသး ဒ်န့ၣ် မ့ၢ်လၢ သုဝဲကိးဂၤဒဲး သုအံးထွဲကွၢ်ထွဲလီၤ သုနီၢ်ကစၢ်ဟံၣ်ဂ့ၤဂ့ၤ ဘၣ်ဆၣ် မ့မ့ၢ် ယတၢ်လုၢ်ဟံၣ်န့ၣ် ဟးဂီၤဝဲအဃိလီၤ.+ ၁၀ လၢတၢ်န့ၣ်အဃိ မူခိၣ်တဒုးလီၤ ပစီၤထံဘၣ် ဒီးဟီၣ်ခိၣ် တဒုးမဲထီၣ်တၢ်ဘၣ်. ၁၁ ယမၤဃ့ထီ သုဟီၣ်ခိၣ် ဒီးသုကစၢၢ်တဖၣ်အဃိ တၢ်မုၢ်တၢ်ဘိတဖၣ်, ဘု, စပံးထံ ဒီးသိတဖၣ် တအိၣ်လၢလၢပှဲၤပှဲၤဘၣ်. သုဒီးသုဆၣ်ဖိကီၢ်ဖိတဖၣ်န့ၣ် ဘၣ်ကီဘၣ်ခဲ ဒီးသုတၢ်ဂုာ်ကျဲးစၢးခဲလၢာ်န့ၣ် ကဲထီၣ် တၢ်ကလီကလီလီၤ.’”
၁၂ မ့ၢ်လၢယဟိဝၤယွၤ ဆှၢလီၤ ဝံဃးကဲအဃိ စီၤၡၤလတံၤအ့လး+ အဖိခွါ စီၤစရူဘၤဘ့လး+ ဒီးစီၤယိၤစါဒး+ အဖိခွါ ပှၤလုၢ်တၢ်ခိၣ် အဒိၣ်ကတၢၢ် စီၤယိၤၡူ ဒီးပှၤဂီၢ်မုၢ်ခဲလၢာ် ဒိကနၣ်ဝဲ ယဟိဝၤယွၤ ဒီးဝံဃးကဲအကလုၢ်လီၤ. ဒီးပှၤဂီၢ်မုၢ်တဖၣ် ပျံၤဝဲ ယဟိဝၤယွၤလီၤ.
၁၃ ယဟိဝၤယွၤ အပှၤစိာ်တၢ်ကစီၣ်ဖိ စီၤဃးကဲန့ၣ် ဒ်ယဟိဝၤယွၤ ဟ့ၣ်လီၤအီၤမူဒါအသိး အဝဲတဲဘၣ် ပှၤဂီၢ်မုၢ်တဖၣ်လၢ “ယဟိဝၤယွၤ တဲဝဲလၢ ‘ပှၤဂီၢ်မုၢ်သ့ၣ်ဧၢ, ယအိၣ်ဒီးသုလီၤ.’”+
၁၄ ဒီးယဟိဝၤယွၤ ထိၣ်ဟူးထိၣ်ဂဲၤထီၣ်+ ယူဒၤအပဒိၣ်ဖးဒိၣ်+ စီၤစရူဘၤဘ့လးအသး ဒီးပှၤလုၢ်တၢ်ခိၣ် အဒိၣ်ကတၢၢ် စီၤယိၤၡူအသး+ ဒီးပှၤဂီၢ်မုၢ်ခဲလၢာ် အသးလီၤ. အဃိ အဝဲသ့ၣ် ဟဲစးထီၣ်မၤတၢ်လၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤအဟံၣ်လီၤ.+ စီၤစရူဘၤဘ့လးမ့ၢ်ဝဲ စီၤၡၤလတံၤအ့လး အဖိခွါ ဒီးစီၤယိၤၡူမ့ၢ်ဝဲ စီၤယိၤစါဒး အဖိခွါလီၤ. ၁၅ အဝဲသ့ၣ် စးထီၣ်မၤဝဲဒ်အံၤ ဖဲစီၤပၤဒၤရယါဝ့ၣ် ပၢတၢ် ခံနံၣ်တနံၣ်,+ လါဃုလါတလါ, လါထီၣ် ၂၄ သီတသီလီၤ.
၂ ဖဲလါနွံလါတလါ, လါထီၣ် ၂၁ သီန့ၣ် ယဟိဝၤယွၤ တဲဘၣ် ဝံဃးကဲလၢ+ ၂ “ဝံသးစူၤ, သံကွၢ် စီၤၡၤလတံၤအ့လး အဖိခွါ စီၤစရူဘၤဘ့လး+ လၢအမ့ၢ် ယူဒၤအပဒိၣ်ဖးဒိၣ်+ ဒီးစီၤယိၤစါဒး+ အဖိခွါ စီၤယိၤၡူ+ လၢအမ့ၢ် ပှၤလုၢ်တၢ်ခိၣ် အဒိၣ်ကတၢၢ် ဒီးပှၤဂီၢ်မုၢ်တဖၣ်လၢ ၃ ‘လၢသုကျါန့ၣ် မတဂၤထံၣ်ဘၣ် တၢ်လုၢ်ဟံၣ် လၢညါတဖျၢၣ် အလၤကပီၤလဲၣ်.+ ခဲအံၤန့ၣ် သုကွၢ်တၢ်တဖျၢၣ်အံၤ မၤသးဒ်လဲၣ်. ပှၤမ့ၢ်ထိၣ်သတြီၤအီၤဒီး လၢညါန့ၣ် ဖျါလၢအတမ့ၢ် တၢ်နီတမံၤဘၣ် တမ့ၢ်ဧီၤ.’+
၄ “ယဟိဝၤယွၤ တဲဝဲလၢ ‘စီၤစရူဘၤဘ့လးဧၢ, ပာ်ဆူၣ်နသးတက့ၢ်. စီၤယိၤစါဒး အဖိခွါ ပှၤလုၢ်တၢ်ခိၣ် အဒိၣ်ကတၢၢ် စီၤယိၤၡူဧၢ, ပာ်ဆူၣ်နသးတက့ၢ်.’
“ယဟိဝၤယွၤ တဲဝဲလၢ ‘ပှၤဂီၢ်မုၢ်သ့ၣ်ဧၢ, ပာ်ဆူၣ်သုသး ဒီးမၤတၢ်ဟီ.’+
“တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ယအိၣ်ဒီးသုလီၤ.’+ ၅ ‘သ့ၣ်နီၣ်ထီၣ်က့ၤတၢ်လၢ ယအၢၣ်လီၤသု ဖဲသုဟးထီၣ်လၢ ကီၢ်အဲၤကူပတူးအပူၤအခါ+ ဒီးနာ်န့ၢ်လၢ ယစိကမီၤ အိၣ်ဒံးလၢ သုကျါန့ၣ်တက့ၢ်.+ တဘၣ်ပျံၤတၢ်တဂ့ၤ.’”+
၆ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘တယံာ်လၢၤဘၣ်န့ၣ် ယကမၤဟူးထီၣ် မူခိၣ်, ဟီၣ်ခိၣ်, ပီၣ်လဲၣ် ဒီးခိသူခိၣ် တဘျီဒံးလီၤ.’+
၇ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “‘ဒီးယကမၤဟူးထီၣ် ပှၤကိးကလုာ်ဒဲး ဒီးတၢ်လၢ အလုၢ်ဒိၣ်ပှ့ၤဒိၣ်တဖၣ်လၢ ပှၤကိးကလုာ်ဒဲး အကျါန့ၣ် ကဟဲနုာ်လီၤဝဲလၢ ဟံၣ်တဖျၢၣ်အံၤ အပူၤလီၤ.+ ဒီးယကမၤပှဲၤ ဟံၣ်အံၤလၢ တၢ်လၤကပီၤလီၤ.’+
၈ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ထူဒီးစ့န့ၣ် မ့ၢ်ယတၢ်လီၤ.’
၉ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဟံၣ်အံၤ အလၤကပီၤန့ၣ် ကဒိၣ်န့ၢ်ဒံး ဟံၣ်လၢညါတဖျၢၣ်လီၤ.’+
“ဒီးတၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ယကဟ့ၣ်လီၤသု တၢ်ဃူတၢ်ဖိး ဖဲတၢ်လီၢ်အဝဲအံၤလီၤ.’”+
၁၀ ဖဲစီၤဒၤရယါဝ့ၣ် ပၢတၢ် ခံနံၣ်တနံၣ်, လါခွံလါတလါ, လါထီၣ် ၂၄ သီတသီန့ၣ် ယဟိဝၤယွၤ တဲဘၣ် ဝံဃးကဲလၢ+ ၁၁ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဝံသးစူၤ, သံကွၢ် ပှၤလုၢ်တၢ်ဒိၣ်တဖၣ် ဘၣ်ဃးဒီး တၢ်သိၣ်တၢ်သီအဂ့ၢ်သၢၤ,+ သံကွၢ်အဝဲသ့ၣ်လၢ ၁၂ “ပှၤတဂၤ မ့ၢ်စိာ်ဝဲ တၢ်ညၣ်စီဆှံလၢ အဘိၣ်ဝဲလၢအဆ့ကၤ ဒီးအဆ့ကၤ မ့ၢ်ဘၣ်ထံးဒီး ကိၣ်မ့ၢ်ဂ့ၤ, ကသူမ့ၢ်ဂ့ၤ, စပံးထံမ့ၢ်ဂ့ၤ, သိမ့ၢ်ဂ့ၤ, တၢ်အီၣ်တမံၤမံၤမ့ၢ်ဂ့ၤန့ၣ် မ့ၢ်တၢ်အီၣ်တဖၣ်န့ၣ် ကစီဆှံထီၣ်ဧါ.”’”
ဒီးပှၤလုၢ်တၢ်ဒိၣ်တဖၣ် တဲဆၢဝဲလၢ “တကဆှီထီၣ်ဘၣ်.”
၁၃ စီၤဃးကဲ သံကွၢ်ဝဲလၢ “ပှၤတဂၤဂၤ မ့ၢ်ကဲထီၣ် ပှၤလၢအတကဆှီဘၣ် ခီဖျိလၢ အဘၣ်ထံးဒီးပှၤသံ* အဃိ ဒီးအဝဲမ့ၢ်ထိးဘၣ် တၢ်အီၣ်တဖၣ်အံၤ တမံၤမံၤန့ၣ် မ့ၢ်တၢ်အီၣ်တဖၣ်အံၤ ကကဆှီဒံးဧါ.”+
ဒီးပှၤလုၢ်တၢ်ဒိၣ်တဖၣ် တဲဆၢဝဲလၢ “တကဆှီလၢၤဘၣ်.”
၁၄ အဃိ စီၤဃးကဲ တဲဝဲလၢ “ယဟိဝၤယွၤ တဲဝဲလၢ ‘လၢယတၢ်ထံၣ်န့ၣ် ပှၤဂီၢ်မုၢ်တဖၣ်အံၤ ဒီးပှၤတကလုာ်အံၤန့ၣ် လီၤဂာ်ဒ်န့ၣ်လီၤ. ဒီးတၢ်လၢ အဝဲသ့ၣ်မၤဝဲခဲလၢာ်န့ၣ် ယထံၣ်အီၤဒ်န့ၣ် စ့ၢ်ကီးလီၤ. တၢ်လၢအဝဲသ့ၣ် လုၢ်ထီၣ် တမံၤဂ့ၤတမံၤဂ့ၤန့ၣ် တကဆှီဘၣ်.’
၁၅ “‘ဘၣ်ဆၣ် ဝံသးစူၤ စးထီၣ်လၢ တနံၤညါအံၤ ဒီးဆူညါ ဆိကမိၣ်ထံလီၤက့ၤ တၢ်ဂ့ၢ်တခါအံၤနီၤ. တချုးလၢ ပှၤစးထီၣ် သူၣ်ထီၣ်ကဒါက့ၤ ယဟိဝၤယွၤ အတၢ်လုၢ်ဟံၣ် ဒံးဘၣ်န့ၣ်+ ၁၆ တၢ်အိၣ်သး မၤသးဒ်လဲၣ်. ဖဲန့ၣ်အဆၢကတီၢ် ပှၤမုၢ်လၢ်ဝဲလၢ ကန့ၢ်ဘၣ် ဘုအနာ် ၂၀ ဘၣ်ဆၣ် အဝဲသ့ၣ် န့ၢ်ဘၣ်ထဲအနာ် ၁၀ လီၤ. ဒီးအဝဲသ့ၣ် မုၢ်လၢ်ဝဲလၢ စပံးထံ အကိ ၅၀ ဘၣ်ဆၣ် အဝဲသ့ၣ် န့ၢ်ဘၣ်ထဲ အကိ ၂၀ လီၤ.+ ၁၇ ယမၤဟးဂီၤ တၢ်လၢသုသူၣ်လီၤဖျးလီၤအီၤခဲလၢာ် ခီဖျိလၢ တၢ်မုၢ်တၢ်ဘိဟးဂီၤ, ဘုအဃၢ်လီၤ+ ဒီးသူၣ်လီၤဝဲအဃိလီၤ. ဘၣ်ဆၣ် သုတဟဲက့ၤလၢ ယအိၣ်နီတဂၤဘၣ်.’ ယဟိဝၤယွၤ တဲဝဲဒ်န့ၣ်လီၤ.
၁၈ “‘ဝံသးစူၤ ဆိကမိၣ်ထံတၢ်လၢ ကမၤအသး စးထီၣ်လၢ တနံၤညါအံၤ ဒီးဆူညါတက့ၢ်. တနံၤအံၤ လၢအမ့ၢ် လါခွံလါတလါ, လါထီၣ် ၂၄ သီတသီန့ၣ် မ့ၢ်ဝဲ မုၢ်နံၤလၢ ပှၤသူၣ်လီၤ ယဟိဝၤယွၤ အတၢ်လုၢ်ဟံၣ် အခီၣ်ထံးအဃိ+ ဆိကမိၣ်ထံ တၢ်ဂ့ၢ်တခါအံၤနီၤ. ၁၉ ခဲအံၤ လၢဘုဖီအပူၤန့ၣ် တၢ်ချံတၢ်သၣ်တဖၣ် တအိၣ်ဘၣ်.+ ဒီးစပံးမုၢ်, ချၢၣ်ဒၢအထူၣ်, သလဲအထူၣ် ဒီးသ့ၣ်စၤယံးအထူၣ်န့ၣ် တသၣ်ထီၣ် တၢ်နီတမံၤဒံးဘၣ်. ဘၣ်ဆၣ် စးထီၣ်လၢ တနံၤအံၤ ယကဆိၣ်ဂ့ၤသုလီၤ.’”+
၂၀ ဖဲလါထီၣ် ၂၄ သီတသီန့ၣ် ယဟိဝၤယွၤ တဲတၢ်ဒီး စီၤဃးကဲ ခံဘျီတဘျီလၢ+ ၂၁ “တဲဘၣ် ယူဒၤအပဒိၣ်ဖးဒိၣ် စီၤစရူဘၤဘ့လးလၢ ‘ယကမၤဟူး မူခိၣ် ဒီးဟီၣ်ခိၣ်လီၤ.+ ၂၂ ဒီးယကမၤလီၤပှီၢ် စီၤပၤတဖၣ် အလီၢ်ပစိာ် ဒီးယကမၤဟးဂီၤကွံာ် ပှၤကလုာ်တဖၣ် အဘီမုၢ် အစိအကမီၤလီၤ.+ ဒီးယကမၤတကျၢၢ်ကွံာ် လ့ၣ်ကဟၣ်တဖၣ် ဃုာ်ဒီးပှၤဒိးလ့ၣ်ကဟၣ်တဖၣ်လီၤ. ကသ့ၣ်တဖၣ် ကလီၤဃံၢ် ဒီးပှၤဒိးကသ့ၣ်တဖၣ်န့ၣ် ကမၤသံလိာ်အသး ကဒဲကဒဲလၢနးလီၤ.’”+
၂၃ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘စီၤၡၤလတံၤအ့လး+ အဖိခွါ လၢအမ့ၢ် ယခ့ယပှၤ စီၤစရူဘၤဘ့လးဧၢ,+ ဖဲတၢ်တနံၤန့ၣ် ယကသူနၤ ဒီးယကဒုးကဲထီၣ်နၤ ဒ်သိးဒီး ပသံးလၢ အလုၢ်ဒိၣ်ပှ့ၤဒိၣ်တဘိလီၤ.* ယဟိဝၤယွၤ တဲဝဲလၢ ‘ယကမၤဒ်န့ၣ် မ့ၢ်လၢ နမ့ၢ်ပှၤလၢ ယဃုထၢအီၤအဃိလီၤ.’ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.”
အခီပညီမ့ၢ်ဝဲ “အိၣ်ဖျဲၣ်ထီၣ်လၢ ဘူၣ်ဘၣ်အဆၢကတီၢ်.”
မ့ၢ်စ့ၢ်ကီး “တ့ထီၣ်ကဒါက့ၤ.”
မ့ၢ်စ့ၢ်ကီး “တၢ်လုၢ်ဟံၣ်.”
မ့ၢ်စ့ၢ်ကီး “တလၢဘၣ်.”
အခီပညီလိၤလိၤ “နဲဖဲး(ၡ်) (ne′phesh).” ကွၢ် တၢ်ကတိၤအခီပညီ.
အခီပညီမ့ၢ်ဝဲ ယဟိဝၤယွၤ ကဆဲးသူ စီၤစရူဘၤဘ့လး ဒ်သိး ကမၤလၢပှဲၤ အတၢ်တိာ်ပာ်အဂီၢ်.