မူခိၣ်ကလူးတဂၤ ဟဲဆူမၤရံအအိၣ် အဂ့ၢ်

ပိာ်မုၣ်ဃံလၤဖိအံၤ မ့ၢ်မၤရံန့ၣ်လီၤ. အဝဲမ့ၢ်ပှၤအံၣ်စရ့လးမုၣ်တဂၤ လၢအအိၣ်လၢ ဝ့ၢ်နစၤရ့းန့ၣ်လီၤ. ယွၤသ့ၣ်ညါလၢ အဝဲမ့ၢ်ပိာ်မုၣ်အဂ့ၤတဂၤလီၤ. လၢတၢ်န့ၣ်အဃိ ယွၤမၢလီၤအကလူးကၤဘြံၤအ့လး လၢကလဲၤကတိၤတၢ်ဒီးအီၤန့ၣ်လီၤ. ကၤဘြံၤအ့လး ဟဲတဲမၤရံမနုၤလဲၣ်န့ၣ် သုသ့ၣ်ညါဧါ. မ်ပကွၢ်သကိးတက့ၢ်.

ကၤဘြံၤအ့လးစံးအီၤ ‘နံၤမုာ်မုာ်, ပိာ်မုၣ်လၢအဘၣ်ဘျုးအါတဂၤဧၢ. ယဟိဝၤယွၤအိၣ်ဒီးနၤလီၤ.’ မၤရံတထံၣ်ဘၣ်တ့ၢ်ပှၤအံၤ နီတဘျီဘၣ်. အဲၣ်ဒိးကတိၤတၢ်မနုၤလဲၣ်န့ၣ်စ့ၢ်ကီး တသ့ၣ်ညါဝဲအဃိ ဖုးဘၣ်အသးန့ၣ်လီၤသၢၣ်. ဘၣ်ဆၣ် ကၤဘြံၤအ့လး ကတိၤမုာ်ကတိၤခုၣ်က့ၤန့ၣ်အသး တဘျီဃီန့ၣ်လီၤ.

‘မၤရံ, ပျံၤတၢ်တဂ့ၤ. ယဟိဝၤဘၣ်အသးလၢနၤဒိၣ်မးလီၤ. လၢတၢ်န့ၣ်အဃိ ယွၤကမၤန့ၢ်နၤ တၢ်မၤအဒိၣ်အမုာ် တခါန့ၣ်လီၤ. တယံာ်ဘၣ်န့ၣ် နကမၤန့ၢ်ဖိတဂၤလီၤ. နကဘၣ်ယုၢ်အမံၤလၢ ယ့ၣ်ၡူးန့ၣ်လီၤ.’

ကၤဘြံၤအ့လး တဲနၢ်ပၢၢ်အီၤဆူညါဒ်အံၤ, ‘ဖိသၣ်အံၤကဟဲကဲထီၣ်, တၢ်ဒိၣ်ဖိသၣ်တဂၤန့ၣ်လီၤ. ကဘၣ်တၢ်ကိးအီၤလၢ တၢ်ထီကတၢၢ်ကစၢ်ယွၤအဖိခွါစ့ၢ်ကီးန့ၣ်လီၤ. ယဟိဝၤကဒုးကဲထီၣ်အီၤစီၤပၤ ဒ်ဒၤဝံးအသိးန့ၣ်လီၤ. ဘၣ်ဆၣ်, ယ့ၣ်ၡူးန့ၣ် ကမ့ၢ်စီၤပၤအထူအယိာ်န့ၣ်လီၤ. အဘီအမုၢ်န့ၣ် အကတၢၢ်တအိၣ်ဘၣ်.’

မၤရံသံကွၢ်ဝဲ ‘တၢ်န့ၣ်ကဲထီၣ်ကသ့ဒ်လဲၣ်. ယတဆီဟံၣ် ဆီဃီဒံးဘၣ်. ယတအိၣ်ဃုာ် ဘၣ်ဒီးပိာ်ခွါနီတဘျီဒံးဘၣ်. ဒ်န့ၣ်အဃိ ယမၤန့ၢ်ဖိသၣ်ကသ့ဒ်လဲၣ်.’ န့ၣ်လီၤ.

ကၤဘြံၤအ့လးစံးဆၢအီၤ ‘ယွၤအစိကမီၤ ကဟဲလီၤလၢနလိၤလီၤ. လၢတၢ်န့ၣ်အဃိ ဖိသၣ်လၢအကအိၣ်ဖျဲၣ်အဝဲအံၤ ကဘၣ်တၢ်ကိးအီၤလၢ ယွၤအဖိခွါလီၤ.’ ဒီးတဲကဒီးဝဲမၤရံလၢ ‘ကွၢ်နဘူးနတံၢ် အ့းလံၤစါဘ့းတက့ၢ်. ပှၤစံးလၢ ကမၤန့ၢ်အဖိအဂီၢ် အသးပှၢ်တလၢကွံာ်လံသနာ်က့ တယံာ်လၢၤဘၣ်ဒီး ကန့ၢ်ဘၣ်ဝဲအဖိခွါဖိတဂၤန့ၣ်လီၤ. နထံၣ်ဧါ. တၢ်လၢယွၤမၤတသ့တဘၣ်န့ၣ် တအိၣ်နီတမံၤဘၣ်’ န့ၣ်လီၤ.

ထဲန့ၢ်ဒီး, မၤရံစံးဝဲတဘျီဃီလၢ ‘ယမ့ၢ်ယွၤအကုၢ်မုၣ်လီၤ. ဒ်ကစၢ်စံးဝဲအသိး မ်အကဲထီၣ်လၢယဂီၢ်န့ၣ်တက့ၢ်’ လီၤ. ဝံၤဒီး မူခိၣ်ကလူးဟးထီၣ်ဝဲလီၤ.

မၤရံလဲၤဝဲဆူ အ့းလံၤစါဘ့းအအိၣ် လၢအချ့န့ၣ်လီၤ. ဖဲအ့းလံၤစါဘ့း နၢ်ဟူမၤရံအကလုၢ်အခါ, ဖိသၣ်လၢအအိၣ်လၢ အ့းလံၤစါဘ့းအဟၢဖၢပူၤန့ၣ် သးခုဒီးစံၣ်ဝဲလီၤ. အ့းလံၤစါဘ့းန့ၣ် လၢထီၣ်ပှဲၤထီၣ်ဒီးယွၤအသးစီဆှံဒီး စံးဝဲမၤရံလၢ ‘ဒ့မုၣ်ဧၢ, လၢပိာ်မုၣ်တဖၣ်အကျါ နဘၣ်ဆိၣ်ဂ့ၤနဲ လီၤဆီမးလဲၣ်.’ န့ၣ်လီၤ. မၤရံအိၣ်ဝဲဒီးအ့းလံၤစါဘ့းသၢလါဝံၤ က့ၤကဒါက့ၤဆူ ဝ့ၢ်နစၤရ့းန့ၣ်လီၤ.

နီၢ်နီၢ်တခီ, မၤရံန့ၣ် ဘုးထီၣ်ကဖျီအသးဒီး ပှၤလၢအမံၤမ့ၢ် ယိၤသးန့ၣ်လီၤ. ဘၣ်ဆၣ်သနာ်က့, ဖဲယိၤသးနၢ်ဟူဝဲလၢ မၤရံကမၤန့ၢ်အဖိလီၤအခါ ဆိကမိၣ်ဝဲဒၣ်လၢ အတကြၢးဒိးတ့ဒိးဖျီအသးလၢမၤရံလၢၤဘၣ်န့ၣ်လီၤ. ထဲန့ၣ်ဒီး မူခိၣ်ကလူးစံးအီၤ ‘ပျံၤတၢ်လၢ နကဟံးန့ၢ်မၤရံအဂီၢ်တဂ့ၤ. ပှၤလၢအဟ့ၣ်အီၤဖိသၣ်န့ၣ် မ့ၢ်ဒၣ်ယွၤလီၤ.’ ဒ်န့ၣ်အဃိ မၤရံဒီးယိၤသး ဒိးတ့ဒိးဖျီအသးန့ၣ်လီၤ. ဝံၤဒီးခိးဝဲသ့ၣ်လၢ ယ့ၣ်ၡူးကဟဲအိၣ်ဖျဲၣ်ထီၣ်ဝဲန့ၣ်လီၤ.