ယ့ၣ်ၡူးသိၣ်လိမၤယုၤတၢ်အကျဲ အဂ့ၢ်

ဘၣ်မုၢ်တနံၤ ယ့ၣ်ၡူးစံးဘၣ်ပှၤတဂၤလၢ ကဘၣ်အဲၣ်ပှၤလၢအဃၢၤန့ၣ်လီၤ. ပှၤအဝဲန့ၣ် သံကွၢ်ယ့ၣ်ၡူး ‘ပှၤလၢအဘၣ်ဃးဒီးယၤန့ၣ် မ့ၢ်မတၤလဲၣ်’ န့ၣ်လီၤ. ပှၤအံၤ ဆိကမိၣ်ဝဲဒၣ်တၢ်မနုၤလဲၣ်န့ၣ် ယ့ၣ်ၡူးသ့ၣ်ညါဝဲလီၤသၢၣ်. ပှၤအံၤဆိကမိၣ်ဝဲဒၣ်လၢ ပှၤလၢအဃၢၤစံးတၢ်န့ၣ် မ့ၢ်အပှၤကလုာ်, ပှၤလၢတၢ်ဘူၣ်တၢ်ဘါ ဒ်သိးလိာ်အသးသ့ၣ်တဖၣ်န့ၣ်လီၤ. မၤသးဒ်န့ၣ်ဒီး ယ့ၣ်ၡူးစံးဘၣ်အီၤဒ်လဲၣ်န့ၣ် မ်ပကွၢ်သကိးတက့ၢ်.

တဘျီတခီၣ်န့ၣ် ယ့ၣ်ၡူးသိၣ်လိပှၤဂီၢ်မုၣ်လၢ တၢ်ကတိၤဒိတဖၣ်န့ၣ်လီၤ. အခဲအံၤစ့ၢ်ကီးမၤဝဲဒ်န့ၣ်လီၤ. တဲဘၣ်ဝဲ ပှၤယူဒၤဖိတဂၤ ဒီးပှၤၡၤမရံဖိတဂၤအဂ့ၢ်န့ၣ်လီၤ. ပှၤယူဒၤဖိတဖၣ် အါဒၣ်တၢ်တက့ၢ် တဘၣ်အသးလၢပှၤၡၤမရံ ဖိတဖၣ်န့ၣ် ပသ့ၣ်ညါဝဲဒၣ်လီၤ. တၢ်ကတိၤဒိလၢယ့ၣ်ၡူးတဲဘၣ်ဝဲန့ၣ် မ့ၢ်ဒ်အံၤလီၤ.

ဘၣ်မုၢ်တနံၤန့ၣ် ပှၤယူဒၤဖိတဂၤ ကလဲၤဝဲဆူဝ့ၢ်ယရံၤဃိအဂီၢ် ဟဲလီၤဝဲလၢကစၢၢ်ခိၣ်အကျဲတဘိလီၤ. တုၤနုၤတစု, တမျာ်တဖၣ်စံၣ်ပှီၤအီၤဒီး ဟံးန့ၢ်အစ့တဖၣ်လီၤ. တီၢ်အီၤဘူးအကသံဒီး ပာ်တ့ၢ်ဝဲသ့ၣ်အီၤလီၤ.

လၢခံန့ၣ် ပှၤယူဒၤအပှၤလုၢ်တၢ်အခိၣ်တဂၤ ဟဲတုၤလၢ ကျဲန့ၣ်အဖီခိၣ်လီၤ. ထံၣ်ဝဲဒၣ်ပှၤ လၢအဘၣ်တၢ်တီၢ်အီၤန့ၣ်လီၤ. နဆိကမိၣ်လၢကမၤဝဲဒ်လဲၣ်. ခီဂာ်ဝဲဆူကျဲဘးခီတကပၤဝံၤ, အတၢ်လဲၤအိၣ်န့ၣ်လဲၤဝဲဒၣ်လီၤ. လၢတၢ်န့ၣ်အလီၢ်ခံ ပှၤလၢအဲၣ်ထူအဲၣ်ယွၤတဂၤ ဟဲတုၤကဒီးဝဲလီၤ. အဝဲမ့ၢ်ပှၤ လ့ၤဝံဖိတတဂၤလီၤ. အိၣ်ပတုာ်ဝဲဧါ. တအိၣ်ပတုာ်ဝဲဘၣ်. တမၤစၢၤဝဲပှၤလၢအဘၣ်တၢ်တီၢ်အီၤန့ၣ် နီတမံၤဘၣ်. သုထံၣ်သ့လၢ ပှၤလုၢ်တၢ်အခိၣ်ဒီး ပှၤလ့ၤဝံဖိသ့ၣ် လဲၤပိာ်ဝဲဒ်ကျဲအတၢန့ၣ် ယံၤလံတစဲးန့ၣ်လီၤ.

ဘၣ်ဆၣ်သနာ်က့ ကွၢ်, မတၤလဲၤတုၤလၢ ပှၤဘၣ်တၢ်တီၢ်အီၤတဂၤ အကပၤန့ၣ်လဲၣ်. မ့ၢ်ပှၤၡၤမရံဖိတဂၤလီၤ. အဝဲဟ့ၣ်တၢ်မၤစၢၤလၢ ပှၤယူဒၤဖိအံၤန့ၣ်လီၤ. တ့ၢ်နုာ်ကသံၣ်လၢအပူၤလီၢ်အပူၤန့ၣ်လီၤ. ဝံၤဒီး လဲၤစိာ်ပှၤယူဒၤဖိအံၤဆူ တၢ်အိၣ်ဘှံးအလီၢ် ဒ်သိးအတၢ်ဆါကကိညၣ်က့ၤအဂီၢ်န့ၣ်လီၤ.

ဖဲယ့ၣ်ၡူးတဲဘၣ်တၢ်ကတိၤဒိအံၤဝံၤဒီး သံကွၢ်ကဒါက့ၤဝဲဒၣ်ပှၤလၢအသံကွၢ်တ့ၢ်အီၤ ‘လၢပှၤသၢဂၤအံၤအကျါန့ၣ် နဆိကမိၣ် မတၤတဂၤမ့ၢ်ပှၤလၢ အမၤဝဲပှၤဘၣ်တၢ်တီၢ်အီၤ ဒ်ပှၤဘၣ်ဃးဒီးအီၤအသိးန့ၣ်လဲၣ်.’ ပှၤလုၢ်တၢ်အခိၣ်ဧါ. ပှၤလ့ၤဝံဖိဧါ. မ့တမ့ၢ်, ပှၤၡၤမရံဖိဧါ.’ ပှၤန့ၣ်စံးဆၢဝဲဒၣ်လၢ ‘မ့ၢ်ပှၤၡၤမရံဖိလီၤ. အဝဲ အသးအိၣ် ပှၤလၢတၢ်တီၢ်အီၤ အဃိန့ၣ်လီၤ.’

ယ့ၣ်ၡူးစံးဘၣ်အီၤလၢ ‘နတဲတၢ်န့ၣ်မ့ၢ်လီၤ. ဒ်န့ၣ်အဃိ လဲၤဒီးမၤပှၤဂၤ ဒ်န့ၣ်အသိးတက့ၢ်.’

မ့ၢ်သုတဘၣ်သုသးလၢ ယ့ၣ်ၡူးအတၢ်သိၣ်လိမၤယုၤအကျဲန့ၣ်ဘၣ်ဧါ. ပမ့ၢ်ဒိကနၣ် တၢ်လၢယ့ၣ်ၡူးတဲတ့ၢ် လၢလံာ်စီဆှံပူၤတဖၣ်န့ၣ် ပသ့ၣ်ညါဘၣ် တၢ်ဂ့ၢ်လၢအကါဒိၣ်တဖၣ် ကသ့အါမးန့ၣ်လီၤ, တမ့ၢ်ဘၣ်ဧါ.