စီၤယိၤဘးတီဒီးယွၤထီဘိ

ပှၤလၢအဘၣ် တၢ်မၤကွၢ်အီၤ အါအါကလဲာ်တဂၤ, မ့ၢ်ဖျါလၢ အတၢ်ဒိကနၣ်ယွၤအကလုၢ် အဘျုးတအိၣ်လၢ နီၢ်ခိအဂီၢ်တခီန့ၣ် မ့ၢ်ကတီဒီးယွၤဒံးဧါ. တၢ်သံကွၢ်အဝဲအံၤ ဒီးအတၢ်စံးဆၢန့ၣ် ဘၣ်ထွဲလိာ်အသး ဒီးပှၤတဂၤလၢအမံၤမ့ၢ် စီၤယိၤဘးန့ၣ်လီၤ.

ဖဲပှၤအံၣ်စရ့လးဖိတဖၣ် အိၣ်ဆိးဒံးဝဲလၢကီၢ်အဲၤကူပတူးအပူၤ, စီၤအၤဘြၤဟၣ် အဘူးအတံၢ်တဂၤ လၢအမ့ၢ် စီၤယိၤဘး အိၣ်ဝဲဆိးဝဲ တၢ်လီၢ်တတီၤန့ၣ် ခဲအံၤဘၣ်တၢ်ကိးအီၤလၢ အရ့းဘံယါန့ၣ်လီၤ. ဆၢကတီၢ်ဖဲန့ၣ်, မူခိၣ်ကလူးတဖၣ် အိၣ်ဖှိၣ်ရိဖှိၣ်လၢ ကစၢ်ယွၤအမဲာ်ညါဒီး မုၣ်ကီၤလံၢ် ပၣ်ဃုာ်လၢအဝဲသ့ၣ်အကျါစ့ၢ်ကီးလီၤ. လၢမူခိၣ်ကလူးသ့ၣ်တဖၣ်အမဲာ်ညါ, ယဟိဝၤယွၤတဲဖျါထီၣ်ဝဲလၢ အဝဲနာ်န့ၢ်အခ့အပှၤလၢ အတီအလိၤစီၤယိၤဘးန့ၣ်လီၤ. ယဟိဝၤယွၤတဲဝဲလၢ ကယဲၢ်ပှၤဟီၣ်ခိၣ်ဖိခဲလၢာ်အကျါ ပှၤလၢအတီဒ်သိးစီၤယိၤဘး တအိၣ်နီတဂၤဘၣ်. ဘၣ်ဆၣ် မုၣ်ကီၤလံၢ်စံးဝဲလၢ ကစၢ်ယွၤဆိၣ်ဂ့ၤစီၤယိၤဘး ဒီးကဟုကယာ်အီၤအဃိ အဝဲဘူၣ်ထီၣ်ဘါထီၣ်ယွၤန့ၣ်လီၤ. အါန့ၢ်အန့ၣ် မုၣ်ကီၤလံၢ်စံးဝဲလၢ တၢ်မ့ၢ်ဟံးထီၣ်ကွံာ်တၢ်လၢအိၣ်ဒီးစီၤယိၤဘးခဲလၢာ်န့ၣ် အဝဲကဆိၣ်အၢယွၤန့ၣ်လီၤ.

အဆိကတၢၢ်န့ၣ် ယွၤဟ့ၣ်မုၣ်ကီၤလံၢ်အခွဲးလၢ ကဟံးထီၣ်ကွံာ် စီၤယိၤဘးအတၢ်ထူးတၢ်တီၤ ဒီးမၤသံကွံာ်အဖိမုၣ်ဖိခွါတဖၣ်န့ၣ်လီၤ. လၢခံန့ၣ် ကစၢ်ယွၤဟ့ၣ်အီၤအခွဲးလၢ ကမၤဘၣ်ဒိစီၤယိၤဘးအတၢ်အိၣ်ဆူၣ်အိၣ်ချ့လီၤ. ဘၣ်မနုၤအဃိ ကစၢ်ယွၤဟ့ၣ်အခွဲးလၢ အဝဲဘၣ်ကွၢ်ဆၢၣ်မဲာ် တၢ်မၤကွၢ်တဖၣ်အံၤလဲၣ်န့ၣ် စီၤယိၤဘးတနၢ်ပၢၢ်ဝဲဘၣ်. မ့ၢ်လၢအဝဲ တသ့ၣ်ညါဝဲလၢမုၣ်ကီၤလံၢ်ထုးထီၣ်တၢ်သံကွၢ်ဘၣ်ဃးအတၢ်သးတီအဃိန့ၣ်လီၤ. ဘၣ်ဆၣ်စီၤယိၤဘးတဃၣ်ကွံာ်အသးလၢယွၤအအိၣ်နီတဘျီဘၣ်.

ဖဲစီၤယိၤဘးအတံၤသကိးလၢအဘျၣ်သၢဂၤ ဟဲဝဲဆူအအိၣ်အခါ အဝဲသ့ၣ်တဲကမၣ်ဝဲလၢ စီၤယိၤဘးမၤခူသူၣ်တၢ်ကမၣ်အဃိ ကစၢ်ယွၤ စံၣ်ညီၣ်အီၤန့ၣ်လီၤ. အဝဲသ့ၣ် အတၢ်ကတိၤတဖၣ်န့ၣ် ဘၣ်တၢ်ကွဲးနီၣ်အီၤလၢ လံာ်ယိၤဘးအပူၤလီၤ. အါန့ၢ်အန့ၣ်, အဝဲသ့ၣ်စံးဝဲလၢ ကစၢ်ယွၤန့ၣ်တဘၣ်သူၣ်ဘၣ်သးဝဲ အခ့အပှၤတဖၣ် တကးဘၣ်အမဲာ်ညါ တနာ်န့ၢ်အဝဲသ့ၣ်ဘၣ်. စီၤယိၤဘးတတူၢ်လိာ် အဝဲသ့ၣ်အတၢ်ဆိကမိၣ်လၢအကမၣ်တဖၣ်အံၤဘၣ်. စီၤယိၤဘး စံးဝဲလီၤတံၢ်လီၤဆဲးလၢ အဝဲကအိၣ်ဒီးတၢ်သးတီ တုၤလၢအသံတစုလီၤ.

ဘၣ်ဆၣ်စီၤယိၤဘး အတၢ်ကမၣ်အိၣ်ဝဲတမံၤလၢ အဝဲပာ်တီပာ်လိၤအသး တလၢကွံာ်အခၢးန့ၣ်လီၤ. စီၤအလံဟူၤန့ၣ် ဒိကနၣ်ဝဲတၢ်ဂ့ၢ်လိာ်ဘှီလိာ်စးထီၣ်လၢအခီၣ်ထံး တုၤလၢအကတၢၢ်ဝံၤဒီး ဘှီဘၣ်ထီၣ်က့ၤဝဲ စီၤယိၤဘးဒီးအတံၤသကိး လၢအဘျၣ်သၢဂၤန့ၣ်လီၤ. တၢ်ပာ်ဖျါထီၣ်ယဟိဝၤယွၤအတၢ်ခွဲးတၢ်ယာ်လၢကပၢပှၤဟီၣ်ခိၣ်ဖိန့ၣ် မ့ၢ်တၢ်လၢအကြၢးဝဲဘၣ်ဝဲလီၤ. တၢ်ဂ့ၢ်အံၤမ့ၢ်တၢ်လၢအရ့ဒိၣ်ဒိၣ်မး ဘၣ်ဆၣ် စီၤယိၤဘးတနၢ်ပၢၢ်ဝဲဘၣ်. လၢတၢ်န့ၣ်အလီၢ် အဝဲအသးစၢၢ်ဆၢလၢ ကပာ်ဖျါထီၣ် အနီၢ်ကစၢ်အတၢ်တီတၢ်လိၤအဃိ စီၤအလံဟူၤ သိၣ်က့ၤသီက့ၤအီၤလီၤ. စီၤအလံဟူၤသိၣ်ဃီၣ်ဝဲ စီၤယိၤဘးအတံၤသကိးလၢအဘျၣ် သၢဂၤဆူၣ်ဆူၣ်ကလဲာ်စ့ၢ်ကီးလီၤ.

ဒီးလၢခံန့ၣ်, ယဟိဝၤယွၤကတိၤတၢ်ဒီး စီၤယိၤဘးဒီးမၤလိၤထီၣ်က့ၤ အတၢ်ဆိကမိၣ်တဖၣ်န့ၣ်လီၤ. ယဟိဝၤယွၤတဲနၢ်ပၢၢ် စီၤယိၤဘးလၢ အစုတၢ်ဘၣ်တ့လၢ အလီၤကမၢကမၣ်တဖၣ်အဂ့ၢ်ဝံၤဒီး စီၤယိၤဘးဒိးန့ၢ်ဘၣ် တၢ်မၤလိ လၢကစၢ်မ့ၢ်ပှၤလၢအဒိၣ်ကတၢၢ်ဒီး ပှၤဟီၣ်ခိၣ်ဖိမ့ၢ်ဒၣ် တၢ်ဆံးဆံးဖိလၢယွၤမဲာ်ညါလီၤ. စီၤယိၤဘးတူၢ်လိာ်ဝဲ ယွၤအတၢ်သိၣ်က့ၤသီက့ၤအီၤလၢ တၢ်ဆီၣ်လီၤသးအပူၤလီၤ. ယဟိဝၤယွၤ မ့ၢ်ကစၢ်လၢ “သူၣ်အိၣ်သးအိၣ်တၢ်, ဒီးသူၣ်ကညီၤ သးကညီၤတၢ်အါမး” အဃိ မၤဘျါကွံာ်ဝဲ စီၤယိၤဘးအတၢ်ဆူးတၢ်ဆါ, ဟ့ၣ်က့ၤအီၤအတၢ်ထူးတၢ်တီၤခံစး, ဒီးဆိၣ်ဂ့ၤအီၤလၢအဖိအဂၤ ၁၀ န့ၣ်လီၤ. (ယၤကိာ် ၅:၁၁) မုၣ်ကီၤလံၢ် တဲဝဲလၢ ပှၤဟီၣ်ခိၣ်ဖိ မ့ၢ်ဘၣ်တၢ်မၤကွၢ်အီၤန့ၣ် တမ့ၢ်ကတီဒီးယွၤနီတဂၤလၢၤဘၣ်. ဘၣ်ဆၣ် ဖဲစီၤယိၤဘး ကွၢ်ဆၢၣ်မဲာ်ဒီး တၢ်နးတၢ်ဖှီၣ်နးနးကလဲာ်အခါ အဝဲတီလၢယဟိဝၤယွၤ အဖီခိၣ်အဃိ ပာ်ဖျါထီၣ်က့ၤလၢ မုၣ်ကီၤလံၢ်အတၢ်ကတိၤန့ၣ်ကမၣ်ဝဲလီၤ.

​—ဘၣ်တၢ်ဒိးသန့ၤထီၣ်အီၤလၢ လံာ်ယိၤဘးန့ၣ်လီၤ.