ပှၤအံၣ်စရ့လးဖိတဖၣ် နုာ်လီၤဆူ ကီၢ်ကနၤဧၣ်

ချုးလၢ ပှၤအံၣ်စရ့လးဖိတဖၣ် နုာ်လီၤဆူကီၢ်ကနၤဧၣ်အပူၤအခါ, ပူၤကွံာ်နံၣ်လၢအကယၤတဖၣ်န့ၣ် ယဟိဝၤယွၤစံးပာ်ဝဲလၢ ကဟ့ၣ်စီၤအၤဘြၤဟၣ် အစၢၤအသွဲၣ်တဖၣ်လၢ ကီၢ်အံၤန့ၣ်လီၤ. ဖဲစီၤယိၤၡူကဲခိၣ်ကဲနၢ်အဆၢကတီၢ်န့ၣ် ပှၤအံၣ်စရ့လးဖိတဖၣ် ကတဲာ်ကတီၤထီၣ်အသးလၢ ကနုာ်လီၤမၤနၢၤ ကီၢ်တၢ်စံးပာ်န့ၣ်လီၤ.

ကစၢ်ယွၤစံၣ်ညီၣ်ဝဲ ပှၤကနၤဧၣ်ဖိတဖၣ်လီၤ. အဝဲသ့ၣ်မၤကမၣ်မုၣ်ကမၣ်ခွါ ဃုာ်ဒီးတၢ်လၢအလီၤသးဘၣ်အၢ အကလုာ်ကလုာ်ဒီး မ့ၢ်ပှၤလၢအအဲၣ်တၢ်မၤဆူၣ်မၤစိးလီၤ. လၢတၢ်န့ၣ်အဃိ, ဖဲပှၤအံၣ်စရ့လးဖိ လဲၤဒုးဝ့ၢ်တဖၣ်လၢအိၣ်လၢကီၢ်ကနၤဧၣ်အပူၤအဆၢကတီၢ်န့ၣ် အဝဲသ့ၣ်ကဘၣ်မၤဟးဂီၤကွံာ်အီၤ လၢာ်လၢာ်ဆ့ဆ့လီၤ.

တချုးအဝဲသ့ၣ်လဲၤနုာ်လၢ ကီၢ်အံၤအပူၤန့ၣ်စီၤယိၤၡူ ပျဲလီၤဝဲပှၤကွၢ်ခူသူၣ်တၢ်ခံဂၤဒီး အဝဲသ့ၣ်လဲၤဝဲဆူဝ့ၢ်ယရံၤဃိလီၤ. ဒီးပှၤကွၢ်ခူသူၣ်တၢ်ခံဂၤအံၤနုာ်လီၤဆူ ပိာ်မုၣ်တဂၤလၢအမံၤမ့ၢ်နီၢ်ရၤဃးအဟံၣ်ပူၤန့ၣ်လီၤ. နီၢ်ရၤဃးသ့ၣ်ညါဝဲလၢ ပှၤကွၢ်ခူသူၣ်တၢ် ခံဂၤအံၤန့ၣ် မ့ၢ်ပှၤအံၣ်စရ့လးဖိသနာ်က့ တူၢ်လိာ်အဝဲသ့ၣ်လၢအဟံၣ်ပူၤဒီး ဒီသဒၢအဝဲသ့ၣ်န့ၣ်လီၤ. နီၢ်ရၤဃးနာ်ဝဲ ယဟိဝၤ, ပှၤအံၣ်စရ့လးဖိအယွၤလီၤ. မ့ၢ်လၢအဝဲနၢ်ဟူဘၣ်ဝဲလၢ ယဟိဝၤယွၤ အုၣ်က့ၤခီၣ်က့ၤ အပှၤဂီၢ်မုၢ် ပှၤအံၣ်စရ့လးဖိတဖၣ်အဃိလီၤ. နီၢ်ရၤဃးစံးဘၣ်ဝဲပှၤကွၢ်ခူသူၣ်တၢ်တဖၣ်လၢ ကဆိၣ်တၢ်ဒီးအီၤ ဒ်သိးကမၤပူၤဖျဲး အဝဲဒီး အဟံၣ်ဖိဃီဖိအသးသမူန့ၣ်လီၤ.

လၢခံန့ၣ်, ဖဲပှၤအံၣ်စရ့လးဖိတဖၣ် နုာ်လီၤဆူကီၢ်ကနၤဧၣ်အခါ အဝဲသ့ၣ်ကတဲာ်ကတီၤဝဲလၢကလဲၤဒုးဝ့ၢ်ယရံၤဃိဒီး ယဟိဝၤယွၤမၤလီၤပှီၢ်ကွံာ် ယရံၤဃိအဝ့ၢ်ခိၣ်ဒူလၢ တၢ်လီၤလိၢ်လီၤလးအပူၤန့ၣ်လီၤ. လၢတၢ်န့ၣ်အလီၢ်ခံ စီၤယိၤၡူအသုးမုၢ်တဖၣ် နုာ်လီၤလၢဝ့ၢ်ပူၤတဘျီဃီဒီး မၤဟးဂီၤကွံာ်တၢ်အိၣ်လၢဝ့ၢ်ပူၤခဲလၢာ်လီၤ. ပှၤလၢအပူၤဖျဲးန့ၣ်အိၣ်ဒၣ်ထဲနီၢ်ရၤဃး ဒီးအဟံၣ်ဖိဃီဖိလီၤ. ဒီးလၢဃုနံၣ်အတီၢ်ပူၤ စီၤယိၤၡူဒုးတၢ်တဘျီဝံၤတဘျီဒီး မၤန့ၢ်ဝဲကီၢ်တၢ်စံးပာ် အတၢ်လီၢ်ခဲလၢာ်ဃၣ်ဃၣ်န့ၣ်လီၤ. တၢ်န့ၣ်အလီၢ်ခံ နီၤလီၤဝဲကီၢ်လၢ ပှၤအံၣ်စရ့လးဖိ တဒူၣ်ဘၣ်တဒူၣ်အစုပူၤန့ၣ်လီၤ.

စီၤယိၤၡူအသးသမူ ဘူးထီၣ်ကကတၢၢ်အခါန့ၣ် အဝဲကိးဖှိၣ် ပှၤအံၣ်စရ့လးဖိခဲလၢာ်လီၤ. ဝံၤဒီးစီၤယိၤၡူဒုးသ့ၣ်နီၣ်ထီၣ်က့ၤ အဝဲသ့ၣ်လၢ ယဟိဝၤယွၤဖံးတၢ်မၤတၢ်လၢအဝဲသ့ၣ်အဖံဖုလၢညါတဖၣ်ဒ်လဲၣ်အဂ့ၢ် ဒီးဟ့ၣ်သဆၣ်ထီၣ် အဝဲသ့ၣ်လၢ ကဘူၣ်ထီၣ်ဘါထီၣ်ထဲဒၣ် ယဟိဝၤယွၤတဂၤဧိၤန့ၣ်လီၤ. ဘၣ်ဆၣ် ဖဲစီၤယိၤၡူဒီးပှၤမၤသကိးတၢ်ဒီး အီၤတဖၣ် သံဝံၤအလီၢ်ခံန့ၣ် ပှၤအံၣ်စရ့လးဖိ လဲၤသဒၣ်ကွံာ်ယဟိဝၤယွၤဒီး ဘူၣ်ထီၣ်ဘါထီၣ်ဝဲ ယွၤလၢအကမူၤကမၣ်တဖၣ်န့ၣ်လီၤ. လၢအနံၣ် ၃၀၀ အတီၢ်ပူၤန့ၣ် အဝဲသ့ၣ်တအိၣ်မူမၤထွဲ ယဟိဝၤယွၤအတၢ်မၤလိာ်တဖၣ် ကိးဆၢကတီၢ်ဒဲးဘၣ်. ဖဲန့ၣ်အတီၢ်ပူၤ ယဟိဝၤယွၤဟ့ၣ်အခွဲးလၢ အံၣ်စရ့လးဖိအဒုၣ်အဒါတဖၣ်, ဒ်သိးဒီး ပှၤဖလ့ၡသးဖိ, ကမၤနးမၤဖှီၣ်အဝဲသ့ၣ်န့ၣ်လီၤ. ဘၣ်ဆၣ် ဖဲပှၤအံၣ်စရ့လးဖိတဖၣ် ဃ့တၢ်မၤစၢၤလၢ ယဟိဝၤယွၤအအိၣ်အခါ ကစၢ်ဃုထၢထီၣ် ပှၤစံၣ်ညီၣ်ကွီၢ် ၁၂ ဂၤလၢ ကအုၣ်က့ၤခီၣ်က့ၤအဝဲသ့ၣ်အဂီၢ်န့ၣ်လီၤ.

ပှၤစံၣ်ညီၣ်ကွီၢ်သ့ၣ်တဖၣ်အံၤအဂ့ၢ် ဘၣ်တၢ်ပာ်ဖျါထီၣ်အီၤလၢ လံာ်စံၣ်ညီၣ်ကွီၢ်အပူၤလီၤ. စံၣ်ညီၣ်ကွီၢ်အဆိကတၢၢ်တဂၤန့ၣ် မ့ၢ်ဝဲစီၤဧီၤသန့လး ဒီးလၢခံကတၢၢ်တဂၤန့ၣ် စီၤၡံၣ်ၡိၣ်လၢအမ့ၢ်ပှၤလၢအဂံၢ်ဆူၣ်ကတၢၢ်လၢ ပှၤဟီၣ်ခိၣ်ဖိခဲလၢာ်အကျါန့ၣ်လီၤ. တၢ်မ့ၢ်တၢ်တီအရ့ဒိၣ်လၢလံာ်စံၣ်ညီၣ်ကွီၢ် ပာ်ဖျါထီၣ်ဝဲအါဘျီန့ၣ် အိၣ်ဝဲတခါလီၤ. တၢ်မ့ၢ်တၢ်တီတခါအံၤပာ်ဖျါဝဲလၢ တၢ်ဒိကနၣ်ကစၢ်ယွၤအကလုၢ်န့ၣ် ဒုးအိၣ်ထီၣ်တၢ်ဆိၣ်ဂ့ၤတဖၣ်, ဒီးတၢ်တဒိကနၣ်ယဟိဝၤယွၤအကလုၢ်န့ၣ် ဒုးအိၣ်ထီၣ်တၢ်နးတၢ်ဖှီၣ်န့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ လံာ်ယိၤၡူ; စံၣ်ညီၣ်ကွီၢ်; ၃ မိၤၡ့ ၁၈:၂၄, ၂၅ န့ၣ်လီၤ.