အဆၢဒိၣ် ၁၁
တၢ်သးဝံၣ်လၢ သိၣ်လိပှၤဒီးမၤမုာ်ထီၣ်ပသး
စီၤဒၤဝံးဒီးပှၤအဂုၤအဂၤတဖၣ်န့ၣ် ကွဲးဝဲတၢ်သးဝံၣ်လၢ တၢ်ကသူအီၤလၢတၢ်ဘူၣ်ထီၣ်ဘါထီၣ် ယွၤအဂီၢ်န့ၣ်လီၤ. လံာ်စံးထီၣ်ပတြၢၤအပူၤန့ၣ် တၢ်သးဝံၣ်အိၣ်ဝဲအယုၢ် ၁၅၀ လီၤ
လၢလံာ်စီဆှံပူၤ လံာ်လၢအထီကတၢၢ်တကတြူၢ်န့ၣ် မ့ၢ်တၢ်ပာ်ဖှိၣ် တၢ်သးဝံၣ်စီဆှံတဖၣ်န့ၣ်လီၤ. လံာ်တကတြူၢ်အံၤန့ၣ် ဘၣ်တၢ်ကွဲးအီၤယံာ်ဝဲအနံၣ် ၁,၀၀၀ ဃၣ်ဃၣ်န့ၣ်လီၤ. တၢ်ကွဲးအသးလၢ လံာ်စံးထီၣ်ပတြၢၤအပူၤန့ၣ် လၢပှဲၤဒီးအခီပညီ ဒီးပာ်ဖျါထီၣ်ဝဲ ပှၤဟီၣ်ခိၣ်ဖိအတၢ်စူၢ်တၢ်နာ်လၢ အထိၣ်ဟူးထိၣ်ဂဲၤထီၣ်ပသးဒိၣ်မးန့ၣ်လီၤ. လံာ်စံးထီၣ်ပတြၢၤတကတြူၢ်အံၤ ပာ်ဖျါထီၣ်ဝဲပှၤဟီၣ်ခိၣ်ဖိတဖၣ် အသးအတၢ်တူၢ်ဘၣ်အကလုာ်ကလုာ်လၢအမ့ၢ် တၢ်သူၣ်ခုသးခု, တၢ်စံးထီၣ်ပတြၢၤ, တၢ်စံးဘျုးစံးဖှိၣ်, တၢ်သူၣ်ကိၢ်သးဂီၤ, တၢ်သူၣ်အုးသးအုး ဒီးတၢ်ပီၢ်ယၢ်လီၤက့ၤသးန့ၣ်လီၤ. ပှၤလၢအကွဲးထါစံးထီၣ်ပတြၢၤအံၤန့ၣ် မ့ၢ်ပှၤလၢအအိၣ်ဒီးတၢ်ရ့လိာ်သးဒီးယွၤဘူးဘူးတံၢ်တံၢ် ဒီးသန့ၤအသးလၢယွၤန့ၣ်လီၤ. ပကဆိကမိၣ်ကွၢ် တၢ်သးဝံၣ်တဖၣ်အံၤ အတၢ်ဂ့ၢ်မိၢ်ပှၢ်တနီၤလီၤ.
ယဟိဝၤယွၤမ့ၢ် တၢ်ပၢကစၢ်အဒိၣ်ကတၢၢ် လၢကြၢးဒိးန့ၢ်ဘၣ် ပတၢ်ဘူၣ်ထီၣ်ဘါထီၣ်ဒီး တၢ်စံးထီၣ်ပတြၢၤန့ၣ်လီၤ. စံးထီၣ်ပတြၢၤ ၈၃:၁၈ ပာ်ဖျါဝဲလၢ “ဒီးကသ့ၣ်ညါလၢ နဲဒၣ်တဂၤဃီလၢ နမံၤမ့ၢ် ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.” ထါစံးထီၣ်ပတြၢၤတနီၤန့ၣ် စံးထီၣ်ပတြၢၤ ယဟိဝၤယွၤခီဖျိလၢ အဝဲတ့လီၤဝဲမူခိၣ်လၢအပှဲၤဝဲဒီးဆၣ်, သးသမူတဖၣ်လၢအိၣ်လၢဟီၣ်ခိၣ်ချၢ ဒီးပှၤဟီၣ်ခိၣ်ဖိအက့ၢ်အဂီၤ လၢအလီၤကမၢကမၣ်အဃိန့ၣ်လီၤ. (စံးထီၣ်ပတြၢၤ ၈, ၁၉, ၁၃၉, ၁၄၈) ထါစံးထီၣ်ပတြၢၤအဂၤတဖၣ်န့ၣ် မၤလၤကပီၤယဟိဝၤ ဒ်ယွၤလၢအမၤပူၤဖျဲးပှၤလၢ အသးတီဒီးအီၤတဖၣ် ဒီးကဟုကယာ်အဝဲသ့ၣ်န့ၣ်လီၤ. (စံးထီၣ်ပတြၢၤ ၁၈, ၉၇, ၁၃၈) တၢ်သးဝံၣ်အဂၤတဖၣ်စ့ၢ်ကီး စံးထီၣ်ပတြၢၤဝဲကစၢ်ယွၤ ဒ်အမ့ၢ်တၢ်စံၣ်ညီၣ်တီအကစၢ် လၢအမၤစၢၤဝဲပှၤလၢအဘၣ်တၢ်မၤနးမၤဖှီၣ်အီၤတဖၣ်ဒီး စံၣ်ညီၣ်ဝဲပှၤအၢပှၤသီတဖၣ်န့ၣ်လီၤ.—စံးထီၣ်ပတြၢၤ ၁၁, ၆၈, ၁၄၆.
ယဟိဝၤယွၤမၤစၢၤဒီး မၤမုာ်ထီၣ်ဝဲပှၤလၢအအဲၣ်အီၤတဖၣ်လီၤ. စံးထီၣ်ပတြၢၤ ၂၃ န့ၣ်ဘၣ်သ့ၣ်သ့ၣ်ကမ့ၢ် တၢ်သးဝံၣ်တယုၢ်လၢအဟူထီၣ်သါလီၤအါကတၢၢ်န့ၣ်လီၤ. ဖဲန့ၣ်န့ၣ်စီၤဒၤဝံးဒိလီၤဝဲ ယဟိဝၤယွၤဒ်ပှၤကွၢ်သိတဂၤလၢ အပှဲၤဒီးတၢ်အဲၣ်တၢ်ကွံလၢ အနဲၣ်လိ, ကဟုကယာ်, ဒီးအံးက့ၤကွၢ်က့ၤဝဲအသိတဖၣ်န့ၣ်လီၤ. စံးထီၣ်ပတြၢၤ ၆၅:၂ န့ၣ်ဒုးသ့ၣ်နီၣ်ထီၣ်က့ၤပှၤလၢအဘူၣ်ထီၣ်ဘါထီၣ်ယဟိဝၤယွၤလၢ အဝဲမ့ၢ်, “ပှၤလၢအနၢ်ဟူ တၢ်ဘါထုကဖၣ်တဂၤ” န့ၣ်လီၤ. ပှၤအါမးလၢအမၤဘၣ် တၢ်ကမၣ်ဖးဒိၣ်န့ၣ် ဒိးန့ၢ်ဘၣ်က့ၤတၢ်သူၣ်မံသးမုာ်လၢ စံးထီၣ်ပတြၢၤ ၃၉ ဒီး ၅၁ န့ၣ်လီၤ. ဖဲန့ၣ်န့ၣ်, စီၤဒၤဝံးကွဲးဝဲထါလၢပာ်ဖျါထီၣ်ဝဲ အတၢ်ပီၢ်ယၢ်လီၤက့ၤအသးလၢ သးဒီဖျၢၣ်လၢ အတၢ်ကမၣ်ဖးဒိၣ်အဃိဒီး အတၢ်နာ်လၢယဟိဝၤယွၤကပျၢ်ကွံာ်အတၢ်ကမၣ်န့ၣ်လီၤ. ဖဲစံးထီၣ်ပတြၢၤ ၅၅:၂၂ န့ၣ်ဟ့ၣ်သဆၣ်ထီၣ်ပှၤလၢ ပကသန့ၤပသးလၢ ယဟိဝၤယွၤဒီး ပကပာ်လီၤပတၢ်ဝံတၢ်ယိးခဲလၢာ်လၢ ကစၢ်အလိၤန့ၣ်လီၤ.
ယဟိဝၤယွၤ ကလဲလိာ်ဟီၣ်ခိၣ်တၢ်အိၣ်အသးခီဖျိ မ့းၡံအၤအဘီအမုၢ်လီၤ. ထါစံးထီၣ်ပတြၢၤ အယုၢ်အါမးန့ၣ် ဘၣ်ထွဲလိာ်သးဒီးမ့းၡံအၤ လၢအမ့ၢ်တၢ်စံးပာ်အစီၤပၤန့ၣ်လီၤ. စံးထီၣ်ပတြၢၤ အဆၢဒိၣ် ၂ န့ၣ် စံးပာ်ဝဲလၢ စီၤပၤအံၤကမၤဟးဂီၤကွံာ် ဘီမုၢ်အအၢအသီတဖၣ်လၢ အထီဒါအီၤခဲလၢာ်န့ၣ်လီၤ. စံးထီၣ်ပတြၢၤ ၇၂ န့ၣ်ပာ်ဖျါထီၣ်ဝဲလၢ စီၤပၤအံၤကမၤကတၢၢ်ကွံာ် တၢ်သၣ်ဝံၤသၣ်စ့ၤ, တၢ်တတီတလိၤ ဒီးတၢ်မၤနးမၤဖှီၣ်န့ၣ်လီၤ. ဒ် စံးထီၣ်ပတြၢၤ ၄၆:၉ တဲဝဲအသိး ကစၢ်ယွၤကမၤကတၢၢ်ကွံာ် တၢ်ဒုးတၢ်ယၤဒီးကမၤဟးဂီၤကွံာ်ဝဲ တၢ်စုကဝဲၤခဲလၢာ် ခီဖျိလၢမ့းၡံအၤ အဘီအမုၢ်န့ၣ်လီၤ. ဖဲ စံးထီၣ်ပတြၢၤ ၃၇ န့ၣ်ပဖးဘၣ်လၢ ပှၤအၢပှၤသီတဖၣ် ကဟါမၢ်ကွံာ်ဝဲကိးဂၤဒဲးလီၤ. မ့မ့ၢ်ပှၤတီပှၤလိၤတဖၣ်န့ၣ် ကအိၣ်မူလၢဟီၣ်ခိၣ်ချၢ လီၤစိၤလီၤထီဒီး ဟီၣ်ခိၣ်ဒီဘ့ၣ်န့ၣ်ကပှဲၤဒီးတၢ်ဃူတၢ်ဖိးလီၤ.
—ဘၣ်တၢ်ဒိးသန့ၤထီၣ်အီၤလၢ လံာ်စံးထီၣ်ပတြၢၤန့ၣ်လီၤ.