ပှၤပၢဆှၢတၢ်ကမံးတံာ်အလံာ်ပရၢ

လၢပဒီပုၢ်ဝဲၢ်တဖၣ်အဂီၢ်–

စးထီၣ်ဖဲ လါယနူၤအါရံၣ် ၁, ၂၀၀၈ တၢးထီခိးတၢ်လၢကမျၢၢ်အဂီၢ်န့ၣ် ပှၤထၢနုာ်တၢ်မၤလိလၢ အခိၣ်တီမ့ၢ်ဝဲ “ကွၢ်လိမၤဒိးအဝဲသ့ၣ်အတၢ်နာ်တက့ၢ်.” ဒီးပသးခုဒိၣ်မးလၢ ပှၤထုးထီၣ်ရၤလီၤဝဲ တၢ်မၤလိလၢအလီၤသူၣ်အိၣ်သးအိၣ်တဖၣ်အံၤ သၢလါတဘျီန့ၣ်လီၤ.

ပှၤဖးလံာ်ဖိတဖၣ် ပာ်ဖျါထီၣ်အတၢ်ထံၣ်ဒ်လဲၣ်. အဒိ ပိာ်မုၣ်တဂၤ ဖဲအဝဲဖးဝဲတၢ်မၤလိ ဘၣ်ဃးဒီး နီၢ်မၢ်သၤအဂ့ၢ်ဝံၤအခါ အဝဲကွဲးဝဲလၢ “မ့ၢ်လၢအတၢ်ပာ်သူၣ်ပာ်သးလီၤဂာ်ဒီးယၤအဃိ ဖဲယဖးဘၣ်အဂ့ၢ်အခါ ယကီၤနံၤတန့ၢ်ဘၣ်. ဖဲပှၤဟဲဟးလၢယဟံၣ် တဘျီဂ့ၤတဘျီဂ့ၤန့ၣ် ယအဲၣ်ဒိးကတဲာ်ကတီၤတၢ်လၢ အဝဲသ့ၣ်အဂီၢ်အဃိ တဘျီတခီၣ် ယသးပ့ၤနီၣ်လီၤယသးလၢ ယကတဲသကိးတၢ်ဒီးအဝဲသ့ၣ်လီၤ.” ဖဲပှၤသးစၢ်တဂၤဖးဝဲ နီၢ်အ့ၤစတၢ်အဂ့ၢ်ဝံၤအလီၢ်ခံ အဝဲစံးဝဲလၢ “ယနၢ်ပၢၢ်လၢ တဘျီတခီၣ် ပဝဲစ့ၢ်ကီးပသးစၢၢ်ဆၢ တၢ်ကူတၢ်ကၤလၢ အချုးစိၤခဲအံၤလီၤ. ပကြၢးဖျါကဆှဲကဆှီ ဘၣ်ဆၣ် ပတဘၣ်သးစၢၢ်ဆၢ တၢ်ဃံတၢ်လၤအါတလၢတဂ့ၤ.” ဒီးအဝဲစံးကဒီးဝဲလၢ “ယဟိဝၤယွၤ ကွၢ်ဝဲတၢ်အိၣ်လၢပသးပူၤလီၤ.” ဖဲဒီပုၢ်ဝဲၢ်မုၣ်အဂၤတဂၤ ဖးဘၣ်ဝဲ စီၤပ့းတရူးအဂ့ၢ်န့ၣ် အဝဲဘၣ်သူၣ်ဘၣ်သးဝဲဒိၣ်မးလီၤ. အဝဲစံးဝဲလၢ “ယလီၤထွံလီၤယွၤလၢတၢ်ဂ့ၢ်တဖၣ်အံၤအပူၤလီၤ. တကးဒံးဘၣ် ယတူၢ်ဘၣ်ဒ်သိးဒီး ယအိၣ်ဘၣ်ဖဲတၢ်ဆၢကတီၢ်အဝဲန့ၣ်လီၤ. ယဂုာ်ကျဲးစၢးအိၣ်ကွၢ်လၢအဝဲသ့ၣ်အလီၢ် ဒီးထံၣ်ကမှံကွၢ် ဒီးတူၢ်ဘၣ်တၢ်ဒ်အဝဲသ့ၣ်လဲၤခီဖျိဘၣ်ဝဲအသိးလီၤ.”

စီၤပီလူးကွဲးဝဲလၢ “ဖဲဒၣ်တၢ်ကွဲးအသးတဘီလၢ်လၢ်န့ၣ်, ဘၣ်ကွဲးအသးလၢ ပဘၣ်တၢ်သိၣ်တၢ်သီအဂီၢ်” လီၤ. (ရိ. ၁၅:၄) ပှၤဖးလံာ်ဖိလၢထးတဖၣ်အံၤ ဒီးပှၤဖးလံာ်ဖိလၢအဂၤတဖၣ် တူၢ်ဘၣ်ဝဲ ဒ်စီၤပီလူးကွဲးဝဲအသိး ဒီးဘၣ်သူၣ်ဘၣ်သးဝဲတၢ်မၤလိတဖၣ်အံၤဒိၣ်မးလီၤ. လၢတၢ်န့ၣ်အဃိ အဝဲသ့ၣ် ကွဲးဖျါထီၣ်က့ၤဝဲအတၢ်စံးဘျုးစံးဖှိၣ်န့ၣ်လီၤ. ယဟိဝၤယွၤ ပာ်ဖျါထီၣ်ဝဲ ပှၤလၢအဒိဂ့ၤတဲာ်ဘၣ်လၢ လံာ်စီဆှံအပူၤအံၤ ဒ်သိးအကဟ့ၣ်လီၤပှၤတၢ်နဲၣ်လိလၢ အကဲဘျုးလၢပဂီၢ်လီၤ. ပဝဲကိးဂၤဒဲး ပသ့ၣ်ညါတၢ်မ့ၢ်တၢ်တီ အနံၣ်ယံာ်ဝဲထဲလဲၣ် သနာ်က့ ပမၤလိန့ၢ်တၢ်လၢပှၤတဖၣ်အံၤအအိၣ် သ့ဝဲလီၤ.

ပဟ့ၣ်ဂံၢ်ဟ့ၣ်ဘါသုလၢ သုကဖးလံာ်တဘ့ၣ်အံၤလၢ အဆိအချ့လီၤ. သုမ့ၢ်သူလံာ်တဘ့ၣ်အံၤ ဖဲဟံၣ်ဖိဃီဖိတၢ်မၤလိလံာ်စီဆှံအဆၢကတီၢ်န့ၣ် သုဖိသုလံၤတဖၣ်ကသးခုဝဲဒိၣ်မးလီၤ. ပှၤမ့ၢ်သူလံာ်တဘ့ၣ်အံၤ ဖဲတၢ်အိၣ်ဖှိၣ် တၢ်မၤလိလံာ်စီဆှံအခါန့ၣ် ဟံးန့ၢ်တၢ်ဆၢကတီၢ်, ဖးလံာ်အံၤကယီကယီဒီး ဆိကမိၣ်အီၤလီၤတံၢ်လီၤဆဲးတက့ၢ်. ဒီးဂုာ်ကျဲးစၢးလဲၤထီၣ် တၢ်အိၣ်ဖှိၣ်ကိးဘျီဒဲးတက့ၢ်. ဖဲနဖးလံာ်အံၤအခါ နကသ့ၣ်ညါအါထီၣ် ပှၤလၢလံာ်စီဆှံပာ်ဖျါထီၣ်ဝဲတဖၣ်အဂ့ၢ်အါမးလီၤ. ဂုာ်ကျဲးစၢးအိၣ်ကွၢ်လၢ အဝဲသ့ၣ်အလီၢ် ဒီးထံၣ်ကမှံကွၢ်လၢ မ့ၢ်အဝဲသ့ၣ်ထံၣ်ဘၣ်တၢ်မနုၤလဲၣ် ဒီးတူၢ်ဘၣ်တၢ်ဒ်လဲၣ်န့ၣ်တက့ၢ်. အဒိ ဖဲအဝဲသ့ၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲအဆၢကတီၢ် အဝဲသ့ၣ်မၤဝဲဒ်လဲၣ် ဒီးဆိကမိၣ်ကွၢ်လၢ နၤစ့ၢ်ကီး နမ့ၢ်အိၣ်ဘၣ်လၢ အဝဲသ့ၣ်အလီၢ် နကမၤဒ်လဲၣ်န့ၣ်တက့ၢ်.

ပသးခုဒိၣ်မးလၢ ပထုးထီၣ်ရၤလီၤလံာ်တဘ့ၣ်အံၤလၢသုဂီၢ်လီၤ. ပဆၢမုၢ်လၢ်လၢ လံာ်တဘ့ၣ်အံၤ ကကဲထီၣ်တၢ်မၤစၢၤလၢ သုဟံၣ်ဖိဃီဖိအဂီၢ်လီၤ. လၢတၢ်အဲၣ် ဒီးတၢ်ဆၢဂ့ၤဆၢဝါအပူၤ,

ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်