တၢ်သံကွၢ်နီၣ်ဂံၢ် ၈
ဘၣ်ဃးဒီး တၢ်မၤတရီတပါန့ၣ် ယကြၢးသ့ၣ်ညါတၢ်ဂ့ၢ်မနုၤလဲၣ်
မ့မ့ၢ်နၤန့ၣ် နကမၤဒ်လဲၣ်
လၢတၢ်တပာ်သူၣ်ပာ်သးအပူၤ ပှၤတဂၤဆီၣ်လီၤဃံၢ်ဝဲ အနဲ(ထ်) ဆူဟီၣ်ခိၣ်လိၤလီၤ. အနဲ(ထ်) တဲဝဲလၢ “တသ့ဖဲအသ့, ယဂုာ်ကျဲးစၢးတြီဆၢအီၤလီၤ. ယဂုာ်ကျဲးစၢးကိးပသူ ဘၣ်ဆၣ်ဟးထီၣ်ထဲယကလံၤဒီး ယကလုၢ်တသီၣ်ဘၣ်. ယဆီၣ်အီၤ, ယထူတံၢ်အီၤ, ယထိအီၤ, ဒီးယကွးအီၤလီၤ. ဘၣ်ဆၣ် ဖဲန့ၣ်အဆၢကတီၢ် ယတူၢ်ဘၣ်လၢအဝဲကူးယၤလၢဒီ ဒီးယတြီဆၢအီၤတဘူၣ်လၢၤဘၣ်.”
နမ့ၢ်အိၣ်ဘၣ်လၢ အနဲ(ထ်) အလီၢ်န့ၣ်နကမၤဒ်လဲၣ်.
ဟံးန့ၢ်တၢ်ဆၢကတီၢ် ဒီးဆိကမိၣ်ထံတၢ် တက့ၢ်
နမ့ၢ်အိၣ်ဒီးတၢ်ပလီၢ်သး သနာ်က့ ဖဲနလဲၤတၢ်က့ၤတၢ်လၢ မုၢ်နၤခီန့ၣ်တၢ်ကီတၢ်ခဲဟဲဘၣ်နၤသ့ဝဲလီၤ. လံာ်စီဆှံတဲဝဲလၢ “ပှၤဃ့ၢ်သတြီၤချ့န့ၣ်တတုၤဆိဘၣ် . . . ဒီးပှၤမၤတၢ်သ့ တဘၣ်ဘျုးဘၣ်ဖှိၣ်ဘၣ်လီၤ. မ့မ့ၢ်တၢ်အဆၢအကတီၢ် ဒီးတၢ်ဘၣ်အတီၤဘၣ်ပှၤခဲလၢာ်လီၤ.”—စံၣ်တဲၤတဲၤလီၤတၢ် ၉:၁၁.
ပှၤသးစၢ်တနီၤနီၤ ဒ်သိးဒီး အနဲ(ထ်) န့ၣ် ဘၣ်တၢ်မၤတရီတပါအီၤလၢ ပှၤလၢအတသ့ၣ်ညါဝဲတဂၤလီၤ. ပှၤသးစၢ်အဂၤတနီၤန့ၣ် အဝဲသ့ၣ်အသကိး မ့တမ့ၢ် အဘူးအတံၢ်တဂၤဂၤ မၤတရီတပါအီၤန့ၣ်လီၤ. အဒိ ဖဲ နါတလံ အသးအိၣ်ထဲအနံၣ် ၁၀ အခါ ပှၤသးစၢ်တဂၤလၢအအိၣ်ဘူးဒီးအဟံၣ်န့ၣ် မၤတရီတပါအီၤလီၤ. အဝဲတဲဝဲလၢ “လၢအခီၣ်ထံးန့ၣ် ခီဖျိလၢ ယပျံၤတၢ်ဒီးယမဲာ်ဆှးဒိၣ်မးအဃိ ယတအဲၣ်ဒိးတဲဘၣ်ပှၤနီတဂၤဘၣ်.”
တမ့ၢ်နတၢ်ကမၣ်ဘၣ်
တုၤခဲအံၤန့ၣ် အနဲ(ထ်) တူၢ်ဘၣ်ဝဲလၢအတၢ်ကမၣ်အိၣ်ဝဲလီၤ. အဝဲတဲဝဲလၢ “ထီဘိန့ၣ် ယဆိကမိၣ်က့ၤတၢ်မၤအသးလၢ မုၢ်တနၤန့ၣ် တဘျီဝံၤတဘျီလီၤ. ယတူၢ်ဘၣ်လၢ နၤအဝဲန့ၣ် ယကြၢးတြီဆၢအီၤအါန့ၢ်အလီၢ်ဒံး, ယမ့ၢ်တဲတီတီန့ၣ် ဖဲအဝဲကူးယၤလၢဒီဝံၤ ယပျံၤတၢ်ဒိၣ်မးတုၤလၢ ယဟူးတန့ၢ်လၢၤဘၣ်. ဒီးအခဲအံၤ ယတူၢ်ဘၣ်လၢ ဖဲန့ၣ်အဆၢကတီၢ် ယတကြၢးဟ့ၣ်ၡူဘၣ်. ယကြၢးတြီဆၢအီၤ တုၤလၢအကတၢၢ်လီၤ.”
နါတလံ စ့ၢ်ကီးတူၢ်ဘၣ်ဝဲလၢအတၢ်ကမၣ်အိၣ်ဝဲလီၤ. အဝဲတဲဝဲလၢ “ယတကြၢးနာ်န့ၢ်ပှၤအဂၤတဖၣ်ဘၣ်. ယမိယပါမၤလိာ်ယၤဒီးယဒ့မုၣ်လၢ ပမ့ၢ်လိာ်ကွဲလၢတၢ်ချၢန့ၣ် ပကဘၣ်လိာ်ကွဲဒ်သိးသိးလီၤ. ဘၣ်ဆၣ် ယတကနၣ်ဘၣ်. အဃိ ယတူၢ်ဘၣ်လၢ ယအိးဟိထီၣ်ကျဲ ဒ်သိးပှၤလၢအအိၣ်ဘူးဒီးယဟံၣ်တဂၤအံၤ ကမၤဘၣ်ဒိယၤအဂီၢ်လီၤ. လၢတၢ်ဂ့ၢ်တခါအံၤအဃိ ယဟံၣ်ဖိဃီဖိအသးဘၣ်ဒိဝဲဒိၣ်မးလီၤ. ဒီးယတူၢ်ဘၣ်လၢ တၢ်လၢယဟံၣ်ဖိဃီဖိ တူၢ်ဘၣ်ဝဲတဖၣ်န့ၣ် မ့ၢ်ဝဲလၢယဃိလီၤ. ယတၢ်တူၢ်ဘၣ်တဖၣ်အံၤ ကဲထီၣ်တၢ်ကီတၢ်ခဲလၢယဂီၢ်ဒိၣ်မးလီၤ.”
နမ့ၢ်တူၢ်ဘၣ်ဒ် အနဲ(ထ်) မ့တမ့ၢ် နါတလံ အသိးန့ၣ် နကဘၣ်သ့ၣ်နီၣ်ထီၣ်လၢ ပှၤလၢအဘၣ်တၢ်ဖီၣ်ဆူၣ်အီၤတဖၣ် တမ့ၢ်တၢ်လၢ အဝဲသ့ၣ်ဘၣ်သးဝဲဘၣ်. ပှၤတနီၤနီၤတဲပူၤဖျဲးဝဲပှၤပိာ်ခွါလၢ အဖီၣ်ဆူၣ်ပိာ်မုၣ်တဖၣ် ဒီးတဲဝဲလၢ တၢ်လၢပှၤပိာ်ခွါန့ၣ် အလုၢ်အလၢ်အိၣ်ဝဲဒ်န့ၣ်လီၤ. မ့တမ့ၢ် တဲဝဲလၢ ပိာ်မုၣ်တဖၣ်အံၤတၢ်ဖီၣ်ဆူၣ်အီၤ ခီဖျိလၢအဝဲသ့ၣ်ထိၣ်ဟူးထိၣ်ဂဲၤထီၣ် ပိာ်ခွါအသးအဃိလီၤ. နီၢ်နီၢ်န့ၣ် ပှၤတကြၢးဖီၣ်ဆူၣ်ပိာ်မုၣ်နီတဂၤဘၣ်. ဒီးနမ့မ့ၢ်ပှၤလၢ အဘၣ်တၢ်ဖီၣ်ဆူၣ်အီၤတဂၤန့ၣ် ပှၤပာ်တၢ်ကမၣ်လၢနလိၤ အလီၢ်တအိၣ်ဘၣ်.
တၢ်ကတိၤလၢအမ့ၢ် “ပှၤပာ်တၢ်ကမၣ်လၢနလိၤအလီၢ်တအိၣ်ဘၣ်” န့ၣ် ပတဲဘၣ်အီၤညီသနာ်က့ ပကနာ်အီၤအဂီၢ်ကီဒိၣ်မးလီၤ. ပှၤတနီၤနီၤတူၢ်ဘၣ်ဝဲလၢ အတၢ်ကမၣ်အိၣ်ဝဲထီဘိဒီး တူၢ်ဘၣ်စ့ၢ်ကီးဝဲ တၢ်သူၣ်အုးသးအုးသနာ်က့ တတဲဖျါထီၣ်အတၢ်တူၢ်ဘၣ်တဖၣ်ဘၣ်. ဘၣ်ဆၣ် နမ့ၢ်တတဲဖျါတၢ်နီတမံၤဘၣ်န့ၣ် ကကဲဘျုးလၢနဂီၢ်ဧါ. မ့တမ့ၢ် ကကဲဘျုးလၢ ပှၤလၢအမၤတရီတပါနၤတဂၤအဂီၢ်ဧါ. နကြၢးဆိကမိၣ်ထံ တၢ်ဂ့ၢ်လၢလာ်တဖၣ်အံၤလီၤ.
တဲဖျါထီၣ်နတၢ်လဲၤခီဖျိ
လံာ်စီဆှံပာ်ဖျါဝဲလၢ ဖဲပှၤတီပှၤလိၤစီၤယိၤဘး အတၢ်သူၣ်ကိၢ်သးဂီၤ နးထီၣ်ဝဲအဆၢကတီၢ်န့ၣ် အဝဲတဲဝဲလၢ “ယကကတိၤတၢ်လၢယသူၣ်ကိၢ်သးဂီၤလီၤ.” (ယိၤဘး ၁၀:၁) ဘၣ်သ့ၣ်သ့ၣ် နၤစ့ၢ်ကီးနမ့ၢ်မၤဒ်န့ၣ်န့ၣ် ကဂ့ၤဝဲလၢနဂီၢ်လီၤ. ဒ်သိးနကဒိးန့ၢ်ဘၣ်တၢ်မၤစၢၤလၢ နတၢ်တူၢ်ဘၣ်တဖၣ်ဒီး လဲၤဆူညါကကဲဝဲအဂီၢ် နတဲသကိးတၢ်ဒီးပှၤလၢ နနာ်န့ၢ်အီၤတဂၤဂၤသ့ဝဲလီၤ.
ဘၣ်သ့ၣ်သ့ၣ် နတၢ်တူၢ်ဘၣ်တဖၣ် ကကဲထီၣ်တၢ်ဝံတၢ်ယိးလၢ နယိးထဲတဂၤတကဲလၢၤဘၣ်အဃိ နမ့ၢ်တဲသကိးဒီးပှၤတဂၤဂၤန့ၣ် ကဂ့ၤဝဲလီၤ
ခီဖျိလၢ အနဲ(ထ်) မၤဝဲဒ်အံၤအဃိ အဝဲဒိးန့ၢ်ဘၣ်တၢ်မၤစၢၤလီၤ. အဝဲတဲဝဲလၢ “ယတဲသကိးတၢ်ဒီး ယတံၤသကိးလၢယနာ်န့ၢ်အီၤတဂၤ ဒီးအဝဲဟ့ၣ်သဆၣ်ထီၣ်ယၤလၢ ယကလဲၤတဲသကိးတၢ်ဒီး တၢ်အိၣ်ဖှိၣ်သးပှၢ်ခံဂၤလၢ တၢ်အိၣ်ဖှိၣ်အပူၤလီၤ. မ့ၢ်လၢယမၤဒ်န့ၣ်အဃိ ယသးခုၣ်လီၤက့ၤလီၤ. အဝဲသ့ၣ်ဟ့ၣ်တၢ်ဆၢကတီၢ်လၢ ကတဲသကိးတၢ်ဒီးယၤတဘျုးဘျီ, ဒီးဒုးနၢ်ပၢၢ်ယၤလၢ တၢ်လၢအဟဲကဲထီၣ်အသးတဖၣ်န့ၣ် တမ့ၢ်လၢယတၢ်ကမၣ်အဃိဘၣ်. အဝဲသ့ၣ်အတၢ်ကတိၤအံၤ ကဲထီၣ်တၢ်မၤစၢၤလၢယဂီၢ် သပှၢ်ကတၢၢ်လီၤ.”
နါတလံ တဲဘၣ်အမိၢ်အပၢ်ဘၣ်ဃးဒီး အတၢ်လဲၤခီဖျိစ့ၢ်ကီးလီၤ. အဝဲတဲဝဲလၢ “အဝဲသ့ၣ်ဟ့ၣ်ဂံၢ်ဟ့ၣ်ဘါယၤလၢ ယကတဲဖျါထီၣ်ယတၢ်လဲၤခီဖျိ, ဒီးခီဖျိလၢယမၤဒ်န့ၣ်အဃိ ကဲထီၣ်တၢ်မၤစၢၤဒ်သိး ယတၢ်သးအုးဒီး ယတၢ်သးထီၣ်ကလီၤစှၤဝဲအဂီၢ်လီၤ.”
နါတလံ ဒိးန့ၢ်ဘၣ်တၢ်သူၣ်မံသးမုာ်ခီဖျိလၢ အတၢ်ထုကဖၣ်စ့ၢ်ကီးလီၤ. အဝဲတဲဝဲလၢ “ဖဲယဃ့ထုကဖၣ်ဆူကစၢ်ယွၤအအိၣ်န့ၣ် ကဲထီၣ်တၢ်မၤစၢၤလၢယဂီၢ် လီၤဆီဒၣ်တၢ် ဆၢကတီၢ်ဖဲယတူၢ်ဘၣ်လၢ ယတဲဖျါထီၣ်ယတၢ်တူၢ်ဘၣ်ဆူ ပှၤဂၤအအိၣ်တသ့နီတဂၤဘၣ်အခါန့ၣ်လီၤ. ဒီးဖဲယဃ့ထုကဖၣ်အခါ ယတဲဖျါထီၣ်ယတၢ်တူၢ်ဘၣ် ၡဲၡဲပျီပျီ ဒီးယဒိးန့ၢ်ဘၣ်တၢ်သူၣ်မံသးမုာ်နီၢ်ကီၢ် လီၤ.”
နၤစ့ၢ်ကီးနကထံၣ်ဘၣ်လၢ “အကတီၢ်လၢ တၢ်မၤဘျါက့ၤအဂီၢ်” အိၣ်ဝဲလီၤ. (စံၣ်တဲၤတဲလီၤတၢ် ၃:၃) ကွၢ်ထွဲနတၢ်အိၣ်ဆူၣ်အိၣ်ချ့ဒီး တြီဆၢတၢ်ဆိကမိၣ်လၢ ကမၤဘၣ်ဒိနသးတက့ၢ်. ဟံးန့ၢ်တၢ်ဆၢကတီၢ်လၢ နကအိၣ်ဘှံးအိၣ်သါတက့ၢ်. ဒီးတၢ်လၢအရ့ဒိၣ်ကတၢၢ်န့ၣ် သန့ၤနသးလၢ တၢ်မၤမုာ်ထီၣ်က့ၤခဲလၢာ်အကစၢ် လၢအမ့ၢ်ယဟိဝၤယွၤတက့ၢ်.—၂ ကရံၣ်သူး ၁:၃, ၄.
နသးနံၣ် မ့ၢ်ပှဲၤထီၣ်လၢနကပာ်တၢ်အဲၣ်တီအဂီၢ်
နမ့မ့ၢ်ပိာ်မုၣ်တဂၤဒီး ပှၤမ့ၢ်ဆီၣ်သနံးနၤလၢ နကမၤတၢ်လၢအတကဆှီဘၣ်န့ၣ် လၢတၢ်သးဒူအပူၤ နတဲအီၤသ့လၢ မၤဒ်န့ၣ်တဂ့ၤ မ့တမ့ၢ် ဟဲဖီၣ်ယၤဒ်န့ၣ်တဂ့ၤ. တဘၣ်ပျံၤလၢ နတၢ်အဲၣ်တီကပာ်တ့ၢ်နၤတဂ့ၤ. အဝဲမ့ၢ်ပာ်တ့ၢ်နၤခီဖျိလၢ နတြီဆၢအီၤဒ်န့ၣ်အဃိ အတကြၢးဒီးနၤဘၣ်. ပှၤလၢအကကဲထီၣ် နသးသမူတံၤသကိးတဂၤ ကြၢးမ့ၢ်ပိာ်ခွါမူာ်နီၢ်တဂၤလၢ အပာ်ကဲနနီၢ်ခိဒီး နလုၢ်လၢ်သကဲာ်ပဝးလၢအဂ့ၤန့ၣ်လီၤ.
တၢ်သံကွၢ်ဘၣ်ဃးဒီး မုၣ်ခွါတၢ်မၤအ့န့ပယွဲ
ခိရဲထၤတဲဝဲလၢ “ဖဲယထီၣ်တီၤခၢၣ်သးကၠိအခါ ပှၤပိာ်ခွါတဖၣ်ဟဲထုးဝဲ ယဆ့ကၤဖိအပျံၤ ဒီးတဲယၤတၢ်ကတိၤလၢ အတဂ့ၤသ့ၣ်တဖၣ်, အဒိ တဲဝဲလၢ ယမ့ၢ်မံဃုာ်ဒီးအဝဲသ့ၣ်န့ၣ် ယတူၢ်ဘၣ်ကမုာ်ဒိၣ်မးလီၤ.”
မ့ၢ်နဆိကမိၣ်လၢ ပိာ်ခွါတဖၣ်အံၤ
က. တဲလိာ်ကွဲအီၤဧါ.
ခ. ဂဲၤလိာ်ကွဲတၢ်အဲၣ်ဒီးအီၤဧါ.
ဂ. မၤဝဲမုၣ်ခွါတၢ်မၤအ့န့ပယွဲဧါ.
ခဲဒၢး(စ်) တဲဝဲလၢ “ဖဲယဒိး ဘၢး(စ်)ကါ အခါ ပှၤပိာ်ခွါဖိတဂၤ တဲယၤတၢ်ကတိၤဘၣ်အၢဘၣ်သီဒီး ဖီၣ်ထုးယၤလီၤ. ယဒဲဖျိးကွံာ်အစုဒီး ယတဲအီၤလၢ ဟဲမၤဘူးယၤတဂ့ၤ. အဝဲကွၢ်ယၤလီၤဂာ်ဒ်သိးဒီး ယမ့ၢ်ပှၤပျုၢ်တဂၤလီၤ.”
မ့ၢ်နဆိကမိၣ်လၢ ပိာ်ခွါဖိတဂၤအံၤ မၤဝဲခဲဒၢး(စ်) ဒ်လဲၣ်.
က. တဲလိာ်ကွဲအီၤဧါ
ခ. ဂဲၤလိာ်ကွဲတၢ်အဲၣ်ဒီးအီၤဧါ
ဂ. မၤဝဲမုၣ်ခွါတၢ်မၤအ့န့ပယွဲဧါ
ဘဲသနံးတဲဝဲလၢ “မဟိတနံၣ်န့ၣ် ပိာ်ခွါဖိတဂၤဟဲတဲယၤတလီၢ်လီၢ်လၢ အဝဲကွၢ်ယၤဂ့ၤဒီး အဲၣ်ဒိးပာ်တၢ်အဲၣ်တီဒီးယၤလီၤ. ဘၣ်ဆၣ် ထီဘိန့ၣ်ယတဲအီၤလၢ ယတအဲၣ်ဒိးမၤဘၣ်. တဘျီတခီၣ်အဝဲဖူးလဲးယစု, ယတဲအီၤမၤတဂ့ၤ ဘၣ်ဆၣ်အဝဲဆဲးမၤဝဲလီၤ. ဒီးဘၣ်တဘျီဖဲ ယစၢထီၣ်ယခီၣ်ဖံးပျံၤအခါ အဝဲဟဲဒဲယခံလီၤ.”
လၢနတၢ်ထံၣ်န့ၣ် ပှၤပိာ်ခွါဖိတဂၤအံၤ မ့ၢ်အဝဲ–
က. တဲလိာ်ကွဲအီၤဧါ
ခ. ဂဲၤလိာ်ကွဲတၢ်အဲၣ်ဒီးအီၤဧါ
ဂ. မၤဝဲမုၣ်ခွါတၢ်မၤအ့န့ပယွဲဧါ
လၢတၢ်သံကွၢ်သၢဖျၢၣ်အံၤအဂီၢ် တၢ်စံးဆၢလၢအဘၣ်န့ၣ်မ့ၢ်ဝဲ (ဂ) လီၤ.
တၢ်လၢမုၣ်ခွါတၢ်မၤအ့န့ပယွဲန့ၣ် လီၤဆီလိာ်အသးဒီး တၢ်တဲလိာ်ကွဲဒီး တၢ်ဂဲၤလိာ်ကွဲတၢ်အဲၣ်န့ၣ်ဒ်လဲၣ်.
မုၣ်ခွါတၢ်မၤအ့န့ပယွဲ န့ၣ်မ့ၢ်တၢ်လၢပှၤမၤဝဲ တခီတၢၤလီၤ. အခီပညီမ့ၢ်ဝဲ ပှၤလၢတူၢ်ဘၣ်တၢ်တဂၤ တြီဆၢဝဲသနာ်က့ အဝဲဆဲးမၤဝဲလီၤ.
တၢ်မၤအ့န့ပယွဲ န့ၣ်မ့ၢ်တၢ်လၢအလီၤဘၣ်ယိၣ်ဒိၣ်မးဒီး ကဲထီၣ်တၢ်မၤတရီတပါသ့ဝဲလီၤ.