တၢ်မၤလိ ၅၈
ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤ
ပှၤယူဒၤဖိတဖၣ် လဲၤသဒၣ် ယဟိဝၤယွၤ တဘျီဝံၤတဘျီ ဒီးဘူၣ်ထီၣ်ဘါထီၣ်ဝဲ ယွၤအကမၣ်တဖၣ်. ယဟိဝၤယွၤ ဂုာ်ကျဲးစၢးမၤစၢၤ ပှၤယူဒၤဖိတဖၣ် အိၣ်ဝဲအနံၣ်အါမးလံ. ကစၢ်ယွၤဆှၢလီၤအဝံတဖၣ် ဒ်သိးကဟ့ၣ်ပလီၢ်ဝဲ ပှၤယူဒၤဖိအဂီၢ်. ဘၣ်ဆၣ် ပှၤယူဒၤဖိတဖၣ် တဒိကနၣ်ဝဲ ဝံတဖၣ် အကလုၢ်ဘၣ်. လၢတၢ်န့ၣ်အလီၢ် အဝဲသ့ၣ်တဲဆါဝဲ ဝံတဖၣ်. ခီဖျိလၢ ပှၤယူဒၤဖိ ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အဃိ ယဟိဝၤယွၤ ကစံၣ်ညီၣ်အဝဲသ့ၣ်ဒ်လဲၣ်.
ဘၤဘူၤလိၣ်အစီၤပၤ နဘူၤကးန့စၢ် ဒုးနၢၤဝဲထံကီၢ် တဘ့ၣ်ဘၣ်တဘ့ၣ်. ဖဲစီၤပၤနဘူၤကးန့စၢ် ဒုးန့ၢ်ဝဲဝ့ၢ်ယရူၤၡလ့ၣ် အဆိကတၢၢ်တဘျီန့ၣ် အဝဲက့ၤဖီၣ်ဝဲ စီၤပၤယဟိၤယါခံၣ်, ပဒိၣ်ဖးဒိၣ်တဖၣ်, ပှၤသုးဖိတဖၣ် ဒီးပှၤစုသ့ဖိတဖၣ်ဆူ ဘၤဘူၤလိၣ်အပူၤ. အဝဲက့ၤစိာ်စ့ၢ်ကီးဝဲ တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤ အတၢ်လုၢ်ဟံၣ် အပူၤခဲလၢာ်. ဝံၤဒီး စီၤပၤနဘူၤကးန့စၢ် ပာ်ထီၣ်ဝဲစီၤစံးဒကံယၤ လၢယူဒၤအစီၤပၤ.
ခီၣ်ထံးခါန့ၣ် စီၤပၤစံးဒကံယၤ ဒိကနၣ်ဝဲ စီၤပၤနဘူၤကးန့စၢ် အကလုၢ်. ဘၣ်ဆၣ် ထံကီၢ်လၢအိၣ်ဘူးဒီး ဝ့ၢ်ယရူၤၡလ့ၣ် ဒီးဝံအဘျၣ်တဖၣ်န့ၣ် ဟ့ၣ်ကူၣ်ဝဲ စီၤပၤစံးဒကံယၤလၢ ကထီဒါက့ၤဝဲ ဘၤဘူၤလိၣ်အစီၤပၤ. မ့မ့ၢ်ဝံယံးရမံယၤန့ၣ် အဝဲဟ့ၣ်ပလီၢ် စီၤပၤစံးဒကံယၤလၢ ‘နမ့ၢ်ထီဒါဘၤဘူၤလိၣ်အစီၤပၤန့ၣ် တၢ်မၤသံမၤဝီ, တၢ်သၣ်ဝံၤလီၤဒိ ဒီးတၢ်ဆူးတၢ်ဆါ ကအိၣ်ထီၣ်ဝဲလၢ ကီၢ်ယူဒၤအပူၤ.’
ဖဲစီၤပၤစံးဒကံယၤ ပၢတၢ်ပှဲၤထီၣ်ဃိးနံၣ် ဝံၤအလီၢ်ခံ အဝဲဆၢတဲာ်လီၤအသးလၢ ကထီဒါဝဲဘၤဘူၤလိၣ်အစီၤပၤ. စီၤပၤစံးဒကံယၤ ဃ့တၢ်မၤစၢၤလၢ ပှၤအဲၤကူပတူးဖိ အသုးမုၢ်တဖၣ်အအိၣ်. ဝံၤဒီး စီၤပၤနဘူၤကးန့စၢ် ဆှၢထီၣ်အသုးမုၢ်တဖၣ် လၢကဒုးဝဲဝ့ၢ်ယရူၤၡလ့ၣ်အဂီၢ် ဒီးအဝဲသ့ၣ်ကဝီၤဃာ်ဝဲဝ့ၢ်အံၤ. ဝံယံးရမံယၤတဲဘၣ် စီၤပၤစံးဒကံယၤလၢ ‘ယဟိဝၤယွၤ တဲဝဲလၢ နမ့ၢ်တူၢ်ၡူနသးလၢ ပှၤဘၤဘူၤလိၣ်ဖိအစုပူၤန့ၣ် နၤဒီးဝ့ၢ်အံၤကပူၤဖျဲးဝဲ. ဘၣ်ဆၣ် နမ့ၢ်တတူၢ်ၡူ နသးန့ၣ် ပှၤဘၤဘူၤလိၣ်ဖိတဖၣ် ကဒွဲၣ်အူထီၣ်ကွံာ်ဝဲ ဝ့ၢ်ယရူၤၡလ့ၣ် ဒီးပှၤကက့ၤဖီၣ်နၤ.’ စီၤပၤစံးဒကံယၤ တဲဝဲလၢ ‘ယတတူၢ်ၡူယသး နီတစဲးဘၣ်.’
တၢ်ဆၢကတီၢ်လဲၤပူၤကွံာ်ဝဲ တနံၣ်ဘျဲၣ် ဝံၤအလီၢ်ခံ ဘၤဘူၤလိၣ် အသုးဖိတဖၣ် မၤဟးဂီၤကွံာ်ဝဲ ဝ့ၢ်ယရူၤၡလ့ၣ်အတၢ်ဒူၣ် ဒီးဒွဲၣ်အူထီၣ်ကွံာ်ဝဲ ဝ့ၢ်လၢမ့ၣ်အူ. အဝဲသ့ၣ်ဒွဲၣ်အူထီၣ်ဝဲတၢ်လုၢ်ဟံၣ်, မၤသံပှၤအါအါဂီၢ်ဂီၢ် ဒီးက့ၤစိာ်ဝဲ ပှၤလၢအကထိတဖၣ်လၢ ကကဲကုၢ်အဂီၢ်.
စီၤပၤစံးဒကံယၤ ဃ့ၢ်ပူၤဖျဲးအသးလၢ ဝ့ၢ်ယရူၤၡလ့ၣ် ဘၣ်ဆၣ် ပှၤဘၤဘူၤလိၣ်ဖိတဖၣ် လူၤဖီၣ်အီၤ. အဝဲသ့ၣ်ဖီၣ်န့ၢ်ဝဲ စီၤပၤစံးဒကံယၤ ဘူးဒီးဝ့ၢ်ယရံၤဃိ ဒီးက့ၤကိးအီၤဆူ စီၤပၤနဘူၤကးန့စၢ်အအိၣ်. ဘၤဘူၤလိၣ်အစီၤပၤ မၢပှၤမၤသံကွံာ် စီၤပၤစံးဒကံယၤအဖိခွါလၢ အမဲာ်ညါ. ဝံၤဒီးစီၤပၤနဘူၤကးန့စၢ် မၤဘျီၣ်ကွံာ်ဝဲ စီၤပၤစံးဒကံယၤအမဲာ်ချံ ဒီးဖၢနုာ်အီၤလၢဃိာ်ပူၤ. လၢခံန့ၣ် စီၤပၤစံးဒကံယၤသံဝဲဖဲန့ၣ်. ဘၣ်ဆၣ် ယဟိဝၤယွၤအၢၣ်လီၤ ပှၤယူဒၤဖိတဖၣ်လၢ ‘အနံၣ် ၇၀ မ့ၢ်ဝံၤန့ၣ် ယကဟဲက့ၤကိး ကဒါက့ၤသုလၢ ဝ့ၢ်ယရူၤၡလ့ၣ်.’
ပှၤသးစၢ်လၢ ဘၣ်တၢ်က့ၤဖီၣ်အီၤ လၢဘၤဘူၤလိၣ်န့ၣ် တၢ်ကမၤအသးဒီး အဝဲသ့ၣ်ဒ်လဲၣ်. မ့ၢ်အဝဲသ့ၣ် ကဆဲးတီဒီး ယဟိဝၤယွၤဒံးဧါ.
“သ့တၢ်လၢာ် ယဟိဝၤယွၤဧၢ, နတၢ်စံၣ်ညီၣ်တဖၣ်န့ၣ် မ့ၢ်ဝဲတီဝဲ ဒီးတီဝဲလိၤဝဲလီၤ.”—လီၣ်ဖျါ ၁၆:၇