ယဟိဝၤယွၤ ဒီသဒၢဝဲ ယ့ၣ်ၡူး

ပှၤအိၣ်လၢထံကီၢ်လၢ အအိၣ်လၢ ကီၢ်အံၣ်စရ့လး အမုၢ်ထီၣ်တခီန့ၣ်​ နာ်ဝဲလၢဆၣ်တဖၣ်​ ဟံးစုနဲၣ်ကျဲအဝဲသ့ၣ်. ဘၣ်တနၤန့ၣ်​ ပှၤတနီၤလၢ အိၣ်လၢမုၢ်ထီၣ်တခီ ထံၣ်ဘၣ်ဝဲ တၢ်တမံၤလၢ အကပီၤ ဒ်သိးဒီးဆၣ်တဖျၢၣ်​ အိၣ်ဖျါထီၣ်ဝဲ လၢတၢ်ဖးဖီ. ဒီးခီဖျိလၢ “ဆၣ်” တဖျၢၣ်သုးအသး လၢတၢ်ဖးဖီအဃိ အဝဲသ့ၣ်လဲၤပိာ်အခံ. “ဆၣ်” တဖျၢၣ်အံၤ ဆှၢအဝဲသ့ၣ်​ လၢဝ့ၢ်ယရူၤၡလ့ၣ်. ဒီးအဝဲသ့ၣ်သံကွၢ်ဝဲ ပှၤအဂၤတဖၣ်လၢ ‘ယူဒၤအစီၤပၤလၢ အဟဲအိၣ်ဖျဲၣ်ထီၣ်တဂၤန့ၣ်​ အိၣ်ဖဲလဲၣ်. ပဟဲဒ်သိး ပကယူးယီၣ်အီၤ.’

ဖဲယရူၤၡလ့ၣ်​ အစီၤပၤဟ့ၤရိာ် နၢ်ဟူဘၣ်ဝဲ ဘၣ်ဃးဒီး စီၤပၤလၢ အသီတဂၤအံၤ အဂ့ၢ်အခါ အဝဲဘၣ်ယိၣ်တၢ် ဒိၣ်မး. စီၤပၤဟ့ၤရိာ် သံကွၢ်ဝဲ ပှၤလုၢ်တၢ်ဒိၣ်တဖၣ်လၢ ‘စီၤပၤလၢ အသီတဂၤန့ၣ်​ ကအိၣ်ဖျဲၣ်ထီၣ်ဝဲလၢ တၢ်လီၢ်ဖဲလဲၣ်.’ အဝဲသ့ၣ်တဲဘၣ်က့ၤ စီၤပၤဟ့ၤရိာ်လၢ ‘ဝံတဖၣ်​ တဲဆိပာ်ဝဲလၢ ဖိသၣ်န့ၣ်​ ကအိၣ်ဖျဲၣ်ထီၣ်ဝဲလၢ ဘ့ၤသလ့ဃ့ၣ်အပူၤ.’ အဃိ စီၤပၤဟ့ၤရိာ်ကိးန့ၢ်ဝဲ ပှၤအိၣ်ဟဲလၢမုၢ်ထီၣ်တဖၣ်အံၤ ဒီးတဲဘၣ်အဝဲသ့ၣ်လၢ ‘လဲၤလၢ ဘ့ၤသလ့ဃ့ၣ်ဒီးဃုဖိသၣ်, ဝံၤဒီး ဟဲက့ၤတဲဘၣ်ယၤလၢ ဖိသၣ်အိၣ်ဖဲလဲၣ်. ယအဲၣ်ဒိး လဲၤယူးယီၣ်အီၤစ့ၢ်ကီး.’ ဘၣ်ဆၣ်​ စီၤပၤဟ့ၤရိာ်န့ၣ်​ အိၣ်ဒၣ်​ အလံၣ်တၢ်လီၤ.

ဖဲန့ၣ်အခါ “ဆၣ်” တဖျၢၣ်န့ၣ်​ စးထီၣ်လဲၤကဒီးတၢ် ဒီးဆှၢအဝဲသ့ၣ်တုၤလၢ ဘ့ၤသလ့ဃ့ၣ်. “ဆၣ်” တဖျၢၣ်အံၤအိၣ်ပတုာ်ဝဲလၢ ဟံၣ်တဖျၢၣ်အဖီခိၣ်​ ဒီးအဝဲသ့ၣ်လဲၤနုာ်ဝဲလၢဟံၣ်ပူၤ. အဝဲသ့ၣ်ထံၣ်ဘၣ်ဝဲ ယ့ၣ်ၡူးဒီးအမိၢ်နီၢ်မၤရံ. ဝံၤဒီးအဝဲသ့ၣ်​ ပာ်ဖျါထီၣ်​ တၢ်ယူးယီၣ်​ လၢဖိသၣ်အမဲာ်ညါ ဝံၤဒီးဟ့ၣ်လီၤအီၤလၢထူ, လီၢ်ဘၣ်​ ဒီးမူရၣ်. မ့ၢ်ယဟိဝၤယွၤ ဆှၢပှၤတဖၣ်အံၤလၢ ယ့ၣ်ၡူးအအိၣ်ဧါ. ယဟိဝၤယွၤ တဆှၢဝဲဘၣ်.

ဖဲတၢ်တနၤန့ၣ်​ ယဟိဝၤယွၤတဲဘၣ်​ စီၤယိၤသးလၢ တၢ်မံမီၢ်အပူၤလၢ ‘စီၤပၤဟ့ၤရိာ် အဲၣ်ဒိးမၤသံ ဖိသၣ်ယ့ၣ်ၡူး. အဃိ ကိးထီၣ်နမါ ဒီးနဖိခွါ ဒီးလဲၤဃ့ၢ်လၢ ကီၢ်အဲၤကူပတူးအပူၤ. ဒီးအိၣ်ဖဲန့ၣ်တုၤလၢ ယမၢနဟးထီၣ်.’ တဘျီဃီန့ၣ်​ စီၤယိၤသး ဒီးအဟံၣ်ဖိဃီဖိ လဲၤဝဲလၢ ကီၢ်အဲၤကူပတူး.

ယဟိဝၤယွၤ တဲဘၣ်ပှၤအိၣ်ဟဲလၢ မုၢ်ထီၣ်တခီလၢ အဝဲသ့ၣ်​ တဘၣ်က့ၤလၢ စီၤပၤဟ့ၤရိာ် အအိၣ်လၢၤဘၣ်. ခီဖျိလၢ ပှၤအိၣ်ဟဲလၢမုၢ်ထီၣ်တဖၣ်အံၤ တဟဲက့ၤလၢ စီၤပၤဟ့ၤရိာ် အအိၣ်ဘၣ်အဃိ အဝဲသးပှံၢ်ထီၣ်တၢ် ဒိၣ်မး. စီၤပၤဟ့ၤရိာ် ဃုယ့ၣ်ၡူးတဘၣ်ဘၣ်အဃိ အဟ့ၣ်လီၤ တၢ်ကလုၢ်လၢ ပှၤကဘၣ်မၤသံကွံာ် ကယဲၢ်ပိာ်ခွါဖိသၣ်လၢ အသးနံၣ်ဘူးကထဲသိးဒီးယ့ၣ်ၡူး. ဘၣ်ဆၣ်​ မ့ၢ်လၢ ယ့ၣ်ၡူးအိၣ်ဝဲလၢ ကီၢ်အဲၤကူပတူးအပူၤအဃိ အပူၤဖျဲးဝဲ.

ဖဲစီၤပၤဟ့ၤရိာ် သံဝံၤအလီၢ်ခံ ယဟိဝၤယွၤတဲဘၣ်​ စီၤယိၤသးလၢ ‘ခဲအံၤ နက့ၤလၢ နကီၢ်န့ၢ်လံ.’ စီၤယိၤသး, နီၢ်မၤရံဒီးယ့ၣ်ၡူး က့ၤကဒါလၢ ကီၢ်အံၣ်စရ့လး ဒီးလဲၤအိၣ်ဝဲလၢ ဝ့ၢ်နစၤရ့း.