တၢ်မၤလိ ၈၀
ယ့ၣ်ၡူးဃုထၢထီၣ် အတၢ်မၢဖိတဆံခံဂၤ
ဖဲယ့ၣ်ၡူး စံၣ်တဲၤတဲလီၤတၢ် တနံၣ်ဘျဲၣ်ဝံၤအလီၢ်ခံ အကဘၣ် ဆၢတဲာ်တၢ်လၢ အရ့ဒိၣ်တခါ. ယ့ၣ်ၡူး ကဃုထၢထီၣ် မတဂၤသ့ၣ်တဖၣ်လၢ ကမၤသကိးတၢ်ဒီးအီၤလဲၣ်. ဒီးယ့ၣ်ၡူး ကဃုထၢထီၣ်ဝဲ မတဂၤသ့ၣ်တဖၣ်လၢ ကတီခိၣ်ရိၤမဲတၢ်လၢ တၢ်အိၣ်ဖှိၣ် အပူၤလဲၣ်. ဒ်သိး ယ့ၣ်ၡူး ဆၢတဲာ်တၢ် ကဘၣ်အဂီၢ် အလိၣ်ဘၣ် ယဟိဝၤယွၤ အတၢ်ဟံးစုနဲၣ်ကျဲ. အဃိ ယ့ၣ်ၡူး လဲၤထီၣ်လၢ ကစၢၢ်ခိၣ် ထဲတဂၤ ဒီးဃ့ထုကဖၣ်တၢ် ဒီတနၤညါ. ဖဲဂီၤခီန့ၣ် ယ့ၣ်ၡူးကိးန့ၢ်ဝဲ အပျဲၢ်အဘီၣ်တနီၤ ဒီးဃုထၢထီၣ်ဝဲ အတၢ်မၢဖိ ၁၂ ဂၤ. ယ့ၣ်ၡူး အတၢ်မၢဖိတဖၣ် အမံၤဒ်လဲၣ်န့ၣ် နသ့ၣ်ညါဧါ. အဝဲသ့ၣ် အမံၤမ့ၢ်ဝဲ စီၤပ့းတရူး, စီၤအၣ်ဒရ့း, စီၤယၤကိာ်, စီၤယိၤဟၣ်, စီၤဖံလံးပူး, စီၤဘၢ်သလီးမဲ, စီၤသိၤမါ, စီၤမးသဲ, စီၤအၤလဖဲအဖိခွါ စီၤယၤကိာ်, စီၤသးဒဲ, စီၤၡံမိၣ် ဒီးစီၤယူဒၤအံၣ်စကၤရံၤအိာ်.
စီၤအၣ်ဒရ့း, စီၤပ့းတရူး, စီၤဖံလံးပူး, စီၤယၤကိာ်
တၢ်မၢဖိတဆံခံဂၤအံၤ လဲၤတၢ်ဒီးယ့ၣ်ၡူး. ယ့ၣ်ၡူး သိၣ်လိနဲၣ်လိ တၢ်မၢဖိတဖၣ်အံၤ ဝံၤအလီၢ်ခံ အဝဲသ့ၣ် လဲၤစံၣ်တဲၤတဲလီၤတၢ်လၢ အနီၢ်ကစၢ်. ယဟိဝၤယွၤ ဟ့ၣ်လီၤအဝဲသ့ၣ် တၢ်စိတၢ်ကမီၤလၢ ကဟီထီၣ်ကွံာ်တၢ်နါ ဒီးမၤဘျါက့ၤ ပှၤဆူးပှၤဆါ.
စီၤယိၤဟၣ်, စီၤမးသဲ, စီၤဘၢ်သလီးမဲ, စီၤသိၤမါ
ယ့ၣ်ၡူး ကိးဝဲအတၢ်မၢဖိ တဆံခံဂၤအံၤလၢ အတံၤသကိး ဒီးနာ်န့ၢ်အဝဲသ့ၣ်. ပှၤဖၤရံၤၡဲတဖၣ် ဆိကမိၣ်ဝဲလၢ တၢ်မၢဖိတဖၣ်အံၤ ကဲပှၤလၢ အတၢ်ကူၣ်ဘၣ်ကူၣ်သ့ တအိၣ်ဘၣ် ဒီးကဲဝဲ ပှၤမုၢ်ဆ့ၣ်မုၢ်ဂီၤဖိ. ဘၣ်ဆၣ် ယ့ၣ်ၡူး သိၣ်လိပာ်စၢၤ အဝဲသ့ၣ်ဂ့ၤဂ့ၤ. ဖဲယ့ၣ်ၡူး တချုးသံအနၤ ဒီးဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အဝဲသ့ၣ် အိၣ်ဘၣ်ဒီးယ့ၣ်ၡူး. ဒီးလၢတၢ်မၢဖိ တဆံခံဂၤအံၤအကျါ တၢ်မၢဖိအါတက့ၢ်န့ၣ် အိၣ်ဟဲဝဲလၢ ကီၢ်ကၤလံၤလါ ဒ်ယ့ၣ်ၡူးအသိး. အဝဲသ့ၣ်တနီၤန့ၣ် မ့ၢ်ပှၤလၢ အိၣ်ဒီးအမါလံ.
စီၤအၤလဖဲအဖိခွါ စီၤယၤကိာ်, စီၤယူဒၤအံၣ်စကၤရံၤအိာ်, စီၤသးဒဲ, စီၤၡံမိၣ်
ယ့ၣ်ၡူး အတၢ်မၢဖိတဖၣ် တကဲပှၤလၢပှၤပှဲၤဘၣ်အဃိ အဝဲသ့ၣ် မၤဘၣ်တၢ်ကမၣ်. တဘျီတခီၣ်န့ၣ် ခီဖျိလၢ အဝဲသ့ၣ် တဆိကမိၣ်ထံတၢ်ဘၣ်အဃိ ဆၢတဲာ်ဘၣ်တၢ် လၢအကမၣ်. ဒီးတဘျီတခီၣ်န့ၣ် အဝဲသ့ၣ် တဲအါလိာ်သးလၢ မ့ၢ်မတဂၤ ကဲပှၤလၢ အရ့ဒိၣ်ကတၢၢ်လဲၣ်. ဘၣ်ဆၣ် တၢ်မၢဖိတဖၣ်အံၤ ကဲပှၤလၢအဂ့ၤ ဒီးအဲၣ်ယဟိဝၤယွၤ. ဒီးဖဲယ့ၣ်ၡူး က့ၤထီၣ်လၢမူခိၣ် ဝံၤအလီၢ်ခံ တၢ်မၢဖိတဖၣ်အံၤ တီခိၣ်ရိၤမဲဝဲ ခရံာ်ဖိတၢ်အိၣ်ဖှိၣ်.
“ယကိးသုလၢ သကိးတဖၣ် မ့ၢ်လၢ ယဒုးသ့ၣ်ညါသု တၢ်ခဲလၢာ်လၢ ယနၢ်ဟူဘၣ်လၢ ယပၢ်အအိၣ်အဃိလီၤ.”—ယိၤဟၣ် ၁၅:၁၅