ဒ်ပှၤစိာ်တၢ်သးခုကစီၣ်အသိး လဲၤထီၣ်လဲၤထီဆူညါတက့ၢ်

၁. ဒ်ပှၤစိာ်တၢ်သးခုကစီၣ်တဖၣ်အသိး ပကြၢးမၤဂ့ၤထီၣ် ပတၢ်သ့တၢ်ဘၣ်န့ၣ် ခရံာ်ဖိလၢတၢယၤဖှိၣ်တဖၣ် ပာ်ဖျါထီၣ်ဝဲအဒိဒ်လဲၣ်.

^၁ ဒ်ပှၤစိာ်တၢ်သးခုကစီၣ်တဖၣ်အသိး ခရံာ်ဖိတဖၣ် ကြၢးလဲၤထီၣ်လဲၤထီဆူညါန့ၣ်လီၤ. လၢတၢ်န့ၣ်အဃိ ယ့ၣ်ၡူးသိၣ်လိမၤယုၤဝဲ အပျဲၢ်အဘီၣ်တဖၣ်ဒ်သိး အဝဲသ့ၣ်ကမၤဂ့ၤထီၣ်ဝဲ အတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအဂီၢ်လီၤ. (လူၤ. ၉:၁-၅; ၁၀:၁-၁၁) စီၤအကူလၤဒီးနီၢ်ပြံပစကံးလၤ စ့ၢ်ကီးကိးန့ၢ်ဝဲစီၤအပီးလိၤဒီး “ဒုးနဲၣ်အီၤလၢယွၤအကျဲ လီၤတံၢ်န့ၢ်အလီၢ်တက့ၢ်လီၤ.” (မၤတၢ်. ၁၈:၂၄-၂၆) ဒ်န့ၣ်အသိး စီၤတံၤမသ့းမ့ၢ် ပှၤစံၣ်တဲၤတဲလီၤတၢ်သးခုကစီၣ်လၢ အိၣ်ဒီးတၢ်လဲၤခီဖျိအါ သနာ်က့ စီၤပီလူး ဟ့ၣ်ဂံၢ်ဟ့ၣ်ဘါအီၤလၢကဂုာ်ကျဲးစၢး သိၣ်လိတၢ်ဂ့ၤဂ့ၤဘၣ်ဘၣ် ဒ်သိးအတၢ်လဲၤထီၣ်လဲၤထီ “ကအိၣ်ဖျါလၢ ပှၤခဲလၢာ်အမဲာ်ညါ” လီၤ. (၁ တံၤ. ၄:၁၃-၁၅) ပစံၣ်တဲၤတဲလီၤတၢ်သးခုကစီၣ် အနံၣ်ယံာ်မ့ၢ်ဂ့ၤ တယံာ်မ့ၢ်ဂ့ၤ ပကဘၣ်မၤဂ့ၤထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤထီဘိလီၤ.

၂. ပမၤလိန့ၢ်တၢ်လၢ ပှၤဂၤအအိၣ်သ့ဒ်လဲၣ်

^၂ မၤလိတၢ်လၢပှၤဂၤအအိၣ်– ဒ်သိးပကမၤဂ့ၤထီၣ် ပတၢ်သ့တၢ်ဘၣ်အဂီၢ် ပမၤလိန့ၢ်တၢ်လၢပှၤဂၤအအိၣ်သ့လီၤ. (ကတိၤ. ၂၇:၁၇) လၢတၢ်န့ၣ်အဃိ ဖဲပဒီပုၢ်ဝဲၢ်တဖၣ် စံၣ်တဲၤတဲလီၤတၢ် တဟံၣ်ဘၣ်တဟံၣ်အခါန့ၣ် ဒိကနၣ်အဝဲသ့ၣ်လၢ တၢ်သးစၢၢ်ဆၢအပူၤတက့ၢ်. ဃ့တၢ်ဟ့ၣ်ကူၣ်လၢ ပှၤလၢအစံၣ်တဲၤတဲလီၤတၢ်သ့ဂ့ၤဂ့ၤတဖၣ်အအိၣ် ဒီးတၢ်လၢအဝဲသ့ၣ်တဲဝဲတဖၣ်န့ၣ် ဒိကနၣ်လီၤတံၢ်လီၤဆဲးတက့ၢ်. (ကတိၤ. ၁:၅) ဖဲနက့ၤအိၣ်သကိးဟံၣ်ကစၢ်အခါ နကတဲတၢ်ဂ့ၢ်မနုၤလဲၣ်, နကဘၣ်စးထီၣ် တၢ်မၤလိလံာ်စီဆှံဒ်လဲၣ်, ဒီးနပၣ်ဃုာ်လၢ တၢ်စံၣ်တဲၤတဲလီၤတၢ်မၤ အသနၢၣ်လၢအဂၤတဖၣ်ဒ်လဲၣ်န့ၣ် မ့ၢ်နတနာ်န့ၢ်လီၤနသးဘၣ်ဧါ. လဲၤဃ့တၢ်မၤစၢၤလၢပှၤလၢအကွၢ်ထွဲနကရူၢ် မ့တမ့ၢ် ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိအိၣ်အါတဂၤ လၢကသိၣ်လိမၤယုၤနၤအဂီၢ်န့ၣ်တက့ၢ်. သ့ၣ်နီၣ်ထီၣ်စ့ၢ်ကီးလၢ ယဟိဝၤယွၤအသးစီဆှံ မၤဒိၣ်ထီၣ်အါထီၣ် ပတၢ်သ့တၢ်ဘၣ်သ့အဃိ ဃ့ထုကဖၣ်ဘၣ်ဆၢဘၣ်ကတီၢ် လၢကစၢ်ကဟ့ၣ်နၤ သးစီဆှံအဂီၢ်န့ၣ်တက့ၢ်.—လူၤကၣ် ၁၁:၁၃.

၃. ပမ့ၢ်တဃ့ပှၤဂၤအတၢ်ဟ့ၣ်ကူၣ်ဒၣ်လဲာ် ပှၤဂၤမ့ၢ်ဟ့ၣ်ကူၣ်ပှၤန့ၣ် ပကြၢးမၤဆၢက့ၤဒ်လဲၣ်.

^၃ ပမ့ၢ်တဃ့ပှၤဂၤအတၢ်ဟ့ၣ်ကူၣ်ဒၣ်လဲာ် အဝဲသ့ၣ်မ့ၢ်ဟ့ၣ်ကူၣ်ပှၤလၢ ပကလဲၤထီၣ်လဲၤထီအဂီၢ်န့ၣ် တဘၣ်သးထီၣ်အီၤတဂ့ၤ. (စံၣ်. ၇:၉) ဒ်စီၤအပီးလိၤအသိး တူၢ်လိာ်တၢ်မၤစၢၤလၢတၢ်ဆီၣ်လီၤသး ဒီးတၢ်စံးဘျုးစံးဖှိၣ်အပူၤန့ၣ်တက့ၢ်. ပမ့ၢ်မၤဒ်န့ၣ်န့ၣ် မ့ၢ်ပပာ်ဖျါထီၣ်လၢ ပအိၣ်ဒီးတၢ်ကူၣ်သ့န့ၣ်လီၤ.—ကတိၤ. ၁၂:၁၅.

၄. ဘၣ်မနုၤအဃိ ယ့ၣ်ၡူးဆီၣ်ထွဲပှၤလၢပကလဲၤထီၣ်လဲၤထီ ဒ်ပှၤစိာ်တၢ်သးခုကစီၣ်တဂၤအသိးန့ၣ်လဲၣ်.

^၄ လဲၤထီၣ်လဲၤထီလၢ ကမၤလၤကပီၤယွၤအဂီၢ်တက့ၢ်– ယ့ၣ်ၡူးသူဝဲတၢ်ကတိၤဒိဒီး ဟ့ၣ်ဂံၢ်ဟ့ၣ်ဘါဝဲအပျဲၢ်အဘီၣ်တဖၣ်လၢ ကလဲၤထီၣ်လဲၤထီ လၢတၢ်သးခုကစီၣ်တၢ်မၤအပူၤန့ၣ်လီၤ. အဝဲဒိလီၤအသးလၢ စပံးအမုၢ် ဒီးအပျဲၢ်အဘီၣ်လၢဘၣ်တၢ်ဒိးဖှူအီၤတဖၣ်န့ၣ် ဒိလီၤဝဲလၢစပံးမုၢ်အဒ့လီၤ. ကယဲၢ်ဒ့လၢအသၣ်ထီၣ်တဖၣ်န့ၣ် ယ့ၣ်ၡူးစံးဝဲဒၣ်လၢ အပၢ်ကပဲာ်ဃိကဆှီထီၣ်အီၤ “ဒ်သိးအကသၣ်အါထီၣ်” အဂီၢ်န့ၣ်လီၤ. (ယိၤဟၣ် ၁၅:၂) ဒ်စပံးလီၢ်အကစၢ်အဲၣ်ဒိးလၢ အစပံးမုၢ်အဒ့တဖၣ် ကသၣ်ထီၣ်အါအါဂီၢ်ဂီၢ်အသိး ယဟိဝၤယွၤစ့ၢ်ကီးအဲၣ်ဒိးဝဲလၢ ပကလဲၤထီၣ်လဲၤထီ ဒ်သိးပကဒုးအိၣ်ထီၣ် ပတၢ်သ့တၢ်ဘၣ်လၢ “ပထးခိၣ်အတၤသၣ်” န့ၣ်လီၤ. (ဧ့ၤ. ၁၃:၁၅) ဖဲပဂုာ်ကျဲးစၢးလဲၤထီၣ်လဲၤထီ ဒ်ပှၤစိာ်တၢ်သးခုကစီၣ်ဖိတဂၤအသိးအခါ ပကဒိးန့ၢ်ဘၣ်တၢ်သူၣ်မံသးမုာ်မနုၤလဲၣ်. ယ့ၣ်ၡူးစံးဆၢက့ၤပှၤလၢ– “လၢသုသၣ်ထီၣ်အါမးအဃိန့ၣ် ယပၢ်အလၤကပီၤအိၣ်ဖျါထီၣ်” လီၤ.—ယိၤဟၣ် ၁၅:၈.