သးစၢၢ်ဆၢလၢ နကဒုးကဲထီၣ်ပှၤလၢ ယ့ၣ်ၡူးအပျဲၢ်အဘီၣ်တက့ၢ်

၁. ဒ်သိးပှၤကဒိးန့ၢ်ဘၣ်တၢ်မူအဂီၢ် ပကဘၣ်မၤတၢ်မနုၤလဲၣ်.

^၁ ဘီမုၢ်တၢ်မၤတၢ်ကွဲးနီၣ်ကွဲးဃါလၢ ၂၀၁၄ နံၣ်အဂီၢ် ပာ်ဖျါထီၣ်ဝဲ ယွၤအခ့အပှၤတဖၣ်အတၢ်သးဆူၣ် ဒီးအတၢ်ပာ်လီၤသးဂၢၢ်ကျၢၤ လၢတၢ်စံၣ်တဲၤတဲလီၤ ဘီမုၢ်တၢ်သးခုကစီၣ်အဂီၢ်လီၤ. (မး. ၂၄:၁၄) ခီဖျိလၢတဟံၣ်ဘၣ်တဟံၣ်တၢ်မၤ, ခဲၣ်ဖ့လီၤဆီလၢပရၤလီၤလံာ်ဖိ ဒီးလံာ်ကွဲမုာ်တဖၣ်အဂီၢ် ဒီးတၢ်စံၣ်တဲၤတဲလီၤတၢ်လၢ ကမျၢၢ်မဲာ်ညါအဃိ လံာ်စီဆှံတၢ်ကစီၣ်တုၤဆူပှၤအါဂၤအအိၣ် အါန့ၢ်ဒံးလၢညါန့ၣ်လီၤ. ဘၣ်ဆၣ်သနာ်က့ လၢပှၤကဒိးန့ၢ်ဘၣ်တၢ်မူအဂီၢ် ပကဘၣ်မၤလိလံာ်စီဆှံဒီးအဝဲသ့ၣ် ဒ်သိးအဝဲသ့ၣ်ကကဲထီၣ် ယ့ၣ်ၡူးအပျဲၢ်အဘီၣ်အဂီၢ်န့ၣ်လီၤ. —၁ တံၤ. ၂:၄.

၂. ဒ်သိးပကအိၣ်ကတဲာ်ကတီၤပသးထီဘိ လၢကစးထီၣ်မၤလိလံာ်စီဆှံဒီးပှၤဂၤအဂီၢ် ပကြၢးသံကွၢ်လီၤက့ၤပသးဒ်လဲၣ်.

^၂ အိၣ်ကတဲာ်ကတီၤနသး ထီဘိလၢ နကစးထီၣ်မၤလိပှၤဂၤလံာ်စီဆှံ– ဖဲနထံၣ်ဘၣ်ပှၤတဂၤလၢ အသးအိၣ်တၢ်မ့ၢ်တၢ်တီအခါ မ့ၢ်နဂုာ်ကျဲးစၢးမၤန့ၢ် အတၢ်ဂ့ၢ်တၢ်ကျိၤလၢ နကဆဲးကျိးဒီးအီၤအဂီၢ် ဒီးက့ၤကဒါက့ၤလၢ အအိၣ်လၢအဆိအချ့ ဒ်သိးနကစးထီၣ်မၤလိလံာ်စီဆှံဒီးအီၤအဂီၢ်ဧါ. ဖဲနထံၣ်လိာ်သးဒီးဟံၣ်ကစၢ်အဆိကတၢၢ်တဘျီ မ့ၢ်နစးထီၣ်မၤလိလံာ်စီဆှံဒီးအီၤတဘျီဃီန့ၣ် အိၣ်တဘျီဘျီဧါ. ပှၤအိၣ်လၢန မဲးကစံအကျိၤအကျဲပူၤတဖၣ် မ့ၢ်နတဲဘၣ်အဝဲသ့ၣ်ဘၣ်ဃးဒီး တၢ်မၤလိလံာ်စီဆှံအတၢ်ရဲၣ်တၢ်ကျဲၤလၢ အလီၢ်ခံကတၢၢ်တဘျီန့ၣ်အခါဖဲလဲၣ်. နသကိးလၢတၢ်မၤလီၢ်, တံၤသကိးလၢကၠိတဖၣ်, ပှၤလၢပခိၣ်ပဃၢၤတဖၣ်, ပဘူးတံၢ်တဖၣ် ဒီးတံၤသကိးအဂၤတဖၣ်န့ၣ် မ့ၢ်နဒုးနဲၣ်အီၤတၢ်ဂီၤမူလၢအမ့ၢ် ဘၣ်မနုၤအဃိ ဘၣ်မၤလိလံာ်စီဆှံလဲၣ် ဒီးတၢ်မၤလိလံာ်စီဆှံန့ၣ် ပှၤမၤအီၤဒ်လဲၣ် န့ၣ်တဘျီဘျီဧါ. ဖဲနသူလ့ၣ်ဆီၣ် မ့တမ့ၢ် စီၢ်နီၤခိၣ်အခါ, ပှၤလၢအဟံးန့ၢ်လံာ်လဲၢ်လၢ တၢ်မၤလိအဂီၢ်တဘ့ၣ်ဘ့ၣ်န့ၣ် မ့ၢ်နဒုးသ့ၣ်ညါအီၤလၢ ပအိၣ်ဒီးတၢ်ရဲၣ်တၢ်ကျဲၤလၢ ပကမၤလိလံာ်စီဆှံဒီး အဝဲသ့ၣ်လၢအဘူးအလဲတအိၣ်ဘၣ်န့ၣ်ဧါ.

၃. ဒ်သိးပသိၣ်လိတၢ်မ့ၢ်တၢ်တီ သ့သ့ဘၣ်ဘၣ်ကသ့အဂီၢ်န့ၣ် လိၣ်ဘၣ်မနုၤလဲၣ်.

^၃ တၢ်မၤစၢၤလၢ ယဟိဝၤယွၤဒီး ယ့ၣ်ၡူးအအိၣ်– ဖဲယ့ၣ်ၡူးမၤလိာ်ပှၤလၢ– “ဒုးကဲထီၣ်ပှၤ. . .လၢယပျဲၢ်ယဘီၣ်တက့ၢ်” န့ၣ်အဆိကတၢၢ်အဝဲသူဝဲ တၢ်ကတိၤလၢအမ့ၢ် “လဲၤ” န့ၣ်လီၤ. လၢတၢ်န့ၣ်အဃိယ့ၣ်ၡူးပာ်ဖျါထီၣ်ဝဲလၢ ပကဘၣ်အိၣ်ဒီး တၢ်ဂုာ်ကျဲးစၢးအါန့ၢ်ဒံးအလီၢ်ဒီး ပာ်ဖျါထီၣ်တၢ်သူၣ်အိၣ်သးအိၣ်န့ၣ်လီၤ. ပမ့ၢ်မၤဒ်န့ၣ်ဒီး ယ့ၣ်ၡူးအၢၣ်လီၤပှၤလၢ အဝဲကအိၣ်ဒီးပှၤလီၤ. (မး. ၂၈:၁၉, ၂၀) တကးဒံးဘၣ် ယဟိဝၤယွၤဟ့ၣ်ပှၤအသးစီဆှံ, တၢ်ပီးတၢ်လီတဖၣ် ဒီးတၢ်သိၣ်လိနဲၣ်လိတဖၣ်ဒ်သိး ပမၤလိပှၤဂၤလၢတၢ်မ့ၢ်တၢ်တီကသ့အဂီၢ်န့ၣ်လီၤ. (ကၤ. ၄:၆; ၂ ကရံၣ်. ၄:၇) ပဃ့ဘါထုကဖၣ် လၢပကဒိးန့ၢ်ဘၣ် “တၢ်သူၣ်အိၣ်သးအိၣ်ဒီး တၢ်စိတၢ်ကမီၤ” ဒ်သိးပကမၤတၢ်မၤလၢအရ့ဒိၣ်အံၤအဂီၢ်န့ၣ်လီၤ.—ဖံလံး ၂:၁၃, nwt.

၄. ဘၣ်မနုၤအဃိ ပဘၣ်သးစၢၢ်ဆၢ လၢပကဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ်လဲၣ်.

^၄ ခီဖျိလၢ ပလဲၤစံၣ်တဲၤတဲလီၤတၢ်အဃိ ပဒိးန့ၢ်ဘၣ်တၢ်သူၣ်ခုသးခု အါအါဂီၢ်ဂီၢ်လီၤ. ဘၣ်ဆၣ် ဖဲပသိၣ်လိပှၤတဂၤတၢ်မ့ၢ်တၢ်တီ ဒီးမၤစၢၤအီၤဒ်သိး အဝဲကလဲၤဃုာ်တၢ်ဒီးပှၤလၢ “ကျဲလၢအဆှၢဝဲဆူတၢ်မူ” အခါန့ၣ် ပတၢ်သူၣ်ဖှံသးညီကအါထီၣ်ဝဲလီၤ. (မး. ၇:၁၄; ၁ သ့း ၂:၁၉, ၂၀) အါန့ၢ်အန့ၣ် ယဟိဝၤယွၤ “တဘၣ်ဘၣ်အသးလၢ ပှၤကတုၤလၢ တၢ်ဟးဂူာ်ဟးဂီၤနီတဂၤဘၣ်. မ့ၢ်လၢပှၤခဲလၢာ်ကန့ၢ်ဘၣ် တၢ်ပီၢ်ယၢ်လီၤက့ၤအသးလီၤ.” လၢတၢ်န့ၣ်အဃိ ပမ့ၢ်သးစၢၢ်ဆၢလၢ ပကဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ်တဖၣ်န့ၣ် ပကမၤသးခုကစၢ်ယွၤအသးန့ၣ်လီၤ.—၂ ပ့း. ၃:၉.