‘လဲၤတၢ်လၢတၢ်နာ် တမ့ၢ်ဘၣ်လၢထံၣ်တၢ်ဘၣ်.’

တချုးဝ့ၢ်ယရူၤၡလ့ၣ် ဘၣ်တၢ်ကဝီၤဃာ်အီၤ ဒီးတၢ်မၤဟးဂီၤအီၤဒံးဘၣ်န့ၣ် တၢ်မၢဖိပီလူး ကွဲးဝဲလၢ ခရံာ်ဖိတဖၣ် မ့ၢ်ခရံာ်အသုးဖိလၢအဂ့ၤတဖၣ်အဃိ အဝဲသ့ၣ်ကဘၣ်သ့ၣ်ညါပာ်စၢၤဝဲလၢ ကကွၢ်ဆၢၣ်မဲာ်ဘၣ် တၢ်ကီတၢ်ခဲလီၤ. လၢတၢ်န့ၣ်အဃိ အဝဲသ့ၣ် တဘၣ်ဆိကမိၣ်လၢ ကအိၣ်မူဝဲ ဖှံဖှံညီညီဘၣ် ဒီးတဘၣ်ပာ်အနီၢ်ကစၢ် အတၢ်မုာ်တၢ်ပၠီၣ်လၢညါဘၣ်. (၂ တံၤ. ၂:၃, ၄) တယံာ်လၢၤဘၣ် ကစၢ်ယွၤကမၤဟးဂီၤကွံာ် ပှၤလၢတယူးယီၣ်ပာ်ကဲအီၤတဖၣ်အဃိ ဒ်သိးပကဆဲးသးစၢၢ်ဆၢ နီၢ်သးတၢ်ဖံးတၢ်မၤတဖၣ်အဂီၢ် ပကဘၣ်အိၣ်ဒီးတၢ်နာ်အဂၢၢ်အကျၢၤလီၤ. (၂ ကရံၣ်. ၄:၁၈; ၅:၇) ကွၢ်တၢ်ဂီၤမူလၢအမ့ၢ် ‘အမြင်အားဖြင့်မဟုတ်ဘဲ ယုံကြည်ခြင်းအားဖြင့် လျှောက်လှမ်းနေလော့’ ‘Walk by Faith Not by Sight’ လၢ jw.org/mya စံၢ်လီၤဖဲ စာအုပ်စာပေများ– ဝံၤဒီး ဗီဒီယိုများ အပူၤတက့ၢ်. ဖဲနကွၢ်တၢ်ဂီၤမူအခါ ပာ်သူၣ်ပာ်သးလၢ တၢ်သးကွံ တၢ်စုလီၢ်ခီၣ်ခိၣ်န့ၣ် ကဲထီၣ်တၢ်သံအပျံၤသကွီၤလၢ စီၤနၤဃၣ် ဒီးနီၢ်အဘံတလးအဂီၢ်ဒ်လဲၣ်. ဝံၤဒီး သမံသမိးကွၢ်တၢ်သံကွၢ်တဖၣ်လၢ လာ်အံၤန့ၣ်တက့ၢ်.

(၁) လၢတၢယၤဖှိၣ်န့ၣ် “တၢ်သးဘၣ်အၢလၢ . . . ဆၢထၢၣ်လၢတၢ်အလီၢ်စီဆှံအပူၤ” န့ၣ် မ့ၢ်မနုၤလဲၣ်. ဒီးခရံာ်ဖိလၢ အိၣ်လၢဝ့ၢ်ယရူၤၡလ့ၣ်အပူၤန့ၣ် ကဘၣ်ဆၢတဲာ်လီၤအသးဒီး ကဘၣ်မၤဝဲတၢ်မနုၤလဲၣ်. (မး. ၂၄:၁၅, ၁၆) (၂) ကဃ့ၢ်ထီၣ်ကွံာ်လၢ ဝ့ၢ်ပူၤအဂီၢ် ဘၣ်မနုၤအဃိတၢ်နာ်လိၣ်ဝဲလဲၣ်. (၃) ဖဲအဝဲသ့ၣ်ဃ့ၢ်ထီၣ်ကွံာ်ဝဲအခါ ကဘၣ်ပာ်တ့ၢ်ကွံာ်ဝဲ တၢ်မနုၤတဖၣ်လဲၣ်. (၄) စီၤနၤဃၣ် ဒီးနီၢ်အဘံတလးန့ၣ် ဘၣ်မနုၤအဃိ မၤယံာ်မၤနီၢ်အသးလဲၣ်. (မး.၂၄:၁၇, ၁၈) (၅) ဖဲအဝဲသ့ၣ် ကဟးထီၣ်ဝဲလၢ ဝ့ၢ်ယရူၤၡလ့ၣ်အခါ နီၢ်ရၤဃ့လး ကွၢ်ဆၢၣ်မဲာ်အါထီၣ်ဘၣ်ဝဲ တၢ်မၤကွၢ်ဒ်လဲၣ်. (မး. ၁၀:၃၄-၃၇; မၢ်. ၁၀:၂၉, ၃၀) (၆) ဘၣ်ဃးဒီးတၢ်နာ် ဒီးတၢ်သန့ၤသးလၢ ယဟိဝၤယွၤန့ၣ် စီၤအ့ၤသၣ် ပာ်လီၤတ့ၢ်အဒိအတဲာ်လၢ အဂ့ၤဒ်လဲၣ်. (၇) ခရံာ်ဖိတဖၣ်လၢ အအိၣ်လၢတၢ်လီၢ် ဖဲလးန့ၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲဒ်လဲၣ်. (၈) စီၤနၤဃၣ် ဒီးနီၢ်အဘံတလးန့ၣ် အတၢ်နာ်စှၤလီၤလၢ ကျဲဒ်လဲၣ်. (၉) ခရံာ်ဖိတဖၣ်လၢ အိၣ်လၢဖဲလးန့ၣ် ယဟိဝၤယွၤ အံးထွဲကွၢ်ထွဲအဝဲသ့ၣ်ဒ်လဲၣ်. (မး. ၆:၃၃; ၁ တံၤ. ၆:၆-၈) (၁၀) ဒ်တၢ်အကတၢၢ်ဘူးထီၣ်လံအသိး ပကွၢ်လိမၤဒိး စီၤအၤဘြၤဟၣ်ဒီးနီၢ်စၤရါ ကသ့ဒ်လဲၣ်. (ဧ့ၤ. ၁၁:၈-၁၀) (၁၁) ဒ်သိးကက့ၤကဒါက့ၤလၢ ဝ့ၢ်ယရူၤၡလ့ၣ်အဂီၢ် စီၤနၤဃၣ် ဒီးနီၢ်အဘံတလးန့ၣ် တဲပူၤဖျဲးအသးဒ်လဲၣ်, ဒီးဘၣ်မနုၤအဃိ အတၢ်ဆိကမိၣ်န့ၣ် ကမၣ်လဲၣ်. (လူၤ. ၂၁:၂၁) (၁၂) ဖဲစီၤနၤဃၣ် ဒီးနီၢ်အဘံတလး က့ၤကဒါက့ၤဆူ ဝ့ၢ်ယရူၤၡလ့ၣ်အခါ ဝ့ၢ်အတၢ်အိၣ်သး မၤအသးဒ်လဲၣ်. (၁၃) တၢ်အကတၢၢ် တချုးဘၣ်ဒံးဘၣ်န့ၣ် ဘၣ်မနုၤအဃိ ပဘၣ်မၤဆူၣ်ထီၣ်ပတၢ်နာ်န့ၣ်လဲၣ်.—လူၤကၣ် ၁၇:၃၁, ၃၂; ၂၁:၃၄-၃၆.

လဲၤတၢ်လၢတၢ်နာ်န့ၣ် အခီပညီမ့ၢ်ဝဲပကဘၣ် (၁) နာ်န့ၢ်ယဟိဝၤယွၤအတၢ်ဟံးစုနဲၣ်ကျဲ, (၂) မၤထွဲဒ် ကစၢ်ယွၤအတၢ်ဟံးစုနဲၣ်ကျဲ ဒီး (၃) ပာ်ဖျါထီၣ်လၢ ပပာ်လုၢ်ပာ်ပှ့ၤ နီၢ်သးအတၢ်ဖံးတၢ်မၤအါန့ၢ်ဒံး တၢ်လၢနီၢ်ခိတကပၤန့ၣ်လီၤ. မ်ပကပာ်လီၤပသး ဂၢၢ်ဂၢၢ်ကျၢၤကျၢၤလၢ ပကလဲၤတၢ်လၢတၢ်နာ် ဒီးပကနာ်လၢ “ဟီၣ်ခိၣ်ဒီး ဟီၣ်ခိၣ်အတၢ်သးကွံန့ၣ် ဒံကွံာ်ဝဲ, မ့မ့ၢ်ပှၤမၤဖဲယွၤအသးန့ၣ်, ကအိၣ်ကဆိးလီၤထူလီၤယိာ်” န့ၣ်တက့ၢ်.—၁ ယိၤဟၣ် ၂:၁၇.