ပၣ်ဃုာ်ဒီး တၢ်ဂီၤ, တၢ်ဂီၤလၢပှၤတ့အီၤ, တၢ်ဂီၤမူလၢ အကလုၢ်တသီၣ် ဒီးကးတိလၢအပာ်ဖျါထီၣ်ဝဲ လံာ်စီဆှံအတၢ်ကွဲးနီၣ်တဖၣ် လီၤတံၢ်လီၤဆဲးလီၤ.
ဘ့ၤသဖၤက့, ကစၢၢ်သ့ၣ်စၤယံး, ဒီးဝ့ၢ်ယရူၤၡလ့ၣ်
တၢ်ဂီၤမူအဖုၣ်အံၤ ပာ်ဖျါဝဲ ကျဲတဘိလၢ အစးထီၣ်အသးဖဲ လၢပျၢၤသဝီ ဘ့ၤသဖၤက့ ဒီးလဲၤထီၣ်ဆူ ကစၢၢ်သ့ၣ်စၤယံး အဒီခိၣ်န့ၣ်လီၤ. စိၤခဲအံၤ သဝီဘ့ၤသဖၤက့န့ၣ် ဘၣ်တၢ်ကိးအီၤလၢ အဲးထၢၤ ဒီးအိၣ်ဝဲလၢ ဝ့ၢ်ယရူၤၡလ့ၣ် အမုၢ်ထီၣ်တခီလီၤ. သဝီဘ့ၤသနံန့ၣ် အိၣ်သူၣ်လီၤအသးလၢ ဘ့ၤသဖၤက့အမုၢ်ထီၣ်တခီ, ကစၢၢ်သ့ၣ်စၤယံး အတၢ်လီၤဘံ လၢမုၢ်ထီၣ်တခီလီၤ. ဖဲယ့ၣ်ၡူး ဒီးအပျဲၢ်အဘီၣ်တဖၣ် လဲၤတုၤလၢ ဝ့ၢ်ယရူၤၡလ့ၣ်အခါ မံဝဲဖဲ သဝီဘ့ၤသနံလီၤ. တၢ်လီၢ်အံၤ လၢအၣ်ရးဘံး ကျိာ်ကိးဝဲလၢ အဲၣ်-အစရံယ့ၣ် ဒီးအခီပညီမ့ၢ် “လါစရူး အလီၢ်” လီၤ. လီၤတံၢ်လၢ ယ့ၣ်ၡူး ကမံဝဲ ဖဲနီၢ်မၢ်သၤ, နီၢ်မၤရံ ဒီးစီၤလါစရူး အဟံၣ်န့ၣ်လီၤ. (မး. ၂၁:၁၇; မၢ်. ၁၁:၁၁; လူၤ. ၂၁:၃၇; ယိၤ. ၁၁:၁) ဖဲယ့ၣ်ၡူး အိၣ်လၢအဝဲသ့ၣ်အဟံၣ် ဒီးလဲၤဆူ ဝ့ၢ်ယရူၤၡလ့ၣ်အခါ ကလဲၤဝဲကျဲလၢ တၢ်ဂီၤမူပူၤ ပာ်ဖျါဝဲအသိးလီၤ. ဖဲ ခ.န ၃၃ လါနံစၣ် ၉ သီ, ယ့ၣ်ၡူးအိၣ်လၢ ကစၢၢ်သ့ၣ်စၤယံး ဒီးလဲၤဒိးကသ့ၣ်ယီၤဒီး လဲၤဆူ ဝ့ၢ်ယရူၤၡလ့ၣ်အခါ ဘၣ်သ့ၣ်သ့ၣ် ကလဲၤဝဲကျဲအံၤလီၤ.
၁. ကျဲလၢအစးထီၣ်အသးဖဲ ဘ့ၤသနံ ဒီးလဲၤဆူဘ့ၤသဖၤက့
၂. ဘ့ၤသဖၤက့
၃. ကစၢၢ်သ့ၣ်စၤယံး
၄. ကံၤဒြိၣ် တၢ်တြီၤ
၅. တၢ်လုၢ်ဟံၣ် ကစၢၢ်
ထးတဘိလၢ အနုာ်လီၤဆူ ပှၤခီၣ်နၢၣ်ခံအဃံပူၤ
တၢ်ဂီၤအံၤမ့ၢ်ဝဲ ထးတဘိလၢကအိၣ် ၄.၅ စုမုၢ်ဒိၣ် နုာ်လီၤဆူ ပှၤခီၣ်နၢၣ်ခံအဃံပူၤအဂီၤန့ၣ်လီၤ. တၢ်ဃံအဝဲန့ၣ် ဘၣ်တၢ်ခူၣ်န့ၢ်အီၤလၢ ဝ့ၢ်ယရူၤၡလ့ၣ် ကလံၤစိးတခီ ဖဲ ၁၉၆၈ နံၣ်ဒီးဘၣ်တၢ်ပာ်ပနီၣ်အီၤလၢ ရိမ့ၤအစိၤန့ၣ်လီၤ. ဒီးမ့ၢ်တၢ်အုၣ်အသးလၢ ဖဲပှၤပျၤထီပှၤလၢသ့ၣ်တၢၣ်လိၤအခါ ပှၤဒိအီၤလၢထးန့ၣ်လီၤ. ဖဲရိမ့ၤအသုးဖိတဖၣ် ပျၤထီယ့ၣ်ၡူး လၢသ့ၣ်တၢၣ်လိၤအခါ ကသူဝဲ ထးလၢအလီၤဂာ်ထးတဘိအံၤလီၤ. ပှၤထံၣ်န့ၢ် တၢ်ဃံအံၤလၢ တလါလၢပှၤတ့အီၤလၢလၢၢ် အပူၤလီၤ. အဃိ ပသ့ၣ်ညါဘၣ်လၢ ပှၤလၢအဘၣ်တၢ်ပျၤထီအီၤလၢ သ့ၣ်တၢၣ်အလိၤန့ၣ် ပှၤဟ့ၣ်အခွဲးလၢ ပှၤကခူၣ်လီၤအီၤလီၤ.—မး. ၂၇:၃၅.