နဒိးန့ၢ်ဘၣ်တၢ်အဘျုးလၢ တၢ်သမံသမိး လံာ်စီဆှံအဆၢ ကိးနံၤဒဲး ဧါ

လံာ်စီဆှံအဆၢ ဒီးတၢ်ဂ့ၢ်လၢ အအိၣ်လၢလံာ်လၢအမ့ၢ် တၢ်သမံသမိး လံာ်စီဆှံအဆၢ ကိးနံၤဒဲး အပူၤန့ၣ်​ နဖးအီၤကိးနံၤဒဲးဧါ. နမ့ၢ်တဖးဘၣ်န့ၣ်​ ဒ်သိးနကဖးအီၤကိးနံၤဒဲးအဂီၢ် နရဲၣ်လီၤကျဲၤလီၤကသ့ဧါ. ပှၤအါတက့ၢ်န့ၣ်​ ဖးဝဲလၢဂီၤခီဂီၤဂီၤလီၤ. အဃိ အဝဲသ့ၣ်ဆိကမိၣ်ထံဝဲ တၢ်ဂ့ၢ်လၢဖးဘၣ်ဝဲတဖၣ်သ့လၢ ဒီတနံၤအတီၢ်ပူၤလီၤ. (ၡူ. ၁:၈; စံး. ၁၁၉:၉၇) ဒ်သိးပကဒိးန့ၢ်ဘၣ်အါထီၣ်​ တၢ်အဘျုးလၢ တၢ်ဖးလံာ်စီဆှံလၢ တနံၤဘၣ်တနံၤအဂီၢ် ပမၤကသ့ဒ်လဲၣ်. ဒ်သိးနကသ့ၣ်ညါ လံာ်စီဆှံ အတၢ်ဂ့ၢ်တၢ်ကျိၤအဂီၢ် ဖးဃုာ်ဒီး လံာ်စီဆှံအဆၢလၢ အဖီခိၣ်ဒီးအဖီလာ်တဖၣ်တက့ၢ်. ဆိကမိၣ်ထံ လံာ်စီဆှံအတၢ်ကွဲးနီၣ်ကွဲးဃါလၢ အပာ်ဖျါထီၣ်ဝဲ လံာ်စီဆှံ အတၢ်ဟံးစုနဲၣ်ကျဲတက့ၢ်. ဝံၤဒီးမၤထွဲ အီၤတက့ၢ်. နမ့ၢ်မၤတၢ်ဆၢတဲာ်ဒ် ယွၤအကလုၢ်ကထါအသိးန့ၣ်​ အကဟံးစုနဲၣ်ကျဲနၤ ဒီးနကဒိးန့ၢ်ဘၣ်​ တၢ်ဆိၣ်ဂ့ၤလီၤ.—စံး. ၁၁၉:၁၀၅.

ပှၤဘ့ၤသ့လးဖိလၢ အအိၣ်လၢဟီၣ်ခိၣ်ဒီဘ့ၣ်န့ၣ်​ အဝဲသ့ၣ်​ ဖးဝဲလံာ်စီဆှံအဆၢလၢ တၢ်သမံသမိး လံာ်စီဆှံအဆၢ ကိးနံၤဒဲး အပူၤလၢ ဂီၤခီတၢ်အီၣ်အဆၢကတီၢ်လီၤ. ပူၤကွံာ်အနံၣ်တယံာ်ဒံးဘၣ်န့ၣ်​ လံာ်စီဆှံအဆၢလၢ ကိးနံၤဒဲးအဂီၢ်တဖၣ်န့ၣ်​ ပပာ်ထီၣ်လၢ JW တၢ်ဂီၤမူအပူၤ လၢတၢ်ရဲၣ်တၢ်ကျဲၤဒီး တၢ်အိၣ်ဖှိၣ်လီၤဆီတဖၣ်​ အဖီလာ်လီၤ. တၢ်ရဲၣ်တၢ်ကျဲၤတဖၣ်အံၤ နကွၢ်အီၤအလီၢ်ခံကတၢၢ်တဘျီန့ၣ်​ အခါဖဲလဲၣ်. တၢ်ဂ့ၢ်တၢ်ကျိၤတနီၤန့ၣ်​ ဘၣ်သ့ၣ်သ့ၣ်​ ကမ့ၢ်တၢ်လၢ နလိၣ်ဘၣ်အီၤနီၢ်နီၢ်လီၤ. အဒိ ဖဲနကဘၣ်မၤတၢ်ဆၢတဲာ်အခါ တၢ်ကွဲးနီၣ်ကွဲးဃါလၢ ဘၣ်ဃးဒီးစီၤလိာ်အဂ့ၢ်န့ၣ်​ ကဲဘျုးလၢနဂီၢ်ဒ်လဲၣ်.

ကွၢ်တၢ်ဂီၤမူလၢ အခိၣ်တီမ့ၢ်ဝဲ အဲၣ်ဟီၣ်ခိၣ်ဒီးတၢ်အိၣ်လၢအပူၤတဂ့ၤ (၁ ယိၤ. ၂:၁၅) ဒီးစံးဆၢတၢ်သံကွၢ်လၢ လာ်တဖၣ်အံၤတက့ၢ်–

• ဂီၤခီတၢ်ဘါတၢ်ရဲၣ်တၢ်ကျဲၤအံၤ ဘၣ်တၢ်သန့ၤထီၣ်အီၤလၢ လံာ်စီဆှံအတၢ်ဟံးစုနဲၣ်ကျဲဖဲလဲၣ်တခါလဲၣ်.

• ဘၣ်ဃးဒီး တၢ်အဲၣ်ဟီၣ်ခိၣ်​ ဒီးတၢ်အိၣ်လၢအပူၤတဖၣ်​ မ့ၢ်တၢ်လၢအလီၤဘၣ်ယိၣ်န့ၣ်​ တၢ်ကွဲးနီၣ်ကွဲးဃါလၢ ဘၣ်ဃးဒီး စီၤလိာ်အဂ့ၢ် ပာ်ဖျါထီၣ်န့ၢ်ပှၤဒ်လဲၣ်.—၁ မိၤ. ၁၃:၁၂; ၁၄:၁၂; ၁၉:၃, ၁၂, ၂၄-၂၆

• ပအဲၣ်ယဟိဝၤယွၤ ဒီးပတအဲၣ်ဟီၣ်ခိၣ်​ ဒီးတၢ်အိၣ်လၢအပူၤတဖၣ်ဘၣ်န့ၣ်​ ပပာ်ဖျါထီၣ်အီၤကသ့ဒ်လဲၣ်.