“ကွၢ်ကွၢ်ပှၤလီၤ မၢလီၤပှၤတက့ၢ်”

ကၠဲၣ်​ ဒီး မရံလဲး(န်) ဘၢၤက့(မ်) မၤဝဲကစၢ်ယွၤအတၢ်မၤလၢ ဆၢကတီၢ်လၢပှဲၤ စးထီၣ်လၢ ၁၉၈၈ နံၣ်န့ၣ်လီၤ. အဝဲသ့ၣ်​ ဆီတလဲအသးဒ် တၢ်အိၣ်သးအိၣ်ဝဲအသိး သ့ဝဲဂ့ၤဂ့ၤလီၤ. ဒီးအဝဲသ့ၣ်​ တူၢ်လိာ်မူဒါအါမး လၢတၢ်လီၢ်လၢ ကွာ်တလိးဒီးဖြၣ်စ့ၣ်​ ကူၣ်အနၣ်န့ၣ်လီၤ. ခဲအံၤန့ၣ်​ တၢ်လီၢ်ခံခါအံၤ အိၣ်လၢကီၢ်ဖြၣ်စ့ၣ်​ အဝဲၤတြၢ် အတၢ်ကွၢ်ထွဲ အဖီလာ်လီၤ. ပကသံကွၢ် ကၠဲၣ်​ ဒီး မရံလဲး(န်) တၢ်သံကွၢ်တနီၤလီၤ.

ဘၣ်မနုၤအဃိ နအဲၣ်ဒိး စးထီၣ်မၤ ယွၤအတၢ်မၤ လၢဆၢကတီၢ် လၢပှဲၤလဲၣ်.

မရံလဲး(န်)– ဖဲယနီၢ်ဆံးအခါ ယဒိၣ်ထီၣ်လၢ ကွာ်တလိး ဒီးညီနုၢ်န့ၣ်​ ယဟးစံၣ်တဲၤတဲလီၤတၢ်ဒီးယမိ ဒီတနံၤလီၤ. ယမိန့ၣ်​ အသးဆူၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. ယအဲၣ်ပှၤအဂၤအဃိ ဖဲယဖျိထီၣ်ကၠိလၢ ၁၉၈၅ နံၣ်အခါ ယစးထီၣ်မၤ ပှၤလဲၤလၢညါ တဘျီဃီလီၤ.

ကၠဲၣ်– ဖဲယသးစၢ်အခါ ယရ့ဘၣ်ဒီး ပှၤလၢအမၤ ကစၢ်ယွၤ အတၢ်မၤလၢ ဆၢကတီၢ်လၢပှဲၤ ထီဘိလီၤ. ဖဲယကၠိပျၢ်ကသုၣ်အဆၢကတီၢ် ညီနုၢ်န့ၣ်​ ယမၤပှၤလဲၤလၢညါ မၤစၢၤတၢ်လီၤ. ဖဲမုၢ်ဃုနံၤအိၣ်ဘှံးနံၤန့ၣ်​ တဘျီတခီၣ်​ ပဒိးဘၢး(စ်) ကါဒီး ပလဲၤစံၣ်တဲၤတဲလီၤတၢ်ဒီး ပှၤလဲၤလၢညါတဖၣ်လီၤ. ပစံၣ်တဲၤတဲလီၤတၢ် ဒီတနံၤဝံၤ ဒီးပလဲၤဟးလၢ ပီၣ်လဲၣ်နံၤလီၤ. ဒီးအမုာ်ဘၣ်ပှၤဒိၣ်မးလီၤ.

ယဖျီယသးဒီး မရံလဲး(န်) ဖဲ ၁၉၈၈ နံၣ်ဒီးတယံာ်ဘၣ်န့ၣ်​ ယဆိကမိၣ်ထီၣ်​ ‘တၢ်လၢအကထုးဃၢပှၤ တအိၣ်နီတမံၤဘၣ်​ အဃိ ပကြၢးမၤအါထီၣ်​ တၢ်စံၣ်တဲၤတဲလီၤတၢ်မၤလီၤ.’ အဃိ ယစးထီၣ်မၤ ပှၤလဲၤလၢညါဒီး မရံလဲး(န်)လီၤ. တနံၣ်ဝံၤအလီၢ်ခံ ပထီၣ်ပှၤလဲၤလၢညါကၠိဝံၤဒီး ပန့ၢ်ဘၣ်မူဒါ လၢပကမၤ ပှၤလဲၤလၢညါလီၤဆီလီၤ. တချုးလၢ ပှၤကွဲမုာ်ပှၤလၢ ပကလဲၤသုးလီၢ်သုးကျဲလၢ ဖြၣ်စ့ၣ်​ ကူၣ်အနၣ်​ ဒံးဘၣ်န့ၣ်​ ဖဲကွာ်တလိးန့ၣ်​ ပအိၣ်ဒီး မူဒါလၢ ပမၤအီၤမုာ် တဘျုးခါညါလီၤ.

လၢနံၣ်တဖၣ်​ အတီၢ်ပူၤ သုမူဒါဆီတလဲအါမးလီၤ. တၢ်မနုၤမၤစၢၤသု ဒ်သိးသုကလဲၤခီဖျိ တၢ်အိၣ်သးအသီအံၤလဲၣ် 

မရံလဲး(န်)– ဒီပုၢ်ဝဲၢ်လၢ ဖြၣ်စ့ၣ်​ ကူၣ်အနၣ်​ အဘ့ၤသ့လးန့ၣ်​ သ့ၣ်ညါဝဲ လံာ်စီဆှံအဆၢလၢပဘၣ်သူၣ်ဘၣ်သးအီၤ ဒိၣ်ကတၢၢ်လီၤ. လံာ်စီဆှံအဆၢအံၤ မ့ၢ်ဝဲ ယၡါယၤ ၆:၈ လီၤ. အဃိ ဖဲအဝဲသ့ၣ်​ ကိးပှၤလၢ လီတဲစိအခါ ညီနုၢ်အဝဲသ့ၣ်​ သံကွၢ်လိာ်ကွဲပှၤလၢ “လံာ်စီဆှံ အဆၢလၢ နဘၣ်သူၣ်ဘၣ်သးအီၤ ဒိၣ်ကတၢၢ် မ့ၢ်မနုၤလဲၣ်န့ၣ်​ နသ့ၣ်နီၣ်ဘၣ်ဒံးဧါ.” အဃိ ပသ့ၣ်ညါလၢ ပကဒိးန့ၢ်ဘၣ်​ မူဒါလၢ အသီတခါလီၤ. ဒီးပတဲလၢ “ကွၢ်ကွၢ်ပှၤလီၤ, မၢလီၤပှၤတက့ၢ်.”

ပတထိၣ်သတြီၤ ပမူဒါအသီ ဒီးပမူဒါ အလီၢ်လံၤဘၣ်. ပမ့ၢ်ထိၣ်သတြီၤအီၤန့ၣ်​ ဘၣ်သ့ၣ်သ့ၣ်​ ပမၤပမူဒါလၢ အသီတမုာ်လၢၤဘၣ်. ပဂုာ်ကျဲးစၢးရ့ဒီး ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်လၢ ပလီၤဘၣ်မူဒါအသီ အလီၢ်န့ၣ်လီၤ.

ကၠဲၣ်– လၢအပူၤကွံာ်န့ၣ်​ ဒီပုၢ်ဝဲၢ်မုၣ်ခွါတနီၤ တအဲၣ်ဒိးလၢ ပကဟးသဒၣ်​ အဝဲသ့ၣ်ဘၣ်အဃိ အဝဲသ့ၣ်​ ဟ့ၣ်ဂံၢ်ဟ့ၣ်ပှၤ ဒ်သိးပသုတသုးလီၢ်သုးကျဲ လၢတၢ်လီၢ်အဂၤတဂ့ၤလီၤ. ဘၣ်ဆၣ်​ ဖဲပဟးထီၣ်လၢ ကွာ်တလိးအခါ ဒီပုၢ်ဝဲၢ်တဂၤ ဒုးသ့ၣ်နီၣ်ထီၣ်ပှၤ ယ့ၣ်ၡူးအတၢ်ကတိၤဖဲ မးသဲ ၁၃:၃၈ အပူၤလီၤ. ဖဲန့ၣ်တဲဝဲလၢ “စံာ်ဧိၤပှဲၤဧိၤန့ၣ်, မ့ၢ်ဟီၣ်ခိၣ်” လီၤ. အဃိ ဖဲပမူဒါဆီတလဲအခါ ပဆိကမိၣ်ထီၣ်က့ၤလၢ ပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ မ့ၢ်ဒၣ်ပမၤကစၢ်ယွၤ အတၢ်မၤလၢ စံာ်ပျီတဘ့ၣ်ဃီအပူၤလီၤ. ပှၤကညီ ဒီးတၢ်စံၣ်တဲၤတဲလီၤတၢ် လီၢ်ကဝီၤန့ၣ်​ မ့ၢ်တၢ်လၢ အရ့ဒိၣ်ကတၢၢ်လီၤ.

ဖဲပလဲၤတုၤလၢ တၢ်လီၢ်အသီ လၢပလီၤဘၣ်မူဒါအခါ ပထံၣ်ဘၣ်လၢ ပှၤဖဲန့ၣ်တဖၣ်န့ၣ်​ အိၣ်မူပှဲၤဒီး တၢ်သူၣ်ခုသးခုလီၤ. အဃိ ပဂုာ်ကျဲးစၢး အိၣ်မူဒ်သိး အဝဲသ့ၣ်လီၤ. တၢ်အီၣ်တၢ်အီ လီၤဆီသနာ်က့ ပအီၣ်တၢ်အီတၢ် ဒ်သိးအဝဲသ့ၣ်​ ဘၣ်ဆၣ်​ ပကွၢ်ကတီၤ ပတၢ်အိၣ်ဆူၣ်အိၣ်ချ့စ့ၢ်ကီးလီၤ. မူဒါတခါဂ့ၤတခါဂ့ၤ လၢပဒိးန့ၢ်ဘၣ်အီၤန့ၣ်​ ပဂုာ်ကျဲးစၢး အိၣ်ဒီးတၢ်ထံၣ်လၢအဂ့ၤလီၤ.

မရံလဲး(န်)– ပမၤလိန့ၢ်ဘၣ်​ တၢ်အါမးလၢ ဒီပုၢ်ဝဲၢ်မုၣ်ခွါ ဖဲန့ၣ်တဖၣ်အအိၣ်လီၤ. ယသ့ၣ်နီၣ်ဘၣ်လၢ တၢ်မၤအသး ဖဲပလဲၤတုၤလၢ ဖြၣ်စ့ၣ်​ ကူၣ်အနၣ်​ တယံာ်ဘၣ်အခါန့ၣ်လီၤ. တၢ်စူၤဖးဒိၣ်အဃိ ပဆိကမိၣ်လၢ ပကအိၣ်ခိးလၢ တၢ်စူၤဝံၤမး ပကဟးစံၣ်တဲၤတဲလီၤတၢ်လီၤ. ဘၣ်ဆၣ်​ ဒီပုၢ်ဝဲၢ်မုၣ်တဂၤ သံကွၢ်ယၤလၢ “ပကလဲၤဧါ.” ယကမၢကမၣ်​ ဒီးယတဲအီၤလၢ “ပကလဲၤဒ်လဲၣ်.” ဒီးအဝဲတဲယၤလၢ “ဟံးန့ၢ်နသဒၢမုၢ် ဒီးပကဒိးထီၣ်လ့ၣ်ယီၢ်” လီၤ. အဃိ စးထီၣ်ဖဲန့ၣ်​ ယဘၣ်ကၠီးလိယသးလၢ ယကဒိးလ့ၣ်ယီၢ်တခီခီ ဒီးဖီၣ်ဃာ်သဒၢမုၢ် တခီခီလီၤ. ယမ့ၢ်တမၤလိယသး ဒ်န့ၣ်ဘၣ်န့ၣ်​ ဖဲတၢ်စူၤခါအဆၢကတီၢ် တမ့ၢ်လၢ ယကဟးစံၣ်တဲၤတဲလီၤဘၣ်တၢ်ဘၣ်.

သုဘၣ်သုးလီၢ်သုးကျဲ ၁၅ ဘျီညါ. အဃိ လၢပှၤလၢ အအဲၣ်ဒိးသုးလီၢ်သုးကျဲတဖၣ်အဂီၢ် သုတၢ်ဟ့ၣ်ကူၣ်​ အိၣ်တမံၤမံၤဧါ.

မရံလဲး(န်)– ပဘၣ်သုးလီၢ်သုးကျဲန့ၣ်​ တမ့ၢ်တၢ်လၢ အညီဘၣ်. အရ့ဒိၣ်ဒိၣ်မးလၢ နကဘၣ်ဃု တၢ်အိၣ်တၢ်ဆိးအလီၢ်လၢ နကအိၣ်ဘှံးအိၣ်သါဘၣ်ဂ့ၤဂ့ၤ ဖဲနဟးစံၣ်တဲၤတဲလီၤတၢ် ဒီးဟဲက့ၤအဆၢကတီၢ်န့ၣ်လီၤ.

ကၠဲၣ်– ညီနုၢ်န့ၣ်​ ယဖှူထီၣ်​ ပဟံၣ်ပူၤအလွဲၢ်လီၤ. ဒီပုၢ်ဝဲၢ်လၢ ဝဲၤတြၢ်တဖၣ်​ မ့ၢ်သ့ၣ်ညါဝဲလၢ ဘၣ်သ့ၣ်သ့ၣ်​ ပတအိၣ်ဖဲန့ၣ်​ ယံာ်ယံာ်ဘၣ်န့ၣ်​ တဘျီတခီၣ်​ အဝဲသ့ၣ်တဲယၤလၢ “ဒီပုၢ်ဝဲၢ်ကၠဲၣ်​ နတလိၣ်ဖှူထီၣ်​ နဟံၣ်အလွဲၢ် ဒီးမၤလီၤဘှံးနသးဘၣ်.”

မရံလဲး(န်) န့ၣ်မ့ၢ်ပှၤလၢ အဘိၣ်ထီၣ်တၢ်ဖၠဲးမး. အဝဲပာ်လီၤတၢ်ကိးမံၤဒဲးလၢ တၢ်အဒၢပူၤတဖၣ်​ ဒီးလၢတၢ်ဒၢတဖၣ်အံၤအလိၤန့ၣ်​ အဝဲကျးလီၤဃာ်ဝဲ လံာ်မဲာ်ဖျၢၣ်လၢအမ့ၢ် “တၢ်ဟးလီၢ်,” “လီၢ်မံ,” “ဖၣ်ကပူၤ” ဒီးတၢ်အဂၤသ့ၣ်တဖၣ်န့ၣ်လီၤ. အဃိ ဖဲပလဲၤတုၤလၢ ပဟံၣ်အသီတဖျၢၣ်အခါ ပပာ်လီၤတၢ်လၢ အလီၢ်အကျဲ ညီဝဲလီၤ. ဒီးလၢတၢ်ဒၢတဖျၢၣ်စုာ်စုာ်အပူၤ တၢ်မနုၤအိၣ်လဲၣ်န့ၣ်​ အဝဲကွဲးနီၣ်ဃာ်ဝဲအဃိ ပဃုတၢ်လၢ ပလိၣ်ဘၣ်အီၤတဖၣ်​ ညီဝဲလီၤ.

မရံလဲး(န်)– ခီဖျိလၢ ပမၤလိပသးလၢ ပကရဲၣ်လီၤကျဲၤလီၤတၢ် ဂ့ၤဂ့ၤအဃိ ပစးထီၣ်​ တၢ်စံၣ်တဲၤတဲလီၤတၢ်မၤ သ့တဘျီဃီလီၤ.

ဒ်သိးနမၤ “တၢ်အခ့အပှၤအတၢ်မၤ လၢလၢပှဲၤပှဲၤ” ကန့ၢ်အဂီၢ် နရဲၣ်လီၤကျဲၤလီၤ နတၢ်ဆၢကတီၢ်ဒ်လဲၣ်.—၂ တံၤမသ့း ၄:၅.

မရံလဲး(န်)– ဖဲမုၢ်တနံၤန့ၣ်​ ပအိၣ်ဘှံးအိၣ်သါ ဒီးကတဲာ်ကတီၤပသးလၢ တၢ်အိၣ်ဖှိၣ်အဂီၢ်လီၤ. ဒီးစးထီၣ်ဖဲ မုၢ်ခံနံၤန့ၣ်​ ပစးထီၣ်​ လဲၤစံၣ်တဲၤတဲလီၤတၢ်လီၤ.

ကၠဲၣ်– ပှၤပာ်ပနီၣ်ဃာ် ပကဘၣ်စံၣ်တဲၤတဲလီၤတၢ် အနၣ်ရံၣ်ဘၣ်ဆၣ်​ ပတသးစၢၢ်ဆၢ တၢ်ဂ့ၢ်အံၤဘၣ်. တၢ်စံၣ်တဲၤတဲလီၤတၢ်န့ၣ်​ မ့ၢ်တၢ်လၢ အရ့ဒိၣ်ကတၢၢ် လၢပဂီၢ်လီၤ. စးထီၣ်လၢ ပဟးထီၣ်လၢဟံၣ်​ ဒီးပဟဲက့ၤတုၤလၢဟံၣ်န့ၣ်​ ပဂုာ်ကျဲးစၢးတဲတၢ်ဒီး ပှၤလၢပထံၣ်ဘၣ်အီၤ ကိးဂၤဒဲးလီၤ.

မရံလဲး(န်)– ဖဲပဟးကသုၣ်ကသီအခါ ပဟးစိာ် လံာ်ဖိတဖၣ်​ ထီဘိလီၤ. ပှၤတနီၤန့ၣ်​ ပတတဲဘၣ်အီၤ လၢပမ့ၢ် ယဟိဝၤပှၤအုၣ်အသးဒံးဘၣ်​ ဘၣ်ဆၣ်​ အဝဲသ့ၣ်​ ဟဲဃ့ပှၤ လံာ်လဲၢ်တဖၣ်လီၤ. မ့ၢ်လၢပှၤဂၤတဖၣ်န့ၣ်​ ပာ်သူၣ်ပာ်သး ပတၢ်ကူတၢ်သိး ဒီးပတၢ်အိၣ်ထီၣ်အိၣ်လီၤ အဃိပပလီၢ်ပသး ဘၣ်ဃးဒီး တၢ်သ့ၣ်တဖၣ်အံၤလီၤ.

ကၠဲၣ်– ပမၤစၢၤ ပှၤလၢပခိၣ်ပဃၢၤလီၤ. ပထၢထီၣ်​ တၢ်ကမှံၤ, လဲၤတၢၤကွံာ် တၢ်ကမှံၤ, ဒီးခွဲပျီသ့ၣ်လၣ်တဖၣ်​ လၢအအိၣ်လၢ ပဟံၣ်ကပိာ်ကပၤလီၤ. ပှၤလၢပခိၣ်ပဃၢၤတဖၣ်​ ပာ်သူၣ်ပာ်သးဝဲ တၢ်ဂ့ၢ်တဖၣ်အံၤအဃိ တဘျီတခီၣ်​ အဝဲသ့ၣ်​ တဲဝဲလၢ “နဟ့ၣ်ယၤ လံာ်စီဆှံတဘ့ၣ်​ ကသ့ဧါ.”

ညီနုၢ်န့ၣ်​ နဘၣ်လဲၤစံၣ်တဲၤတဲလီၤတၢ် လၢတၢ်လီၢ်လၢအယံၤအဃိ မ့ၢ်နသ့ၣ်နီၣ်ဘၣ်​ တၢ်လဲၤခီဖျိလၢ အလီၤဆီတမံၤမံၤဧါ.

ကၠဲၣ်– တၢ်လီၢ်တနီၤနီၤ ဖဲကူၣ်အနၣ်န့ၣ်​ နဘၣ်လဲၤဘၣ်အီၤ ကီကီခဲခဲလီၤ. ညီနုၢ်န့ၣ်​ တနွံန့ၣ်ပဘၣ်လဲၤတၢ် ၃၇၀ မံးလာ် (၆၀၀ ကံလိမံထၢၣ်) လၢကျဲလၢအတဂ့ၤဘၣ်န့ၣ်လီၤ. ပတၢ်လဲၤအိၣ်သကိး ဖဲသဝီစ့ၣ်​ အဲလံး လၢအအိၣ်ဖဲ အမ့ၤစိၤပှၢ်လၢ်ကျါန့ၣ်​ ပတသးပ့ၤနီၣ်အီၤ နီတဘျီဘၣ်. ပလဲၤဒိးကါ ဒီးကါကျဲတဂ့ၤဘၣ်, ဒီးပဘၣ်လဲၤဒိးစ့ၢ်ကီး ချံစဲးဒီးပကလဲၤတုၤအဂီၢ် ကဘၣ်တဘျုး နၣ်ရံၣ်ညါလီၤ. ပှၤအိၣ်ဖဲန့ၣ်​ အါတက့ၢ်န့ၣ်​ မ့ၢ်ပှၤခူၣ်ထူဖိလီၤ. ခီဖျိလၢ အဝဲသ့ၣ်​ ဘၣ်သူၣ်ဘၣ်သး ပလံာ်လဲၢ်တဖၣ်ဒိၣ်မး ဒီးအဲၣ်ဒိး စံးဘျုးစံးဖှိၣ်ပှၤအဃိ အဝဲသ့ၣ်ဟ့ၣ်ပှၤ ထူကိၣ်လိၣ်ဆံးဆံးဖိတနီၤ ဒ်တၢ်မၤဘူၣ်အသိးန့ၣ်လီၤ. ဖဲမုၢ်ဟါလီၤန့ၣ်​ ပပၠးအဝဲသ့ၣ်​ လၢတၢ်ကရၢကရိ အတၢ်ဂီၤမူတဖၣ်လီၤ. ပှၤလီၢ်ကဝီၤဖိတဖၣ်​ ဟဲကွၢ်အိၣ်ဒီဒူၣ်လီၤ.

မရံလဲး(န်)– ပူၤကွံာ်တယံာ်ဒံးဘၣ်န့ၣ်​ ပှၤကွဲမုာ်ကၠဲၣ်​ လၢကဟ့ၣ်​ တၢ်စံၣ်တဲၤတဲလီၤတၢ်လၢ တၢ်သ့ၣ်နီၣ်ထီၣ်က့ၤအမူးအဂီၢ် လၢခမိပံၤသဝီအဃိ ပဘၣ်လဲၤတၢ်ဒီးချံစဲး လၢထံကျိအိၣ်ယၤဖး(ခ်) အပူၤလွံၢ်နၣ်ရံၣ်ညါ. ပလဲၤမုာ်မး.

ကၠဲၣ်– ဖဲတၢ်လီၢ်လၢ ထံကျိတယိာ်ဘၣ်​ ဒီးထံယွၤ ဆူၣ်အခါ လီၤဘၣ်ယိၣ်ဒိၣ်မး. ဖဲပချံစဲး လဲၤတုၤလၢ ထံယွၤဆူၣ်အလီၢ်အခါ လီၤကမၢကမၣ်​ ဖးဒိၣ်ညါလီၤ. ပှၤနီချံတဂၤန့ၣ်​ ကဘၣ်သ့ၣ်ညါ တၢ်အိၣ်သး ဒီးနီချံသ့ဂ့ၤဂ့ၤလီၤ. တၢ်လဲၤခီဖျိတခါအံၤ လီၤကမၢကမၣ်ဒိၣ်မးလီၤ. ပှၤထီၣ်တၢ်သ့ၣ်နီၣ်ထီၣ်က့ၤအမူး အိၣ်ဝဲအဂၤ ၅၀ ဃၣ်ဃၣ်​ ဒီးဖဲန့ၣ်အကျါန့ၣ်​ ယဟိဝၤပှၤအုၣ်အသး ပၣ်ထဲ ၆ ဂၤလီၤ. လၢပှၤဟဲထီၣ်တၢ်အိၣ်ဖှိၣ်အံၤကျါန့ၣ်​ ပၣ်ဃုာ်ဒီး ပှၤအၤမရံဒံၤယၢၤဖိ တနီၤလီၤ.

မရံလဲး(န်)– ဒီပုၢ်ဝဲၢ်သးစၢ်တဖၣ်​ မ့ၢ်မၤအါထီၣ်​ ယဟိဝၤယွၤအတၢ်မၤန့ၣ်​ အဝဲသ့ၣ်​ ဒိးန့ၢ်ဘၣ်​ တၢ်လဲၤခီဖျိဒ်အံၤသ့လီၤ. ဖဲနထံၣ်ဘၣ်​ တၢ်အိၣ်အသး ဒ်အံၤတဖၣ်အခါ နကဘၣ်သန့ၤနသး လၢယဟိဝၤယွၤ ဒီးနတၢ်နာ် ကဂၢၢ်ကျၢၤထီၣ်လီၤ. ပထံၣ်ဘၣ်လၢ ယဟိဝၤယွၤ မၤစၢၤပှၤထီဘိလီၤ.

နမၤလိဘၣ်​ ကျိာ်အါမးလီၤ. ဒ်သိးနကမၤလိကျိာ်အဂီၢ် မ့ၢ်အညီလၢ နဂီၢ်စ့ၢ်ကီးဧါ.

ကၠဲၣ်– တညီဘၣ်. ယမၤလိကျိာ် ဒ်သိးယကစံၣ်တဲၤတဲလီၤတၢ် ဒီးမၤစၢၤတၢ်လၢ တၢ်အိၣ်ဖှိၣ်ပူၤအဂီၢ်လီၤ. တချုးလၢ ယဒိးန့ၢ်ဘၣ်မူဒါလၢ တၢ်ဖးလံာ်စီဆှံ နီတဘျီဒံးဘၣ်ဒၣ်လဲာ်န့ၣ်​ ယဘၣ်ဖီၣ်​ တၢးထီခိးတၢ် တၢ်မၤလိ လၢစရၢနါတီၣ်ကိၣ်အကျိာ်လီၤ.a ယသံကွၢ် ဒီပုၢ်ဝဲၢ်တဂၤလၢ မ့ၢ်အဝဲ နၢ်ပၢၢ်ယၤဧါန့ၣ်လီၤ. အဝဲတဲယၤလၢ “တဘျီတခီၣ်​ တၢ်ကတိၤတနီၤန့ၣ်​ ပတနၢ်ပၢၢ်ဘၣ်, ဘၣ်ဆၣ်​ နမၤကၠးနးလီၤ.” ဖိသၣ်တဖၣ်န့ၣ်​ ကဲထီၣ်တၢ်မၤစၢၤ လၢပဂီၢ်ဒိၣ်မးလီၤ. ဖဲပတဲတၢ်ကမၣ်အခါ အဝဲသ့ၣ်​ တဲပှၤတၢ်တမံၤမံၤလီၤ, ဘၣ်ဆၣ်​ မ့မ့ၢ်ပှၤနီၢ်ဒိၣ်တဖၣ်န့ၣ်​ တတဲပှၤဒ်န့ၣ်ဘၣ်. ယန့ၢ်ဘၣ်​ တၢ်မၤလိလၢ ပှၤသးစၢ်တဖၣ်အအိၣ်​ အါမးလီၤ.

မရံလဲး(န်)– ဖဲတၢ်စံၣ်တဲၤတဲလီၤတၢ် လီၢ်ကဝီၤတခါန့ၣ်​ ယအိၣ်ဒီး ပှၤမၤလိလံာ်စီဆှံဖိလၢ အတဲဝဲ ဖြၣ်စ့ၣ်, ဖီၣ်တူၢ်ကံး ဒီးစရၢနါတီၣ်ကိၣ်အကျိာ်လီၤ. ဒီပုၢ်ဝဲၢ်မုၣ်တဂၤ ဟ့ၣ်ကူၣ်ယၤလၢ ယကစးထီၣ်​ တၢ်မၤလိလံာ်စီဆှံလၢ ကျိာ်လၢအကီကတၢၢ် ဝံၤမးယကသိၣ်လိလံာ်စီဆှံလၢ ကျိာ်လၢအညီကတၢၢ်လၢ ယဂီၢ်လီၤ. တယံာ်ဘၣ်ဒီး ယသ့ၣ်ညါဘၣ်လၢ တၢ်ဟ့ၣ်ကူၣ်အံၤ ကဲဘျုးဝဲဒိၣ်မးလီၤ.

ဘၣ်တနံၤန့ၣ်​ ယဘၣ်လဲၤမၤ တၢ်မၤလိလံာ်စီဆှံလၢ စရၢနါတီၣ်ကိၣ်အကျိာ်တခါ ဒီးဖီၣ်တူၢ်ကံးအကျိာ်တခါလီၤ. ဖဲယစးထီၣ်​ တၢ်မၤလိလံာ်စီဆှံ ခံခါတခါအဆၢကတီၢ် ဒီပုၢ်ဝဲၢ်မုၣ်လၢ အလဲၤပိာ်ယခံတဂၤ တဲယၤလၢ “မရံလဲး(န်) ဘၣ်သ့ၣ်သ့ၣ်​ နတၢ်န့ၣ်​ ကမၣ်လံဧါသၢၣ်.” အဃိ ယသ့ၣ်ညါထီၣ်လၢ ယလဲၤတဲ ပှၤဖြၣ်စ့ၣ်မုၣ်တဂၤလၢ စရၢနါတီၣ်ကိၣ်အကျိာ်လီၤ. နီၢ်ကီၢ်န့ၣ်​ ယကဘၣ်တဲတၢ်ဒီးအီၤလၢ ဖီၣ်တူၢ်ကံးအကျိာ်လီၤ.

ပှၤလၢနမၤသကိးဘၣ်တၢ်ဒီးအီၤတဖၣ်န့ၣ်​ အဲၣ်နၤဒိၣ်မးလီၤ. နကကဲထီၣ်​ အဝဲသ့ၣ်​ အသကိးလၢအဂ့ၤအဂီၢ် နမၤဒ်လဲၣ်.

ကၠဲၣ်– ကတိၤဒိ ၁၁:၂၅ တဲဝဲလၢ “ပှၤလၢအဟ့ၣ်တၢ်ညီ ကဘီၣ်ထီၣ်ညီထီၣ်” လီၤ. ပတမၤယံာ်မၤနီၢ်ပသး လၢပကမၤစၢၤပှၤဂၤဘၣ်. ဘၣ်ဃးဒီး တၢ်ကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်န့ၣ်​ ပှၤတနီၤနီၤတဲပှၤလၢ “မၢပှၤစံၣ်တဲၤတဲလီၤတၢ်ဖိတဖၣ်​ မၤန့ၣ်.” ဘၣ်ဆၣ်​ ပတဲအဝဲသ့ၣ်လၢ “ပဝဲသ့ၣ်စ့ၢ်ကီး ပမ့ၢ်ပှၤစံၣ်တဲၤတဲလီၤတၢ်ဖိလီၤ. အဃိ ပမ့ၢ်ဘၣ်မၤဝံၤ တၢ်တမံၤမံၤန့ၣ်​ ယအဲၣ်ဒိးမၤစ့ၢ်ကီး” လီၤ. တဘျီတခီၣ်​ ပဝဲကိးဂၤဒဲး ပလိၣ်ဘၣ်တၢ်ဆၢကတီၢ်လၢ ပကအိၣ်ဘှံးအိၣ်သါလီၤ. ဘၣ်ဆၣ်​ ပတအဲၣ်ဒိးသူ ပတၢ်ဆၢကတီၢ်အံၤ ထဲလၢပနီၢ်ကစၢ်အဂီၢ်ဘၣ်. ပအဲၣ်ဒိးမၤဂ့ၤတၢ်လၢ ပှၤဂၤအဂီၢ်စ့ၢ်ကီးလီၤ.

မရံလဲး(န်)– ပဂုာ်ကျဲးစၢး ပာ်ဖျါထီၣ်​ တၢ်သူၣ်အိၣ်သးအိၣ်​ ဒီပုၢ်ဝဲၢ်မုၣ်ခွါ သ့ၣ်တဖၣ်လီၤ. ခီဖျိလၢ ပမၤဒ်န့ၣ်အဃိ ပသ့ၣ်ညါထီၣ်​ တၢ်လၢအဝဲသ့ၣ်လိၣ်ဘၣ်ဝဲလီၤ. အဒိ တဘျီတခီၣ်​ အဝဲသ့ၣ်​ လိၣ်ဘၣ်လၢ ပှၤကကွၢ်ထွဲအဖိ ဒီးလဲၤအိၣ်အဖိ လၢကၠိလီၤ. အဃိ ပရဲၣ်လီၤတၢ်ဆၢကတီၢ် လၢပကမၤစၢၤ အဝဲသ့ၣ်သ့လီၤ. မ့ၢ်လၢပအိၣ်ကတဲာ်ကတီၤပသးလၢ ပကမၤစၢၤပှၤဂၤ ဖဲအဝဲသ့ၣ်​ လိၣ်ဘၣ်တၢ်မၤစၢၤ အဆၢကတီၢ်အဃိ ပကဲထီၣ်​ အဝဲသ့ၣ်​ အသကိး လၢအဂ့ၤလီၤ.

မ့ၢ်လၢ သုလဲၤမၤစၢၤတၢ် လၢတၢ်လီၢ်လၢအလိၣ်ဘၣ်​ တၢ်မၤစၢၤအဃိ သုဒိးန့ၢ်ဘၣ်​ တၢ်ဆိၣ်ဂ့ၤမနုၤတဖၣ်လဲၣ်.

ကၠဲၣ်– မ့ၢ်လၢ ပမၤကစၢ်ယွၤအတၢ်မၤ လၢဆၢကတီၢ်လၢပှဲၤအဃိ ပတၢ်အိၣ်မူပှဲၤဒီး တၢ်သးခုလီၤ. ပန့ၢ်ဘၣ်​ တၢ်ခွဲးတၢ်ယာ်လၢ ပကထံၣ်ဘၣ်​ ယဟိဝၤယွၤ အတၢ်ဘၣ်တ့ အကလုာ်ကလုာ်လီၤ. ပထံၣ်ဘၣ်ဒီး တၢ်ကီတၢ်ခဲဘၣ်ဆၣ်​ ပအိၣ်ဒီးတၢ်သူၣ်မံသးမုာ် ခီဖျိပသ့ၣ်ညါလၢ ပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤန့ၣ်​ ပအိၣ်ဒီး ဒီပုၢ်ဝဲၢ်မုၣ်ခွါတဖၣ်​ လၢကမၤစၢၤပှၤလီၤ.

မ့ၢ်လၢယတအဲၣ်ဒိး နုာ်လီၤကဲသုးဘၣ်ဃိ ဖဲယသးစၢ်အခါ ယလီၤဘၣ်လၢ ဖြၣ်စ့ၣ်​ ကူၣ်အနၣ်​ အဃိာ်ပူၤလီၤ. ယကက့ၤဘၣ်ဖဲန့ၣ်​ ဒ်မံးၡ့ၣ်နရ့ၣ်တဂၤအသိး ဒီးလဲၤစံၣ်တဲၤတဲလီၤဘၣ်တၢ်လၢ ဃိာ်ဖဲန့ၣ်တဖၣ်န့ၣ်​ ယတဆိကမိၣ်ဘၣ်​ နီတဘျီဘၣ်. ယဟိဝၤယွၤ သးအိၣ်ဆိၣ်ဂ့ၤပှၤ သပှၢ်ကတၢၢ်လီၤ.

မရံလဲး(န်)– တၢ်သးခုအဒိၣ်ကတၢၢ် လၢယဂီၢ်န့ၣ်​ မ့ၢ်ဝဲယဟ့ၣ်လီၤယသး လၢပှၤဂၤအဂီၢ်လီၤ. ပမၤယဟိဝၤယွၤ အတၢ်မၤမုာ်ဒိၣ်မးလီၤ. တကးဒံးဘၣ်​ ပနီၢ်ဒီမါဝၤခံဂၤ ပတၢ်ရ့လိာ်သး ဂၢၢ်ကျၢၤထီၣ်ဝဲလီၤ. တဘျီတခီၣ်​ ကၠဲၣ်တဲယၤလၢ ပကကွဲမုာ် ပှၤဒီမါဝၤလၢ အလိၣ်ဘၣ်​ တၢ်ဟ့ၣ်ဂံၢ်ဟ့ၣ်ဘါဧါ. ဒီးယက့ၤတဲအီၤလၢ “ယၤနာ်က့ ယဆိကမိၣ်​ ဒ်န့ၣ်စ့ၢ်ကီးလီၤ.” ညီနုၢ်န့ၣ်​ ပဆိကမိၣ်တၢ် လီၤဂာ်လိာ်အသးလီၤ.

ကၠဲၣ်– ဖဲတယံာ်ဘၣ်န့ၣ်​ ယသ့ၣ်ညါလၢ ယအိၣ်ဒီး ခဲစၢၣ်တကလုာ် (prostate cancer) လီၤ. တမ့ၢ်လၢ မရံလဲး(န်) ကအဲၣ်ဒိးနၢ်ဟူဝဲ တၢ်ဂ့ၢ်အံၤဘၣ်ဆၣ်​ ယတဲအီၤလၢ “သးဘိဧၢ, ယသးတပှၢ်ဒံးဘၣ်, ဘၣ်ဆၣ်​ ခဲမုၢ်ဆ့ၣ်​ ယမ့ၢ်ဘၣ်သံနာ်က့ ယသ့ၣ်ညါလၢ ယမၤတၢ်လၢအကဲဘျုး, ယမၤယဟိဝၤယွၤအတၢ်မၤ လၢယတၢ်အိၣ်မူပူၤအဃိ ယသးခုလီၤ.”—၁ မိၤၡ့ ၂၅:၈.

မရံလဲး(န်)– ယဟိဝၤယွၤ ဟ့ၣ်လီၤပှၤမူဒါ လၢပတမုၢ်လၢ်ဘၣ်​ နီတဘျီဘၣ်​ ဒီးဟ့ၣ်ပှၤအခွဲးလၢ ပကမၤတၢ်လၢ ပတဆိကမိၣ်ဘၣ်​ နီတဘျီဘၣ်. လၢပတၢ်အိၣ်မူပူၤန့ၣ်​ ပထံၣ်ဘၣ်ထဲ တၢ်လၢအဂ့ၤတဖၣ်လီၤ. မ့ၢ်လၢပသ့ၣ်ညါ လၢယဟိဝၤယွၤ ကမၤစၢၤပှၤထီဘိအဃိ ယဟိဝၤယွၤ အတၢ်ကရၢကရိ မ့ၢ်မၢပလဲၤလၢ တၢ်လီၢ်တပူၤဂ့ၤတပူၤဂ့ၤန့ၣ်​ ပလဲၤလီၤ.