ဒီပုၢ်ဝဲၢ်မုၣ်ဟိဒၤ အဖီတၢၣ်ဟဲလၢပှဲၤထီၣ်

လၢကီၢ်အ့ၤဒိၤနံၡါ အကီးဆဲကၢၤဘစါန့ၣ် ဒီပုၢ်ဝဲၢ်မုၣ် အိၣ်ဝဲဖဲန့ၣ်သၢဂၤ. ပူၤကွံာ် တဘျုးနံၣ်န့ၣ် အဝဲသ့ၣ် မၤသကိးဝဲ တၢ်စံၣ်တဲၤတဲလီၤတၢ်မၤ လၢပီၣ်လဲၣ်နံၤဖဲန့ၣ် ဒ်သိးသိး. အဝဲသ့ၣ်သၢဂၤန့ၣ် ပှၤသ့ၣ်ညါအီၤလၢ အစံၣ်တဲၤတဲလီၤတၢ် ဒီးမၤစၢၤပှၤဂၤဒ်သိး ပှၤကသ့ၣ်ညါထီၣ် လံာ်စီဆှံတၢ်မ့ၢ်တၢ်တီ. သနာ်က့ တဘျီတခီၣ်န့ၣ် အဝဲသ့ၣ် မၤဝဲတၢ်မၤအဂၤစ့ၢ်ကီး.

အဒိ အဝဲသ့ၣ် လဲၤလၢထံကျါ, ဃုထၢဝဲလၢၢ်ဖးဒိၣ် ဒီးက့ၤစိာ်ဝဲ လၢၢ်တဖၣ်န့ၣ်လၢ ပီၣ်လဲၣ်ကၢၢ်နံၤ. လၢၢ်တနီၤနီၤန့ၣ် အဒိၣ်ထဲသိးဒီး ဖျၢၣ်ထူညါ. ဝံၤဒီး အဝဲသ့ၣ် ဆ့ၣ်နီၤ ဒီးတီၢ်သ့ၣ်ဖးဝဲ လၢၢ်ဖးဒိၣ် ဒီးတီၢ်လီၤကရဲဝဲ ဆံးန့ၢ်ဒံးဆီဒံၣ်ဒံး. လၢခံ အဝဲသ့ၣ်ဖၢနုာ်ဝဲလၢ တၢ်ဒၢပူၤ ဒီးက့ၤစိာ်ဝဲလၢအဟံၣ်. ဝံၤဒီး အဝဲသ့ၣ်ဖၢနုာ် လၢၢ်တဖၣ်န့ၣ် လၢထၢၣ်ဖးဒိၣ်အပူၤ ဒီးတီၣ်ထီၣ်ဝဲလၢကါဖးဒိၣ်အပူၤ ဒီးဆှၢဝဲလၢ ပှၤကတ့ကျဲအဂီၢ်.

လၢဒီပုၢ်ဝဲၢ်မုၣ်သၢဂၤအံၤအကျါန့ၣ် ဒီပုၢ်ဝဲၢ်မုၣ်ဟိဒၤ မၤဘၣ်ဝဲ တၢ်မၤတခါအံၤအါတစဲး. ဒီးစ့လၢအမၤန့ၢ်ဝဲ လၢအမၤတၢ်မၤအံၤအဃိန့ၣ် အသူဝဲလၢ အဟံၣ်ဖိဃီဖိ တၢ်လိၣ်ဘၣ်အဂီၢ်. သနာ်က့ ခဲအံၤန့ၣ် အဘၣ်သး စူးပာ်အစ့တနီၤ လၢတၢ်ဂ့ၢ်အဂၤတခါအဂီၢ်. ဒ်သိး အနုာ်လီၤလၢ JW Library^® app အပူၤကန့ၢ်အဂီၢ် အလိၣ်ဘၣ်ဝဲ ထဲးဘလဲးတဖျၢၣ်. ဒီပုၢ်ဝဲၢ်မုၣ်ဟိဒၤ သ့ၣ်ညါဝဲလၢ တၢ်ဂီၤမူ ဒီးတၢ်ဂ့ၢ်အဂၤ လၢအအိၣ်လၢ JW Library^® app အပူၤန့ၣ် ကမၤစၢၤအီၤ ဒ်သိးအစံၣ်တဲၤတဲလီၤတၢ် ကသ့ဒိၣ်ထီၣ် ဒီးအကနၢ်ပၢၢ် လံာ်စီဆှံအါထီၣ်.

လၢတလါဘျဲၣ် အတီၢ်ပူၤန့ၣ် ဒီပုၢ်ဝဲၢ်မုၣ်ဟိဒၤ မၤတၢ်မၤတခါအံၤ ကိးဂီၤဒဲး ဒီးမၤဝဲတဂီၤခံနၣ်ရံၣ်. လၢခံ စ့လၢအန့ၢ်ဘၣ်ဝဲန့ၣ် အပှ့ၤဝဲ ထဲးဘလဲးတဖျၢၣ်.

ဒီပုၢ်ဝဲၢ်မုၣ်ဟိဒၤ တဲဝဲလၢ “ယဘၣ်တီၢ်သ့ၣ်ဖးလၢၢ်အဃိ ယလီၤဘှံး ဒီးယလိၤဆါညါ. သနာ်က့ ခီဖျိလၢ ယန့ၢ်ဘၣ် ထဲးဘလဲးတဖျၢၣ် လၢအမၤစၢၤယၤ ဒ်သိး ယစံၣ်တဲၤတဲလီၤတၢ် ကသ့ဒိၣ်ထီၣ် ဒီးယကတဲာ်ကတီၤသး လၢတၢ်အိၣ်ဖှိၣ်အဂီၢ် ညီဒိၣ်ထီၣ်အဃိ ယသးပ့ၤနီၣ်ကွံာ် ယတၢ်ဆါလၢာ်ပျီ.” ဒီပုၢ်ဝဲၢ်မုၣ်ဟိဒၤ တဲဝဲလၢ ဖဲတၢ်ဆါရၤလီၤသး သီသီခါန့ၣ် ခီဖျိလၢ အအိၣ်ဒီး ထဲးဘလဲးတဖျၢၣ်အဃိ အထီၣ်ဘၣ်တၢ်အိၣ်ဖှိၣ် ဒီးဆဲးကျိးဘၣ်ဒီး ဒီပုၢ်ဝဲၢ်မုၣ်ခွါလၢ တၢ်စံၣ်တဲၤတဲလီၤတၢ်မၤအဂီၢ်. ဒီပုၢ်ဝဲၢ်မုၣ်ဟိဒၤ အဖီတၢၣ်ဟဲလၢပှဲၤထီၣ်အဃိ ပသးခုစၢၤအီၤညါ.