နအိၣ်ဒီးတၢ်နာ်ဧါ

ဒ်သိး ပကမၤတၢ်ဘၣ် ယဟိဝၤယွၤအသးအဂီၢ် ပကဘၣ်အိၣ်ဒီး တၢ်နာ်. သနာ်က့ လံာ်စီဆှံ တဲဝဲလၢ “ပှၤတအိၣ်ဒီးတၢ်နာ် ကိးဂၤဒဲးဘၣ်.” (၂ သ့း ၃:၂) ဖဲတၢ်မၢဖိပီလူး ကွဲးဝဲ တၢ်ဂ့ၢ်အံၤအခါ အတဲဘၣ်ဃးဒီး “ပှၤအၢပှၤသီ ဒီးပှၤလၢအသးအၢ” လၢအမၤအၢမၤနးအီၤ. ဘၣ်ဆၣ် ဘၣ်ဃးဒီး တၢ်နာ်အဂ့ၢ် လၢအတဲဝဲန့ၣ် အဘၣ်ထွဲဒီး ပှၤအဂၤစ့ၢ်ကီး. အဒိ ကစၢ်ယွၤလၢ အတ့လီၤတၢ်ခဲလၢာ် အိၣ်ဝဲနီၢ်ကီၢ်န့ၣ် ပှၤတနီၤ တဘၣ်သးနာ်ဝဲဘၣ်. (ရိ ၁:၂၀) မ့မ့ၢ် ပှၤအဂၤတနီၤန့ၣ် အဝဲသ့ၣ် တဲဝဲလၢ အနာ်ဝဲ တၢ်တမံၤမံၤ မ့တမ့ၢ် ပှၤတဂၤဂၤလၢ အစိအကမီၤ ဒိၣ်န့ၢ်ဒံးတၢ်အဂၤ. ဘၣ်ဆၣ် တၢ်နာ်ဒ်အံၤန့ၣ် တမ့ၢ်တၢ်နာ်လၢ အဘၣ်ကစၢ်ယွၤအသးဘၣ်.

ပကဘၣ်နာ် သပှၢ်တၢၢ်လၢ ယဟိဝၤယွၤ အိၣ်ဝဲနီၢ်ကီၢ် ဒီးပမ့ၢ်အိၣ်ဒီး တၢ်နာ်လၢ အဘၣ်ယဟိဝၤယွၤအသးန့ၣ် အကဆိၣ်ဂ့ၤပှၤ သပှၢ်တၢၢ်. (ဧ့ၤ ၁၁:၆) အဃိ ဒ်သိး ပကအိၣ်ဒီး တၢ်နာ်လၢ အဘၣ်ယဟိဝၤယွၤအသးအဂီၢ် ပကလိၣ်ဘၣ် သးစီဆှံ အတၢ်မၤစၢၤ. ဒီးဒ်သိး ပကဒိးန့ၢ်ဘၣ် ယဟိဝၤယွၤ အသးစီဆှံအဂီၢ် ပကဘၣ် ဃ့ထုကဖၣ် လၢအအိၣ်. (လူၤ ၁၁:၉, ၁၀, ၁၃) တကးဒံးဘၣ် ကစၢ်ယွၤ အကလုၢ်ကထါန့ၣ် ပှၤကွဲးဝဲခီဖျိ သးစီဆှံ အတၢ်ဟံးစုနဲၣ်ကျဲအဃိ ပမ့ၢ်ဖးလံာ်စီဆှံ, ဆိကမိၣ်ထံ တၢ်ဂ့ၢ်လၢပဖး ဒီးအိၣ်မူမၤထွဲအီၤန့ၣ် ပဒိးန့ၢ်ဘၣ် သးစီဆှံ အတၢ်မၤစၢၤသ့. ပမ့ၢ်မၤဒ်အံၤန့ၣ် ပပျဲလၢ ယဟိဝၤယွၤ အသးစီဆှံ ကမၤစၢၤပှၤ ဒ်သိးပကအိၣ်ဒီး တၢ်နာ်လၢ အဘၣ် ယဟိဝၤယွၤအသး.