ယဟိဝၤယွၤမၤစၢၤပှၤ ဒ်သိးပက ‘ဘိၣ်ထီၣ်ဖးထီၣ်’ ဖဲတၢ်လီၢ်လၢ အသူၣ်လီၤပှၤ

ဒီပုၢ်ဝဲၢ်မုၣ် ဒီးဒီပုၢ်ဝဲၢ်ခွါ ခးစဟိ ထီၣ်ဝဲကံးလဧးကၠိ ဖဲ ၁၉၇၉. လၢတဘျုးနံၣ် အတီၢ်ပူၤန့ၣ် အဝဲသ့ၣ် “ဘၣ်တၢ်သူၣ်လီၤအီၤ,” အဲၣ်ဒိးတဲဝဲ အဝဲသ့ၣ် ဒိးန့ၢ်ဘၣ်မူဒါလၢကမၤ ကစၢ်ယွၤအတၢ်မၤလၢ ကီၢ်အံၤရၤ, ကီၢ်မရံၤၡး, ကီၢ်ပယီၤ, ကီၢ်ထၣ်စါနံယါ, ကီၢ်ယူၤကၣ်ဒၣ် ဒီးကီၢ်စၤအံယၢၤ. အဝဲသ့ၣ် ဒိးန့ၢ်ဘၣ်မူဒါအသီ တဘျုးဘျီညါ. ဒီးဖဲအဝဲသ့ၣ် ဒိးန့ၢ်ဘၣ် မူဒါအသီ တဘျီဂ့ၤ တဘျီဂ့ၤအခါ တၢ်လၢအမၤစၢၤ အဝဲသ့ၣ်ဒိၣ်မးန့ၣ်မ့ၢ်ဝဲ ပှၤသိၣ်လိကံးလဧးကၠိ လၢအမံၤမ့ၢ် ကၠဲၣ် ရဲၣ်ဖိၣ် အတၢ်ဟ့ၣ်ကူၣ်. အဝဲသ့ၣ် ကတဲဝဲဒ်လဲၣ်န့ၣ် ပကဆဲးကွၢ်သကိး.

မဲၣ်, နန့ၢ်ဘၣ် တၢ်မ့ၢ်တၢ်တီဒ်လဲၣ်.

မဲၣ်– ဖဲဟီၣ်ခိၣ်တၢ်ဒုး ခံဘျီတဘျီအခါန့ၣ် ယပါအိၣ်လၢ ကီၢ်ဖိလဲ ဒီးအထံၣ်ဘၣ်ဝဲ တၢ်လံၣ်တၢ်လီလၢ ခဲးသလ့းသရိာ် အါမး. သနာ်က့ ထီဘိန့ၣ် အတဲဝဲလၢ “တၢ်ဘူၣ်တၢ်ဘါ အမ့ၢ်အတီန့ၣ် ကဘၣ်အိၣ်ဝဲဒၣ်ဟီ.” လၢခံန့ၣ် ယသ့ၣ်ညါဘၣ်လၢ တၢ်လၢယပါတဲဝဲန့ၣ် အဘၣ်နီၢ်ကီၢ်. ယပှ့ၤလံာ်လၢ ပှၤသူဝဲဝံၤ ဒီးယဖးအီၤမုာ်မး. လံာ်တဘ့ၣ်န့ၣ် အလွဲၢ်လုး ဒီးအခိၣ်တီမ့ၢ်ဝဲ The Truth That Leads to Eternal Life. လံာ်တဘ့ၣ်အံၤ အခိၣ်တီ ထုးန့ၢ်ယသးဒိၣ်မးအဃိ လၢတနၤဃီ အတီၢ်ပူၤန့ၣ် ယဖးအီၤဝး ဒီတဘ့ၣ်. ယဖးလံာ်အံၤ ဝံၤအလီၢ်ခံ ယသ့ၣ်ညါလၢ ယထံၣ်န့ၢ် တၢ်မ့ၢ်တၢ်တီလံ.

စးထီၣ်ဖဲ လါအ့ဖြ့ၣ် ၁၉၇၂ န့ၣ် ယဖး ယဟိဝၤပှၤအုၣ်အသးတဖၣ် အလံာ်အလဲၢ် ဒီးသ့ၣ်ညါဘၣ် တၢ်စံးဆၢလၢ ယအဲၣ်ဒိးသ့ၣ်ညါ ဘၣ်ဃးဒီး လံာ်စီဆှံန့ၣ် အါမး. ယတူၢ်ဘၣ်လၢ ယကဲပှၤပှ့ၤတၢ်ဆါတၢ် တဂၤလၢ ယ့ၣ်ၡူး တဲဖျါထီၣ်ဝဲလၢ အတၢ်ကတိၤဒိအပူၤ. ပှၤတဂၤန့ၣ် အထံၣ်န့ၢ် ပလဲလၢ အလုၢ်ဒိၣ်ပှ့ၤဒိၣ်တဖျၢၣ် ဝံၤဒီး ဒ်သိး ကပှ့ၤဝဲ ပလဲတဖျၢၣ်န့ၣ်အဂီၢ် အဆါလီၤကွံာ် တၢ်လၢအအိၣ်ဒီးအီၤခဲလၢာ်. ဒ်သိး ယပှ့ၤ “ပလဲ” လၢအမ့ၢ် တၢ်မ့ၢ်တၢ်တီ လၢယထံၣ်န့ၢ် ကသ့အဂီၢ် ယ “ဆါလီၤကွံာ်” ယဖီတၢၣ်လၢ ယကထီၣ် ဖၠၣ်စိမိၤကၠိ ဒ်သိးယကကဲထီၣ် ကသံၣ်သရၣ်အဂီၢ်. (မး ၁၃:၄၅, ၄၆) ဒီးဖဲလါဒံၣ်စ့ဘၢၣ် ၁၀, ၁၉၇၂ န့ၣ် ယဒိးဘျၢထံ.

လၢတနံၣ်အတီၢ်ပူၤန့ၣ် ယမိယပါ ဒီးယဒ့ဖိ မၤလိတၢ်မ့ၢ်တၢ်တီ ဒီးဒိးဘျၢထံစ့ၢ်ကီး. ဒီးဖဲလါယူၤလံ ၁၉၇၃ န့ၣ် ယစးထီၣ်မၤ ကစၢ်ယွၤတၢ်မၤ လၢဆၢကတီၢ်လၢပှဲၤ. လၢပတၢ်အိၣ်ဖှိၣ်ပူၤ ပှၤလဲၤလၢညါ လၢအသးဆူၣ်န့ၣ် အိၣ်တဘျုးဂၤညါ. လၢပှၤကျါန့ၣ် မ့ၢ်ဝဲ ဒီပုၢ်ဝဲၢ်မုၣ်အဲခထြံ လၢအကဲပှၤလၢ အဒိၣ်တၢ်ဂ့ၤ ဒီးအနီၢ်သးဆူၣ်. ပအဲၣ်ဘၣ်လိာ်သး ဒီးဖဲ ၁၉၇၅ န့ၣ် ပဖျီပသး. လၢခံလွံၢ်နံၣ် အတီၢ်ပူၤန့ၣ် ပမၤကစၢ်ယွၤ အတၢ်မၤလၢ ဝ့ၢ်စထြၢစူ လၢကီၢ်စွံဒဲၣ်. ဖဲန့ၣ် တၢ်လီၢ်ဃံလၤဒိၣ်မး ဒီးပှၤအါဂၤ အဲၣ်ဒိးမၤလိ လံာ်စီဆှံ.

အဲခထြံ– ဖဲယပါ ထီၣ်ဖၠၣ်စိမိၤကၠိလၢ ဝ့ၢ်စတီၣ်ဟိအခါ အမၤလိဘၣ် တၢ်မ့ၢ်တၢ်တီ. ဖဲန့ၣ်အခါ ယအိၣ်ထဲသၢလါဒံးလီၤ ဘၣ်ဆၣ် ဖဲယပါလဲၤထီၣ် တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်အခါ အလဲၤကိးဃုာ်ဒီးယၤ. ယမိတဘၣ်သးဝဲဘၣ် ဒီးအဂုာ်ကျဲးစၢး ပာ်ဖျါထီၣ်လၢ ယဟိဝၤပှၤအုၣ်သးတဖၣ်န့ၣ် သိၣ်လိကမၣ်တၢ်. အမၤဝဲတန့ၢ်ဘၣ်အဃိ လၢခံန့ၣ် အဒိးဘျၢထံစ့ၢ်ကီး. ယဒိးဘျၢထံ ဖဲယအိၣ် ၁၃ နံၣ် ဒီးဖဲယအိၣ် ၁၆ နံၣ်အခါ ယစးထီၣ်မၤ ပှၤလဲၤလၢညါ. ယမၤကစၢ်ယွၤအတၢ်မၤဖဲ ဝ့ၢ်အူၤမ့အိၤ လၢအကဲ တၢ်လီၢ်လၢ ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိ ဝံၤဒီး ယကဲထီၣ် ပှၤလဲၤလၢညါလီၤဆီ.

ယၤဒီးယဝၤန့ၣ် ပမၤစၢၤဘၣ် ပှၤအါဂၤ လၢကသ့ၣ်ညါထီၣ် တၢ်မ့ၢ်တၢ်တီ ဒီးပသးခုဒိၣ်မး. ပှၤလၢပမၤစၢၤ အကျါတဂၤန့ၣ်မ့ၢ်ဝဲ ပိာ်မုၣ်သးစၢ် လၢအမံၤမ့ၢ် မါဘၢၤ. ဒ်သိး အကမၤအါထီၣ်ဘၣ် ယဟိဝၤယွၤ အတၢ်မၤအဂီၢ် အပာ်တ့ၢ်ကွံာ် အတၢ်မၤလၢ အဘၣ်ဃးဒီး တၢ်လိာ်ကွဲ ဒီးအမၤသကိး ပှၤလဲၤလၢညါဒီး ယဒ့မုၣ်. ဖဲ ၁၉၈၄ န့ၣ် အဝဲသ့ၣ် ထီၣ်ကံးလဧးကၠိ ဒီးမၤဝဲ မံၤၡၢၤနရံၤလၢ ကီၢ်အဲးခွံးဒီ.

ဖဲသုမၤ မံၤၡၢၤနရံၤအခါ သုမၤထွဲ တၢ်ဟ့ၣ်ကူၣ် လၢအမ့ၢ် “ဘိၣ်ထီၣ်ဖးထီၣ် ဖဲတၢ်လီၢ်လၢ နဘၣ်တၢ်သူၣ်လီၤနၤ” န့ၣ်ဒ်လဲၣ်.

မဲၣ်– အါဘျီန့ၣ် ပဒိးန့ၢ်ဘၣ် မူဒါအသီ ဒီးဘၣ်လဲၤပၠီလၢ တၢ်လီၢ်အဂၤ. ဘၣ်ဆၣ် တၢ်လၢအမၤစၢၤပှၤန့ၣ်မ့ၢ်ဝဲ ပဂုာ်ကျဲးစၢးကွၢ်လိ ယ့ၣ်ၡူးအဒိအတဲာ်, လီၤဆီဒၣ်တၢ် အတၢ်ဆီၣ်လီၤသး. (ကလီး ၂:၆, ၇) အဒိ ပတဆိကမိၣ်လၢ ဒီပုၢ်ဝဲၢ်မုၣ်ခွါ လၢလီၢ်ကဝီၤပူၤ ကဘၣ်မၤတၢ် ဒ်သိးဒီးပမၤ ဒီးကဘၣ်အိၣ်ဒီးတၢ်ထံၣ် ဒ်သိးဒီးပှၤဘၣ်. ဘၣ်မနုၤအဃိ အဝဲသ့ၣ် မၤတၢ်ဒ်အံၤ ဒ်န့ၣ်လဲၣ်န့ၣ် ပဂုာ်ကျဲးစၢး ဃုသ့ၣ်ညါ. ပအဲၣ်ဒိးနၢ်ပၢၢ် အဝဲသ့ၣ် အတၢ်ထံၣ် ဒီးအတၢ်ဆဲးတၢ်လၤ. ဒီးခီဖျိလၢ ပကွၢ်လိ ယ့ၣ်ၡူးအဒိအတဲာ်အဃိ ပတူၢ်ဘၣ်ဒ်သိးဒီး ပဘၣ်တၢ်သူၣ်လီၤပှၤလၢ “ထံကျိဖိတဖၣ်အနံၤ” အဃိ ပဘိၣ်ထီၣ်ဖးထီၣ် ဖဲတၢ်လီၢ်လၢ ပလီၤဘၣ်မူဒါ.—စံး ၁:၂, ၃.

အဲခထြံ– သ့ၣ်တထူၣ်လၢ ပှၤထဲးထီၣ်အီၤ ဒီးသူၣ်လီၤအီၤလၢ တၢ်လီၢ်အဂၤ တတီၤန့ၣ် ဒ်သိး အကမဲထီၣ်အဂီၢ် အကလိၣ်ဘၣ်စ့ၢ်ကီး မုၢ်အတၢ်ကပီၤ. ယဟိဝၤယွၤန့ၣ် အပာ်ဖျါထီၣ်လၢ အကဲဝဲ “မုၢ်” လၢပဂီၢ် ထီဘိ. (စံး ၈၄:၁၁) အဟ့ၣ်ပှၤ ဒီပုၢ်ဝဲၢ်မုၣ်ခွါ လၢအပာ်ဖျါထီၣ် တၢ်အဲၣ်လၢပဖီခိၣ်အါမး. အဒိ လၢပတၢ်အိၣ်ဖှိၣ် ဆံးဆံးဖိတဖျၢၣ် လၢဝ့ၢ်ထဲရၤ, ကီၢ်အံၤရၤန့ၣ် ဒီပုၢ်ဝဲၢ်မုၣ်ခွါတဖၣ် ကဲပှၤလၢ အသးအိၣ်တူၢ်လိာ်တမှံၤ ဒီးဟ့ၣ်တၢ်ညီမး. အဝဲသ့ၣ် အတၢ်သးအိၣ်န့ၣ် ဒုးသ့ၣ်နီၣ်ထီၣ်ပှၤ တၢ်လဲၤခီဖျိလၢ ပဖးဘၣ်လၢ လံာ်စီဆှံပူၤ. ပအဲၣ်ဒိး ဆဲးမၤစၢၤတၢ်ဖဲ ကီၢ်အံၤရၤ ဘၣ်ဆၣ် ဖဲလါယူၤလံ ၁၉၈၀ န့ၣ် ပဒိၣ်တြီဝဲ ယဟိဝၤပှၤအုၣ်အသးတဖၣ် အတၢ်မၤ ဒီးလၢ ၄၈ နၣ်ရံၣ် အတီၢ်ပူၤန့ၣ် ပှၤမၢပဟးထီၣ်လၢကီၢ်ပူၤ. ပလီၤဘၣ်က့ၤမူဒါလၢ ကီၢ်စၤအံယၢၤ (ခဲအံၤ ပှၤကိးဝဲလၢ ခိကိၣ်) လၢအၤဖြံၤကၤ.

ဖဲယသ့ၣ်ညါဘၣ်လၢ ပလီၤဘၣ်က့ၤမူဒါလၢ ကီၢ်အၤဖြံၤကၤအခါ ယဟီၣ်. တၢ်ဂ့ၢ်လၢ ယနၢ်ဟူဘၣ် ဘၣ်ဃးဒီး ဂုၢ်ဒီးတၢ်ဆူးတၢ်ဆါလၢ ကီၢ်အၤဖြံၤကၤန့ၣ် အမၤပျံၤယၤဒိၣ်မး. ဘၣ်ဆၣ် ယသကိးခံဂၤလၢ ယမုာ်ဒီးအီၤဒိၣ်မး လၢအမၤကစၢ်ယွၤ အတၢ်မၤဖဲန့ၣ် ဖးယံာ်လံန့ၣ် တဲပှၤလၢ “ပျံၤတၢ်တဂ့ၤ. နတလဲၤတုၤလၢ ကီၢ်အၤဖြံၤကၤ နီတဘျီဒံးဘၣ်. ဘၣ်ဆၣ် ပသ့ၣ်ညါလၢ နကဘၣ်သူၣ်ဘၣ်သး တၢ်လီၢ်တတီၤန့ၣ်ဒိၣ်မး.” အဝဲသ့ၣ် တဲတၢ်ဖးဘၣ်ညါ. ဒီပုၢ်ဝဲၢ်မုၣ်ခွါတဖၣ်န့ၣ် ပာ်ဖျါထီၣ်တၢ်အဲၣ် ဒီးတၢ်ကဟုကယာ်. တကးဒံးဘၣ် ခီဖျိလၢ ပဒိၣ်တြီဝဲ ပတၢ်ဖံးတၢ်မၤအဃိ ပအိၣ်ဖဲ ကီၢ်စၤအံယၢၤ ဃုနံၣ်ဝံၤအလီၢ်ခံ ပဘၣ်ဟးထီၣ်. ယနံၤလီၤဘၣ်ယသး ခီဖျိလၢ ယသ့ၣ်ညါလၢ ယတၢ်ထံၣ်ဘၣ်ဃးဒီး ကီၢ်အၤဖြံၤကၤန့ၣ် ဆီတလဲ ဒီးယဃ့ကညး ယဟိဝၤယွၤလၢ “ဝံသးစူၤ ပျဲပဆဲးအိၣ်လၢ ကီၢ်အၤဖြံၤကၤမီၤ.”

နဒိးန့ၢ်ဘၣ် တၢ်ဆိၣ်ဂ့ၤ မနုၤတဖၣ်လဲၣ်.

မဲၣ်– ဖဲပမၤ မံၤၡၢၤနရံၤအခါ ပရ့လိာ်ဘၣ်သးဒီး မံၤၡၢၤနရံၤ လၢအဟဲလၢ ထံကီၢ်အဂၤ ဒီးအတၢ်အိၣ်သး လီၤဆီလိာ်သး. တကးဒံးဘၣ် ပဝဲခံဂၤလၢာ်န့ၣ် ပအိၣ်ဒီး တၢ်မၤလိလံာ်စီဆှံ အစှၤကတၢၢ် အခါ ၂၀ အဃိ ပဒိးန့ၢ်ဘၣ် တၢ်သးခု ဒီးတၢ်သူၣ်မံသးမုာ် ဒိၣ်မး. တကးဒံးဘၣ် တၢ်အဲၣ် ဒီးတၢ်သးအိၣ်တူၢ်လိာ်တမှံၤ လၢဒီပုၢ်ဝဲၢ်မုၣ်ခွါလၢ ကီၢ်အၤဖြံၤကၤ ပာ်ဖျါထီၣ်ဝဲန့ၣ် ယတသးပ့ၤနီၣ် နီတဘျီဘၣ်. ဒီးဖဲပလဲၤအိၣ်သကိး တၢ်အိၣ်ဖှိၣ်လၢ ကီၢ်ထၣ်စါနံယါ အခါ ပမံလၢပကါပူၤ. ဒီပုၢ်ဝဲၢ်မုၣ်ခွါတဖၣ်န့ၣ် အဝဲသ့ၣ်ဖှီၣ်ဝဲဒိၣ်မး ဘၣ်ဆၣ် အဝဲသ့ၣ် မၤစၢၤပှၤဒ်သိး ပကန့ၢ်ဘၣ် တၢ်လၢပလိၣ်ဘၣ်ခဲလၢာ်. (၂ ကရံၣ် ၈:၃) တၢ်ဆၢကတီၢ်လၢ ပဝဲခံဂၤ ပာ်လုၢ်ပာ်ပှ့ၤအီၤဒိၣ်မးန့ၣ် အကဲဝဲ တၢ်ဆၢကတီၢ်လၢဟါခီ ဖဲပဆ့ၣ်နီၤတဲသကိး တၢ်ကဲထီၣ်သး လၢဒီတနံၤညါ ဒီးပစံးဘျုး ယဟိဝၤယွၤ လၢအအိၣ်ဒီးပှၤအဃိ.

အဲခထြံ– တၢ်သးခုဒိၣ်မးလၢ ယဒိးန့ၢ်ဘၣ်န့ၣ် အကဲဝဲ တၢ်ခွဲးတၢ်ယာ်လၢ ယရ့လိာ်ဘၣ်သးဒီး ဒီပုၢ်ဝဲၢ်မုၣ်ခွါ လၢဟီၣ်ခိၣ်ဒီဘ့ၣ်ညါ. ပမၤလိ ကျိာ်အသီတဖၣ် လၢအပၣ်ဃုာ်ဒီး ဖြါစံၤ, ဖြၣ်စ့ၣ်, လူၤကၣ်ဒၣ် ဒီးစွါဟံလံၤအကျိာ် ဒီးပမၤလိန့ၢ် လုၢ်လၢ် ဒီးတၢ်ဆဲးတၢ်လၤ အသီအါမး. ပသိၣ်လိ ဒီးမၤစၢၤ ဒီပုၢ်ဝဲၢ်မုၣ်ခွါ အသီတဖၣ်, ဒိးန့ၢ်ဘၣ် သကိးလၢအဂ့ၤ ဒီးပမၤသကိး ယဟိဝၤယွၤ အတၢ်မၤ “ဃူဃူဖိးဖိး.”—ဖါ ၃:၉.

ပထံၣ်ဘၣ်စ့ၢ်ကီး ယဟိဝၤယွၤ အတၢ်ဘၣ်တ့ လၢအဃံလၤ ဒီးအလီၤကမၢကမၣ် အကလုာ်ကလုာ်. ဒီးဖဲပတူၢ်လိာ် မူဒါအသီ တဘျီဂ့ၤ တဘျီဂ့ၤအခါ လီၤဂာ်ဒ်သိးဒီး ပလဲၤသကိးတၢ်ဒီး ယဟိဝၤယွၤ ဒီးအလဲၤကိးပှၤလၢ တၢ်လီၢ်အသီတတီၤ. မ့တမ့ၢ်လၢ ယဟိဝၤယွၤ အဃိဘၣ်န့ၣ် ပတဒိးန့ၢ်ဘၣ် တၢ်သိၣ်လိ ဒီးတၢ်လဲၤခီဖျိ ဒ်အံၤဘၣ်.

နထံၣ်ဘၣ် တၢ်ကီတၢ်ခဲမနုၤလဲၣ် ဒီးနလဲၤခီဖျိအီၤန့ၢ်ဒ်လဲၣ်.

မဲၣ်– တဘျီတခီၣ်န့ၣ် ပဆိးက့ ဒီးဒိးန့ၢ်ဘၣ်တၢ်ဆါ ဒ်သိးဒီး တၢ်ညၣ်ဂိၢ်တၢ်ဆါ. ဒီးလၢတၢ်တဆိကမိၣ်အပူၤ ယမါအဲခထြံ ဘၣ်ဖွဲးသး တဘျုးဘျီညါ. ပမိပပါလၢ အသးပှၢ်ထီၣ်န့ၣ် ပသးကိၢ်န့ၢ်တၢ် လၢအဝဲသ့ၣ်အဂီၢ်. အဃိ ပဟံၣ်ဖိဃီဖိ လၢအကွၢ်ထွဲ ပမိပပါ လၢအသးပှၢ်န့ၣ် ပစံးဘျုးဘၣ် အဝဲသ့ၣ်ဒိၣ်မး. ဖဲအဝဲသ့ၣ် ကွၢ်ထွဲ ပမိပပါအခါ အဝဲသ့ၣ် ပာ်ဖျါထီၣ် တၢ်သးစူၤ, တၢ်သးခု ဒီးတၢ်အဲၣ်. (၁ တံၤ ၅:၄) ပအိၣ်ယံၤဒီး ပမိပပါ ဒီးပဂုာ်ကျဲးစၢး မၤစၢၤအဝဲသ့ၣ်ဒံး. သနာ်က့ တဘျီတခီၣ်န့ၣ် ပသးအုး ဒီးပတူၢ်ဘၣ်လၢ ပတမၤစၢၤ အဝဲသ့ၣ်အါအါဘၣ်.

အဲခထြံ– ဖဲ ၁၉၈၃ န့ၣ် ပလီၤဘၣ်မူဒါလၢ ကီၢ်စၤအံယၢၤ ဒီးယဒိးန့ၢ်ဘၣ် တၢ်ဆါလူဘှိးအဃိ ယဆိးက့နးမး. ကသံၣ်သရၣ် တဲယဝၤလၢ “ကိးဟးထီၣ်ကွံာ်နမါလၢ ကီၢ်စၤအံယၢၤ မ့ၢ်ချ့.” လၢခံတနံၤန့ၣ် ပဟးထီၣ်. ဘၣ်ဆၣ် ဒ်သိးပကလဲၤတုၤလၢ ကီၢ်စွံဒဲၣ်အဂီၢ် ပဘၣ်ဒိးထီၣ် ကဘီယူၤ လၢပှၤတီၣ်ဆှၢ တၢ်ဖိတၢ်လံၤ.

မဲၣ်– ပဆိကမိၣ်လၢ ပမၤမံၤၡၢၤနရံၤ တန့ၢ်လၢၤဘၣ်အဃိ ပဟီၣ်နးမး. ကသံၣ်သရၣ် ဆိကမိၣ်ဝဲလၢ အဲခထြံ တဘျါက့ၤလၢၤဘၣ် သနာ်က့ အဘျါက့ၤ. ဒီးလၢခံ တနံၣ်န့ၣ် ပက့ၤကဒါလၢ ကီၢ်စၤအံယၢၤ ဒီးတဘျီအံၤ ပမၤစၢၤဘၣ်တၢ်လၢ လူဘၢၤဘီၡံၤ တၢ်အိၣ်ဖှိၣ် ဆံးဆံးဖိတဖျၢၣ် ဒီးဖဲန့ၣ် ဒီပုၢ်ဝဲၢ်မုၣ်ခွါတဲဝဲ စွါဟံလံၤကျိာ်.

အဲခထြံ– ဖဲပအိၣ်လၢ လူဘၢၤဘီၡံၤ အခါ ယဒၢထီၣ် ဘၣ်ဆၣ် တချုးလၢ ယဖိအိၣ်ဖျဲၣ်ဒံးဘၣ်န့ၣ် အလီၤတဲာ်. ပတပာ်လီၤသးလၢ ပကဟံးဖိဘၣ် သနာ်က့ ဖဲပဖိသံအခါ ယသးဘၣ်ဒိနးမး. ဖဲပသးအုးအခါန့ၣ် ယဟိဝၤယွၤဟ့ၣ်ပှၤ တၢ်ဟ့ၣ်လၢ ပတဆိကမိၣ်ဘၣ်ဘၣ်. ပစးထီၣ် တၢ်မၤလိလံာ်စီဆှံ အါန့ၢ်ဒံးလၢညါ. ဒီးလၢစှၤကိာ်လါ အတီၢ်ပူၤန့ၣ် ပတၢ်အိၣ်ဖှိၣ်လၢ ပှၤစံၣ်တဲၤတဲလီၤတၢ် အနီၣ်ဂံၢ် အိၣ်ဝဲ ၃၅ ဂၤန့ၣ် အအါထီၣ် တုၤလၢ အဂၤ ၇၀. ဒီးပှၤဟဲထီၣ်တၢ်အိၣ်ဖှိၣ် အနီၣ်ဂံၢ် အိၣ်ဝဲ ၄၀ န့ၣ် အအါထီၣ် တုၤလၢ အဂၤ ၂၂၀. ပစံၣ်တဲၤတဲလီၤတၢ်ဆူၣ်မး ဒီးပထံၣ်ဘၣ်လၢ ယဟိဝၤယွၤဆိၣ်ဂ့ၤ ပတၢ်ဂုာ်ကျဲးစၢး အဃိ ပသးမုာ်ထီၣ်ဒိၣ်မး. ပဆိကမိၣ် ဒီးတဲဘၣ်ဃးဒီး ပဖိအဂ့ၢ်ထီဘိ. ပအိၣ်ခိးကွၢ်လၢ် တၢ်ဆၢကတီၢ်ဖဲ ယဟိဝၤယွၤ ကမၤလီၤမၢ်ကွံာ် ပတၢ်တူၢ်ဘၣ် လၢအဆါတဖၣ်.

မဲၣ်– ဘၣ်တဘျီန့ၣ် ယမါအဲခထြံ အဂံၢ်လီၤ ဒီးအလီၤဘှံးဖးဒိၣ်. မ့မ့ၢ်ယၤန့ၣ် ယန့ၢ်ဘၣ် ပှံာ်ပှၢ်ခဲစၢၤတၢ်ဆါ ဒီးယကဘၣ်ဖွဲးယသး တဘျီဃီ. ဘၣ်ဆၣ် ခဲအံၤန့ၣ် ယအိၣ်မုာ် ဒီးယမါအဲခထြံန့ၣ် အဂုာ်ကျဲးစၢး မၤယဟိဝၤယွၤအတၢ်မၤ ဖဲအမၤဝဲသ့.

ပသ့ၣ်ညါဘၣ်လၢ ပှၤလၢအထံၣ်ဘၣ် တၢ်ကီတၢ်ခဲန့ၣ် တမ့ၢ်ထဲပှၤဘၣ်. ဖဲပှၤမၤလီၤတူာ် ကလုာ်ဒူၣ်လၢ ကီၢ်ရဝၣ်ဒၣ် ဖဲ ၁၉၉၄ ဝံၤအလီၢ်ခံ ပလဲၤဟးလၢ ဒီပုၢ်ဝဲၢ်မုၣ်ခွါ လၢအအိၣ်လၢ ဘၣ်ကီဘၣ်ခဲ ဒဲကဝီၤ. အဝဲသ့ၣ်ထံၣ်ဘၣ် တၢ်အိၣ်သးကီခဲဘၣ်ဆၣ် အဝဲသ့ၣ် အိၣ်ဒီးတၢ်နာ်, တၢ်တူၢ်န့ၢ်ခီၣ်ကဲ ဒီးသးအိၣ်တူၢ်လိာ် ပှၤတမှံၤ. တၢ်လၢပထံၣ်ဘၣ်န့ၣ် မၤစၢၤပှၤဒ်သိး ပကသ့ၣ်ညါထီၣ်လၢ ဒ်သိး ယဟိဝၤယွၤ အပှၤဂီၢ်မုၢ် လဲၤခီဖျိ တၢ်ကီတၢ်ခဲ တမံၤဂ့ၤမံၤဂ့ၤ ကန့ၢ်အဂီၢ် ယဟိဝၤယွၤ အိၣ်ဒီး တၢ်စိတၢ်ကမီၤလၢ ကမၤစၢၤအဝဲသ့ၣ်.—စံး ၅၅:၂၂.

အဲခထြံ– ဖဲ ၂၀၀၇ န့ၣ် ပထံၣ်ဘၣ် တၢ်ကီတၢ်ခဲ အဂၤတမံၤ. ဖဲန့ၣ်အခါ ပလဲၤထီၣ် တၢ်အိၣ်ဖှိၣ်လၢ တၢ်ဟ့ၣ်လုၢ်ထီၣ် ဝဲၤတြၢ်အဂီၢ် လၢကီၢ်ယူၤကၣ်ဒၣ်. တၢ်ရဲၣ်တၢ်ကျဲၤ ဝံၤအလီၢ်ခံ ပဝဲမံၤၡၢၤနရံၤ ဒီးပှၤဘ့ၤသ့လးဖိ ကအိၣ်ဝဲ ၂၅ ဂၤန့ၣ် လဲၤသကိးလၢ ဝ့ၢ်နၤရိဘံၤ လၢကီၢ်ကဲၣ်နယၣ်. တချုးလၢ ပလဲၤတုၤလၢ ကဲၣ်နယၣ် အကီၢ်ဆၢဒံးဘၣ်န့ၣ် ဘၢးစကါ ဆံးဆံးဖိတခိၣ် ဟဲတဲးဘၣ် ပဘၢးစကါ. ပှၤနီကါဖိ ဒီးပသကိး ၅ ဂၤ သံတဘျီဃီ. ဒီးလၢခံ ဒီပုၢ်ဝဲၢ်မုၣ်တဂၤ သံလၢတၢ်ဆါဟံၣ်. ပခိးကွၢ်လၢ် တၢ်ဆၢကတီၢ်ဖဲ ပကထံၣ်ဘၣ်က့ၤ ပသကိးတဖၣ်အံၤဒိၣ်မး.—ဘး ၁၄:၁၃-၁၅.

ယဘၣ်ဒိ ဘၣ်ဆၣ် လၢခံန့ၣ် ယဘျါက့ၤ. သနာ်က့ ခီဖျိလၢ တၢ်ကဲထီၣ်သးအဃိ ယဝၤဒီးယၤ ဒီးဒီပုၢ်ဝဲၢ်မုၣ်ခွါ အဂၤတနီၤန့ၣ် ပတူၢ်ဘၣ်ဒံး တၢ်သူၣ်ပျံၤသးဖုး. မ့မ့ၢ်ယၤန့ၣ် တၢ်တူၢ်ဘၣ်တခါအံၤ ဟဲကဲထီၣ်သးလၢ မုၢ်နၤခီ ဒီးလီၤဂာ်ဒ်သိးဒီး ယသွံၣ်တလဲၤလၢ ယသးဖျၢၣ်ဘၣ် ဒီးယတူၢ်ဘၣ်လၢ ယသးနါပှၢ်ဆါ. အလီၤပျံၤညါ. ဘၣ်ဆၣ် ပဃ့ထုကဖၣ် ဆူၣ်ဆူၣ် ဒီးပဖးလံာ်စီဆှံ အဆၢတဖၣ်လၢ ပကၠဲးအဒိၣ်ကတၢၢ် ဒီးပသးမုာ်ထီၣ်အဃိ ပတူၢ်တၢ်န့ၢ်. ပလဲၤထံၣ်လိာ်သးဒီး ကသံၣ်သရၣ်အဃိ ကဲထီၣ်တၢ်မၤစၢၤ လၢပဂီၢ်ဒိၣ်မး. ခဲအံၤ ပတၢ်တူၢ်ဘၣ်တဖၣ်န့ၣ် တဟဲအိၣ်ထီၣ် အါအါလၢၤဘၣ်. ဒီးပဆဲးဃ့လၢ ယဟိဝၤယွၤ ကမၤစၢၤပှၤ ဒ်သိးပကမၤစၢၤ ပှၤလၢအလဲၤခီဖျိဘၣ် တၢ်သူၣ်ပျံၤသးဖုး ဒ်သိးဒီးပှၤ.

ဖဲသုလဲၤခီဖျိ တၢ်အိၣ်သးကီခဲအခါ သုတဲလၢ ယဟိဝၤယွၤ စိာ်ဃာ်သု “လီၤဂာ်ဒ်သိးဒီး ဆီဒံၣ်သံသိ.” သုအဲၣ်ဒိးတဲ အခီပညီဒ်လဲၣ်.

မဲၣ်– တၢ်ကတိၤတထံၣ်န့ၣ် အကဲဝဲ စွါဟံလံၤ အတၢ်ကတိၤ. ဖဲပှၤတဂၤစိာ်ဃာ်ဝဲ ဆီဒံၣ်သံသိအခါ ဒ်သိးအတသ့ၣ်ဖး တဂ့ၤအဂီၢ် အပလီၢ်အသး ဒီးကဟုကယာ်ဝဲ. ဒ်န့ၣ်အသိး ဖဲပလီၤဘၣ်မူဒါလၢ တၢ်လီၢ်တတီၤဂ့ၤ တတီၤဂ့ၤအခါ ယဟိဝၤယွၤ ကဟုကယာ် ဒီးဆီၣ်ထွဲပှၤ. ဒီးတၢ်လၢ ပလိၣ်ဘၣ်န့ၣ် ပန့ၢ်ဘၣ်ထီဘိ ဒီးပန့ၢ်ဘၣ်အီၤ အါန့ၢ်ပလိၣ်ဘၣ်ဒံး. ပဒိးန့ၢ်ဘၣ် ယဟိဝၤယွၤ အတၢ်အဲၣ် ဒီးအတၢ်မၤစၢၤ ခီဖျိတၢ်အဲၣ် ဒီးတၢ်ဒိသူၣ်ဒိသးလၢ ပှၤပၢဆှၢတၢ်ကမံးတံာ် ပာ်ဖျါထီၣ်န့ၢ်ပှၤ.

အဲခထြံ– ယအဲၣ်ဒိး တဲဖျါထီၣ် တၢ်အဒိတခါ လၢအဘၣ်ဃးဒီး ယဟိဝၤယွၤ အတၢ်မၤစၢၤ ဒီးတၢ်ကဟုကယာ်အဂ့ၢ်. ဘၣ်တနံၤန့ၣ် ပှၤကိးယၤလၢ လီတဲစိ ဒီးတဲဘၣ်ယၤလၢ ယပါလၢအအိၣ်လၢ ကီၢ်စွံဒဲၣ်န့ၣ် အဆိးက့နးမးအဃိ အဘၣ်အိၣ်လၢ တၢ်ဆါဟံၣ်. ယဝၤန့ၣ် အဘၣ်ဝဲ တၢ်ညၣ်ဂိၢ်ဃၢ် ဒီးအတဘျါက့ၤ ဂ့ၤဂ့ၤဒံးဘၣ်. ဒီးပကက့ၤကဒါလၢဟံၣ်အဂီၢ် ပပှ့ၤကဘီယူၤလဲးမး တန့ၢ်ဘၣ်အဃိ ပဆိကမိၣ်လၢ ပကဆါကွံာ်ပကါ. ဘၣ်ဆၣ် ပှၤကိးပှၤလၢ လီတဲစိခံဘျီ. တၢတဘျီန့ၣ် ဘၣ်လၢ ပှၤဒီမိၢ်ဝၤခံဂၤလၢ အနၢ်ဟူဘၣ် ပတၢ်အိၣ်သး ဒီးအဲၣ်ဒိး ပှ့ၤန့ၢ်ပှၤ ကဘီယူၤလဲးမးတဘ့ၣ်. ခံဘျီတဘျီန့ၣ် ဘၣ်လၢ ဒီပုၢ်ဝဲၢ်မုၣ်သးပှၢ်တဂၤ လၢအစူးပာ်စ့ ဒီးလၢ စူးဘူလိၤန့ၣ် အကွဲးလီၤဝဲ “လၢပှၤလိၣ်ဘၣ် တၢ်မၤစၢၤအဂီၢ်.” လၢစှၤကိာ်မံးနံး အတီၢ်ပူၤန့ၣ် ယဟိဝၤယွၤ မၤစၢၤပှၤဒ်သိး ပပှ့ၤကဘီယူၤလဲးမးကန့ၢ်.—ဧ့ၤ ၁၃:၆.

ဖဲသုဆိကမိၣ်ထီၣ်က့ၤ သုမၤကစၢ်ယွၤတၢ်မၤ လၢဆၢကတီၢ်လၢပှဲၤ လၢအနံၣ် ၅၀ ဘျဲၣ် အတီၢ်ပူၤန့ၣ် သုဒိးန့ၢ်ဘၣ် တၢ်မၤလိမနုၤလဲၣ်.

အဲခထြံ– ယန့ၢ်ဘၣ် တၢ်မၤလိလၢ ပမ့ၢ် ‘ပာ်ပသး ဂၢၢ်ဂၢၢ် ဒီးနာ်န့ၢ်’ ယဟိဝၤယွၤန့ၣ် ပကအိၣ်ဒီး တၢ်ဂံၢ်တၢ်ဘါ. ဒီးပမ့ၢ်နာ်န့ၢ် ယဟိဝၤယွၤန့ၣ် လီၤဂာ်ဒ်သိးဒီး ပပျဲလၢ အကဒုးန့ၢ်တၢ်လၢပဂီၢ်. (ၡါ ၃၀:၁၅; ၂ ကွဲး ၂၀:၁၅, ၁၇) ဖဲပဒိးန့ၢ်ဘၣ်မူဒါ တခါဂ့ၤတခါဂ့ၤ အခါ ပဂုာ်ကျဲးစၢး မၤအဂ့ၤကတၢၢ်အဃိ ပဒိးန့ၢ်ဘၣ် တၢ်ဆိၣ်ဂ့ၤအါန့ၢ်ဒံး တၢ်အဂၤခဲလၢာ်.

မဲၣ်– တၢ်မၤလိ အရ့ဒိၣ်တခါလၢ ယမၤလိဘၣ်န့ၣ်မ့ၢ်ဝဲ ယမ့ၢ်သန့ၤသးလၢ ယဟိဝၤယွၤ လၢတၢ်အိၣ်သးခဲလၢာ်န့ၣ် ယကထံၣ်ဘၣ်လၢ အမၤစၢၤယၤ. (စံး ၃၇:၅) ဒ်အအၢၣ်လီၤဝဲအသိး အမၤစၢၤယၤထီဘိ. ဒီးခဲအံၤ ပလီၤဘၣ်မူဒါလၢ ကီၢ်ပယီၤ ဘ့ၤသ့လး ဒီးပထံၣ်ဘၣ်လၢ အမၤစၢၤပှၤဒံး.

ပမုၢ်လၢ်လၢ ပှၤသးစၢ်အါဂၤ လၢအအဲၣ်ဒိး မၤအါထီၣ် ယဟိဝၤယွၤ အတၢ်မၤန့ၣ် ကလဲၤခီဖျိဘၣ် ယဟိဝၤယွၤ အတၢ်အဲၣ်လၢအတီ လၢပဒိးန့ၢ်ဘၣ်စ့ၢ်ကီး. ပှၤသးစၢ်တဖၣ် မ့ၢ်ပျဲလၢ ယဟိဝၤယွၤ ကမၤစၢၤအဝဲသ့ၣ် ဖဲတၢ်လီၢ်လၢ ယဟိဝၤယွၤ သူၣ်လီၤအီၤန့ၣ် ပနာ်လၢ အဝဲသ့ၣ် ကဘိၣ်ထီၣ်ဖးထီၣ် သပှၢ်တၢၢ်.