ယ့ၣ်ၡူး “မၤလိန့ၢ်တၢ်ဒိကနၣ်”

ယ့ၣ်ၡူးန့ၣ် အဒိကနၣ် ယဟိဝၤယွၤ အကလုၢ်ထီဘိ. (ယိၤ ၈:၂၉) ဘၣ်ဆၣ် လံာ်စီဆှံ တဲဝဲလၢ ယ့ၣ်ၡူး “မၤလိန့ၢ်တၢ်ဒိကနၣ် ခီဖျိတၢ်လၢ အတူၢ်ဘၣ်ဝဲတဖၣ်အဃိ.” (ဧ့ၤ ၅:၈) ဘၣ်မနုၤအဃိ လံာ်စီဆှံ တဲဝဲဒ်န့ၣ်လဲၣ်.

တၢ်လၢယ့ၣ်ၡူး လဲၤခီဖျိဘၣ်ဝဲ လၢဟီၣ်ခိၣ်ချၢန့ၣ် ဖဲအအိၣ်လၢ မူခိၣ်အခါ အတလဲၤခီဖျိဘၣ်ဝဲဘၣ်. အဒိ အမိအပါလၢ အလုၢ်ဒိၣ်ထီၣ်အီၤန့ၣ် အဝဲသ့ၣ်အဲၣ် ယဟိဝၤယွၤ ဘၣ်ဆၣ် အဝဲသ့ၣ် တကဲပှၤလၢပှၤပှဲၤဘၣ်. (လူၤ ၂:၅၁) တၢ်ဘူၣ်တၢ်ဘါခိၣ်နၢ် ဒီးပဒိၣ်တဖၣ် ရ့ဒီးအီၤ အၢအၢသီသီ. (မး ၂၆:၅၉; မၢ် ၁၅:၁၅) ဒီးတချုးလၢ ယ့ၣ်ၡူး သံဒံးဘၣ်အခါ အဘၣ်တူၢ်တၢ်ဆါ နးဒိၣ်မး. လံာ်စီဆှံ တဲဝဲလၢ “အဝဲဆီၣ်လီၤအသး ဒီးအအိၣ်ဒီးတၢ်ဒိကနၣ် တုၤလၢ အသံတစု.”—ဖံလံး ၂:၈.

ဖဲယ့ၣ်ၡူး အိၣ်လၢမူခိၣ်အခါ အတလဲၤခီဖျိဘၣ်တၢ် ဒ်သိးဒီး ဖဲအအိၣ်လၢ ဟီၣ်ခိၣ်ချၢအခါဘၣ်. ဒီးတၢ်အိၣ်သးလၢ အလဲၤခီဖျိဘၣ် လၢဟီၣ်ခိၣ်ချၢန့ၣ် မၤစၢၤအီၤဒ်သိး အကမၤလိန့ၢ်တၢ်ဒိကနၣ်. အဃိ အကဲထီၣ်ဝဲ စီၤပၤ လၢအလၢအပှဲၤ ဒီးပှၤလုၢ်တၢ်ခိၣ် အဒိၣ်ကတၢၢ် တဂၤလၢ အနၢ်ပၢၢ်စၢၤ ပတၢ်အိၣ်သး. (ဧ့ၤ ၄:၁၅, ၅:၉) ယ့ၣ်ၡူး မၤလိန့ၢ်တၢ်ဒိကနၣ် ခီဖျိတၢ်လၢ အတူၢ်ဘၣ်ဝဲတဖၣ်အဃိ ယဟိဝၤယွၤ ပာ်လုၢ်ပာ်ပှ့ၤအီၤ ဒိၣ်ထီၣ် ဒီးသူအီၤသ့အါထီၣ်. ပဝဲစ့ၢ်ကီး ဖဲပထံၣ်ဘၣ် တၢ်အိၣ်သးကီခဲအခါ ပမ့ၢ်ဆဲးအိၣ်ဒီး တၢ်ဒိကနၣ်န့ၣ် ယဟိဝၤယွၤ ကပာ်လုၢ်ပာ်ပှ့ၤပှၤ ဒိၣ်ထီၣ် ဒီးအသူပှၤလၢ ပကမၤမူဒါ တမံၤဂ့ၤတမံၤဂ့ၤ ကသ့အါထီၣ်.—ယၤ ၁:၄.