တၢ်ဂ့ၢ်မိၢ်ပှၢ်

နမၤတၢ်အၢၣ်လီၤအီလီၤဒီး ယဟိဝၤယွၤပှဲၤခါလဲၣ်. မ့ၢ်နတူၢ်ဘၣ်လၢ နဂုာ်ကျဲးစၢးအိၣ်မူဒ် နတၢ်အၢၣ်လီၤအသိး လၢအဂ့ၤကတၢၢ်လံဧါ. နတၢ်ဟ့ၣ်လုၢ်ထီၣ်သး အတၢ်အၢၣ်လီၤအီလီၤ မ့တမ့ၢ် တၢ်အၢၣ်လီၤအီလီၤလၢ နမၤဒီးနသးသမူတံၤသကိးန့ၣ် မ့ၢ်နဂုာ်ကျဲးစၢးအိၣ်မူဒ် နအၢၣ်လီၤအီလီၤအသိးဧါ. လၢတၢ်မၤလိအံၤအပူၤ ပကမၤလိဘၣ်ဃး စီၤယံးဖသၤဒီး နီၢ်ဃးနၤ မၤလၢပှဲၤဝဲ အတၢ်အၢၣ်လီၤအီလီၤ အဂ့ၢ်န့ၣ်လီၤ. ဒီးအဝဲသ့ၣ်အဒိအတဲာ်အံၤ ကမၤစၢၤပှၤဒ်သိး ပကဆဲးတီဒီး ပတၢ်အၢၣ်လီၤအီလီၤန့ၣ်လီၤ.

ညီနုၢ်ပဆိကမိၣ်ထီၣ်ဘၣ်ဃး တၢ်လၢယဟိဝၤယွၤကဟ့ၣ်ပှၤလၢ ပၤရဒံစူးအပူၤန့ၣ်လီၤ. ဘၣ်ဆၣ် လၢတၢ်မၤလိအံၤအပူၤ ပကတဲသကိးဘၣ်ဃး တၢ်ကီတၢ်ခဲလွံၢ်ခါလၢ ယဟိဝၤယွၤ ကမၤလီၤမၢ်ကွံာ်ဝဲ ဒီးကမၤပှဲၤဟီၣ်ခိၣ်အံၤ လၢတၢ်ဃူတၢ်ဖိးဒီးတၢ်သူၣ်ခုသးခုလီၤ. ဒီးဖဲပတဲသကိးတၢ်ဂ့ၢ်အံၤအခါ ကမၤစၢၤပှၤဒ်သိး ပတၢ်နာ်ကဂၢၢ်ကျၢၤထီၣ်ဒီး ပကဆဲးတီဒီးယွၤ တုၤအကတၢၢ်အဂီၢ်လီၤ.

ဖဲပဘၣ်သဂၢၢ်ဒီးတၢ်တတီတလိၤအခါ ပတၢ်နာ်, တၢ်ဆီၣ်လီၤသး ဒီးတၢ်သးတီန့ၣ် ဘၣ်တၢ်မၤကွၢ်အီၤသ့ဝဲလီၤ. တၢ်မၤလိအံၤ ကပာ်ဖျါထီၣ်ဝဲ တၢ်ဂ့ၢ်လၢလံာ်စီဆှံအပူၤသၢခါလၢ ကမၤစၢၤပှၤဒ်သိး ပကအိၣ်ဒီးတၢ်ထံၣ်ဒ် ယဟိဝၤယွၤအသိးန့ၣ်လီၤ.

ယဟိဝၤယွၤတလိၣ်ဘၣ် တၢ်လၢပအိၣ်နီတမံၤဘၣ် ဘၣ်ဆၣ် ဖဲအဝဲထံၣ်လၢပဂုာ်ကျဲးစၢးဆီၣ်ထွဲမၤစၢၤ အတၢ်ပၢအခါ အသးခုဒိၣ်မးလီၤ. လၢစံၣ်ညီၣ်ကွီၢ်အဆၢဒိၣ် ၄ ဒီး ၅ အပူၤန့ၣ် ပကမၤလိဘၣ်လၢ ယဟိဝၤယွၤ ပာ်လုၢ်ပာ်ပှ့ၤ ပတၢ်သးအိၣ်ဟ့ၣ်လီၤသးဒီး မၤထွဲအတၢ်နဲၣ်လိန့ၣ်လီၤ.