နကဘၣ်မၤဒ်လဲၣ် တၢ်ဟ့ၣ်ကူၣ်လၢ အကဲဘျုး
မၤဂ့ၤထီၣ် နတၢ်ဆီဟံၣ်ဆီဃီ
မၤဂ့ၤထီၣ် နတၢ်ဆီဟံၣ်ဆီဃီ
လံာ်စီဆှံ တဲဝဲလၢ– “ပှၤခံဂၤန့ၣ် ဂ့ၤဒိၣ်န့ၢ်ဒံး ပှၤတဂၤ . . . အဝဲသ့ၣ် မ့ၢ်လီၤဃံၢ်တဂၤဒီး အဝဲတဂၤ ကဝံၣ်ဆၢထၢၣ်အီၤ.” (စံၣ်တဲၤတဲလီၤတၢ် ၄:၉, ၁၀) ပှၤဒီမိၢ်ဝၤတဖၣ် ကဘၣ်မၤသကိးတၢ် ဒ်သိးဒီး ပှၤနီကဘီယူၤ ဒီးအပှၤမၤစၢၤတၢ် မၤသကိးတၢ် ဒီးအဝဲသ့ၣ် တဘၣ်အ့ၣ်လိာ်သးဘၣ်.
ဖဲနအိၣ်ဒီး နနီၢ်ကစၢ် တၢ်ကီတၢ်ခဲအခါ တဘၣ်ပာ်ဖျါထီၣ် တၢ်သးဒိၣ်လၢ နသးသမူတံၤသကိး အဖီခိၣ်တဂ့ၤ. ပာ်ဖျါထီၣ် တၢ်ဝံသးစူၤ ဒီးအိၣ်ဒီး တၢ်ကီၤသူၣ်ကီၤသး.
ပာ်လီၤတၢ်ဆၢကတီၢ် အစှၤကတၢၢ် တနွံတဘျီလၢ နကတဲသကိးတၢ်ဒီး နသးသမူတံၤသကိး ဘၣ်ဃးဒီး တၢ်ကီတၢ်ခဲလၢ သုထံၣ်ဘၣ်အဂ့ၢ်. ဖဲသုတဲသကိးတၢ်အခါ သုတၢ်တိာ်ပာ် ကဘၣ်မ့ၢ်လၢ သုကဘှီဘၣ်ထီၣ်က့ၤ တၢ်ဂ့ၢ်ကီ ဒီးတဘၣ်မ့ၢ်လၢ သုကတဲအါလိာ်သး အဂီၢ်ဘၣ်.
ပာ်လီၤတၢ်ဆၢကတီၢ်လၢ သုကမၤ တၢ်တမံၤမံၤလၢ သုခံဂၤလၢာ် ဘၣ်သူၣ်ဘၣ်သး.
ဆိကမိၣ်ထီၣ်က့ၤ တၢ်ဆၢကတီၢ် ဒီးတၢ်လဲၤခီဖျိလၢ အမၤသးခုသုသး ဒီးကွၢ်က့ၤတၢ်ဂီၤ ဖဲသုဖျီသးအခါ.
ဒ့ဘ့း တဲဝဲလၢ “ပှၤဒီမိၢ်ဝၤန့ၣ် အတၢ်ထံၣ် တဒ်သိးလိာ်သး ကိးဘျီဒဲးဘၣ်. ဘၣ်ဆၣ် အဝဲသ့ၣ် ဆၢတဲာ်သကိးတၢ်သ့ ဒီးဒ်သိး အဝဲသ့ၣ်တၢ်ဆၢတဲာ် ကကဲထီၣ်အဂီၢ် အဝဲသ့ၣ် ကဘၣ်မၤသကိးတၢ် ဒ်သိးသိး.”
မၤဂ့ၤထီၣ် နတၢ်ရ့လိာ်ဒီးပှၤဂၤ
မၤဂ့ၤထီၣ် နတၢ်ရ့လိာ်ဒီးပှၤဂၤ
ဒ်သိး နကန့ၢ်ဘၣ် တၢ်မၤစၢၤလၢ နသကိးအအိၣ်အဂီၢ် ဆိကမိၣ်ထီၣ် ကျဲတဘိဘိလၢ နကမၤစၢၤ အဝဲသ့ၣ်. နမ့ၢ်ဟ့ၣ်ဂံၢ်ဟ့ၣ်ဘါ ပှၤဂၤန့ၣ် နန့ၢ်ဘၣ်က့ၤ တၢ်ဂံၢ်တၢ်ဘါစ့ၢ်ကီး.
ဒ်သိး နကသ့ၣ်ညါလၢ နသကိးတဖၣ် မၤဒ်လဲၣ်အီၣ်ဒ်လဲၣ်အဂီၢ် ဆဲးကျိးဒီးအဝဲသ့ၣ် တဂၤခံဂၤ ကိးနံၤဒဲး.
နသကိးလၢ အထံၣ်ဘၣ် တၢ်ကီတၢ်ခဲလၢ အလီၤဂာ်ဒီးနၤန့ၣ် သံကွၢ်အီၤလၢ အလဲၤခီဖျိ အတၢ်ကီတၢ်ခဲ န့ၢ်ဒ်လဲၣ်.
နံခိ တဲဝဲလၢ “ဖဲနထံၣ်ဘၣ် တၢ်ကီတၢ်ခဲ ဒိၣ်ဒိၣ်မုၢ်မုၢ် လၢအလီၤဂာ်ဒ်သိးဒီး ကလံၤမုၢ်အခါ နကဘၣ်မၤဒ်လဲၣ်န့ၣ် နသကိး မၤစၢၤနၤသ့. အဝဲသ့ၣ် ကဒုးနဲၣ်နၤ ကျဲလၢအဘၣ် ဒီးကဒုးသ့ၣ်နီၣ်နၤ တၢ်လၢနကဘၣ်မၤ. နသကိးတဖၣ်န့ၣ် သးအိၣ်နၤ ဒီးအဝဲသ့ၣ် သ့ၣ်ညါလၢ နသးအိၣ် အဝဲသ့ၣ်စ့ၢ်ကီး.”
ကဲထီၣ်မိပါ လၢအဂ့ၤ
ကဲထီၣ်မိပါလၢအဂ့ၤ
လံာ်စီဆှံ တဲဝဲလၢ– ပ “ကဘၣ်သးအိၣ် ဒိကနၣ်တၢ် ဘၣ်ဆၣ် တဘၣ်ကရီတဲတၢ်ဘၣ်.” (ယၤကိာ် ၁:၁၉) ခီၣ်ထံးခါန့ၣ် ကကီလၢ နဖိတဖၣ် ကတဲဖျါထီၣ် အတၢ်တူၢ်ဘၣ်. ဘၣ်ဆၣ် နမ့ၢ်ဒိကနၣ် အဝဲသ့ၣ် လၢတၢ်သးစူၤအပူၤန့ၣ် အဝဲသ့ၣ် တဲဖျါထီၣ် အတၢ်တူၢ်ဘၣ်ကဘူၣ်.
ဃုကျဲလၢ နဖိတဲဖျါထီၣ် အတၢ်တူၢ်ဘၣ် ကဘူၣ်အဂီၢ်. ဖိသၣ်တနီၤ မ့ၢ်ဘၣ်ဆ့ၣ်နီၤ တဲသကိးတၢ်ဒီး အမိအပါ လၢမဲာ်သကိးမဲာ်န့ၣ် အဝဲသ့ၣ် တဲဖျါထီၣ် အတၢ်တူၢ်ဘၣ် တဘူၣ်ဘၣ်. ဘၣ်ဆၣ် အဝဲသ့ၣ် မ့ၢ်ဟးဒိးလိာ်ကွဲကါ မ့တမ့ၢ် ဟးလိာ်ကွဲဒီး အမိအပါန့ၣ် ဘၣ်သ့ၣ်သ့ၣ် အဝဲသ့ၣ် တဲဖျါထီၣ် အတၢ်တူၢ်ဘၣ်ကဘူၣ်.
မၤစၢၤနဖိတဖၣ် ဒ်သိး အဝဲသ့ၣ် တကွၢ်တၢ်ကစီၣ်လၢ ကမၤဘၣ်ဒိ အဝဲသ့ၣ်သးတဂ့ၤ.
ဒ်သိး နဟံၣ်ဖိဃီဖိ ကအိၣ်ဘၣ် ပူၤပူၤဖျဲးဖျဲးအဂီၢ် နဘၣ်မၤဒ်လဲၣ်န့ၣ် တဲဘၣ်နဖိ.
အိၣ်ကတဲာ်ကတီၤ ဒီးကၠီးလိပာ်စၢၤသးဒီးနဖိ ဘၣ်ဃးဒီး တၢ်ကကဲထီၣ်သး သတူၢ်ကလာ် လၢခါဆူညါအဂီၢ်.
ဘဲသနံး တဲဝဲလၢ “တဲသကိးတၢ်ဒီးနဖိ ဒီးပျဲလၢ အဝဲသ့ၣ် ကတဲဖျါထီၣ် အတၢ်တူၢ်ဘၣ်. ဘၣ်သ့ၣ်သ့ၣ် နဖိတဘၣ်သး တဲဖျါထီၣ် အတၢ်ဘၣ်ယိၣ်, အတၢ်သးအ့န့ ဒီးအတၢ်ပျံၤတၢ်ဖုးဘၣ်. အဃိ တဲဘၣ်အဝဲသ့ၣ်လၢ နတူၢ်ဘၣ်တၢ်ဒ်သိးဒီး အဝဲသ့ၣ်. ဒီးဖဲနတူၢ်ဘၣ်တၢ် တမံၤမံၤအခါ နသးကမုာ်ထီၣ်အဂီၢ် နမၤဒ်လဲၣ်န့ၣ် တဲဘၣ်အဝဲသ့ၣ် စ့ၢ်ကီး.