ယရံၤဃိဝ့ၢ်ခိၣ်ဒူ အဂ့ၢ်

ယရံၤဃိအဝ့ၢ်ခိၣ်ဒူအံၤ မနုၤမၤလီၤပှီၢ်အီၤလဲၣ်. လီၤဂာ်ဒ်သိး မ့ၢ်ပိၢ်ဘၣ်အီၤန့ၣ်လီၤ. ဘၣ်ဆၣ် ဖဲဆၢကတီၢ်အဝဲန့ၣ် မ့ၢ်ပိၢ်တအိၣ်ဒံးဘၣ်. ကျိဒၣ်လဲာ်တအိၣ်ဘၣ်. တၢ်အံၤန့ၣ် ယဟိဝၤအစိကမီၤ အတၢ်လီၤလးတမံၤလီၤသၢၣ်. မ်ပကွၢ်သကိး ကဲထီၣ်ဝဲဒ်လဲၣ်န့ၣ်တက့ၢ်.

ယဟိဝၤစံးဘၣ်ယိၤၡူဒ်လဲၣ်န့ၣ် ဒိကနၣ်ကွၢ်တက့ၢ်. ‘နၤဒီးနသုးမုၢ်သံၣ်ဘိတဖၣ်န့ၣ် ကဘၣ်ဟးတရံးဝ့ၢ်လီၤ. သုကဘၣ်တရံး တသီန့ၣ်တဝီဒီး ဃုသီန့ၣ်လီၤ. ယိးဃုာ် တၢ်အၢၣ်လီၤအီလီၤအတလါစီဆှံ တက့ၢ်. လၢ တၢ်အၢၣ်လီၤအီလီၤအတလါစီဆှံ အမဲာ်ညါန့ၣ် ပှၤလုၢ်တၢ်အခိၣ်နွံဂၤ ကဘၣ်လဲၤလၢအမဲာ်ညါ ဒီးကဘၣ်အူကွဲၤန့ၣ်လီၤ.

နွံသီတသီန့ၣ် ကဘၣ်တရံးဝ့ၢ် နွံဝီ လီၤ. ကဘၣ်အူသီၣ် ကွဲၤအကလုၢ်ဖးထီ ဒီးပှၤကိးဂၤဒဲး ကဘၣ်ကိးထီၣ်လၢ သုးအတၢ်ကိးသသြီထီၣ်န့ၣ်လီၤ. ထဲန့ၣ်ဒီး ဝ့ၢ်ခိၣ်ဒူကလီၤပှီၢ် တုၤအလီၤပၢၤလၢဟီၣ်ခိၣ်န့ၣ်လီၤ.’

ဒ်ယဟိဝၤစံးဝဲအသိးန့ၣ် ယိၤၡူဒီးပှၤတဖၣ်န့ၣ် မၤဝဲသ့ၣ်လီၤ. ဖဲအဝဲသ့ၣ် ဟးတရံးဝ့ၢ်အခါ ပှၤကိးဂၤဒဲးအိၣ်ဘှ့ၣ်ကလာ်န့ၣ်လီၤ. ပှၤတကတိၤတၢ်နီတဂၤဘၣ်. နၢ်ဟူဘၣ်ထဲ ကွဲၤအကလုၢ်ဒီး ပှၤဟးသီၣ်အကလုၢ်န့ၣ်လီၤ. လၢဝ့ၢ်ယရံၤဃိအပူၤတခီ ယွၤအပှၤဂီၢ်မုၢ်အဒုၣ်အဒါတဖၣ် ကပျံၤဝဲသ့ၣ်တၢ်လီၤ. နထံၣ်ပျံၤဖါဂီၤ ဘျးလီၤအသးလၢ ပဲတြီတပူၤန့ၣ်ဧါ. မတၤအပဲတြီလဲၣ်. မ့ၢ်လီၤ, ရၤဃးမၤဝဲဒၣ်ဒ်သိး ပှၤကွၢ်ခူသူၣ်တၢ်ခံဂၤ မၤလိာ်ပာ်အီၤအသိးန့ၣ်လီၤ. အဝဲဒၣ်အပှၤဟံၣ်ဖိဃီဖိတဖၣ်စ့ၢ်ကီး အိၣ်ဒီးအီၤလၢဟံၣ်ပူၤ ဒီးခိးကွၢ်တၢ်န့ၣ်လီၤ.

တုၤအထီၣ်ဘးနွံသီဒီး ဖဲတရံးဝဲသ့ၣ်ဝ့ၢ်နွံဝီဝံၤအလီၢ်ခံ ဖဲအအူကွဲၤအခါ ကိးထီၣ်ဝဲဒၣ်လၢ သုးအတၢ်ကိးသသြီထီၣ်န့ၣ်လီၤ. ထဲန့ၣ်ဒီး ဝ့ၢ်ခိၣ်ဒူတဖၣ်လီၤပှီၢ်ဝဲဒၣ်လီၤ. ယိၤၡူစံးဝဲဒၣ်လၢ ‘မၤသံ ကယဲၢ်ပှၤလၢ အအိၣ်လၢဝ့ၢ်ပူၤ ခဲလၢာ်န့ၣ် တက့ၢ်. ဒွဲၣ်ထီၣ်ကွံာ်ဝ့ၢ်လၢမ့ၣ်အူတက့ၢ်. ဒွဲၣ်အူကွံာ်တၢ်ခဲလၢာ် ဒီးပာ်တ့ၢ်တၢ်နီတမံၤတဂ့ၤ. ဟံးန့ၢ် စ့, ထူ, တိၢ်ဘီ ဒီးထးတဖၣ်ဒီး ဒၢနုာ်အီၤဆူ ယဟိဝၤအဒဲ အတၢ်ပာ်ဖှိၣ်ကျိၣ်စ့အလီၢ်ပူၤန့ၣ်တက့ၢ်.’

ယိၤၡူစံးဘၣ် ပှၤကွၢ်ခူသူၣ်တၢ်ခံဂၤလၢ, ‘လဲၤဆူရၤဃးအဟံၣ်, ဟဲက့ၤကိးထုးထီၣ် ရၤဃး ဒီးအပှၤဟံၣ်ဖိဃီဖိတဖၣ် တက့ၢ်’ န့ၣ်လီၤ. ရၤဃးဒီးအပှၤဟံၣ်ဖိဃီဖိတဖၣ် အသးသမူပူၤဖျဲးဝဲသ့ၣ် ဒ်ပှၤကွၢ်ခူသူၣ်တၢ်တဖၣ် အၢၣ်လီၤအီလီၤအီၤအသိးန့ၣ်လီၤ.