ဒၤဝံးဘၣ် တၢ်ဒုးကဲထီၣ်စီၤပၤ အဂ့ၢ်

စီလူးန့ၣ် ဂုာ်ကျဲးစၢးကဒီးဝဲဒ်သိး ကဖီၣ်န့ၢ်ဒၤဝံးန့ၣ်လီၤ. ဃုထၢလီၤဆီ သုးဖိ ၃,၀၀၀ ဝံၤ လူၤဃုဝဲဒၤဝံးန့ၣ်လီၤ. တုၤဒၤဝံးသ့ၣ်ညါဝဲဒီး မၢလီၤအပှၤကွၢ်ခူသူၣ်တၢ်တဖၣ် ဒ်သိးကသ့ၣ်ညါ စီလူးဒီးအပှၤတဖၣ် ပာ်လီၤတၢ်မံအလီၢ်လၢမုၢ်နၤအဂီၢ်ဖဲလဲၣ်န့ၣ်လီၤ. ဝံၤဒီး ဒၤဝံးသံကွၢ်အပှၤခံဂၤ, ‘မတၤကလဲၤဒီးယၤဆူ စီလူးအသုးပာ်လီၤတၢ်မံအလီၢ်န့ၣ်လဲၣ်.’

အဘံၡဲၤစံးဝဲ ‘ယကလဲၤ’ လီၤ. အဘံၡဲၤန့ၣ် ဒၤဝံးအဝဲၢ်မုၢ်အဖိခွါလီၤ. စီလူးဒီးအပှၤတဖၣ် မံဘၣ်အသးအခါ ဒၤဝံးဒီးအဘံၡဲၤတခီ လဲၤနုာ်လီၤဝဲဆူ သုးတၢ်မံအလီၢ် ကယီကယီန့ၣ်လီၤ. ဒီးစိာ်ထီၣ်ကွံာ်ဝဲ စီလူးအဘီဒီထံဒၢ လၢအအိၣ်လၢစီလူးအခိၣ်ထးကပၤန့ၣ်လီၤ. မ့ၢ်လၢတၢ်မံလီၤဒိးစီလူးဒီးအပှၤခဲလၢာ်အဃိ ပှၤနီတဂၤတထံၣ်, တသ့ၣ်ညါအဝဲသ့ၣ်ဟဲဘၣ်.

ကွၢ်ဒၤဝံး ဒီးအဘံၡဲၤ လၢအဟးထီၣ်ဝဲန့ၣ်တက့ၢ်. ပူၤပူၤဖျဲးဖျဲးဒီးတုၤဝဲသ့ၣ်ဒၣ်လဲာ် လၢကစၢၢ်တဖျၢၣ်အဒီခိၣ်န့ၣ်လံ. ဒၤဝံးကိးသသြီထီၣ်ဆူ အံၣ်စရ့လးအသုးခိၣ်ဒိၣ်အဘံန့ၢ်လၢ, ‘အဘံန့ၢ်ဧၢ, ဘၣ်မနုၤလၢနတခိး နကစၢ်စီၤပၤအသးသမူန့ၣ်လဲၣ်. နသါကွၢ်တဘီ, စီၤပၤအဘီဒီးအထံဒၤအိၣ်ဖဲလဲၣ်.’ န့ၣ်လီၤ.

စီလူးဖုးသံနီၣ်ဝဲ, တိၢ်နီၢ်ဝဲ ဒၤဝံးအကလုၢ်ဘၣ်ဒီးသံကွၢ်ဝဲ ‘ဒၤဝံး, တၢ်န့ၣ်မ့ၢ်နကလုၢ်ဧါ.’ န့ၣ်လီၤ. သုထံၣ်ဘၣ် စီလူးဒီးအဘံန့ၢ်လၢလာ်ခီန့ၣ်ဧါ.

ဒၤဝံးစံးဆၢစီလူး ‘မ့ၢ်လီၤယကစၢ်စီၤပၤဧၢ.’ ဝံၤဒီး သံကွၢ်ဝဲ ‘ဘၣ်မနုၤနဘၣ် ဂုာ်ကျဲးစၢးလူၤဖီၣ်ယၤန့ၣ်လဲၣ်. ယမၤတၢ်တဂ့ၤမနုၤလဲၣ်. ကစၢ်ဧၢ. လၢအံၤ နဘီ. မၢလီၤနပှၤတဂၤ လၢကဟဲဟံးက့ၤနဘီတက့ၢ်.’

စီလူးအၢၣ်လီၤဝဲဒီးစံးဝဲဒၣ်လၢ ‘ယကမၣ်လံး, ယမၤဘၣ်တ့ၢ်တၢ် အၢအၢသီသီန့ၣ်လံလီၤ.’ ဒၤဝံးလဲၤ ကျဲလၢအကဘၣ်လဲၤဝဲန့ၣ်လီၤ. စီလူးစ့ၢ်ကီး ဟဲက့ၤကဒါက့ၤဆူ အနီပူၤလီၤ. ဘၣ်ဆၣ် ဒၤဝံးဆိကမိၣ်ဝဲလၢ ‘စီလူးကမၤသံယၤ တနံၤနံၤလီၤ. ယမ့ၢ်ဃ့ၢ်ဆူ ပှၤဖလ့ၡသးဖိအကီၢ်တခီ ကဂ့ၤဝဲလီၤ’ န့ၣ်လီၤ. တုၤနုၤတစု, ဃ့ၢ်ဝဲဆူ ကီၢ်ဖလ့ၡသးန့ၣ်လီၤ. ဖဲန့ၣ် ဒၤဝံးလွဲန့ၢ်ပှၤဖလ့ၡသးဖိလၢ ကဆိကမိၣ်အဝဲကဲထီၣ်အဝဲသ့ၣ်အပှၤလံန့ၣ်လီၤ.

တၢ်န့ၣ်ဝံၤအလီၢ်ခံ ဘၣ်မုၢ်တနံၤန့ၣ် ပှၤဖလ့ၡသးဖိတဖၣ် လဲၤထီၣ်ဒုးပှၤအံၣ်စရ့လးဖိတဖၣ်န့ၣ်လီၤ. စီလူးဒီးယိၤနၤသၣ်ခံဂၤလၢာ် ဘၣ်တၢ်မၤသံအီၤလၢ တၢ်ဒုးပူၤန့ၣ်လီၤ. ဒၤဝံးအသးအုးဒိၣ်ဒိၣ်ကလဲာ်န့ၣ်လီၤ. တုၤနုၤတစု, ဒၤဝံးကွဲးဝဲ ထါဃံလၤတယုၢ်န့ၣ်လီၤ. လၢတၢ်သးဝံၣ်အပူၤ ဒၤဝံးစံး, ‘ဝဲၢ်ယိၤနၤသၣ်ဧၢ လၢဝဲၢ်အဃိ ဒ့ဖိဘၣ်သူၣ်ကိၢ်သးဂီၤဝဲလံဘီၣ်. ဒ့ဖိအဲၣ်ဘၣ်ဝဲၢ်ဒိၣ်မးန့ၣ်လီၤ.’

လၢတၢ်န့ၣ်အလီၢ်ခံ ဒၤဝံးက့ၤကဒါက့ၤဆူ ပှၤအံၣ်စရ့လးဖိ အတၢ်အိၣ်တၢ်ဆိးအလီၢ် ဝ့ၢ်ဃ့ဘြိၣ်န့ၣ်လီၤ. ပှၤတနီၤလၢအသးအိၣ် ပာ်ထီၣ်စီၤပၤလၢ စီလူးအဖိခွါ အံၤၡဘိၡ့းဒီး ပှၤတနီၤသးအိၣ်လၢကပာ်ထီၣ် ဒၤဝံးလၢစီၤပၤဒီး ပှၤခံဖုဒုးလိာ်အသးန့ၣ်လီၤ. ဘၣ်ဆၣ် လၢခံကတၢၢ်န့ၣ် ဒၤဝံးအပှၤတဖၣ် မၤနၢၤတၢ်န့ၣ်လီၤ. ဖဲဒၤဝံးကဲထီၣ်စီၤပၤအခါ အသးအိၣ်အနံၣ် ၃၀ လီၤ. ပၢတၢ်လၢဃ့ဘြိၣ်ယံာ် နွံနံၣ်ဃုလါန့ၣ်လီၤ. ဖိခွါတဖၣ်လၢ မၤန့ၢ်ဝဲဒၣ်ဖဲန့ၣ်တဖၣ်တနီၤ အမံၤမ့ၢ်ဝဲ အၤမနိၣ်, အးဘၡါလိၣ် ဒီးအဒိနံၤယၤ န့ၣ်လီၤ.

တၢ်ဆၢကတီၢ်ဟဲတုၤဝဲလၢ ဒၤဝံးဒီးအပှၤတဖၣ် ကလဲၤဒုးန့ၢ် ဝ့ၢ်ဃံလၤယရူၤၡလ့ၣ်လီၤ. ဒၤဝံးအဝဲၢ်မုၢ်စရူယၤ အဖိခွါလၢခံတဂၤ ယိၤအာ် ကဲပှၤအခိၣ်အနၢ်ဒီးဘၣ်ဒုးတၢ်လီၤ. လၢတၢ်န့ၣ်အဃိ ဒၤဝံးမၤလၤကပီၤအီၤလၢ ဟ့ၣ်အီၤသုးခိၣ်ကျၢၢ်အလီၢ်အလၤန့ၣ်လီၤ. ခဲအံၤ ဒၤဝံးန့ၣ်စးထီၣ်ပၢတၢ်လၢ ဝ့ၢ်ယရူၤၡလ့ၣ်န့ၣ်လီၤ.