နီၢ်ပၤမုၣ်လၢအအၢသီ အံၤစ့ဘ့ၤလး အဂ့ၢ်

စီၤပၤယၤရၤဘၣ်သံဝံၤအလီၢ်ခံ စီၤပၤလၢအပၢ အံၣ်စရ့လးဖိအဒူၣ် ၁၀ ကိးဂၤဒဲးန့ၣ် အၢခဲလၢာ်လီၤ. စီၤပၤအၤဃာ်န့ၣ်အအၢကတၢၢ်လီၤ. ဘၣ်မနုၤအဃိလဲၣ် နသ့ၣ်ညါဧါ. အဂ့ၢ်မိၢ်ပှၢ်တံၢ်နီၢ်တခါန့ၣ် မ့ၢ်အနီၢ်ပၤမုၣ်အံၤစ့ဘ့ၤလးလၢ အအၢဒိၣ်အဃိန့ၣ်လီၤ.

အံၤစ့ဘ့ၤလးန့ၣ် တမ့ၢ်အံၣ်စရ့လးမုၣ်တဂၤဘၣ်. မ့ၢ်စံဒိၣ်စီၤပၤအဖိမုၣ်လီၤ. အဝဲ ဘူၣ်ထီၣ်ဘါထီၣ် ယွၤလၢအကမၣ် ဘၤလးန့ၣ်လီၤ. မၤဝဲဒၣ်လၢ အၤဃာ်ဒီးပှၤအံၣ်စရ့လးဖိအါအါကလဲာ် ကဘူၣ်ထီၣ်ဘါထီၣ်ဘၤလးစ့ၢ်ကီးန့ၣ်လီၤ. အံၤစ့ဘ့ၤလးန့ၣ် သးဟ့ယဟိဝၤလီၤ. မၤသံဝဲ ယဟိဝၤအဝံတဖၣ် အါအါကလဲာ်န့ၣ်လီၤ. ဝံတနီၤန့ၣ် ဒ်သိးတဘၣ်တၢ်မၤသံအီၤအဂီၢ် ဘၣ်အိၣ်ခူသူၣ်ဝဲသ့ၣ်လၢ လ့ကအိတဖၣ်အပူၤန့ၣ်လီၤ. အံၤစ့ဘ့ၤလးန့ၣ် မ့သးလီဝဲတၢ်တမံၤမံၤန့ၣ် မ့ၢ်ဘၣ်မၤသံဝဲပှၤအသးသမူဒၣ်လဲာ် မၤသံဝဲဒီး ဟံးန့ၢ်ဝဲတုၤအန့ၢ်လီၤ.

ဘၣ်မုၢ်တနံၤ, စီၤပၤအၤဃာ်န့ၣ် အသူၣ်တမုာ်သးတမုာ်ဝဲ ဒိၣ်မးန့ၣ်လီၤ. တုၤနုၤတစု အံၤစ့ဘ့ၤလးသံကွၢ်အီၤ ‘ယကစၢ်စီၤပၤဧၢ ဘၣ်မနုၤအဃိနသူၣ်တမုာ်သးတမုာ်န့ၣ်လဲၣ်.’ န့ၣ်လီၤ.

အၤဃာ်စံးဆၢ ‘နီၢ်ပၤမုၣ်ဧၢ, မ့ၢ်တၢ်ကတိၤလၢ နၤဘိးစံးဘၣ်ယၤအဃိန့ၣ်လီၤ. ယအဲၣ်ဒိးပှ့ၤအစပံးအတၤသၣ်လီၢ်သနာ်က့ စံးဝဲဒၣ်လၢသါဆါတကဲဘၣ်လီၤ.’

အံၤစ့ဘ့ၤလးစံးအီၤ, ‘ဘၣ်ကိၢ်တဂ့ၤ ယကစၢ်စီၤပၤဧၢ. ယကမၤန့ၢ်နၤ တုၤအန့ၢ်လီၤ.’

တုၤနုၤတစု, အံၤစ့ဘ့ၤလးကွဲးလီၤလံာ်ဆူ ဝ့ၢ်လၢနၤဘိးအိၣ် ဝ့ၢ်အပှၤသူၣ်က့သးပှၢ်တနီၤအအိၣ်, စံးဝဲဒၣ်, ‘မၢပှၤဟးဂီၤဖိတဖၣ် ကအုၣ်အသးလၢ နၤဘိးန့ၣ် ဆိၣ်အၢကစၢ်ယွၤဒီးစီၤပၤ, ဝံၤဒီး ထုးထီၣ်အီၤဆူဝ့ၢ်ချၢ, ဒီးကွံာ်အီၤလၢလၢၢ် တုၤအသံန့ၣ်တက့ၢ်’ န့ၣ်လီၤ.

တုၤအနၢ်ဟူဝဲနၤဘိးသံန့ၣ် စံးဝဲအၤဃာ်လၢ ‘လဲၤဒီးမၤန့ၢ် စပံးအတၤသၣ်လီၢ်န့ၣ်တက့ၢ်, ယကစၢ်စီၤပၤဧၢ’ န့ၣ်လီၤ. လၢအံၤစ့ဘ့ၤလးမၤတၢ်မၤ အၢအၢသီသီဒ်အံၤအဃိ တကြၢးတၢ်စံၣ်ညီၣ်ဘၣ်အီၤန့ၣ်ဘၣ်ဧါ.

လၢတၢ်န့ၣ်အဃိ, တုၤအဆၢကတီၢ်တုၤဝဲအခါ ယဟိဝၤမၢလီၤဝဲ ပှၤလၢအမံၤမ့ၢ်ယ့ၤဟူ ဒ်သိးကစံၣ်ညီၣ်ကွံာ်အီၤန့ၣ်လီၤ. ဖဲအံၤစ့ဘ့ၤလးနၢ်ဟူ ယ့ၤဟူဟဲဝဲအခါ မၤဃံမၤလၤထီၣ်အမဲာ်ချံ ဒီးကယၢကယဲအသးလၢ ကဖျါဃံဖျါလၤအဂီၢ်န့ၣ်လီၤ. ဘၣ်ဆၣ်သနာ်က့ ဖဲယ့ၤဟူဟဲတုၤဝဲအခါ ထံၣ်စိအံၤစ့ဘ့ၤလးလၢပဲတြီအကပၤန့ၣ်ဒီး ကိးထီၣ်ဝဲဒီးစံးဝဲပိာ်ခွါတနီၤ လၢအအိၣ်လၢနီပူၤ ‘တ့ၢ်လီၤကွံာ်အီၤ’ န့ၣ်လီၤ. ပှၤတဖၣ်န့ၣ်စ့ၢ်ကီး တ့ၢ်လီၤကွံာ်အီၤ ဒ်သုထံၣ်လၢတၢ်ဂီၤပူၤအသိးန့ၣ်လီၤသၢၣ်. ဒီးအံၤစ့ဘ့ၤလးသံလီၤ. တၢ်အံၤမ့ၢ် နီၢ်ပၤမုၣ်အအၢအသီအံၤစ့ဘ့ၤလး အကျဲအကတၢၢ်န့ၣ်လီၤ.