ကစၢ်ယွၤမၤစၢၤစီၤပၤဃံးစကံယၤ အဂ့ၢ်

ပှၤအံၤ ဘၣ်မနုၤအဃိ ဃ့ထီၣ်တၢ်လၢယဟိဝၤအအိၣ်န့ၣ်လဲၣ် နသ့ၣ်ညါဧါ. ဘၣ်မနုၤအဃိ အဝဲဒၣ်သလၣ်ထီၣ် လံာ်တဖၣ်အံၤလၢ တၢ်လုၢ်လီၤအမဲာ်ညါန့ၣ်လဲၣ်. ပှၤအံၤ အမံၤမ့ၢ် ဃံးစကံယၤန့ၣ်လီၤ. အဝဲမ့ၢ် အံၣ်စရ့လးကီၢ်ကလံၤထံးခံဒူၣ် အစီၤပၤန့ၣ်လီၤ. အဝဲဘၣ်ကွၢ်ဆၢၣ်မဲာ်လိာ်အသးဒီး တၢ်ကီတၢ်ခဲဖးဒိၣ်လီၤ. ဘၣ်မနုၤအဃိလဲၣ်.

ကီၢ်ကလံၤစိးအဒူၣ် ၁၀ ဘၣ်တၢ်မၤဟးဂီၤကွံာ်လၢ အၤၡူၢ်အသုးမုၢ်တဖၣ်လံအဃိန့ၣ်လီၤ. ပှၤတဖၣ်အံၤအၢဒိၣ်မးအဃိ ယဟိဝၤဟ့ၣ်အခွဲးလၢ တၢ်ကမၤအသးဒ်န့ၣ်လီၤ. မ့မ့ၢ်ခဲအံၤန့ၣ် အၤၡူၢ်အသုးမုၢ်တဖၣ် ဟဲလၢကဒုး ဒူၣ်ခံဒူၣ်အကီၢ်န့ၣ်လံ.

အၤၡူၢ်အစီၤပၤ ကွဲးလီၤလံာ်တဖၣ်ဆူစီၤပၤ ဃံးစကံယၤအအိၣ်အခဲအံၤန့ၣ်လီၤ. မ့ၢ်ဝဲဒၣ်လံာ်တဖၣ်လၢ စီၤပၤဃံးစကံယၤ သလၣ်ထီၣ်လၢ ကစၢ်ယွၤအမဲာ်ညါန့ၣ်လီၤသၢၣ်. လၢလံာ်ပူၤန့ၣ် ကွဲးဒုၣ်ဒွဲၣ်ဃာ်ဝဲကစၢ်ယွၤဒီး မၢဃံးစကံယၤလၢ ကပာ်လီၤစုကဝဲၤ, ကဟ့ၣ်လီၤအသးန့ၣ်လီၤ. လၢတၢ်န့ၣ်အဃိ ဃံးစကံယၤန့ၣ် ဃ့ဘါထုကဖၣ်တၢ် စံးဝဲ, ‘အိယဟိဝၤယွၤဧၢ, အုၣ်က့ၤခီၣ်က့ၤ ပဝဲသ့ၣ်လၢ အၤၡူၢ်စီၤပၤအစုပူၤတက့ၢ်. နမ့ၢ်မၤဒ်အံၤသၢပျၢၤ, ပှၤကလုာ်ခဲလၢာ် ကသ့ၣ်ညါလၢ ထဲနၤတဂၤဧိၤ နမ့ၢ်ကစၢ်ယွၤန့ၣ်လီၤ.’ ဃံးစကံယၤဃ့ဘါထုကဖၣ်တၢ်န့ၣ် ယဟိဝၤကဒိကနၣ်ဝဲဧါ.

ဃံးစကံယၤမ့ၢ် စီၤပၤလၢအဂ့ၤတဂၤလီၤ. တလီၤဂာ်ဒီး အံၣ်စရ့လးအဒူၣ် ၁၀ အကီၢ် အစီၤပၤအအၢတဖၣ်န့ၣ်ဘၣ်. တမ့ၢ်ဝဲဒ်သိးအပၢ်အၤဃး စီၤပၤဖးဒိၣ်လၢအအၢ စ့ၢ်ကီးန့ၣ်ဘၣ်. ဃံးစကံယၤတိၢ်န့ၢ် ယဟိဝၤအတၢ်သိၣ်တၢ်သီခဲလၢာ် လီၤတံၢ်လီၤဆဲးန့ၣ်လီၤ. လၢတၢ်န့ၣ်အဃိ ဃံးစကံယၤဃ့ဘါထုကဖၣ်ဝံၤဒီး ဝံယၡါယၤဆှၢလီၤန့ၢ်အီၤတၢ်ကစီၣ် လၢအဟဲလၢ ယဟိဝၤအအိၣ်န့ၣ်လီၤ. တၢ်ကစီၣ်စံးဝဲ, ‘အၤၡူၢ်အစီၤပၤ တမ့ၢ်အကဟဲဆူ ယရူၤၡလ့ၣ်ဘၣ်. အသုးဖိတဂၤဒၣ်လဲာ် တမ့ၢ်လၢအကဟဲဘူးဝ့ၢ်အကပၤဘၣ်. တမ့ၢ်လၢကခးဝဲ ပျၢ်တဘိဒၣ်လဲာ်ဆူဝ့ၢ်အအိၣ်ဘၣ်’ န့ၣ်လီၤ.

ကွၢ်တၢ်ဂီၤလၢ လံာ်ကဘျံးပၤအဂၤတခါအပူၤန့ၣ်တက့ၢ်. သုးဖိလၢအသံခဲလၢာ် မ့ၢ်မတၤတဖၣ်လဲၣ် နသ့ၣ်ညါဧါ. မ့ၢ်ပှၤအၤၡူၢ်သုးဖိသ့ၣ်တဖၣ်န့ၣ်လီၤသၢၣ်. ယဟိဝၤမၢလီၤအမူခိၣ်ကလူးဒီး လၢတနၤဃီအတီၢ်ပူၤန့ၣ် ကလူးမၤသံ အၤၡူၢ်အသုးဖိ ၁၈၅,၀၀၀ ဂၤန့ၣ်လီၤ. မၤသးဒ်န့ၣ်ဒီး အၤၡူၢ်အစီၤပၤၡူဝံၤ ဃ့ၢ်ကဒါက့ၤဆူအကီၢ်န့ၣ်လီၤ.

လၢတၢ်န့ၣ်အဃိ ကီၢ်ခံကီၢ်အဒူၣ် ပူၤဖျဲးဝဲဒၣ်န့ၣ်လီၤ. ထံဖိကီၢ်ဖိသ့ၣ်တဖၣ်စ့ၢ်ကီး အိၣ်မုာ်အိၣ်ခုၣ်ဘၣ်ဝဲသ့ၣ် တစိၢ်တလီၢ်ကဒီးန့ၣ်လီၤ. ဘၣ်ဆၣ်သနာ်က့ ဃံးစကံယၤသံဝံၤအလီၢ်ခံ အဖိခွါမနၤၡ့ၤ ကဲစီၤပၤန့ၣ်လီၤ. မနၤၡ့ၤဒီးစီၤပၤထီၣ်လၢအလီၢ်ခံ အၤမိၣ်စ့ၢ်ကီး မ့ၢ်စီၤပၤအအၢအသီတဖၣ်န့ၣ်လီၤ. လၢတၢ်န့ၣ်အဃိ ထံကီၢ်န့ၣ် ပှဲၤမးဒီးတၢ်မၤဆူၣ်မၤစိး, ဒီးတၢ်လုၢ်သ့ၣ်ခါပတာ် ထံကီၢ်အတၢ်သိၣ်တၢ်သီန့ၣ်လီၤ. အၤမိၣ်န့ၣ် အကုၢ်ဒၣ်ဝဲ မၤသံက့ၤအီၤဝံၤအလီၢ်ခံ အဖိခွါယိၤၡံယၤကဲထီၣ် ကီၢ်ခံကီၢ်အဒူၣ်အစီၤပၤန့ၣ်လီၤ.