တၢ်မၤလိ ၁
ကစၢ်ယွၤကွဲနၤလၢနကကဲထီၣ်အတံၤသကိး
ကစၢ်ယွၤအဲၣ်ဒိးလၢ နကကဲထီၣ်အတံၤသကိးလီၤ. မ့ၢ်နဆိကမိၣ်ကွၢ် နကဲထီၣ်နဲဒၣ်တံၤသကိးဒီး ကစၢ်အဒိၣ်အထီကတၢၢ်လၢမူဒီဖျၢၣ်သ့ တဘျီဘျီဧါ? စီၤအၤဘြၤဟၣ်လၢ အအိၣ်မူတ့ၢ်ဝဲလၢပျၢၤန့ၣ် ဘၣ်တၢ်ကိးအီၤလၢ ယွၤအတံၤသကိးန့ၣ်လီၤ. (ယၤကိာ် ၂:၂၃) လံာ်စီဆှံပာ်ဖျါထီၣ်လၢ ပှၤအဂၤတဖၣ်စ့ၢ်ကီး ကဲတ့ၢ်ဝဲယွၤအတံၤသကိးဒီး ဒိးန့ၢ်ဘၣ်တၢ်ဆိၣ်ဂ့ၤအါမးန့ၣ်လီၤ. မုၢ်မဆါတနံၤအံၤ လၢဟီၣ်ခိၣ်ဒီဘ့ၣ်အတၢ်လီၢ်ကိးပူၤဒဲးန့ၣ် ပှၤအါဒ်အါဂၤဟဲကဲထီၣ် ယွၤအတံၤသကိးလံန့ၣ်လီၤ. နဲဒၣ်စ့ၢ်ကီး နဟဲကဲထီၣ်ယွၤအတံၤသကိးသ့န့ၣ်လီၤ.
တၢ်ကဲထီၣ်ယွၤအတံၤသကိးန့ၣ် ဂ့ၢ်န့ၢ်တၢ်ကဲထီၣ် ပှၤတဂၤဂၤအတံၤသကိးန့ၣ်လီၤ. ယွၤတမၤဟးဂီၤ အတံၤသကိးလၢအသးတီဒီးအီၤတဖၣ်အသးနီတဘျီဘၣ်. (စံးထီၣ်ပတြၢၤ ၁၈:၂၅, ခ့ခါစှီၤကျိာ်) တၢ်ကဲထီၣ်ယွၤအတံၤသကိးန့ၣ် ဂ့ၤန့ၢ်ဒံး တၢ်အိၣ်ဒီးတၢ်ထူးတၢ်တီၤန့ၣ်လီၤ. ဖဲပှၤထူးပှၤတီၤတဂၤသံဝဲအခါ ပှၤဂၤမၤန့ၢ်အစ့န့ၣ်လီၤ. ဘၣ်ဆၣ်, ပှၤလၢအမ့ၢ်ယွၤအတံၤသကိးတဖၣ်န့ၣ် အိၣ်ဒီးတၢ်ထူးတၢ်တီၤလၢ ပှၤနီတဂၤဟံးန့ၢ်ဝဲ တန့ၢ်ဘၣ်န့ၣ်လီၤ.—မးသဲ ၆:၁၉.
ပှၤတနီၤနီၤ ကဂုာ်ကျဲးစၢးတြီနၤလၢ နသုတမၤလိယွၤအဂ့ၢ်လၢၤဘၣ်န့ၣ်လီၤ. နတံၤသကိးဒီး နပှၤဟံၣ်ဖိတနီၤဒၣ်လဲာ် ကမၤဝဲဒ်န့ၣ်လီၤ. (မးသဲ ၁၀:၃၆, ၃၇) ပှၤအဂၤတဖၣ်မ့ၢ်ဒုၣ်ဒွဲၣ်နၤ, မ့တမ့ၢ်, မ့ၢ်ကတိၤပျံၤကတိၤဖုးနၤသၢပျၢၤ သံကွၢ်လီၤက့ၤနသးလၢ, ‘မ့ၢ်ယသးအိၣ်မၤန့ၣ် ပှၤကညီအတၢ်ဘၣ်သးဧါ? ယွၤအတၢ်ဘၣ်သးဧါ?’ န့ၣ်လီၤ. ကွၢ်ဆိကမိၣ်တၢ်ဂ့ၢ်အံၤတက့ၢ်. ပှၤတဂၤဂၤ မ့ၢ်တြီနၤလၢနတဘၣ်အီၣ်မ့ၤသၢပျၢၤ နကဒိကနၣ်အတၢ်ကတိၤဧါ? နတဒိကနၣ်လ့ၤတက့ၤဘၣ်. လၢပကမူအဂီၢ် လိၣ်ဘၣ်တၢ်အီၣ်လီၤ. ဘၣ်ဆၣ်, ကစၢ်ယွၤမၤတၢ်သ့လၢ နကအိၣ်မူဘၣ်လီၤထူလီၤယိာ်အဂီၢ်န့ၣ်လီၤ. လၢတၢ်န့ၣ်အဃိ, နသုတဟ့ၣ်အခွဲးပှၤနီတဂၤလၢ အကတြီနမၤလိတၢ်လၢ နကဲထီၣ် ယွၤအတံၤသကိးသ့ဒ်လဲၣ်အဂ့ၢ်န့ၣ်တဂ့ၤ.—ယိၤဟၣ် ၁၇:၃.