မတၤတဖၣ်မ့ၢ်ယွၤအဒုၣ်အဒါလဲၣ်?

အဒုၣ်အဒါအခိၣ်ကျၢၢ် မ့ၢ်စၤတၣ်မုၣ်ကီၤလံၢ်လီၤ. အဝဲမ့ၢ်ပှၤနီၢ်သးဖိတဂၤ လၢအထီဒါပူထီၣ်ယဟိဝၤန့ၣ်လီၤ. စၤတၣ်အံၤ ထီဒါယွၤဒီး မၤနးမၤဖှီၣ်ပှၤဟီၣ်ခိၣ်ဖိ နးနးကလဲာ်လီၤ. မုၣ်ကီၤလံၢ်န့ၣ်​ မ့ၢ်ပှၤအၢဒိၣ်တုာ်တဂၤလီၤ. အဝဲမ့ၢ်ပှၤလၢအလီတၢ်ဒီး လၢအမၤသံပှၤကညီတဂၤလီၤ.​—ယိၤဟၣ်​ ၈:၄၄.

ပှၤနီၣ်သးဖိအဂၤတဖၣ်​ ထီဒါပူထီၣ်ယွၤသကိးဒီးမုၣ်ကီၤလံၢ်န့ၣ်လီၤ. လံာ်စီဆှံကိးအဝဲသ့ၣ်လၢတၢ်နါတဖၣ်လီၤ. တၢ်နါတဖၣ်န့ၣ်​ မ့ၢ်ပှၤကညီအဒုၣ်အဒါ ဒ်မုၣ်ကီၤလံၢ်အသိးန့ၣ်လီၤ. အဝဲသ့ၣ်န့ၣ်​ အသးအိၣ်လၢ ကမၤဘၣ်ဒိဆါပှၤကညီလီၤ. (မးသဲ ၉:​၃၂, ၃၃; ၁၂:၂၂) ယဟိဝၤန့ၣ်​ ကမၤဟးဂီၤကွံာ် စၤတၣ်ဒီးအတၢ်နါတဖၣ်​ လီၤထူလီၤယိာ်န့ၣ်လီၤ. အဝဲသ့ၣ်အတၢ်ဆၢကတီၢ်လၢ ကမၤနးမၤဖှီၣ်ပှၤကညီအဂီၢ် အိၣ်တ့ၢ်ဒၣ်တစိၢ်ဖိန့ၣ်လီၤ.​—လီၣ်ဖျါ ၁၂:၁၂.

နမ့ၢ်အဲၣ်ဒိးကဲထီၣ်​ ယွၤအတံၤသကိးန့ၣ်​ နတဘၣ်မၤတၢ်လၢ မုၣ်ကီၤလံၢ်အဲၣ်ဒိးနမၤဘၣ်. မုၢ်ကီၤလံၢ်ဒီးတၢ်နါတဖၣ်န့ၣ်​ သးဟ့ဝဲသ့ၣ်ယဟိဝၤယွၤလီၤ. အဝဲသ့ၣ်န့ၣ်​ မ့ၢ်ယွၤအဒုၣ်အဒါတဖၣ်ဒီး အဲၣ်ဒိးဝဲသ့ၣ်လၢ နၤစ့ၢ်ကီး နကကဲထီၣ်ယွၤအဒုၣ်အဒါလီၤ. နအဲၣ်ဒိးမၤ ဘၣ်သူၣ်ဘၣ်သးမုၣ်ကီၤလံၢ်ဧါ? ယဟိဝၤဧါ?​—နကဘၣ်ဃုထၢနဲန့ၣ်လီၤ. နမ့ၢ်သးလီတၢ်မူအထူအယိာ်န့ၢ် နကဘၣ်ဃုထၢလၢ နကမၤတၢ်ဘၣ်ယဟိဝၤအသးလီၤ. စၤတၣ်အိၣ်ဒီးအတၢ်ကဘျံးကဘျၣ်​ ဒီးအကျဲအကပူၤအါမး လၢကလီန့ၢ်ပှၤအဂီၢ်န့ၣ်လီၤ. ပှၤအါတက့ၢ် တူၢ်ဘၣ်အတၢ်လီတၢ်ဝ့ၤလံန့ၣ်လီၤ.​—လီၣ်ဖျါ ၁၂:၉.