ပလံာ်လဲၢ်တဖၣ်န့ၣ် ဘၣ်တၢ်ကွဲးအီၤဒီး ကွဲးကျိာ်ထံအီၤဒ်လဲၣ်

ဒ်သိးပကစံၣ်တဲၤတဲလီၤ “တၢ်သးခုကစီၣ်” ဆူ “ကယဲၢ်ပှၤကလုာ်ဒီး ပှၤအဒူၣ်ဒီး ပှၤကတိၤတၢ်အကျိာ်, ဒီးပှၤဂီၢ်မုၢ်ခဲလၢာ်” အအိၣ်ကသ့အဂီၢ် ပထုးထီၣ်လံာ်လဲၢ်တဖၣ်လၢ ကျိာ် ၇၅၀ ဘျဲၣ်န့ၣ်လီၤ. (လီၣ်ဖျါ ၁၄:၆) တၢ်မၤလၢအဒိၣ်အမုၢ်အံၤ ပမၤကဲထီၣ်အီၤလၢကျဲဒ်လဲၣ်. ပအိၣ်ဒီးပှၤကွဲးလံာ်ဖိဒီး ပှၤကွဲးကျိာ်ထံတၢ်တဖၣ် ဒီးအဝဲသ့ၣ်ခဲလၢာ်န့ၣ်မ့ၢ် ယဟိဝၤပှၤအုၣ်အသးလီၤ.

လံာ်လဲၢ်တဖၣ်န့ၣ် ဘၣ်တၢ်ကွဲးအီၤအဆိကတၢၢ်လၢ အဲကလံးကျိာ်လီၤ. ပှၤပၢဆှၢတၢ်ကမံးတံာ်ကွၢ်ထွဲဝဲ တၢ်ကွဲးလံာ်ဝဲၤကျိၤလၢအိၣ်ဖဲ ဝဲၤလီၢ်ခိၣ်သ့ၣ်န့ၣ်လီၤ. ဝဲၤကျိၤအံၤရဲၣ်ကျဲၤမူဒါလၢ ပှၤကွဲးလံာ်ဖိလၢအမၤတၢ်ဖဲ ဝဲၤလီၢ်ခိၣ်သ့ၣ် ဒီးဝဲၤတြၢ်အဂၤတနီၤအဂီၢ်န့ၣ်လီၤ. ခီဖျိလၢပပှၤကွဲးလံာ်ဖိတဖၣ်န့ၣ် ကလုာ်ဒီးတၢ်ဆဲးတၢ်လၤ လီၤဆီလိာ်သးအဃိ ပလံာ်လဲၢ်သ့ၣ်တဖၣ်န့ၣ်အဘျုးအိၣ် လၢပှၤလၢတၢ်ဆဲးတၢ်လၤအကလုာ်ကလုာ် တဖၣ်အဂီၢ်လီၤ.

ပှၤကွဲးလံာ်လဲၢ်သ့ၣ်တဖၣ်အံၤလၢ အဲကလံးကျိာ်ဝံၤဒီး ဘၣ်တၢ်ဆှၢအီၤဆူ ပှၤကွဲးကျိာ်ထံတၢ်တဖၣ်အအိၣ်လီၤ. ပှၤဘှီက့ၤ လံာ်လဲၢ်တဖၣ်ဒီး ပှၤပၢဆှၢတၢ်ကမံးတံာ် တူၢ်လိာ်အီၤမ့ၢ်ဝံၤအလီၢ်ခံ လံာ်တဖၣ်အံၤ ဘၣ်တၢ်ဆှၢအီၤခီဖျိလၢ ခီၣ်ဖၠူထၢၣ်ဆူ ပှၤကွဲးကျိာ်ထံတၢ်တဖၣ် လၢအိၣ်လၢဟီၣ်ခိၣ်ဒီဘ့ၣ်လီၤ. အဝဲသ့ၣ်ကွဲးကျိာ်ထံဝဲဒီး သမံသမိးဝဲဒ်သိး ကလီၤတံၢ်လီၤဆဲးဒီး ပှၤနၢ်ပၢၢ်အီၤကညီအဂီၢ်လီၤ. အဝဲသ့ၣ်ဂုာ်ကျဲးစၢးဃုထၢဝဲ “တၢ်မ့ၢ်တၢ်တီအတၢ်ကတိၤ” လၢအဝဲသ့ၣ်အကျိာ် လၢအခီပညီကလီၤပလိာ်ဒီး လံာ်လဲၢ်လၢဘၣ်တၢ်ကွဲးအီၤအဆိကတၢၢ်လၢ အဲကလံးကျိာ်န့ၣ်လီၤ. —စံၣ်တဲၤတဲလီၤ ၁၂:၁၀.

ခီၣ်ဖၠူထၢၣ်တဖၣ်န့ၣ် မၤစၢၤဝဲလၢ တၢ်မၤကလဲၤအသးချ့ချ့အဂီၢ်လီၤ. ခီၣ်ဖၠူထၢၣ်န့ၣ် ကွဲးလံာ်ဒီးကွဲးကျိာ်ထံတၢ်ဒ်သိးဒီး ပှၤကညီတသ့ဘၣ်. ဘၣ်ဆၣ်, ခီဖျိပသူခီၣ်ဖၠူထၢၣ် အတၢ်ရဲၣ်တၢ်ကျဲၤ ဃုာ်ဒီးလံာ်ခီယ့ၤလၢအိၣ်လၢ ခီၣ်ဖၠူထၢၣ်အပူၤ, ဒီးတၢ်ဃုသ့ၣ်ညါတၢ်ပီးတၢ်လီ တဖၣ်အဃိပတၢ်မၤလဲၤအသးချ့ချ့လီၤ. ယဟိဝၤပှၤအုၣ်အသးတဖၣ် တ့ထီၣ်ဝဲ (MEPS) အတၢ်ရဲၣ်တၢ်ကျဲၤလီၤ. ခီဖျိခီၣ်ဖၠူထၢၣ်တၢ်ရဲၣ်တၢ်ကျဲၤအံၤအဃိ အဝဲသ့ၣ်ကွဲးထၢနုာ်ဝဲ ကျိာ်လၢအကယၤသ့ၣ်တဖၣ်သ့ဒီး ပာ်ဖှိၣ်ဝဲလံာ်ဒီးတၢ်ဂီၤတပူၤဃီ ဒ်သိးကစဲကျံးထုးထီၣ်ဝဲအဂီၢ်လီၤ.

ကျိာ်လၢပကွဲးကျိာ်ထံအီၤတနီၤန့ၣ် ပှၤကတိၤအီၤအနီၣ်ဂံၢ်အိၣ်ထဲဒၣ် အကထိတဖၣ်လီၤ. ဘၣ်မနုၤအဃိပမၤဒ်အံၤလဲၣ်. မ့ၢ်လၢယဟိဝၤယွၤ ဘၣ်အသးလၢ “ပှၤကညီခဲလၢာ် ကတုၤလၢတၢ်အုၣ်က့ၤခီၣ်က့ၤအီၤ, ဒီးကသ့ၣ်ညါထီၣ်တၢ်မ့ၢ်တၢ်တီ” အဃိလီၤ.—၁ တံၤမသ့း ၂:၃, ၄.

• ပလံာ်လဲၢ်တဖၣ်န့ၣ် ဘၣ်တၢ်ကွဲးအီၤဒ်လဲၣ်.

• ဘၣ်မနုၤအဃိ ပကွဲးကျိာ်ထံပလံာ်လဲၢ်တဖၣ်လၢ ကျိာ်အါမးလဲၣ်.