စီၤၡမူၤအ့လး မၤတၢ်ဂ့ၤထီဘိ

ဖဲစီၤၡမူၤအ့လးမ့ၢ်ဒံး ဖိသၣ်အခါအဝဲအိၣ်ဖဲ ဒဲစီဆှံဒီးမၤတၢ်ဖဲန့ၣ်လီၤ. ဒဲစီဆှံန့ၣ်မ့ၢ်ပှၤဘူၣ်ထီၣ်ဘါထီၣ် ယဟိဝၤယွၤအလီၢ်လီၤ. ဘၣ်မနုၤအဃိစီၤၡမူၤအ့လး ဘၣ်လဲၤအိၣ်ဝဲဖဲဒဲစီဆှံလဲၣ်န့ၣ် နသ့ၣ်ညါဧါ. အဆိကတၢၢ် ပကမၤလိသကိး စီၤၡမူၤအ့လးအမိမိၢ်, နီၢ်ဃးနၤအဂ့ၢ်လီၤ.

နီၢ်ဃးနၤသးလီအဖိဖးယံာ်လံ ဘၣ်ဆၣ်အဖိတအိၣ်ဘၣ်. လၢတၢ်န့ၣ်အဃိ အဝဲဃ့ဘါထုကဖၣ်ဆူ ယဟိဝၤယွၤဒီးဃ့ကညးကစၢ်လၢ ကဟ့ၣ်အီၤအဖိလီၤ. အဝဲတဲပာ်ဝဲလၢကစၢ်မ့ၢ်ဟ့ၣ်အီၤ ဖိခွါတဂၤန့ၣ် ကဆှၢအီၤဆူ ဒဲစီဆှံဒီး ကအိၣ်ဝဲဖဲန့ၣ် လၢကမၤတၢ်အဂီၢ်လီၤ. ယဟိဝၤယွၤစံးဆၢ အတၢ်ထုကဖၣ်ဒီး ဟ့ၣ်အီၤဖိခွါတဂၤလီၤ. ဒီးအဝဲကိးဝဲအမံၤလၢ စီၤၡမူၤအ့လးလီၤ. ဒ်နီၢ်ဃးနၤတဲပာ်ဝဲအသိး ဖဲစီၤၡမူၤအ့လးအသးအိၣ် သၢနံၣ်လွံၢ်နံၣ်အခါ အဝဲလဲၤဆှၢအီၤဆူဒဲစီဆှံဒ်သိး ကမၤယွၤအတၢ်မၤဖဲန့ၣ်လီၤ.

စီၤဧ့လံၤမ့ၢ်ပှၤလုၢ်တၢ်အခိၣ်လၢ ဒဲစီဆှံအပူၤလီၤ. အဖိခွါခံဂၤစ့ၢ်ကီးမၤတၢ်ဖဲန့ၣ်ဒ် ပှၤလုၢ်တၢ်အဒိၣ်အသိးလီၤ. သ့ၣ်နီၣ်ထီၣ်လၢဒဲစီဆှံန့ၣ် မ့ၢ်ယွၤအဟံၣ်လၢ ပှၤဘူၣ်ထီၣ်ဘါထီၣ်တၢ်အလီၢ်န့ၣ်တက့ၢ်. လၢတၢ်န့ၣ်အဃိ, ကြၢးလၢပှၤမၤတၢ်ဂ့ၤဖဲန့ၣ်လီၤ. ဘၣ်ဆၣ်စီၤဧ့လံၤအဖိခွါတဖၣ် မၤတၢ်အၢအၢသီသီလီၤ. တၢ်လၢအဝဲသ့ၣ်မၤဝဲတဖၣ်န့ၣ် စီၤၡမူၤအ့လးထံၣ်ဘၣ်ဝဲလီၤ. စီၤၡမူၤအ့လးမၤတၢ်အၢဒ် စီၤဧ့လံၤအဖိခွါတဖၣ်မၤဝဲန့ၣ်ဧါ.— တမၤဝဲဘၣ်, အဝဲမၤတၢ်ဂ့ၤထီဘိဒ်အမိမိၢ်ပါပၢ် သိၣ်လိတ့ၢ်အီၤအသိးလီၤ.

စီၤဧ့လံၤအဖိခွါခံဂၤမၤတၢ်အၢန့ၣ် နဆိကမိၣ်လၢ အပၢ်ကြၢးမၤအီၤဒ်လဲၣ်.— အဝဲကြၢးသိၣ်အီၤလီၤ. အဝဲတကြၢးပျဲအဖိတဖၣ် မၤတၢ်လၢယွၤအဟံၣ်လၢၤဘၣ်. ဘၣ်ဆၣ်စီၤဧ့လံၤပျဲဝဲအဃိ ယဟိဝၤယွၤသးထီၣ်အီၤဒီး အဖိခွါခံဂၤလီၤ. ယဟိဝၤယွၤပာ်လီၤအသးလၢ ကစံၣ်ညီၣ်အဝဲသ့ၣ်လီၤ.

ဘၣ်တနၤ ဖဲစီၤၡမူၤအ့လးမံဝဲအခါ နၢ်ဟူပှၤကိးအီၤ ‘စီၤၡမူၤအ့လးဧၢ’ ဒီးအဝဲလဲၤဃ့ၢ်ဆူစီၤဧ့လံၤအအိၣ် ဘၣ်ဆၣ်စီၤဧ့လံၤတဲအီၤလၢ ‘ယတကိးနၤဘၣ်.’ တၢ်မၤကဒီးအသးဒ်အံၤခံဘျီလီၤ. တၢ်ကိးအီၤသၢဘျီတဘျီ ဝံၤအလီၢ်ခံန့ၣ်စီၤဧ့လံၤ တဲဘၣ်စီၤၡမူၤအ့လးလၢ နမ့ၢ်နၢ်ဟူကဒီးပှၤကိးနၤန့ၣ် နကဘၣ်စံးဆၢလၢ ‘ယဟိဝၤယွၤဧၢ, တဲတက့ၢ်. ယဒိကနၣ်လီၤ.’ လၢတၢ်န့ၣ်အဃိ စီၤၡမူၤအ့လးမၤဝဲဒ်န့ၣ်လီၤ. လၢခံယဟိဝၤယွၤ စံးဘၣ် စီၤၡမူၤအ့လးလၢ ‘တဲဘၣ်စီၤဧ့လံၤလၢယကစံၣ်ညီၣ် အဟံၣ်ဖိဃီဖိလၢ အမၤတၢ်အၢအဃိန့ၣ်တက့ၢ်.’ စီၤၡမူၤအ့လးကတဲဘၣ်ဝဲ တၢ်ဂ့ၢ်အံၤလၢစီၤဧ့လံၤန့ၣ် ကညီလၢအဂီၢ်ကစီဒီဧါ.— တညီဘၣ်. စီၤၡမူၤအ့လးပျံၤတၢ်သနာ်က့, မၤဝဲဒ်ယဟိဝၤယွၤတဲဘၣ်အီၤအသိးလီၤ. တၢ်လၢယဟိဝၤယွၤစံးဝဲန့ၣ် ဟဲကဲထီၣ်ဝဲလီၤ. စီၤဧ့လံၤအဖိခွါခံဂၤ ဘၣ်တၢ်မၤသံအီၤဒီး စီၤဧ့လံၤသံစ့ၢ်ကီးလီၤ.

စီၤၡမူၤအ့လးမ့ၢ် ပှၤဒိဂ့ၤတဲာ်ဘၣ်လၢပဂီၢ်လီၤ. အဝဲထံၣ်ဘၣ်ဝဲ ပှၤအဂၤမၤတၢ်အၢသနာ်က့ အဝဲမၤတၢ်လၢအဂ့ၤလီၤ. မ့မ့ၢ်နၤန့ၣ်နကလီၤဂာ် စီၤၡမူၤအ့လးဒီး မၤတၢ်ဂ့ၤထီဘိဧါ. နမ့ၢ်မၤဒ်န့ၣ်န့ၣ်, နကမၤသးခုယဟိဝၤယွၤ ဒီးနမိမိၢ်ပါပၢ်အသးလီၤ.