ဒ်ဟံၣ်ဖိဃီဖိတဒူၣ်အသိး ဘူၣ်ထီၣ်ဘါထီၣ်သကိး ယဟိဝၤယွၤတက့ၢ်

ဒ်နမၤလိဘၣ်လၢ လံာ်တဘ့ၣ်အံၤအပူၤအသိး လံာ်စီဆှံန့ၣ် အိၣ်ဒီးတၢ်နဲၣ်လိအါမးလၢ ကမၤစၢၤနၤဒီးနဟံၣ်ဖိဃီဖိန့ၣ်လီၤ. ယဟိဝၤယွၤအဲၣ်ဒိးလၢ နကသးခုလီၤ. ကစၢ်အၢၣ်လီၤဝဲလၢ သုမ့ၢ်ပာ် တၢ်ဘူၣ်ထီၣ်ဘါထီၣ်အီၤလၢညါန့ၣ် “တၢ်ကပာ်ဖှိၣ် တၢ်န့ၣ်တဖၣ်ခဲလၢာ် လၢသုလီၤ.” (မးသဲ ၆:၃၃) ကစၢ်အဲၣ်ဒိးလၢ နကကဲထီၣ်အတံၤသကိးလီၤ. သူတၢ်ခွဲးတၢ်ယာ်ကိးမံၤဒဲးလၢ ကမၤဂ့ၤထီၣ် နတၢ်ရ့လိာ်သးဒီးယွၤန့ၣ်တက့ၢ်. တၢ်ကဲထီၣ်ကစၢ်ယွၤ အတံၤသကိးန့ၣ် မ့ၢ်တၢ်ခွဲးတၢ်ယာ်အဂ့ၤကတၢၢ်လၢ ပှၤကညီဒိးန့ၢ်ဘၣ်သ့န့ၣ်လီၤ.—မးသဲ ၂၂:၃၇, ၃၈.

၁ မၤဂ့ၤထီၣ်နတၢ်ရ့လိာ်သးဒီး ယဟိဝၤယွၤတက့ၢ်

လံာ်စီဆှံစံးဝဲ– “‘ယကကဲလၢသုပၢ်, ဒီးသုကကဲလၢယဖိမုၣ်, ဒီးယဖိခွါတဖၣ်လီၤ,’ ယွၤလၢအသ့တၢ်လၢာ်စံးဝဲဒၣ်.” (၂ ကရံၣ်သူး ၆:၁၈) ကစၢ်ယွၤအဲၣ်ဒိးလၢ နကကဲထီၣ်အတံၤသကိးလၢ ရ့ဒီးအီၤဘူးဘူးတံၢ်တံၢ်လီၤ. တၢ်ဃ့ဘါထုကဖၣ်န့ၣ် မ့ၢ်ကျဲတဘိလၢနကကဲထီၣ် ယွၤအတံၤသကိးန့ၣ်လီၤ. ယဟိဝၤကွဲမုာ်နၤလၢနက “ဘါထုကဖၣ်တၢ် တထံၣ်ဃီ” လီၤ. (၁ သ့းစၤလနံ ၅:၁၇) ကစၢ်သးအိၣ်ဒိကနၣ် နသးအတၢ်ဆိကမိၣ်ဒီး နတၢ်ဘၣ်ယိၣ်တဖၣ်လီၤ. (ဖံလံးပံၤ ၄:၆) ဖဲနဃ့ဘါထုကဖၣ်တၢ်ဒီး နဟံၣ်ဖိဃီဖိအခါ အဝဲသ့ၣ်ကထံၣ်ဘၣ်ဝဲလၢ ယွၤမ့ၢ်ကစၢ်နီၢ်နီၢ်လၢနဂီၢ်လီၤ.

နကဘၣ်ကတိၤတၢ်ဒီးယွၤ တကးဘၣ်နကဘၣ် ဒိကနၣ်အကလုၢ်စ့ၢ်ကီးလီၤ. နမၤဒ်န့ၣ်သ့ခီဖျိလၢ နမၤလိလံာ်စီဆှံဒီး လံာ်လၢတၢ်ကရၢကရိ ထုးထီၣ်ဝဲတဖၣ်လီၤ. (စံးထီၣ်ပတြၢၤ ၁:၁, ၂) ဆိကမိၣ်ထံတၢ်လၢ နမၤလိတဖၣ်တက့ၢ်. (စံးထီၣ်ပတြၢၤ ၇၇:၁၁, ၁၂) နမ့ၢ်အဲၣ်ဒိး ဒိကနၣ်ကစၢ်ယွၤအကလုၢ်န့ၣ် နကဘၣ်လဲၤထီၣ် တၢ်အိၣ်ဖှိၣ်ရိဖှိၣ် ဘၣ်ဆၢဘၣ်ကတီၢ်န့ၣ်လီၤ.—စံးထီၣ်ပတြၢၤ ၁၂၂:၁-၄.

တၢ်တဲဘၣ်ပှၤဂၤလၢ ကစၢ်အဂ့ၢ်န့ၣ် မ့ၢ်ကျဲအဂၤတမံၤလၢ ပတၢ်ရ့လိာ်သးဒီးယဟိဝၤယွၤ ကဂၢၢ်ကျၢၤထီၣ်အဂီၢ်န့ၣ်လီၤ. နမ့ၢ်တဲယဟိဝၤယွၤအဂ့ၢ်အါအါန့ၣ် နကဘူးထီၣ်ဒီးယဟိဝၤယွၤ ဒံးယံာ်ဒံးအါထီၣ်လီၤ.—မးသဲ ၂၈:၁၉, ၂၀.

တၢ်လၢနမၤသ့–

• ဟံးန့ၢ်တၢ်ဆၢကတီၢ် ကိးနံၤဒဲးလၢ နကဖးလံာ်စီဆှံဒီး နကဃ့ဘါထုကဖၣ် အဂီၢ်န့ၣ်တက့ၢ်

• နဟံၣ်ဖိဃီဖိခဲလၢာ် ပာ်ဆိနီၢ်သးအတၢ်ဖံးတၢ်မၤလၢ တၢ်မၤမုာ်မၤဖှံသးဒီး တၢ်အိၣ်ဘှံးအိၣ်သါအမဲာ်ညါန့ၣ်တက့ၢ်

၂ ဟံၣ်ဖိဃီဖိ တၢ်မၤလိလံာ်စီဆှံလၢ အပှဲၤဒီးတၢ်သူၣ်ခုသးခု

လံာ်စီဆှံစံးဝဲ– “သုးဘူးသုသးဆူ ယွၤအအိၣ်တက့ၢ်, ဒီးကသုးဘူးအသး ဆူသုအိၣ်လီၤ.” (ယၤကိာ် ၄:၈) နကဘၣ်ရဲၣ်ကျဲၤ နဟံၣ်ဖိဃီဖိတၢ်မၤလိလံာ်စီဆှံ ဒီးဒ်နရဲၣ်ကျဲၤပာ်အသိး မၤအီၤဘၣ်ဆၢဘၣ်ကတီၢ်တက့ၢ်. (၁ မိၤၡ့ ၁၈:၁၉) ဘၣ်ဆၣ် ထဲန့ၣ်တကးဒံးဘၣ်, နကဘၣ်သ့ၣ်နီၣ်ထီၣ် ကစၢ်ယွၤလၢ နတၢ်အိၣ်မူ ကိးနံၤဒဲးအပူၤလီၤ. ဒ်သိးနကမၤဂ့ၤထီၣ် နဟံၣ်ဖိဃီဖိ အတၢ်ရ့လိာ်သးဒီးယွၤအဂီၢ် ကတိၤတၢ်ဒီးအဝဲသ့ၣ်ဖဲ “နဆ့ၣ်နီၤလၢနဟံၣ်ပူၤ, ဒီးတုၤနပိာ်ကျဲ, ဒီးတုၤနမံလီၤ, ဒီးတုၤနဂဲၤဆၢထၢၣ်ဒီး နဘၣ်ကတိၤတၢ်လၢ အဂ့ၢ်အကျိၤလီၤ.” (၅ မိၤၡ့ ၆:၆, ၇) ပာ်လီၤနသးလၢ နကလီၤဂာ်ဒ် စီၤယိၤၡူလၢအစံးဝဲ “မ့မ့ၢ်ယဲဒၣ်အံၤ, ဒီးယပှၤဟံၣ်ဖိ, ပကမၤယွၤအတၢ်” န့ၣ်တက့ၢ်.—ယိၤၡူ ၂၄:၁၅.

တၢ်လၢနမၤသ့–

• ရဲၣ်ကျဲၤတၢ်သိၣ်လိမၤယုၤလၢ ဘၣ်ထွဲလိာ်အသးဒီး နဟံၣ်ဖိဃီဖိကိးဂၤဒဲး အတၢ်လိၣ်ဘၣ် ဒီးမၤအီၤဘၣ်ဆၢဘၣ်ကတီၢ်တက့ၢ်