စီၤယၤကိာ်ဒီးစီၤဧ့ၡီၤ မၤဃူဖိးလိာ်က့ၤအသး

ယဟိဝၤယွၤ အၢၣ်လီၤအီလီၤ စီၤယၤကိာ်လၢ ကဒီသဒၢအီၤဒ်သိး အဒီသဒၢတ့ၢ် စီၤအၤဘြၤဟၣ်​ ဒီးစီၤအံၤစဲး. စီၤယၤကိာ်လဲၤအိၣ်ဝဲလၢ ဝ့ၢ်ဟၤရၣ်အပူၤ. ဖဲန့ၣ်န့ၣ်​ စီၤယၤကိာ်ဟံးန့ၢ်အမါ ဒီးအဝဲအိၣ်ထီၣ်ဒီး အဟံၣ်ဖိဃီဖိဖးဒိၣ်တဒူၣ်​ ဒီးကဲဒိၣ်ထီၣ်ဝဲ.

လၢခံ ယဟိဝၤယွၤ တဲဘၣ်စီၤယၤကိာ်လၢ ‘က့ၤဆူ နအိၣ်တၢ်လီၢ်.’ အဃိ စီၤယၤကိာ် ဒီးအဟံၣ်ဖိဃီဖိတဖၣ်​ စးထီၣ်က့ၤဝဲ. လၢကျဲန့ၣ်​ ပှၤတနီၤဟဲလၢစီၤယၤကိာ်အအိၣ်​ ဒီးတဲဘၣ်အီၤလၢ ‘နဝဲၢ်ခွါစီၤဧ့ၡီၤ ဒီးအပှၤအဂၤ ၄၀၀ ဟဲဝဲလံ.’ စီၤယၤကိာ် ပျံၤဝဲလၢ စီၤဧ့ၡီၤ ကမၤဘၣ်ဒိအီၤ ဒီးအဟံၣ်ဖိဃီဖိ. စီၤယၤကိာ်ဃ့ဘါထုကဖၣ်တၢ်ဆူ ယဟိဝၤယွၤအအိၣ်​ ဒီးတဲဝဲလၢ ‘ဝံသးစူၤ မၤပူၤဖျဲးယၤလၢ ယဝဲၢ်ခွါအစုပူၤ.’ လၢခံတနံၤန့ၣ်​ စီၤယၤကိာ်ဆှၢန့ၢ် စီၤဧ့ၡီၤတၢ်ဟ့ၣ်လၢအမ့ၢ် သိ, မဲာ်တဲးလဲး, ကျီၢ်, ကီၤလၤအူး ဒီးကသ့ၣ်ယီၤတဖၣ်.

နၤဝဲန့ၣ်​ ဖဲစီၤယၤကိာ် အိၣ်ဝဲထဲတဂၤအခါ အဝဲထံၣ်ဝဲ မူခိၣ်ကလူးတဂၤ. မူခိၣ်ကလူးတဂၤအံၤ စးထီၣ်ကနိလိာ်အသးဒီး စီၤယၤကိာ် တုၤလၢ မုၢ်ဆ့ၣ်ဝါထီၣ်တစု. စီၤယၤကိာ်ဘၣ်ဒိ သနာ်က့ အဝဲတတူၢ်ၡူအသးဘၣ်. မူခိၣ်ကလူး တဲဘၣ်အီၤလၢ ‘ပျၢ်ယၤ’ ဘၣ်ဆၣ်​ စီၤယၤကိာ်တဲဘၣ်အီၤလၢ ‘နမ့ၢ်တဆိၣ်ဂ့ၤယၤန့ၣ်​ ယတပျၢ်နၤဘၣ်.’

လၢခံ မူခိၣ်ကလူး ဆိၣ်ဂ့ၤစီၤယၤကိာ်. ခဲအံၤန့ၣ်​ စီၤယၤကိာ်သ့ၣ်ညါဝဲလၢ ယဟိဝၤယွၤ တပျဲဝဲလၢ စီၤဧ့ၡီၤ ကမၤဆါအီၤဘၣ်.

ဖဲမုၢ်ဆ့ၣ်ဝါထီၣ်အခါ စီၤယၤကိာ် ကွၢ်စိတၢ်လၢအယံၤ ဒီးထံၣ်ဝဲလၢ စီၤဧ့ၡီၤဒီးအပှၤအဂၤ ၄၀၀ ဟဲဝဲ. စီၤယၤကိာ်လဲၤလၢ အဟံၣ်ဖိဃီဖိအမဲာ်ညါ ဒီးတီၤလီၤလၢ စီၤဧ့ၡီၤအမဲာ်ညါ နွံဘျီ. စီၤဧ့ၡီၤ လဲၤဃ့ၢ်ဆူစီၤယၤကိာ်အအိၣ်​ ဒီးဖိးဟုအီၤ. အဝဲသ့ၣ်ဟီၣ်ဝဲ ဒီးမၤဃူမၤဖိးလိာ်က့ၤအသး. စီၤယၤကိာ်မၤဃူမၤဖိးလိာ်အသး ဒီးအဝဲၢ်ခွါစီၤဧ့ၡီၤန့ၣ်​ နဆိကမိၣ်​ ယဟိဝၤယွၤ အသးကမၤအသးဒ်လဲၣ်.

လၢခံ စီၤဧ့ၡီၤက့ၤဆူအဟံၣ်​ ဒီးစီၤယၤကိာ်စ့ၢ်ကီး က့ၤဝဲဆူအအိၣ်တၢ်လီၢ်. စီၤယၤကိာ်အိၣ်ဒီး အဖိခွါ ၁၂ ဂၤ. အဝဲသ့ၣ်​ အမံၤမ့ၢ်ဝဲ စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ, စီၤယူဒၤ, စီၤဒၣ်, စီၤနးသၤလံ, စီၤကး, စီၤအၤၡ့ၢ်, စီၤယံးစၣ်ကၢ်, စီၤစဘူလိၣ်, စီၤယိၤသး ဒီးစီၤဘံၣ်ယၤမံၣ်. ဒီးစီၤယိၤသးန့ၣ်​ မ့ၢ်ပှၤလၢယဟိဝၤယွၤ သူအီၤဒ်သိးကမၤပူၤဖျဲးဝဲ အပှၤဂီၢ်မုၢ်အဂီၢ်. ကစၢ်ယွၤသူအီၤ ဒ်လဲၣ်န့ၣ်​ မ့ၢ်နသ့ၣ်ညါဧါ. ပကကွၢ်သကိး တၢ်ဂ့ၢ်အံၤလၢ တၢ်မၤလိ လၢခံတခါအပူၤ.