ယ့ၣ်ၡူးဟးလၢထံဖီခိၣ်

ယ့ၣ်ၡူး မၤဘျါက့ၤ ပှၤဆူးပှၤဆါ ဒီးမၤသမူထီၣ်က့ၤပှၤသံ တကးဒံးဘၣ်​ အမၤပတုာ်ဝဲ ကလံၤမုၢ် ဒီးတၢ်စူၤသ့ဝဲစ့ၢ်ကီး. ဖဲယ့ၣ်ၡူး ဃ့ထုကဖၣ်တၢ်လၢ ကစၢၢ်ဒီခိၣ်​ ဝံၤအလီၢ်ခံ အကွၢ်လီၤတၢ်ဆူ ပီၣ်လဲၣ်ကၤလံၤလါ ဒီးထံၣ်ဘၣ်ဝဲ ကလံၤမုၢ်. ယ့ၣ်ၡူး အတၢ်မၢဖိတဖၣ်​ အိၣ်လၢကဘီပူၤ ဘၣ်ဆၣ်​ ခီဖျိလၢ ကလံၤမုၢ်ဆူၣ်ဒိၣ်မးအဃိ အဝဲသ့ၣ်ဝၢ်ဝဲ အကဘီတန့ၢ်ဘၣ်. အဃိ ယ့ၣ်ၡူး ဟဲက့ၤလီၤလၢ ကစၢၢ်အခီၣ်ထံး, အစးထီၣ်ဟးဝဲ လၢထံဖီခိၣ်​ ဒီးလဲၤဝဲလၢ အတၢ်မၢဖိတဖၣ်​ အကဘီအအိၣ်. ဖဲတၢ်မၢဖိတဖၣ်​ ထံၣ်ဘၣ်ဝဲ ပှၤတဂၤဟးလၢ ထံဖီခိၣ်အခါ အဝဲသ့ၣ်​ ပျံၤတၢ်ဒိၣ်မး. ဘၣ်ဆၣ်​ ယ့ၣ်ၡူးတဲဘၣ်​ အဝဲသ့ၣ်လၢ ‘ယၤလီၤ, ပျံၤတၢ်တဂ့ၤ.’

စီၤပ့းတရူး တဲဝဲလၢ “ကစၢ်ဧၢ, မ့မ့ၢ်နၤန့ၣ်​ မၢယဟဲလၢနအိၣ်.” ယ့ၣ်ၡူးတဲဘၣ်​ စီၤပ့းတရူးလၢ ‘ဟဲလၢယအိၣ်.’ ဖဲကလံၤမုၢ်ဖးဒိၣ်​ အူတၢ်အဆၢကတီၢ် စီၤပ့းတရူး ဟးထီၣ်လၢကဘီပူၤ ဒီးလဲၤဝဲလၢ ယ့ၣ်ၡူးအအိၣ်. ဘၣ်ဆၣ်​ ဖဲအလဲၤဘူးထီၣ်လၢ ယ့ၣ်ၡူးအိၣ်အခါ စီၤပ့းတရူး ကွၢ်ဝဲကလံၤမုၢ် ဒီးပျံၤတၢ်. ဒီးစီၤပ့းတရူး လီၤဘျၢဝဲလၢ ထံကျါ. စီၤပ့းတရူး ကိးပသူထီၣ်ဝဲလၢ “ကစၢ်ဧၢ, မၤစၢၤယၤ.” ယ့ၣ်ၡူး ဖီၣ်စီၤပ့းတရူးအစု ဒီးတဲဘၣ်အီၤလၢ ‘ဘၣ်မနုၤအဃိ နသးဒ့ဒီလဲၣ်. နတၢ်နာ် တအိၣ်လၢၤဧီၤ.’

ယ့ၣ်ၡူး ဒီးစီၤပ့းတရူး လဲၤနုာ်လီၤလၢကဘီပူၤ ဒီးတဘျီဃီန့ၣ်​ ကလံၤမုၢ်ပတုာ်ဝဲ. တၢ်မၢဖိတဖၣ်​ တူၢ်ဘၣ်ဝဲဒ်လဲၣ်. အဝဲသ့ၣ်​ တဲဝဲလၢ “နမ့ၢ်ကစၢ်ယွၤအဖိခွါ နီၢ်ကီၢ်.”

ယ့ၣ်ၡူး မၤပတုာ်ဝဲ ကလံၤမုၢ်ဖးဒိၣ်န့ၣ်​ တမ့ၢ်ထဲ တၢ်တဘျီအံၤဘၣ်. ဘၣ်တဘျီ ဖဲယ့ၣ်ၡူး ဒီးအတၢ်မၢဖိတဖၣ်​ ဒိးဝဲကဘီ လၢကလဲၤဆူ ပီၣ်လဲၣ်ဝၢ်ဘးခီအခါ ယ့ၣ်ၡူး မံဘၣ်အသးလၢ ကဘီလီၢ်ခံ. ဖဲန့ၣ်အဆၢကတီၢ် ကလံၤမုၢ်ဖးဒိၣ်ဟဲဝဲ. လပီတဖၣ်​ ဆီၣ်ဝဲကဘီ ဒီးထံနုာ်လီၤလၢ ကဘီပူၤ. တၢ်မၢဖိတဖၣ်​ ကိးဆၢထၢၣ်ယ့ၣ်ၡူး ဒီးတဲဝဲလၢ အကလုၢ်ဖးဒိၣ်လၢ ‘သရၣ်ဧၢ, ပကသံလီၤ. မၤစၢၤပှၤသၢၤ.’ ယ့ၣ်ၡူး ဂဲၤဆၢထၢၣ်​ ဒီးတဲဘၣ်ပီၣ်လဲၣ်လၢ “အိၣ်ဘှ့ၣ်.” တဘျီဃီန့ၣ်​ ကလံၤဒီးလပီ အိၣ်ဂၢၢ်က့ၤဝဲ. ယ့ၣ်ၡူးသံကွၢ် အတၢ်မၢဖိတဖၣ်လၢ ‘သုတၢ်နာ် တအိၣ်လၢၤဧီၤ.’ အဝဲသ့ၣ်​ တဲလိာ်သးလၢ “ကလံၤဒီးပီၣ်လဲၣ်မး ဒိကနၣ်အကလုၢ်ဒံး.” တၢ်မၢဖိတဖၣ်​ န့ၢ်ဘၣ်တၢ်မၤလိလၢ အဝဲသ့ၣ်မ့ၢ်နာ်န့ၢ်ယ့ၣ်ၡူး လၢအသးဒီဖျၢၣ်န့ၣ်​ အတလိၣ်ပျံၤတၢ် နီတမံၤဘၣ်.