ပှၤဟဲဖီၣ်ယ့ၣ်ၡူး

ယ့ၣ်ၡူး ဒီးအတၢ်မၢဖိတဖၣ်​ ခီဂာ်ဝဲ ကံဒြိၣ်တၢ်တြီၤပူၤ ဒီးလဲၤဝဲလၢ ကစၢၢ်သ့ၣ်စၤယံး ဖဲဖးဖီမုၢ် ဒီးလါပှဲၤဝဲအခါ. ဖဲအဝဲသ့ၣ်​ လဲၤတုၤလၢ ကရၢၢ်က့ၤသစ့းမနၤအခါ ယ့ၣ်ၡူးတဲဘၣ်​ အဝဲသ့ၣ်လၢ “အိၣ်ဖဲအံၤဒီး ဆိးသီနီၤ.” ဝံၤဒီး ယ့ၣ်ၡူးလဲၤယံၤထီၣ်ဒီး အဝဲသ့ၣ်တစဲး ဒီးချံးလီၤအခီၣ်. လၢတၢ်သူၣ်ကိၢ်သးဂီၤအပူၤ ယ့ၣ်ၡူး ဃ့ထုကဖၣ်တၢ်လၢ ယဟိဝၤယွၤအအိၣ်လၢ “မ်အကဲထီၣ်ဒ် နတၢ်ဘၣ်သး အသိးတက့ၢ်.” ဝံၤဒီး ယဟိဝၤယွၤ ဆှၢလီၤဝဲ မူခိၣ်ကလူးတဂၤ ဒ်သိး ကဟ့ၣ်ဂံၢ်ဟ့ၣ်ဘါ ယ့ၣ်ၡူးအဂီၢ်. ဖဲန့ၣ်ဝံၤအလီၢ်ခံ ယ့ၣ်ၡူးဟဲက့ၤဝဲဆူ အတၢ်မၢဖိတဖၣ်အအိၣ်​ ဒီးယ့ၣ်ၡူးထံၣ်ဝဲလၢ အတၢ်မၢဖိသၢဂၤန့ၣ်​ မံဘၣ်အသး. ဒီးယ့ၣ်ၡူးတဲဘၣ်​ အဝဲသ့ၣ်လၢ ‘ဂဲၤဆၢထၢၣ်သၢၤ. ခဲအံၤန့ၣ်​ တမ့ၢ်တၢ်ဆၢကတီၢ်လၢ သုကမံအဂီၢ်ဘၣ်. နၣ်ရံၣ်ဘၣ်လၢ ပှၤကဟ့ၣ်လီၤကွံာ်ယၤလၢ ဒုၣ်ဒါတဖၣ်​ အစုပူၤလံ.’

တယံာ်ဘၣ်ဒီး စီၤယူဒၤ ဟဲကိးဝဲ ပှၤဂီၢ်မုၢ် ဒီးပှၤသုးဖိတဖၣ်လၢ အအိၣ်ဒီးနး ဒီးနီၣ်တီၢ်. ခီဖျိလၢ ယ့ၣ်ၡူးဒီးအတၢ်မၢဖိတဖၣ်​ ညီနုၢ်လဲၤဝဲလၢ ကရၢၢ်က့ၤသစ့းမနၤအဃိ စီၤယူဒၤ သ့ၣ်ညါဝဲလၢ ယ့ၣ်ၡူး ကအိၣ်ဖဲန့ၣ်. စီၤယူဒၤ တဲပာ်စၢၤ ပှၤသုးဖိတဖၣ်လၢ အဝဲကဒုးနဲၣ်​ အဝဲသ့ၣ်လၢယ့ၣ်ၡူး. အဃိ အဝဲလဲၤဆူ ယ့ၣ်ၡူးအအိၣ်​ ဒီးတဲဝဲလၢ ‘ဟါလၢဂ့ၤသရၣ်.’ ဝံၤဒီးအဝဲ နၢမူယ့ၣ်ၡူး. ယ့ၣ်ၡူး တဲဆၢက့ၤအီၤလၢ ‘စီၤယူဒၤဧၢ, နဟ့ၣ်လီၤကွံာ်ယၤလၢ နတၢ်နၢမူ တထံၣ်အံၤဧါ.’

ယ့ၣ်ၡူး သုးဘူးအသး ဒီးသံကွၢ်ပှၤဂီၢ်မုၢ်လၢ “သုဃု မတဂၤလဲၣ်.” အဝဲသ့ၣ်​ စံးဆၢက့ၤဝဲလၢ “ပှၤနစၤရ့းဖိ ယ့ၣ်ၡူး.” ဝံၤဒီး ယ့ၣ်ၡူးတဲဆၢဝဲလၢ “ယမ့ၢ်ပှၤအဝဲန့ၣ်လီၤ.” ဒီးပှၤပိာ်ခွါတဖၣ်န့ၣ်​ သုးလီၤက့ၤအသးလၢ အလီၢ်ခံ ဒီးလီၤဃံၢ်လၢဟီၣ်ခိၣ်လိၤ. ယ့ၣ်ၡူးသံကွၢ်ကဒီး ပှၤဂီၢ်မုၢ်လၢ “သုဃု မတဂၤလဲၣ်.” ဒီးအဝဲသ့ၣ်​ စံးဆၢကဒီးဝဲလၢ “ပှၤနစၤရ့းဖိ ယ့ၣ်ၡူး.” ယ့ၣ်ၡူး တဲဆၢက့ၤကဒီးဝဲလၢ ‘ယတဲသုဝံၤလံ, အကဲယၤလီၤ. ပျဲက့ၤ ပှၤတဖၣ်အံၤတက့ၢ်.’

ဖဲစီၤပ့းတရူး သ့ၣ်ညါဝဲလၢ ပှၤကဖီၣ်ယ့ၣ်ၡူးအခါ အဝဲထုးထီၣ်နးဒီး ကျီဝဲ ပှၤလုၢ်တၢ်ခိၣ်​ အဒိၣ်ကတၢၢ် အခ့အပှၤ စီၤမါလဃူးအနၢ်ကု. ဘၣ်ဆၣ်​ ယ့ၣ်ၡူးဖီၣ်ဝဲ ပိာ်ခွါအံၤအနၢ် ဒီးမၤဘျါက့ၤဝဲ. ဝံၤဒီး ယ့ၣ်ၡူးတဲဘၣ်​ စီၤပ့းတရူးလၢ ‘ဒၢနုာ်လီၤက့ၤ နနးလၢအလီၢ်န့ၣ်. နမ့ၢ်ဒုးတၢ်လၢနးန့ၣ်​ နကသံလၢနးလီၤ.’ ပှၤသုးဖိတဖၣ်ဖီၣ်ဝဲ ယ့ၣ်ၡူး ဒီးစၢထီၣ်ဝဲအစု. ဒီးအတၢ်မၢဖိတဖၣ်​ ဃ့ၢ်ကွံာ်ဝဲလၢအယံၤ. ဝံၤဒီး ပှၤဂီၢ်မုၢ်တဖၣ်​ က့ၤကိးဝဲ ယ့ၣ်ၡူးလၢ ပှၤလုၢ်တၢ်ဒိၣ်အခိၣ်​ စီၤအၣ်နၣ်အအိၣ်. စီၤအၣ်နၣ်​ သံကွၢ်ယ့ၣ်ၡူးဝံၤဒီး ဆှၢက့ၤယ့ၣ်ၡူးလၢ ပှၤလုၢ်တၢ်ခိၣ်​ အဒိၣ်ကတၢၢ် စီၤကၤယါဖၤအအိၣ်. ဘၣ်ဆၣ်​ တၢ်မၤအသးဒီး ယ့ၣ်ၡူး အတၢ်မၢဖိတဖၣ်ဒ်လဲၣ်.