တၢ်ကတိၤအိးထီၣ် အကူာ် ၆
ဖဲပှၤအံၣ်စရ့လးဖိတဖၣ် လဲၤတုၤလၢ ကီၢ်တၢ်စံးပာ်အခါ ဒဲစီဆှံန့ၣ်ကဲထီၣ် အဝဲသ့ၣ် အတၢ်ဘူၣ်တၢ်ဘါအလီၢ်. ပှၤလုၢ်တၢ်ဒိၣ်တဖၣ် သိၣ်လိဝဲ စီၤမိၤၡ့အတၢ်သိၣ်တၢ်သီ ဒီးပှၤစံၣ်ညီၣ်ကွီၢ်တဖၣ်န့ၣ် ဟံးစုနဲၣ်ကျဲဝဲ ကစၢ်ယွၤအပှၤဂီၢ်မုၢ်. အကူာ်ဃုအံၤ ကပာ်ဖျါထီၣ်န့ၢ်ပှၤလၢ ပတၢ်ဆၢတဲာ် ဒီးတၢ်လၢပမၤသ့ၣ်တဖၣ်န့ၣ် မၤဘၣ်ဒိပှၤဂၤသ့ဝဲ. ပှၤအံၣ်စရ့လးဖိ တဂၤစုာ်စုာ် အိၣ်ဒီးမူဒါလၢ ကတီဒီးယဟိဝၤယွၤ ဒီးလၢယွၤအပှၤဂီၢ်မုၢ် အဖီခိၣ်. တဲဖျါထီၣ်လၢ နီၢ်ဒဘိရၤ, နီၢ်နၤဧမံ, စီၤယိၤၡူ, နီၢ်ဃးနၤ, စီၤယံးဖသၤအဖိမုၣ် ဒီးစီၤၡမူၤအ့လး အဒိဂ့ၤတဲာ်ဘၣ်န့ၣ် ကဲဘျုးဝဲလၢ ယွၤအပှၤဂီၢ်မုၢ်အဂီၢ်ဒ်လဲၣ်. ဒီးတဲဖျါထီၣ်စ့ၢ်ကီးလၢ ပှၤတနီၤလၢအတမ့ၢ် ပှၤအံၣ်စရ့လးဖိ ဒ်သိးဒီး နီၢ်ရၤဃး, နီၢ်ရူၤသး, နီၢ်ယဧ့လး ဒီးပှၤကံးဘိၣ်ဖိတဖၣ် သ့ၣ်ညါဝဲလၢ ယဟိဝၤယွၤအိၣ်ဒီး ပှၤအံၣ်စရ့လးဖိအဃိ အဝဲသ့ၣ် ဃုထၢဝဲလၢ ကအိၣ်လၢ ပှၤအံၣ်စရ့လးဖိ အအိၣ်တခီ.