တၢ်ကတိၤအိးထီၣ် အတၢ်နီၤဖး ၉
အကူာ်ခွံအံၤ သိၣ်လိပှၤ ဘၣ်ဃးဒီး ပှၤသးစၢ်, ဝံတဖၣ် ဒီးစီၤပၤတဖၣ် လၢအအိၣ်ဒီး တၢ်နာ်ယဟိဝၤယွၤ. အဒိ လၢကီၢ်စူၤရံအပူၤန့ၣ် ပှၤအံၣ်စရ့လး ပိာ်မုၣ်ဖိတဂၤ နာ်ဝဲလၢ ယဟိဝၤယွၤအဝံ ကမၤဘျါဝဲ စီၤနဧၤမၣ် အတၢ်ဆါ. ဝံအလံၤၡါ နာ်ဝဲလၢ ယဟိဝၤယွၤ ကမၤပူၤဖျဲးအီၤလၢ ဒုၣ်ဒါအစုပူၤ. ပှၤလုၢ်တၢ်အခိၣ် စီၤယဟိယဒါ မၤပူၤဖျဲးဝဲ စီၤယိၤအၣ် အသးသမူလၢ အဖံနီၢ်ဧသၤလယၤ လၢအမ့ၢ် ပှၤအၢပှၤသီတဂၤ အစုပူၤ. စီၤပၤဃံးစကံယၤ နာ်ဝဲလၢယဟိဝၤယွၤ ကဒီသဒၢဝဲ ဝ့ၢ်ယရူၤၡလ့ၣ် ဒီးအဝဲတလီၤဝဲလၢ ပှၤအၤၡူၢ်ဖိ အစုပူၤဘၣ်. စီၤပၤယိၤၡံယၤ မၤဟးဂီၤကွံာ် တၢ်ဂီၤတၢ်ဖှီၣ်လၢ အထံအကီၢ်ပူၤ, ဘှီဂ့ၤထီၣ်က့ၤ တၢ်လုၢ်ဟံၣ် ဒီးမၤစၢၤ ပှၤထံဖိကီၢ်ဖိ ဒ်သိး ကဘူၣ်ထီၣ်ဘါထီၣ်က့ၤ ယဟိဝၤယွၤအဂီၢ်.