ဂုာ်ကျဲးစၢးဒ်သိး ကနုာ်လီၤလၢ ပှၤဒိကနၣ်တၢ်ဖိအသးပူၤတက့ၢ်

ကတိၤဒိ ၃:၁

ဘၣ်မၤဒ်လဲၣ်– မၤစၢၤနပှၤဒိကနၣ်တၢ်ဖိဒ်သိး ကပာ်လုၢ်ပာ်ပှ့ၤဝဲ တၢ်လၢအမၤလိဘၣ်ဝဲတဖၣ်​ ဒီးကအိၣ်မူမၤထွဲဝဲန့ၣ်တက့ၢ်.

မၤဒ်အံၤတက့ၢ်–

• မၤစၢၤနပှၤဒိကနၣ်တၢ်ဖိ ဒ်သိးအဝဲသ့ၣ်​ ကဆိကမိၣ်ထံက့ၤ အနီၢ်ကစၢ်အတၢ်အိၣ်သးတက့ၢ်. သူတၢ်သံကွၢ်တဖၣ် ဒ်သိးနပှၤဒိကနၣ်တၢ်ဖိ ကသမံသမိးလီၤက့ၤ အနီၢ်ကစၢ်အသးတက့ၢ်.

• နာ်လၢနပှၤဒိကနၣ်တၢ်ဖိတဖၣ်​ အဲၣ်ဒိးမၤတၢ်လၢအဘၣ်န့ၣ်တက့ၢ်. ဟ့ၣ်သဆၣ်ထီၣ်​ နပှၤဒိကနၣ်တၢ်ဖိတဖၣ်ဒ်သိး ကဆိကမိၣ်ထံဝဲလၢ ဘၣ်မနုၤအဃိ အဝဲသ့ၣ်အဲၣ်ဒိးမၤတၢ် လၢအဂ့ၤလဲၣ်. မၤစၢၤအဝဲသ့ၣ်ဒ်သိး ကအဲၣ်ဒိးမၤတၢ်လၢအဂ့ၤကတၢၢ် ဒ်သိးကပာ်ဖျါထီၣ်​ တၢ်အဲၣ်ယဟိဝၤယွၤ, ပှၤလၢအခိၣ်အဃၢၤတဖၣ်​ ဒီးကပာ်လုၢ်ပာ်ပှ့ၤ လံာ်စီဆှံအတၢ်သိၣ်လိနဲၣ်လိတဖၣ်တက့ၢ်. မၤစၢၤအီၤဒ်သိး အကသ့ၣ်ညါထီၣ်​ ကစၢ်ယွၤအတၢ်ဘၣ်သးလၢ လံာ်စီဆှံပူၤတက့ၢ်. ဘၣ်ဆၣ်​ တဘၣ်မၤဒ်သိး ဖျါလၢနသိၣ်အီၤတဂ့ၤ. တၢ်လၢနတဲသ့ၣ်တဖၣ်န့ၣ်​ ကဘၣ်ကဲထီၣ်တၢ်ဂံၢ်တၢ်ဘါ လၢအဝဲသ့ၣ်အဂီၢ် ဒ်သိးအဝဲသ့ၣ်​ ကအဲၣ်ဒိးမၤတၢ်လၢအဘၣ်တက့ၢ်. ဒီးတၢ်လၢနတဲသ့ၣ်တဖၣ်န့ၣ်​ တဘၣ်မ့ၢ်လၢ အကဲထီၣ်တၢ်မဲာ်ဆှးလၢ အဝဲသ့ၣ်အဂီၢ်ဘၣ်.

• ဟ့ၣ်တၢ်လၤကပီၤလၢ ယဟိဝၤယွၤတက့ၢ်. မၤစၢၤအဝဲသ့ၣ်ဒ်သိး ကနၢ်ပၢၢ်ထီၣ်ဝဲလၢ လံာ်စီဆှံအတၢ်သိၣ်လိ, အတၢ်ဟံးစုနဲၣ်ကျဲ ဒီးအတၢ်သိၣ်တၢ်သီတဖၣ်န့ၣ်​ ပာ်ဖျါထီၣ်ဝဲ ယဟိဝၤယွၤအတၢ်ဂ့ၤတၢ်ဝါတဖၣ်​ ဒီးအတၢ်အဲၣ်ပှၤ ဒ်လဲၣ်န့ၣ်တက့ၢ်. မၤစၢၤနပှၤဒိကနၣ်တၢ်ဖိတဖၣ်​ ဒ်သိးအဝဲကဆိကမိၣ်ထံ ကစၢ်ယွၤအတၢ်တူၢ်ဘၣ်​ ဒီးကအဲၣ်ဒိးမၤသးခုအသးန့ၣ်တက့ၢ်.