ဒ်သိး နဖးလံာ်စီဆှံကမုာ်အဂီၢ် နကဘၣ်မၤဒ်လဲၣ်

ထံၣ်တမှံကွၢ်လၢ နအဲၣ်ဒိးမၤပျီ တၢ်လီၢ်ဖးလဲၢ်တက့ ဘၣ်ဆၣ် နကဘၣ် စးထီၣ်မၤပျီဆိအီၤ ဖဲလဲၣ်တတီၤလဲၣ်န့ၣ် နတသ့ၣ်ညါဘၣ်. ဘၣ်သ့ၣ်သ့ၣ် ဒ်သိး နမၤပျီဘၣ်အီၤ ကညီအဂီၢ် နကမၤပျီအီၤ တဘျီတစဲး. တၢ်ဖးလံာ်စီဆှံစ့ၢ်ကီး နဘၣ်မၤအီၤဒ်န့ၣ်လီၤ. ဘၣ်သ့ၣ်သ့ၣ် နကသံကွၢ်လီၤနသးလၢ ‘ယကဘၣ် စးထီၣ်ဖး ဖဲလဲၣ်တတီၤလဲၣ်.’ လၢတၢ်မၤလိအံၤအပူၤ ပကတဲသကိး တၢ်ဂ့ၢ်တနီၤ လၢနမၤအီၤသ့ ဒ်သိး ကမၤစၢၤနၤလၢ နဖးလံာ်စီဆှံကမုာ်.

၁. ဘၣ်မနုၤအဃိ ပဘၣ်ဖးလံာ်စီဆှံ ထီဘိလဲၣ်.

ပှၤတဂၤလၢ အဖးလံာ်စီဆှံ လၢအမ့ၢ် “ယဟိဝၤယွၤ အတၢ်သိၣ်တၢ်သီ” ထီဘိန့ၣ် အကသးခု ဒီးတၢ်လၢအမၤဝဲခဲလၢာ်န့ၣ် ကကဲထီၣ်လိၣ်ထီၣ်. (ဖး စံးထီၣ်ပတြၢၤ ၁:​၁-၃.) အဃိ ဖဲနစးထီၣ်ဖး လံာ်စီဆှံသီသီအခါ တနံၤဘၣ်တနံၤန့ၣ် ဖးဆိအီၤ စှၤကိာ်မံးနံး. နမ့ၢ်စးထီၣ်ဖးလံာ်စီဆှံန့ၣ် နကသ့ၣ်ညါအါထီၣ် လံာ်စီဆှံအဂ့ၢ် ဒီးနဖးအီၤကမုာ် ဒိၣ်ထီၣ်လီၤ.

၂. ဒ်သိး ပတၢ်ဖးလံာ်စီဆှံန့ၣ် ကကဲဘျုးလၢပဂီၢ် ဒီးပဖးအီၤကမုာ်အဂီၢ် ပကဘၣ်မၤဒ်လဲၣ်.

ဒ်သိး ပတၢ်ဖးလံာ်စီဆှံန့ၣ် ကကဲဘျုး ဒီးပဖးအီၤကမုာ်အဂီၢ် ပကဘၣ်ဟံးန့ၢ် တၢ်ဆၢကတီၢ် လၢပကဆိကမိၣ် တၢ်လၢပဖးအီၤ. ပကဘၣ်ဖး တကးဒံးဘၣ် ပကဘၣ် “ဆိကမိၣ်ထံ” တၢ်လၢပဖးအီၤ. (ယိၤၡူ ၁:၈) ဖဲနဖးလံာ်စီဆှံအခါ သံကွၢ်လီၤနသးလၢ တၢ်သံကွၢ် ဒ်သိးဒီး ‘တၢ်ဂ့ၢ်လၢ ယဖးဘၣ်တဖၣ်အံၤ အသိၣ်လိယၤ ဘၣ်ဃးဒီး ယဟိဝၤယွၤအဂ့ၢ်ဒ်လဲၣ်. ယအိၣ်မူမၤထွဲ တၢ်ဂ့ၢ်တဖၣ်အံၤ ကသ့ဒ်လဲၣ်. လံာ်စီဆှံအဆၢလၢ ယဖးဘၣ်တဖၣ်အံၤ ယသူအီၤဒ်သိး ကမၤစၢၤပှၤဂၤ ကသ့ဒ်လဲၣ်.’

၃. ဒ်သိး နကအိၣ်ဒီး တၢ်ဆၢကတီၢ် လၢနကဖးလံာ်စီဆှံအဂီၢ် နကဘၣ်မၤ မနုၤလဲၣ်.

ဒ်သိး နကပာ်လီၤတၢ်ဆၢကတီၢ် လၢနကဖးလံာ်စီဆှံအဂီၢ် မ့ၢ်အကီလၢနဂီၢ်ဧါ. ပဝဲအါဂၤန့ၣ် ပကပာ်လီၤတၢ်ဆၢကတီၢ် လၢပကဖးလံာ်စီဆှံအဂီၢ်ကီဝဲ. အဃိ လံာ်စီဆှံတဲဝဲလၢ ‘တၢ်ဆၢကတီၢ်လၢ အအိၣ်ဒီးနၤန့ၣ် သူအီၤလၢ အဂ့ၤကတၢၢ်တက့ၢ်.’ (အ့းဖ့းစူး ၅:၁၆) နမၤဒ်န့ၣ် ကသ့အဂီၢ် နကဘၣ်ပာ်ပနီၣ် တၢ်ဆၢကတီၢ် လၢတၢ်ဖးလံာ်စီဆှံအဂီၢ် ကိးနံၤဒဲး. ပှၤတနီၤန့ၣ် ပာ်ပနီၣ်ဝဲတၢ်ဆၢကတီၢ် လၢကဖးလံာ်စီဆှံ လၢဂီၤခီဂီၤဂီၤ. အဂၤတနီၤန့ၣ် ပာ်ပနီၣ်တၢ်ဆၢကတီၢ် လၢကဖးလံာ်စီဆှံ လၢမုၢ်ထူၣ် ဖဲအီၣ်ဝဲ မုၢ်ဆါခီတၢ်အီၣ်အခါ. ဒီးအဂၤတနီၤန့ၣ် ဖးလံာ်စီဆှံ လၢဟါလီၤခီ တချုးအဝဲသ့ၣ် မံဒံးဘၣ်အခါ. မ့မ့ၢ်နၤမီၤ နဖးလံာ်စီဆှံ ကချုးလၢ အဆၢကတီၢ်ဖဲလဲၣ်.

ဃုသ့ၣ်ညါအါထီၣ်

၄. ဒ်သိးနဖးလံာ်စီဆှံ ကမုာ်အဂီၢ် နကဘၣ်မၤဒ်လဲၣ်

ဖဲနစးထီၣ် ဖးလံာ်စီဆှံ သီသီအခါန့ၣ် ဘၣ်သ့ၣ်သ့ၣ် နဖးတမုာ်ဘၣ်. ဘၣ်ဆၣ် ဒ်သိးနဖးလံာ်စီဆှံ ကမုာ်အဂီၢ် နကဘၣ် မၤလိထီၣ်နသး ဒ်သိးဒီး ပှၤတဂၤလၢ အအီၣ်ကွၢ် တၢ်အီၣ်လၢအတအီၣ်ဘၣ်ဝဲ နီတဘျီဘၣ် ဘၣ်ဆၣ်လၢခံ အအီၣ် ဝဲဝံၣ်ထီၣ်. ဖး ၁ ပ့းတရူး ၂:၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နမ့ၢ်ဖးလံာ်စီဆှံ ကိးနံၤဒဲးန့ၣ် နဆိကမိၣ် နဖးအီၤကမုာ်ဧါ ဒီးနကအဲၣ်ဒိး ဖးအါထီၣ်အီၤဧါ.

ကွၢ်တၢ်ဂီၤမူ လၢအပာ်ဖျါထီၣ်ဝဲလၢ ဒ်သိးပှၤတနီၤ ဖးလံာ်စီဆှံ ကမုာ်အဂီၢ် အဝဲသ့ၣ်မၤဝဲဒ်လဲၣ်. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– သးစၢ်တဖၣ် အဲၣ်ယွၤအကလုၢ်ကထါ (၅:၃၃)

• လၢတၢ်ဂီၤမူအပူၤ ဒ်သိးပှၤသးစၢ်တဖၣ် ဖးလံာ်စီဆှံ သုတမုာ် တဂ့ၤအဂီၢ် တၢ်လၢအမၤတံာ်တာ် အဝဲသ့ၣ်န့ၣ် မ့ၢ်မနုၤလဲၣ် ဒီးအဝဲသ့ၣ် မၤနၢၤဝဲဒ်လဲၣ်.

• ဒ်သိး အဝဲသ့ၣ် ကဆဲးဖးလံာ်စီဆှံ ထီဘိအဂီၢ် တၢ်မနုၤမၤစၢၤ အဝဲသ့ၣ်လဲၣ်.

• ဒ်သိး အဝဲသ့ၣ် ဖးလံာ်စီဆှံ ကမုာ်ဒိၣ်ထီၣ်အဂီၢ် အဝဲသ့ၣ်မၤဝဲဒ်လဲၣ်.

တၢ်ဟ့ၣ်ကူၣ်လၢ ကမၤစၢၤနၤဒ်သိး နကစးထီၣ်ဖးလံာ်စီဆှံ–

• ဃုထၢ တၢ်ကွဲးကျိာ်ထံလံာ်စီဆှံ လၢနနၢ်ပၢၢ်ဘၣ်အီၤညီ ဒီးလၢအဘၣ် လီၤတံၢ်လီၤဆဲး. ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မ့ၢ်အိၣ်လၢနကျိာ်န့ၣ် ဖးကွၢ်အီၤ.

• စးထီၣ်ဖးလံာ်စီဆှံ လၢနဘၣ်သူၣ်ဘၣ်သးအီၤ အဒိၣ်ကတၢၢ် တကတြူၢ်. ကွၢ်တၢ်ဟ့ၣ်ကူၣ် လၢအအိၣ်လၢ လံာ်တဘ့ၣ်အံၤအပူၤ ဒီးသူတၢ်ဂ့ၢ်ခိၣ်တီ လၢအမ့ၢ် “စးထီၣ် ဖးလံာ်စီဆှံ.”

• တၢ်လၢနဖးအီၤဝံၤတဖၣ်န့ၣ် မၤနီၣ်ဃာ်အီၤ. ဒ်သိး နကမၤနီၣ်ဃာ် တၢ်လၢနဖးအီၤဝံၤတဖၣ်အဂီၢ် သူတၢ်ဂ့ၢ်ခိၣ်တီ လၢအမ့ၢ် “မၤနီၣ်ဃာ် နတၢ်ဖးလံာ်စီဆှံ” လၢအအိၣ်လၢ လံာ်တဘ့ၣ်အံၤအပူၤ.

• သူ JW Library^® app. နမ့ၢ်သူအီၤန့ၣ် နလဲၤဖဲလဲၣ်ဂ့ၤဖဲလဲၣ်ဂ့ၤ နဖးဒီးဒိကနၣ် လံာ်စီဆှံ လၢနလီတဲစိ မ့တမ့ၢ် ထဲးဘလဲး အပူၤသ့.

• သူတၢ်ဂ့ၢ်ခိၣ်တီ လၢအမ့ၢ် တၢ်ဂ့ၢ်ဘၣ်ထွဲလိာ်သး လၢအအိၣ်လၢ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ အပူၤ. လၢတၢ်ဂ့ၢ်ခိၣ်တီ လၢအမ့ၢ် “တၢ်ဂ့ၢ်ဘၣ်ထွဲလိာ်သး” အပူၤန့ၣ် အိၣ်ဒီးဟီၣ်ခိၣ်ဂီၤ, စရီ ဒီးတၢ်ကတိၤတဖၣ်အခီပညီ လၢအကမၤစၢၤနၤ ဒ်သိးနဖးလံာ်စီဆှံ ကမုာ်ဒိၣ်ထီၣ်.

၅. ကတဲာ်ကတီၤဆိပာ်စၢၤနသး လၢနတၢ်မၤလိ လံာ်စီဆှံအဂီၢ်

ဖး စံးထီၣ်ပတြၢၤ ၁၁၉:၃၄ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• တချုးလၢ နဖးလံာ်စီဆှံ ဒီးကတဲာ်ကတီၤပာ်စၢၤ နတၢ်မၤလိ လၢလံာ်တဘ့ၣ်အံၤ အဂီၢ်ဒံးဘၣ်န့ၣ် ဘၣ်မနုၤအဃိ နကြၢးဃ့ထုကဖၣ်လဲၣ်.

ဒ်သိး နတၢ်မၤလိလံာ်စီဆှံ ကကဲဘျုး လၢလၢပှဲၤပှဲၤအဂီၢ် ကိးဘျီဒဲး တချုးလၢနမၤလိ လံာ်တဘ့ၣ်အံၤ ဒံးဘၣ်န့ၣ် နကဘၣ်မၤဒ်လဲၣ်. ဖဲနကတဲာ်ကတီၤပာ်စၢၤနသး လၢတၢ်မၤလိ တခါခါအဂီၢ်န့ၣ် မၤကွၢ် တၢ်ဟ့ၣ်ကူၣ် လၢလာ်တဖၣ်အံၤ–

1. ၁. ဖးလံာ်အဆၢတဖၣ် လၢအအိၣ်လၢ အဆိကတၢၢ်တကူာ် လၢတၢ်မၤလိအပူၤ.

2. ၂. အိးထီၣ်ဖး လံာ်စီဆှံအဆၢတဖၣ် ဒီးလံာ်စီဆှံအဆၢတဖၣ် ဘၣ်ထွဲလိာ်အသးဒီး တၢ်ဂ့ၢ်တၢ်ကျိၤဒ်လဲၣ်န့ၣ် ဆိကမိၣ်ကွၢ်အီၤ.

3. ၃. တိၤနီၣ်ဃာ် တၢ်စံးဆၢ ဒီးတၢ်ကတိၤ လၢအရ့ဒိၣ်တဖၣ်. နမ့ၢ်မၤဒ်န့ၣ်န့ၣ် ကညီဝဲလၢ နကတဲသကိးတၢ်ဒီး ပှၤလၢအမၤလိနၤလံာ်စီဆှံ.

မ့ၢ်နသ့ၣ်ညါဧါ

ယဟိဝၤပှၤအုၣ်အသးတဖၣ် သူတ့ၢ်ဝဲ တၢ်ကွဲးကျိာ်ထံ လံာ်စီဆှံအါခါ. ဘၣ်ဆၣ် တၢ်ကွဲးကျိာ်ထံ လံာ်စီဆှံ လၢပဖးအီၤမုာ်ဒိၣ်ကတၢၢ်န့ၣ် မ့ၢ်ဝဲ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ မ့ၢ်လၢ တၢ်ဂ့ၢ်တၢ်ကျိၤန့ၣ် ဘၣ်ဝဲလီၤတံၢ်လီၤဆဲး, ပဖးအီၤမုာ်ဒိၣ် ဒီးအအိၣ်ဒီး ကစၢ်ယွၤအမံၤ.​—ကွၢ်တၢ်ဂ့ၢ် လၢအအိၣ်လၢ online အဖီခိၣ် လၢအခိၣ်တီမ့ၢ်ဝဲ “မ့ၢ်ယဟိဝၤပှၤအုၣ်အသးတဖၣ် အိၣ်ဒီးအလံာ်စီဆှံ လီၤလီၤဆီဆီဧါ”

တၢ်ဂ့ၢ်လၢအရ့ဒိၣ်

ဒ်သိး နတၢ်ဖးလံာ်စီဆှံ ကကဲဘျုး လၢလၢပှဲၤပှဲၤ အဂီၢ် ပာ်ပနီၣ်ဃာ် တၢ်ဆၢကတီၢ် လၢနကဖးအီၤ, ဃ့ထုကဖၣ် ဒ်သိးနကနၢ်ပၢၢ် တၢ်လၢနဖးအီၤ ဒီးကတဲာ်ကတီၤပာ်စၢၤနသး လၢနတၢ်မၤလိ လံာ်စီဆှံအဂီၢ်.

တၢ်ကွၢ်ကဒါက့ၤ

• ဒ်သိး နတၢ်ဖးလံာ်စီဆှံ ကကဲဘျုး လၢလၢ ပှဲၤပှဲၤအဂီၢ် တၢ်မနုၤ ကမၤစၢၤနၤလဲၣ်.

• နပာ်ပနီၣ်ဃာ် တၢ်ဆၢကတီၢ် လၢနကဖးဒီး မၤလိလံာ်စီဆှံ သ့လၢအဆၢကတီၢ်ဖဲလဲၣ်.

• ကိးဘျီဒဲး တချုးလၢနမၤလိ လံာ်တဘ့ၣ်အံၤ ဒံးဘၣ်န့ၣ် ဘၣ်မနုၤအဃိ နကဘၣ် ကတဲာ်ကတီၤဆိပာ်စၢၤလဲၣ်.

ဃုသ့ၣ်ညါ

ကွၢ်ကဒါက့ၤ တၢ်ဟ့ၣ်ကူၣ်တနီၤ လၢက မၤစၢၤနၤဒ်သိး နတၢ်ဖးလံာ်စီဆှံန့ၣ် ကကဲဘျုးလၢနဂီၢ်.

“တၢ်ဖးလံာ်စီဆှံ ကဲဘျုးလၢနဂီၢ် ကသ့ဒ်လဲၣ်” (တၢးထီခိးတၢ်, နီၣ်ဂံၢ် ၁ ၂၀၁၇)

ဃုသ့ၣ်ညါ တၢ်ဂ့ၢ်သၢမံၤ လၢအက မၤစၢၤနၤ ဒ်သိးနကဖးလံာ်စီဆှံ.

“လံာ်စီဆှံ မၤစၢၤယၤ ကသ့ဒ်လဲၣ်​—အကူာ် ၁– ဃုသ့ၣ်ညါ နလံာ်စီဆှံ” (တၢ်မၤလိလၢ အအိၣ်လၢ online အဖီခိၣ်)

ဒ်သိး နဖးလံာ်စီဆှံကမုာ်အဂီၢ် နကဘၣ်မၤဒ်လဲၣ်န့ၣ် ဃုသ့ၣ်ညါကွၢ်.

“လံာ်စီဆှံ မၤစၢၤယၤ ကသ့ဒ်လဲၣ်​—အကူာ် ၂– ဃုကျဲဒ်သိး နဖးလံာ်စီဆှံကမုာ်” (တၢ်မၤလိလၢ အအိၣ်လၢ online အဖီခိၣ်)

ကွၢ်တၢ်ဂီၤမူ ဒီးဟံးန့ၢ်တၢ်ဟ့ၣ်ကူၣ်လၢ ပှၤလၢအဖးလံာ်စီဆှံ လၢအနံၣ်အါမး တဖၣ်အအိၣ်.

နီၢ်ကစၢ် တၢ်မၤလိလံာ်စီဆှံလၢ အထုးန့ၢ်ပသး (၂:၀၆)