မၤတၢ်ဆၢတဲာ်တဖၣ်လၢ အမၤလၤကပီၤ ကစၢ်ယွၤ
“မ့မ့ၢ် ပှၤကူၣ်တၢ်သ့န့ၣ် ဆိကမိၣ်ထံ အခီၣ်ခါ ကိးခါဒဲးလီၤ.” —ကတိၤဒိ ၁၄:၁၅
၁, ၂. (က) ဖဲပမၤတၢ်ဆၢတဲာ်အခါ တၢ်ဂ့ၢ်လၢအရ့ဒိၣ်လၢ ပကဘၣ်ပာ်သူၣ်ပာ်သးအီၤန့ၣ် မ့ၢ်မနုၤလဲၣ်. (ခ)ပကတဲသကိး တၢ်သံကွၢ် မနုၤသ့ၣ်တဖၣ်လဲၣ်.
တနံၤဘၣ်တနံၤန့ၣ် ပဝဲသ့ၣ်တဖၣ် ပကဘၣ်မၤ တၢ်ဆၢတဲာ်ဒီဒူၣ်ညါ. တၢ်ဆၢတဲာ်တနီၤနီၤန့ၣ် မ့ၢ်တၢ်ဆၢတဲာ်လၢအဆံး ဒီးအရ့တဒိၣ်အါအါဘၣ်. ဘၣ်ဆၣ်တၢ်ဆၢတဲာ်တနီၤနီၤခီန့ၣ် မ့ၢ်တၢ်ဆၢတဲာ်လၢအဒိၣ် ဒီးအရ့ဒိၣ်လၢပတၢ်အိၣ်မူအပူၤ. ဒီးတၢ်ဆၢတဲာ်လၢပမၤအီၤ အဒိၣ်မ့ၢ်ဂ့ၤအဆံးမ့ၢ်ဂ့ၤ ကဘၣ်မ့ၢ်တၢ်လၢ အကဲထီၣ် တၢ်မၤလၤကပီၤကစၢ်ယွၤ.—၁ ကရံၣ်သူး ၁၀:၃၁.
၂ နကမၤတၢ်ဆၢတဲာ်အဂီၢ် မ့ၢ်အညီလၢနဂီၢ်ဧါ မ့တမ့ၢ် အကီလၢနဂီၢ်ဧါ. ဒ်သိးပကကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤတဂၤအဂီၢ် ဖဲပဘၣ်မၤတၢ်ဆၢတဲာ်အခါ ပဂုာ်ကျဲးစၢးမၤ တၢ်ဆၢတဲာ်လၢအဘၣ်. ဒီးတၢ်ဆၢတဲာ်တဖၣ်လၢပမၤအီၤန့ၣ် ကဘၣ်လီၤပလိာ်လိာ်အသးဒီး တၢ်လၢပနာ်အီၤ ဒီးတဘၣ်မ့ၢ် ပဟးမၤပိာ်ပှၤဂၤအခံဘၣ်. (ရိမ့ၤ ၁၂:၁, ၂; ဧ့ၤဘြံၤ ၅:၁၄) တၢ်မနုၤ ထိၣ်ဟူးထိၣ်ဂဲၤထီၣ်ပှၤလၢ ပကမၤ တၢ်ဆၢတဲာ်လၢအဘၣ်လဲၣ်. တဘျီတခီၣ် ပကမၤတၢ်ဆၢတဲာ်ဒ်န့ၣ်အဂီၢ် ဘၣ်မနုၤအဃိကီလဲၣ်. တၢ်ဆၢတဲာ်တဖၣ်လၢ ပမၤအီၤန့ၣ် ဒ်သိးကကဲထီၣ် တၢ်မၤလၤကပီၤ ကစၢ်ယွၤအဂီၢ် ပကဘၣ်မၤဒ်လဲၣ်.
ဘၣ်မနုၤအဃိ ပဘၣ်မၤ တၢ်ဆၢတဲာ်တဖၣ်လဲၣ်.
၃. ဖဲပမၤတၢ်ဆၢတဲာ်အခါ ပတဘၣ်ပျဲ တၢ်မနုၤသ့ၣ်တဖၣ် မၤတံာ်တာ်ပှၤဘၣ်လဲၣ်.
၃ ဖဲပဘၣ်မၤတၢ်ဆၢတဲာ်အခါ ပမ့ၢ်တနၢ်ပၢၢ် လံာ်စီဆှံတၢ်သိၣ်တၢ်သီ ဒီးပသးမ့ၢ်ဒ့ဒီန့ၣ် ပသကိးလၢကၠိမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဖဲအဝဲသ့ၣ်ထံၣ်ဝဲအခါ ကတဲဝဲလၢ ပတၢ်စူၢ်တၢ်နာ် တဂၢၢ်တကျၢၤဘၣ်အဃိ အဝဲသ့ၣ်ကွဲန့ၢ်လွဲန့ၢ်ပှၤ ကန့ၢ်ညီညီလီၤ. ဒီးအဝဲသ့ၣ်န့ၣ် ကတဲလံၣ်တဲလီတၢ်, ကဟုၣ်တၢ်ဘျၣ်တၢ် ဒီးဘၣ်သ့ၣ်သ့ၣ် အဝဲသ့ၣ်ကမၢပ “မၤပိာ် ပှၤဂီၢ်မုၢ်အခံ” မ့တမ့ၢ် အဝဲသ့ၣ်ကမၢပှၤလၢ ပကမၤဘံၣ်မၤဘၢ အဝဲသ့ၣ်အတၢ်ကမၣ်. (၂ မိၤၡ့ ၂၃:၂) ဘၣ်ဆၣ် မ့မ့ၢ်ပှၤလၢ အအဲၣ်ကစၢ်ယွၤန့ၣ် ကမၤတၢ်ဆၢတဲာ်လၢ အမၤလၤကပီၤယွၤ ဒီးအတပျဲဝဲ တၢ်ပျံၤပှၤဂၤမ့ၢ်ဂ့ၤ တၢ်လူၤဘၣ် အသကိးအသးမ့ၢ်ဂ့ၤ ဒိၣ်စိလၢ အသးလၢအသ့ၣ်ညါဒၣ်တၢ် အဖီခိၣ်ဘၣ်.—ရိမ့ၤ ၁၃:၅.
၄. ဘၣ်မနုၤအဃိ ပှၤအဂၤတဖၣ် အဲၣ်ဒိးမၤန့ၢ် တၢ်ဆၢတဲာ်တဖၣ်လၢ ပဂီၢ်လဲၣ်.
၄ ပှၤလၢအဲၣ်ဒိးမၤန့ၢ် တၢ်ဆၢတဲာ်လၢပဂီၢ်တဖၣ်န့ၣ် တမ့ၢ်လၢ အကအဲၣ်ဒိးမၤဘၣ်ဒိပသး ကိးဂၤဒဲးဘၣ်. ပသကိးတနီၤနီၤန့ၣ် အအဲၣ်ဒိးမၤစၢၤပှၤအဃိ အဝဲသ့ၣ်အဲၣ်ဒိးလၢ ပကမၤပိာ်အခံ. ပဝဲသ့ၣ်တဖၣ် ပမ့ၢ်အိၣ်လီၤဆီဒီး ပမိၢ်ပပၢ် ဒီးပဘူးပတံၢ်သနာ်က့ ဖဲပကဘၣ်မၤတၢ်ဆၢတဲာ်လၢ အရ့ဒိၣ်တဖၣ်အခါ အဝဲသ့ၣ်တဖၣ် အဲၣ်ဒိးပၣ်ဃုာ်လၢပကျါလီၤ. အဒိ ဆိကမိၣ်ကွၢ်ဘၣ်ဃးဒီး တၢ်ကူဆါယါဘျါအဂ့ၢ်. ပမ့ၢ်ကွၢ်န့ၣ် လံာ်စီဆှံတဲပှၤလၢ ပကဘၣ်ဟးဆှဲးတၢ်သွံၣ်. (မၤတၢ် ၁၅:၂၈, ၂၉) တၢ်ဂ့ၢ်တၢ်ကျိၤအဂၤလၢ အဘၣ်ဃးဒီး တၢ်ကူဆါယါဘျါအဂ့ၢ်န့ၣ် တၢ်ဟံးစုနဲၣ်ကျဲလီၤတံၢ်လီၤဆဲး တအိၣ်ဘၣ်အဃိ ပှၤတဂၤစုာ်စုာ် ကဘၣ်မၤဝဲတၢ်ဆၢတဲာ်လၢ အကတူၢ်လိာ် တၢ်ကူဆါယါဘျါ မနုၤလဲၣ် ဒီးကဂ့ၢ်လိာ်ဝဲတၢ်မနုၤလဲၣ်. ဘၣ်ဃးဒီး တၢ်ဂ့ၢ်သ့ၣ်တဖၣ်အံၤန့ၣ် ပဟံၣ်ဖိဃီဖိ ဒီးပဘူးပတံၢ်သ့ၣ်တဖၣ် အတၢ်ထံၣ်ကအိၣ်ဝဲ အကလုာ်ကလုာ်သ့. ဘၣ်ဆၣ် တၢ်ဆၢတဲာ်လၢ အဘၣ်ဃးဒီး တၢ်ဂ့ၢ်သ့ၣ်တဖၣ်အံၤန့ၣ် ခရံာ်ဖိလၢ အဘျၢထံဝံၤတဂၤစုာ်စုာ်န့ၣ် “ကဘၣ်ဝံ အနီၢ်ကစၢ် အတၢ်ဝံတၢ်ယိးလီၤ.” (ကလၤတံ ၆:၄, ၅) ပမၤဒ်အံၤန့ၣ် မ့ၢ်ဒ်သိး ပကအိၣ်ဒီးသးလၢ အသ့ၣ်ညါဒၣ်တၢ်လၢ အကဆှီလၢ ကစၢ်ယွၤအမဲာ်ညါ အဂီၢ်လီၤ.—၁ တံၤမသ့း ၁:၅.
၅. ပတၢ်နာ် သုတဟးဂီၤတဂ့ၤအဂီၢ် ပကဘၣ်မၤဒ်လဲၣ်.
၅ တၢ်ဆၢတဲာ်လၢ ပမၤအီၤလၢ တၢ်သးဒ့ဒီအပူၤန့ၣ် ကဲထီၣ်တၢ်လီၤဘၣ်ယိၣ်သ့. စီၤယၤကိာ် ကွဲးဖျါထီၣ်ဝဲလၢ ပှၤလၢအသးဒ့ဒီတဖၣ်န့ၣ် “ကဒံကဒါဝဲလၢ အကျဲခဲလၢာ်အပူၤလီၤ.” (ယၤကိာ် ၁:၈) အဝဲန့ၣ် ကလီၤဂာ်ဒ်ကဘီတဘ့ၣ်လၢ အနီၣ်ဝၢ်တအိၣ်ဘၣ် လၢအလဲၤတၢ်လၢ ပီၣ်လဲၣ်ပူၤ ဖဲကလံၤမုၢ်လီၤဝဲ အဆၢကတီၢ် ဒီးပှၤဒ်န့ၣ်သ့ၣ်တဖၣ်န့ၣ် ဖဲအထံၣ်ဘၣ်တၢ်မၤကွၢ်အခါ အတၢ်နာ်ဟးဂီၤဝဲညီ ဒီးအကပာ်ဒ့ၣ်ပာ်ကမၣ် ပှၤဂၤလၢ အတၢ်ကီတၢ်ခဲအဃိလီၤ. (၁ တံၤမသ့း ၁:၁၉) ဒ်သိးပသု တကဲထီၣ်ဒ်န့ၣ်တဂ့ၤအဂီၢ် ပကဘၣ်မၤဒ်လဲၣ်. ပကဘၣ် ‘မၤဂၢၢ်မၤကျၢၤပတၢ်နာ်လီၤ.’ (ဖး ကလီးစဲ ၂:၆, ၇.) ဒ်သိးပတၢ်နာ်ကဂၢၢ်ကကျၢၤ ဒီးပသုတကဒံကဒါ တဂ့ၤအဂီၢ် ပကဘၣ်မၤတၢ်ဆၢတဲာ်လၢ အလီၤပလိာ်ဒီး လံာ်စီဆှံအတၢ်ဟံးစုနဲၣ်ကျဲ. (၂ တံၤမသ့း ၃:၁၄-၁၇) ဘၣ်ဆၣ် ဒ်သိးပမၤတၢ်ဆၢတဲာ်လၢအဘၣ် သုတသ့တဂ့ၤအဂီၢ် တၢ်လၢအမၤတံာ်တာ်ပှၤန့ၣ် မ့ၢ်မနုၤလဲၣ်.
တၢ်ဆၢတဲာ်တဖၣ်န့ၣ် ဘၣ်မနုၤအဃိ ပမၤဘၣ်အီၤကီလဲၣ်
၆. တၢ်ပျံၤတၢ်ဖုး မၤဘၣ်ဒိပှၤသ့ဒ်လဲၣ်.
၆ ဘၣ်သ့ၣ်သ့ၣ် ပကဘၣ်ယိၣ်တၢ်လၢ ပတၢ်ဆၢတဲာ်န့ၣ် ကကမၣ်ဘၣ်ဖုးအဃိ မ့တမ့ၢ် ပဘၣ်ယိၣ်လၢ ပှၤကဆိကမိၣ်ဆံးပှၤအဃိ ပမၤတၢ်ဆၢတဲာ် တဘူၣ်ဘၣ်. နမ့ၢ်ဘၣ်ယိၣ်တၢ်ဒ်န့ၣ်န့ၣ် ပနၢ်ပၢၢ်သ့. ပဝဲသ့ၣ်တဖၣ် ပတအဲၣ်ဒိးမၤ တၢ်ဆၢတဲာ်လၢ အကကဲထီၣ် တၢ်ကီတၢ်ခဲ ဒီးတၢ်မဲာ်ဆှး လၢပဂီၢ်ဘၣ်. ဘၣ်ဆၣ် ပတၢ်အဲၣ်ကစၢ်ယွၤ ဒီးအကလုၢ်ကထါန့ၣ် မၤစၢၤပှၤဒ်သိး ပမၤနၢၤကွံာ် ပတၢ်ပျံၤတၢ်ဖုးအံၤ ကသ့ဒ်လဲၣ်. တချုးလၢ ပမၤတၢ်ဆၢတဲာ်လၢ အရ့ဒိၣ်တဖၣ်ဒံးဘၣ်န့ၣ် ပတၢ်အဲၣ်ယွၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကဃုသ့ၣ်ညါ တၢ်ဂ့ၢ်တၢ်ကျိၤလၢ လံာ်စီဆှံဒီးလံာ်လဲၢ်လၢ ပတၢ်ကရၢကရိ ထုးထီၣ်ဝဲတဖၣ်အပူၤ. ပမ့ၢ်မၤဒ်န့ၣ်န့ၣ် ပဆၢတဲာ်တၢ်လၢ အဘၣ်ကသ့ဝဲလီၤ. ဘၣ်မနုၤအဃိ ပတဲဒ်အံၤလဲၣ်. မ့ၢ်လၢ လံာ်စီဆှံန့ၣ် “ကမၤစၢၤ ပှၤလၢအတၢ်လဲၤခီဖျိစှၤတဂၤ ဒ်သိး ကကဲထီၣ် ပှၤလၢအသူၣ်ဆးသးဆး ဒီးဒ်သိး ပှၤသးစၢ်တဖၣ် ကန့ၢ်ဘၣ် တၢ်သ့ၣ်ညါ ဒီးတၢ်သ့ပဲာ်ထံနီၤဖးတၢ် အဂီၢ်လီၤ.”—ကတိၤဒိ ၁:၄.
၇. စီၤဒၤဝံး အဒိအတဲာ်န့ၣ် သိၣ်လိပှၤ တၢ်မနုၤလဲၣ်.
၇ တၢ်ဆၢတဲာ်လၢပမၤတဖၣ်န့ၣ် မ့ၢ်အဘၣ်ကိးဘျီဒဲးဧါ. တဘၣ်ကိးဘျီဒဲးဘၣ်. ပဝဲကိးဂၤဒဲး ပမၤကမၣ်တၢ်သ့. (ရိမ့ၤ ၃:၂၃) အဒိ စီၤပၤဒၤဝံးန့ၣ် မ့ၢ်ပှၤလၢ အကူၣ်တၢ်သ့ ဒီးအိၣ်ဒီးတၢ်သးတီတဂၤလီၤ. ဘၣ်ဆၣ် အမၤဘၣ် တၢ်ဆၢတဲာ်တနီၤလၢ အကမၣ်အဃိ ကဲထီၣ်တၢ်ကီတၢ်ခဲလၢအဂီၢ် ဒီးပှၤဂၤအဂီၢ်. (၂ ၡမူၤအ့လး ၁၂:၉-၁၂) အဝဲမၤဘၣ်တၢ်ကမၣ် သနာ်က့ အတပျဲဝဲ အတၢ်ကမၣ်လၢအပူၤကွံာ်တဖၣ် မၤတံာ်တာ်အီၤလၢ အကဆဲးမၤတၢ်ဆၢတဲာ်လၢ အဘၣ်ကစၢ်ယွၤအသး အဂီၢ်ဘၣ်. (၁ စီၤပၤ ၁၅:၄, ၅) ဒ်စီၤဒၤဝံးအသိး ပမ့ၢ်မၤဘၣ် တၢ်ကမၣ်လၢအပူၤကွံာ် သနာ်က့ ပမ့ၢ်သ့ၣ်နီၣ်ထီၣ်က့ၤလၢ ယဟိဝၤယွၤန့ၣ် ကွၢ်ကပာ် ပတၢ်လီၤတူာ်လီၤကာ် ဒီးပျၢ်ကွံာ် ပတၢ်ဒဲးဘးန့ၣ် ပဆဲးမၤတၢ်ဆၢတဲာ်လၢအဘၣ်သ့. အစၢ်ယွၤန့ၣ် ကဆဲးဆီၣ်ထွဲမၤစၢၤဝဲ ပှၤလၢအအဲၣ်အီၤ ဒီးဒိကနၣ်အကလုၢ်လီၤ.—စံးထီၣ်ပတြၢၤ ၅၁:၁-၄, ၇-၁၀.
၈. စီၤပီလူးအတၢ်ဟ့ၣ်ကူၣ် လၢအဘၣ်ဃးဒီး တၢ်ဆီဟံၣ်ဆီဃီန့ၣ် ပမၤလိန့ၢ်ဘၣ် တၢ်မနုၤလဲၣ်.
၈ ပကမၤတၢ်ဆၢတဲာ်အဂီၢ် ပဘၣ်ယိၣ်တၢ်သ့ ဘၣ်ဆၣ် ကျဲလၢကမၤလီၤစှၤ ပတၢ်ဘၣ်ယိၣ်ဘၣ်ဘှီန့ၣ်အိၣ်ဝဲ. ပကဘၣ်နၢ်ပၢၢ်လၢ ပမၤတၢ်ဆၢတဲာ်လၢ အဘၣ်ကသ့အဂီၢ်န့ၣ် ကျဲတအိၣ်ထဲတဘိဘၣ်. အဒိ ဆိကမိၣ်ကွၢ် စီၤပီလူး ကွဲးဝဲဘၣ်ဃးဒီး တၢ်ဆီဟံၣ်ဆီဃီအဂ့ၢ်. ဒီးအဝဲကွဲးဖျါထီၣ်ဝဲလၢ “ဘၣ်ဆၣ် ပှၤတဂၤဂၤ မ့ၢ်ဆိကမိၣ်လၢ အဝဲတကြၢးအိၣ်ဒ် ပှၤသဘျ့အသိးလၢၤဘၣ် ဒီးအဝဲမ့ၢ်လဲၤပူၤကွံာ် ပှၤသးစၢ်အတၢ်သးကတၢ အသဟီၣ်ဆူၣ်အကတီၢ်န့ၣ် အဝဲကြၢးမၤဝဲဒ်အံၤလီၤ. အဝဲမ့ၢ်အဲၣ်ဒိး ဖျီအသးန့ၣ် မ်အဝဲဖျီအသးတက့ၢ်. တမ့ၢ်လၢ အဝဲမၤတၢ်ဒဲးဘးဘၣ်. ဘၣ်ဆၣ် ပှၤတဂၤ မ့ၢ်ပာ်လီၤအသးလၢ အတဆီဟံၣ်ဆီဃီဘၣ် ဒီးမ့ၢ်ဆၢတဲာ်လီၤအသးဒ်န့ၣ် မ့ၢ်လၢအတူၢ်ဘၣ်လၢ အတလိၣ်ဆီဟံၣ်ဆီဃီဘၣ် ဒီးအဝဲပၢၤဃာ် အတၢ်သးကွံ မ့ၢ်န့ၢ်န့ၣ် အတၢ်ဆၢတဲာ်ဂ့ၤဝဲလီၤ.” (၁ ကရံၣ်သူး ၇:၃၆-၃၈) စီၤပီလူး တဲဝဲလၢ တၢ်အိၣ်သဘျ့န့ၣ် မ့ၢ်ကျဲလၢအဂ့ၤကတၢၢ်တဘိ ဘၣ်ဆၣ် တမ့ၢ်ထဲလၢ ကျဲအဘၣ်ကတၢၢ်တဘိဘၣ်.
၉. တၢ်ဆၢတဲာ်လၢပမၤန့ၣ် မ့ၢ်ပလိၣ်ဘၣ်ယိၣ်လၢ ပှၤဂၤကထံၣ်ပှၤ ဒ်လဲၣ်ဒ်လဲၣ်စ့ၢ်ကီးဧါ. ၡဲပၠးတက့ၢ်.
၉ တၢ်ဆၢတဲာ်လၢ ပမၤန့ၣ် မ့ၢ်ပလိၣ်ဘၣ်ယိၣ်လၢ ပှၤဂၤကထံၣ်ပှၤဒ်လဲၣ်ဒ်လဲၣ် စ့ၢ်ကီးဧါ. မ့ၢ်, ပကြၢးဘၣ်ယိၣ်ဝဲ. ပာ်သူၣ်ပာ်သး တၢ်လၢစီၤပီလူးတဲဝဲ ဘၣ်ဃးဒီးတၢ်အီၣ်တၢ်အီတဖၣ်လၢ ပှၤလုၢ်ထီၣ်အီၤလၢ တၢ်ဂီၤတၢ်ဖှီၣ် န့ၣ်တက့ၢ်. အဝဲတဲဝဲလၢ တၢ်ဆၢတဲာ်လၢ ပှၤကအီၣ်တၢ်အီၣ်တၢ်အီ ဒ်န့ၣ်တဖၣ်န့ၣ် တမ့ၢ်တၢ်လၢ အကမၣ်ဘၣ်. ဘၣ်ဆၣ် ပှၤလၢအသးလၢ အသ့ၣ်ညါဒၣ်တၢ် အဂံၢ်စၢ်ဘါစၢ်တဖၣ် မ့ၢ်ထံၣ်ဝဲန့ၣ် ကဲထီၣ်တၢ်လီၤဃံၢ်သ့. မ့မ့ၢ် စီၤပီလူးမီၤ အမၤဝဲဒ်လဲၣ်. အဝဲတဲဝဲလၢ “ဒ်သိးယသုတမၤလီၤဃံၢ် ယဒီပုၢ်ဝဲၢ်တဂ့ၤအဂီၢ် တၢ်အီၣ်မ့ၢ်ကဲထီၣ် တၢ်လီၤဃံၢ်အလီၢ်လၢ ယဒီပုၢ်ဝဲၢ်အဂီၢ်န့ၣ် ယတအီၣ် တၢ်ဖံးတၢ်ညၣ် နီတစဲးလၢၤဘၣ်.” (၁ ကရံၣ်သူး ၈:၄-၁၃) ပဝဲစ့ၢ်ကီး ပကဘၣ်ဆိကမိၣ်ထံလၢ ပတၢ်ဆၢတဲာ်န့ၣ် မ့ၢ်ကမၤဘၣ်ဒိပှၤဂၤ အသးလၢအသ့ၣ်ညါဒၣ်တၢ် စ့ၢ်ကီးဧါ. ဘၣ်ဆၣ် တၢ်လၢအရ့ဒိၣ်န့ၣ် ပကဘၣ်ပလီၢ်ပသးလၢ တၢ်ဆၢတဲာ်လၢပမၤအီၤန့ၣ် အသုတမၤဘၣ်ဒိ ပတၢ်ရ့လိာ်သးဒီး ယဟိဝၤယွၤတဂ့ၤ. (ဖး ရိမ့ၤ ၁၄:၁-၄.) ဒ်သိးပကမၤတၢ်ဆၢတဲာ်လၢ အကမၤလၤကပီၤ ကစၢ်ယွၤအဂီၢ် လံာ်စီဆှံ အတၢ်ဟံးစုနဲၣ်ကျဲမနုၤတဖၣ် ကမၤစၢၤပှၤလဲၣ်.
ကျဲဃုဘိလၢ ကမၤစၢၤပှၤ ဒ်သိးပကမၤတၢ်ဆၢတဲာ် လၢအဘၣ်
၁၀, ၁၁. (က)ပဟးဆှဲး တၢ်ပာ်ထီၣ်ထီသးလၢ ဟံၣ်ပူၤဃီပူၤ ကသ့ဒ်လဲၣ်. (ခ) တၢ်အိၣ်ဖှိၣ်သးပှၢ်တဖၣ်စ့ၢ်ကီး ဖဲအမၤတၢ်ဆၢတဲာ်လၢ တၢ်အိၣ်ဖှိၣ်အဂီၢ်အခါ ကဘၣ်ပာ်သူၣ်ပာ်သး တၢ်ဂ့ၢ်မနုၤလဲၣ်.
၁၀ ဟးဆှဲးတၢ်ပာ်ထီၣ်ထီသး. တချုးလၢပမၤ တၢ်တခါခါဒံးဘၣ်န့ၣ် ပကြၢးသံကွၢ်လီၤပသးလၢ “မ့ၢ်ယအိၣ်ဒီးတၢ်ခွဲးတၢ်ယာ်လၢ ယကမၤတၢ်ဆၢတဲာ်အံၤဧါ.” စီၤပၤၡလိၤမိၤ ကွဲးဝဲလၢ “ဖဲပှၤတဂၤ ပာ်ထီၣ်ထီအသးအခါ အကဒိးန့ၢ်ဘၣ် တၢ်မဲာ်ဆှးလီၤ. မ့မ့ၢ် ပှၤလၢအဆီၣ်လီၤသးန့ၣ် အိၣ်ဒီး တၢ်ကူၣ်သ့လီၤ.”—ကတိၤဒိ ၁၁:၂.
၁၁ မိၢ်ပၢ်တဖၣ် ကဟ့ၣ်ဝဲအဖိတဖၣ် တၢ်ခွဲးတၢ်ယာ်တနီၤလၢ ကမၤဝဲတၢ်ဆၢတဲာ် ဘၣ်ဆၣ်ဖိတဖၣ် တကြၢးဟံးန့ၢ် တၢ်ခွဲးတၢ်ယာ် အါန့ၢ်ဒံးတၢ်လၢ အဒိးန့ၢ်ဘၣ်ဝဲတဖၣ်ဘၣ်. (ကလီးစဲ ၃:၂၀) မိၢ် မ့တမ့ၢ် မါတဖၣ်န့ၣ် အိၣ်ဒီးတၢ်စိတၢ်ကမီၤတနီၤလၢ ဟံၣ်ပူၤဃီပူၤ ဘၣ်ဆၣ် အဝဲသ့ၣ်ကဘၣ်သ့ၣ်ညါဝဲလၢ အဝၤန့ၣ် မ့ၢ်ဝဲဟံၣ်ခိၣ်လီၤ. (ကတိၤဒိ ၁:၈; ၃၁:၁၀-၁၈; အ့းဖ့းစူး ၅:၂၃) ဒ်န့ၣ်အသိး ဝၤတဖၣ်စ့ၢ်ကီး ကဘၣ်သ့ၣ်ညါဝဲလၢ အတၢ်စိကမီၤအိၣ်ထဲအကြၢးအဘၣ် ဒီးယ့ၣ်ၡူးန့ၣ် မ့ၢ်ဝဲအဝဲသ့ၣ်အခိၣ်လီၤ. (၁ ကရံၣ်သူး ၁၁:၃) တၢ်အိၣ်ဖှိၣ်သးပှၢ်တဖၣ်စ့ၢ်ကီး မၤတၢ်ဆၢတဲာ်လၢတၢ်အိၣ်ဖှိၣ်အဂီၢ်သ့ ဘၣ်ဆၣ် အဝဲသ့ၣ် “တဘၣ်မၤအါန့ၢ်ဒံး တၢ်ကွဲးအသးတဖၣ် အိၣ်ဝဲအသိး” ဘၣ်. (၁ ကရံၣ်သူး ၄:၆) ဒီးတၢ်အိၣ်ဖှိၣ်သးပှၢ်တဖၣ်န့ၣ် ကဘၣ်မၤထွဲဝဲ ကုၢ်လၢအကလုၢ်တီတဖၣ် အတၢ်ဟံးစုနဲၣ်ကျဲလီၤ. (မးသဲ ၂၄:၄၅-၄၇) ပမ့ၢ်မၤတၢ်ဆၢတဲာ် ထဲဒၣ်လၢ ပကြၢးမၤန့ၣ် ပတၢ်သူၣ်ကိၢ်သးဂီၤကလီၤစှၤ ဒီးပတဒုးအိၣ်ထီၣ် တၢ်သူၣ်ကိၢ်သးဂီၤလၢ ပှၤဂၤအဖီခိၣ် စ့ၢ်ကီးဘၣ်.
၁၂. (က)ဘၣ်မနုၤအဃိ ပကဘၣ် ဃုသ့ၣ်ညါအါထီၣ်တၢ်လဲၣ်. (ခ)နကၡဲပၠး ပှၤဂၤလၢ အကဃုသ့ၣ်ညါအါထီၣ်တၢ်ဒ်လဲၣ်.
၁၂ ဃုသ့ၣ်ညါအါထီၣ်တၢ်. စီၤၡလိၤမိၤကွဲးဝဲလၢ “တၢ်လၢပှၤခုတဖၣ် ရဲၣ်လီၤကျဲၤလီၤဝဲန့ၣ် ကကဲထီၣ်လိၣ်ထီၣ်ဝဲ သပှၢ်တၢၢ်, မ့မ့ၢ် ပှၤလၢအမၤကရီတၢ်န့ၣ် ကဖှီၣ်လီၤယာ်လီၤဝဲ သပှၢ်တၢၢ်လီၤ.” (ကတိၤဒိ ၂၁:၅) ဆိကမိၣ်ကွၢ်လၢ နကမၤစံပွါယ့တခါ. ဘၣ်ဆၣ် တဘၣ်ပျဲလၢ နတၢ်သူၣ်ပိၢ်သးဝး ဒိၣ်စိလၢနဖီခိၣ်တဂ့ၤ. အဃိ တချုးလၢနမၤအီၤဒံးဘၣ်န့ၣ် ဃုသ့ၣ်ညါ တၢ်ဂ့ၢ်တၢ်ကျိၤလီၤတံၢ်လီၤဆဲး, ဃ့တၢ်မၤစၢၤလၢ ပှၤလၢအအိၣ်ဒီးတၢ်လဲၤခီဖျိတဖၣ်အအိၣ် ဒီးဃုသ့ၣ်ညါ လံာ်စီဆှံ အတၢ်ဟံးစုနဲၣ်ကျဲ လၢအဘၣ်ဃးဒီးတၢ်ဂ့ၢ်အံၤတက့ၢ်. (ကတိၤဒိ ၂၀:၁၈) ဃုသ့ၣ်ညါတၢ်ဂ့ၢ်တၢ်ကျိၤဝံၤ ကွဲးလီၤ တၢ်လၢနကဒိးန့ၢ်ဘၣ် ဒီးတၢ်လၢနကဘၣ်ဟ့ၣ်. ဘၣ်ဆၣ် တချုးလၢ နမၤတၢ်ဆၢတဲာ်ဒံးဘၣ်န့ၣ် ‘ဒွးဆိ တၢ်လၢာ်ဘူၣ်လၢာ်စ့ၤ’ တက့ၢ်. (လူၤကၣ် ၁၄:၂၈) နကဘၣ်ဆိကမိၣ်ထံ တၢ်ဆၢတဲာ်လၢနမၤန့ၣ် ကမၤဘၣ်ဒိ နတၢ်ဟဲနုာ် ဒီးနနီၢ်သးဧါ. ဒ်သိးနကသ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲးအဂီၢ် နကဘၣ်သူနတၢ်ဆၢကတီၢ်ဒီး နကဘၣ်ထဲးဂံၢ်ထဲးဘါ. နမ့ၢ်မၤဒ်န့ၣ်န့ၣ် နတဆၢတဲာ်တၢ်ကရီကဒးဘၣ် ဒီးနတထံၣ်ဘၣ် တၢ်ကီတၢ်ခဲစ့ၢ်ကီးဘၣ်.
၁၃. (က) ယၤကိာ် ၁:၅ န့ၣ်ဟ့ၣ်ဂံၢ်ဟ့ၣ်ဘါပှၤဒ်လဲၣ်. (ခ) ပမ့ၢ်ဃ့ထုကဖၣ်ဒ်သိး ပကန့ၢ်ဘၣ်တၢ်ကူၣ်သ့အဂီၢ်န့ၣ် အဘျုးကအိၣ်ဒ်လဲၣ်.
၁၃ ဃ့ထုကဖၣ်ဒ်သိး နကအိၣ်ဒီးတၢ်ကူၣ်သ့အဂီၢ်. ပမ့ၢ်ပျဲလၢ ယဟိဝၤယွၤ ကမၤစၢၤပှၤလၢ ပကမၤတၢ်ဆၢတဲာ်အဂီၢ်န့ၣ် ပတၢ်ဆၢတဲာ်တဖၣ် ကကဲထီၣ် တၢ်မၤလၤကပီၤအီၤလီၤ. စီၤယၤကိာ် ကွဲးဖျါထီၣ်ဝဲလၢ “ကစၢ်ယွၤသးအိၣ်ဟ့ၣ်ဝဲ ပှၤခဲလၢာ်လၢ တၢ်အါအါဂီၢ်ဂီၢ် ဒီးအတဒူပှၤဘၣ်. အဃိ သုဝဲတဂၤဂၤ မ့ၢ်လိၣ်ဘၣ်အါထီၣ် တၢ်ကူၣ်သ့န့ၣ် မ်အဆဲးဃ့တၢ်လၢ ကစၢ်ယွၤအအိၣ် ဒီးကစၢ်ယွၤ ကဟ့ၣ်လီၤအီၤလီၤ.” (ယၤကိာ် ၁:၅) ဒ်သိးပကမၤတၢ်ဆၢတဲာ်အဂီၢ် ပဝဲသ့ၣ်တဖၣ် ပသ့ၣ်ညါလၢ ပလိၣ်ဘၣ်တၢ်ကူၣ်သ့လၢ ယဟိဝၤယွၤအအိၣ် ဒီးတၢ်န့ၣ်အတမ့ၢ်တၢ်လၢ အလီၤမဲာ်ဆှးဘၣ်. (ကတိၤဒိ ၃:၅, ၆) ဘၣ်မနုၤအဃိလဲၣ်န့ၣ် ပမ့ၢ်သန့ၤပသးထဲလၢ ပနီၢ်ကစၢ်အတၢ်သ့တၢ်ဘၣ်န့ၣ် ပကျဲကမၣ်သ့. အဃိ ပဝဲသ့ၣ်တဖၣ် ပမ့ၢ်ဃ့ထုကဖၣ် ဒ်သိးပကန့ၢ်ဘၣ်တၢ်ကူၣ်သ့ ဒီးဃုကွၢ် လံာ်စီဆှံ အတၢ်ဟံးစုနဲၣ်ကျဲန့ၣ် မ့ၢ်ဒၣ်ပပျဲလၢ ကစၢ်ယွၤအသးစီဆှံ ကမၤစၢၤပှၤဒ်သိး ပကမၤတၢ်လၢအဘၣ်အဂီၢ်လီၤ.—ဧ့ၤဘြံၤ ၄:၁၂; ဖး ယၤကိာ် ၁:၂၂-၂၅.
၁၄. ဘၣ်မနုၤအဃိ ပတဘၣ် ထုးယံာ်ထုးနီၢ် ပသးဘၣ်လဲၣ်.
၁၄ မၤတၢ်ဆၢတဲာ်. နဃုသ့ၣ်ညါတၢ်ဂ့ၢ်တၢ်ကျိၤ လီၤတံၢ်လီၤဆဲး မ့ၢ်တဝံၤဒံးဘၣ် ဒီးဒ်သိးနကန့ၢ်ဘၣ်တၢ်ကူၣ်သ့အဂီၢ် နမ့ၢ်တဃ့ထုကဖၣ်ဘၣ်ဒံးဘၣ်န့ၣ် တဘၣ်မၤတၢ်ဆၢတဲာ်ဒံးတဂ့ၤ. ပှၤလၢကူၣ်တၢ်သ့န့ၣ် ‘ဆိကမိၣ်ထံအခီၣ်ခါလီၤ.’ (ကတိၤဒိ ၁၄:၁၅) ဒီးတဘၣ်ထုးယံာ်ထုးနီၢ် စ့ၢ်ကီးနသးလၢ နကမၤတၢ်ဆၢတဲာ်အဂီၢ်တဂ့ၤ. ပှၤလၢထုးယံာ်ထုးနီၢ်အသးတဖၣ်န့ၣ် ကထုးယံာ်အသး ဒ်သိးအသုတမၤ တၢ်ဆၢတဲာ်တဂ့ၤအဂီၢ်. (ကတိၤဒိ ၂၂:၁၃) ဘၣ်ဆၣ်လၢခံ အဝဲမ့ၢ်မၤတၢ်ဆၢတဲာ်ဘၣ်ဆၣ် အကမၢပှၤဂၤမၤန့ၢ်အီၤလီၤ.
၁၅, ၁၆. ပမၤဒ်ပတၢ်ဆၢတဲာ်အသိး ကသ့ဒ်လဲၣ်.
၁၅ မၤထွဲဒ်နတၢ်ဆၢတဲာ်အသိး. ပမ့ၢ်တမၤထွဲ ဒ်ပတၢ်ဆၢတဲာ်အသိးဘၣ်န့ၣ် ပဂုာ်ကျဲးစၢး ဆၢတဲာ်တၢ်လၢအဘၣ် သနာ်က့ ကကဲထီၣ် တၢ်ကလီကလီလီၤ. စီၤၡလိၤမိၤ ကွဲးဝဲလၢ “တၢ်တမံၤဂ့ၤ တမံၤဂ့ၤလၢ နမၤအီၤသ့န့ၣ် မၤအီၤလၢ နဂံၢ်နဘါခဲလၢာ်တက့ၢ်.” (စံၣ်တဲၤတဲလီၤတၢ် ၉:၁၀) ဒ်သိးတၢ်ကကဲထီၣ်လိၣ်ထီၣ်အဂီၢ် ပကဘၣ်သးအိၣ်မၤ တၢ်ကိးမံၤဒဲးလၢ ပကဘၣ်မၤအီၤ ဒ်ပဆၢတဲာ်ပာ်အီၤအသိးလီၤ. အဒိ ပှၤစံၣ်တဲၤတဲလီၤတၢ်ဖိတဂၤ ဆၢတဲာ်ဝဲလၢ ကမၤပှၤလဲၤလၢညါ. ဒီးအတၢ်ဆၢတဲာ်န့ၣ် ကကဲထီၣ်လိၣ်ထီၣ်ဧါ. အဝဲမ့ၢ်တမၤ နီၢ်ခိအတၢ်ဖံးတၢ်မၤ အါတလၢဘၣ် ဒီးအဝဲမ့ၢ်တသူဝဲ အတၢ်ဆၢကတီၢ် ဒီးတၢ်ဂံၢ်တၢ်ဘါအါတလၢ လၢတၢ်မၤမုာ်မၤဖှံသး အဂီၢ်ဘၣ်န့ၣ် အတၢ်ဆၢကတီၢ်လၢ တၢ်စံၣ်တဲၤတဲလီၤတၢ်မၤအဂီၢ် ကအိၣ်ဝဲအဃိ အဝဲမၤဝဲ ပှၤလဲၤလၢညါသ့လီၤ.
၁၆ ပတၢ်ဆၢတဲာ်လၢအဂ့ၤအံၤ ကကဲထီၣ်လိၣ်ထီၣ်အဂီၢ် တမ့ၢ်တၢ်လၢအညီဘၣ်. ဘၣ်မနုၤအဃိလဲၣ်. မ့ၢ်လၢ “ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤလီၤ.” (၁ ယိၤဟၣ် ၅:၁၉) တကးဒံးဘၣ် ပကဘၣ် “ဒုးလိာ်သးဒီး တၢ်ပၢတၢ်ပြးတဖၣ်, တၢ်စိတၢ်ကမီၤတဖၣ် ဒီးခိၣ်နၢ်တဖၣ်လၢ အပၢဝဲဟီၣ်ခိၣ်လၢ အပှဲၤဒီးတၢ်ခံးအံၤလီၤ. အဝဲသ့ၣ်မ့ၢ်ဝဲ ပှၤနီၢ်သးဖိလၢ အအၢအသီတဖၣ် လၢအအိၣ်လၢ မူခိၣ်လီၤ.” (အ့းဖ့းစူး ၆:၁၂) တၢ်မၢဖိပီလူး ဒီးစီၤယူဒၤ ပာ်ဖျါထီၣ်ဝဲလၢ ပှၤလၢအမၤတၢ်ဆၢတဲာ်လၢ ကမၤလၤကပီၤ ကစၢ်ယွၤန့ၣ် ကဘၣ်ဒုးတၢ်လၢ အတၢ်နာ်အဂီၢ်လီၤ.—၁ တံၤမသ့း ၆:၁၂; ယူဒၤ ၃.
၁၇. ဖဲပမၤတၢ်ဆၢတဲာ်အခါ ယဟိဝၤယွၤ အဲၣ်ဒိးလၢပကမၤဒ်လဲၣ်.
၁၇ သမံသမိးက့ၤ နတၢ်ဆၢတဲာ် ဒီးတၢ်လၢ နကဘၣ်ဆီတလဲ မ့ၢ်အိၣ်န့ၣ် ဆီတလဲအီၤ. တဘျီတခီၣ် ပတၢ်ဆၢတဲာ်တဖၣ်န့ၣ် တကဲထီၣ်အသး လီၤတံၢ်လီၤဆဲး ဒ်ပရဲၣ်ကျဲၤပာ်အသိးဘၣ်. မ့ၢ်လၢ “တၢ်ဆၢကတီၢ် ဒီးတၢ်ဘၣ်န့ၢ်အတီၤလီၤဘၣ်” ပဝဲခဲလၢာ်အဃိလီၤ. (စံၣ်တဲၤတဲလီၤတၢ် ၉:၁၁) ဘၣ်ဆၣ် ပမ့ၢ်ထံၣ်ဘၣ်ဒီး တၢ်မၤကွၢ်တဖၣ်ဒၣ်လဲာ် ယဟိဝၤယွၤ အဲၣ်ဒိးလၢ ပကဆဲးမၤဒ် ပတၢ်ဆၢတဲာ် အိၣ်ဝဲအသိးလီၤ. ပှၤတဂၤအတၢ်ဆၢတဲာ် ဒ်သိးဒီး အတၢ်ဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးအတၢ်အၢၣ်လီၤလၢ အမၤဝဲဖဲအဖျီသးအခါန့ၣ် အဆီတလဲဝဲတသ့ဘၣ်. ကစၢ်ယွၤ အဲၣ်ဒိးလၢ ပမၤဒ်ပတၢ်ဆၢတဲာ်အသိး. (ဖး စံးထီၣ်ပတြၢၤ ၁၅:၁, ၂, ၄) တၢ်ဆၢတဲာ်အါတက့ၢ်န့ၣ် တမ့ၢ်တၢ်ဆၢတဲာ်လၢအရ့ဒိၣ်ဘၣ် သနာ်က့ ပှၤလၢအကူၣ်တၢ်သ့န့ၣ် ကသမံသမိးက့ၤဝဲ အတၢ်ဆၢတဲာ်တဖၣ်လီၤ. အဝဲတပာ်ထီၣ်ထီအသး ဒီးအခိၣ်တကိၤဘၣ်. မ့ၢ်လိၣ်လၢ အကဘၣ်ဆီတလဲ အတၢ်ဆၢတဲာ်န့ၣ် ကဆီတလဲဝဲလီၤ. (ကတိၤဒိ ၁၆:၁၈) တၢ်လၢအရ့ဒိၣ်လၢအဂီၢ်န့ၣ် မ့ၢ်ဝဲအကအိၣ်မူတၢ်အိၣ်မူလၢ ကမၤလၤကပီၤ ကစၢ်ယွၤအဂီၢ်လီၤ.
သိၣ်လိပှၤအဂၤတဖၣ်လၢ ကမၤတၢ်ဆၢတဲာ်လၢ အမၤလၤကပီၤကစၢ်ယွၤ
၁၈. ဒ်သိးဖိတဖၣ် မၤတၢ်ဆၢတဲာ်လၢအဘၣ် ကသ့အဂီၢ် မိၢ်ပၢ်တဖၣ်မၤစၢၤဝဲကသ့ဒ်လဲၣ်.
၁၈ မိၢ်ပၢ်သ့ၣ်တဖၣ် မၤစၢၤအဖိတဖၣ်လၢ ကမၤတၢ်ဆၢတဲာ်လၢ ကမၤလၤကပီၤကစၢ်ယွၤအဂီၢ်သ့. မိၢ်ပၢ်တဖၣ်အဒိအတဲာ်န့ၣ် မ့ၢ်သရၣ်လၢအဂ့ၤကတၢၢ်လီၤ. (လူၤကၣ် ၆:၄၀) မ့ၢ်ကြၢးလၢ မိၢ်ပၢ်တဖၣ် ကတဲပၠးဘၣ်အဖိတဖၣ်လၢ ဘၣ်ဃးဒီးတၢ်ဆၢတဲာ်လၢအဝဲသ့ၣ်မၤဝဲ ဒီးဘၣ်မနုၤအဃိအဝဲသ့ၣ်မၤဝဲလဲၣ်န့ၣ် အဝဲသ့ၣ်ကြၢးတဲပၠးဝဲ. ဒီးမိၢ်ပၢ်တဖၣ် ကပျဲဝဲလၢ အဖိတဖၣ် ကမၤတၢ်ဆၢတဲာ်တနီၤလၢ အနီၢ်ကစၢ် ဒီးဖဲအဝဲသ့ၣ် မၤဝဲကဲထီၣ်လိၣ်ထီၣ်အခါ ပတြၢၤအဝဲသ့ၣ်တက့ၢ်. ဘၣ်ဆၣ် အဖိတဖၣ် အတၢ်ဆၢတဲာ်မ့ၢ်ကမၣ်မီၤ. ညီနုၢ် မိၢ်ပၢ်တဖၣ်န့ၣ် အဲၣ်ဒိးဒီသဒၢအဖိတဖၣ် ဒ်သိးအသုတထံၣ်ဘၣ် တၢ်ကီတၢ်ခဲလၢ တၢ်ဆၢတဲာ်လၢအကမၣ်လၢ ဖိသ့ၣ်တဖၣ်မၤဝဲလီၤ. မိၢ်ပၢ်တဖၣ် မ့ၢ်မၤဝဲဒ်န့ၣ်ထီဘိန့ၣ် တကဲဘျုးလၢအဖိအဂီၢ်ဒိၣ်ဒိၣ်ဘၣ်. အဒိ မိၢ်ပၢ်တဖၣ် ကဟ့ၣ်အခွဲးလၢ အဖိကအိၣ်ဒီး ပှၤနီကါလံာ်အုၣ်သး ဘၣ်ဆၣ် အဖိမ့ၢ်မၤကမၣ် တၢ်သိၣ်တၢ်သီန့ၣ် ပှၤကအီၣ်လီးအီၤလီၤ. ဖဲန့ၣ်အခါ မိၢ်ပၢ်တဖၣ် မ့ၢ်အဲၣ်ဒိးလီးန့ၢ်ဝဲ အဖိအဂီၢ်န့ၣ် လီးန့ၢ်ဝဲသ့ ဘၣ်ဆၣ် မ့ၢ်ပျဲလၢအဖိတဖၣ် ကလီးဝဲလၢအနီၢ်ကစၢ်အစ့န့ၣ် အကန့ၢ်ဘၣ်တၢ်မၤလိလီၤ.—ရိမ့ၤ ၁၃:၄.
၁၉. ပကဘၣ်သိၣ်လိ ပပှၤမၤလိလံာ်စီဆှံဖိလၢ ကမၤဝဲတၢ်မနုၤလဲၣ် ဒီးပမၤကသ့ဒ်လဲၣ်.
၁၉ ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ ကသိၣ်လိနဲၣ်လိပှၤဂၤ. (မးသဲ ၂၈:၂၀) တၢ်သိၣ်လိနဲၣ်လိလၢ အရ့ဒိၣ်ကတၢၢ်အကျါတခါန့ၣ် မ့ၢ်ဝဲ ပသိၣ်လိပပှၤမၤလိလံာ်စီဆှံဖိတဖၣ် ဒ်သိးအဝဲသ့ၣ် ကမၤတၢ်ဆၢတဲာ် လၢအဘၣ်ကသ့အဂီၢ်. အဃိ ပမ့ၢ်တဲ အဝဲသ့ၣ်လၢ အဝဲသ့ၣ်ကမၤ ဒ်အံၤဒ်နုၤန့ၣ် တကဲဘျုးလၢ အဝဲသ့ၣ်အဂီၢ် ဒိၣ်ဒိၣ်ဘၣ်. လၢတၢ်န့ၣ်အလီၢ် ပကပၠးအီၤ လံာ်စီဆှံအတၢ်ဟံးစုနဲၣ်ကျဲတဖၣ် ဒ်သိး အဝဲသ့ၣ် မၤတၢ်ဆၢတဲာ်လၢ အနီၢ်ကစၢ်ကသ့အဂီၢ်လီၤ. ပမ့ၢ်ကွၢ်န့ၣ် “ပဝဲတဂၤစုာ်စုာ် ပကဘၣ်ဟ့ၣ်တၢ်စံးဆၢလၢ ကစၢ်ယွၤအအိၣ်လၢ ပနီၢ်ကစၢ်လီၤ.” (ရိမ့ၤ ၁၄:၁၂) လၢတၢ်န့ၣ်အဃိ ပဝဲခဲလၢာ် ပအိၣ်ဒီးတၢ်ဂ့ၢ်အဂ့ၤလၢ ပကမၤတၢ်ဆၢတဲာ်လၢ အမၤလၤကပီၤ ကစၢ်ယွၤလီၤ.
နကစံးဆၢဒ်လဲၣ်
• ဘၣ်မနုၤအဃိ ပကဘၣ် မၤလိသ့ထီၣ်ပသးလၢ ပကမၤတၢ်ဆၢတဲာ်အဂီၢ်လဲၣ်.
• တၢ်ပျံၤတၢ်ဖုး မၤဘၣ်ဒိပှၤသ့ဒ်လဲၣ် ဒီးပမၤနၢၤကွံာ် ပတၢ်ပျံၤတၢ်ဖုးတသ့ဒ်လဲၣ်.
• ကျဲဃုဘိလၢ ကမၤစၢၤပှၤလၢ ပကမၤတၢ်ဆၢတဲာ်လၢ ကမၤလၤကပီၤ ကစၢ်ယွၤန့ၣ် မ့ၢ်မနုၤလဲၣ်.
[တၢ်လွံၢ်နၢၣ်]
ကျဲလၢပကမၤ တၢ်ဆၢတဲာ်လၢအဘၣ်
၁ ဟးဆှဲးတၢ်ပာ်ထီၣ်ထီသး
၂ ဃုသ့ၣ်ညါအါထီၣ်တၢ်
၃ ဃ့ထုကဖၣ်ဒ်သိး နကအိၣ်ဒီးတၢ်ကူၣ်သ့အဂီၢ်
၄ မၤတၢ်ဆၢတဲာ်
၅ မၤထွဲဒ်နတၢ်ဆၢတဲာ်အသိး
၆ သမံသမိးက့ၤ နတၢ်ဆၢတဲာ် ဒီးတၢ်လၢနကဘၣ်ဆီတလဲမ့ၢ်အိၣ်န့ၣ် ဆီတလဲအီၤ
[တၢ်ဂ့ၢ်လၢ တၢ်ဂီၤအဖီလာ်]
အဝဲန့ၣ် ကလီၤဂာ်ဒ်ကဘီတဘ့ၣ်လၢ အနီၣ်ဝၢ်တအိၣ်ဘၣ်လၢ အလဲၤတၢ်လၢ ပီၣ်လဲၣ်ပူၤ ဖဲကလံၤမုၢ်လီၤဝဲ အဆၢကတီၢ်