နာ်န့ၢ် ယဟိဝၤယွၤထီဘိတက့ၢ်

၁–၃. ဘၣ်မနုၤအဃိ စီၤပီလူးနာ်ဝဲလၢ အဝဲသန့ၤအသးလၢ ယဟိဝၤယွၤသ့န့ၣ်လဲၣ်. (ကွၢ်တၢ်ဂီၤလၢ တၢ်မၤလိအံၤအခီၣ်ထံးန့ၣ်တက့ၢ်.)

နမ့မ့ၢ်ဘၣ်ဖုး ခရံာ်ဖိလၢ တၢယၤဖှိၣ်အစိၤတဂၤ ဒီးအိၣ်မူဘၣ်လၢ ရိမ့ၤအတၢ်ပၢအဖီလာ်အခါ နတၢ်အိၣ်မူကပှဲၤဒီး တၢ်ဘၣ်ယိၣ်ဘၣ်ဘီလီၤ. ပှၤရိမ့ၤဖိတဖၣ် မၤနးမၤဖှီၣ်ဝဲ ခရံာ်ဖိတဖၣ်န့ၣ်လီၤ. ပှၤရိမ့ၤဖိတဖၣ် ပာ်တၢ်ကမၣ်လၢခရံာ်ဖိတဖၣ်အလိၤဒီး တဲဝဲလၢအဝဲသ့ၣ်မ့ၢ် ပှၤလၢအဒွဲၣ်အူထီၣ်ဝ့ၢ် ဒီးမ့ၢ်ပှၤတဖၣ်လၢ အသးဟ့ပှၤအဂၤလီၤ. ဒီပုၢ်ဝဲၢ်မုၣ်ဒီပုၢ်ဝဲၢ်ခွါအါဂၤ ဘၣ်တၢ်ဖီၣ်အီၤန့ၣ်လီၤ. အဝဲသ့ၣ်အကျါတနီၤ ဘၣ်တၢ်ဒုးအ့ၣ်ဖှီအီၤ ဒီးဆၣ်ဖိကီၢ်ဖိ, တနီၤဘၣ်တၢ်ပျၤထီအီၤဒီး ဒွဲၣ်ထီၣ်အဝဲသ့ၣ်လၢမ့ၣ်အူ ဒ်မ့ၣ်အူတၢၣ်အသိးလီၤ. ကိးနံၤဒဲးန့ၣ် နကဆိကမိၣ်ဘၣ်လၢ တၢ်သ့ၣ်တဖၣ်အံၤ ကကဲထီၣ်အသးဒီးနၤသ့ဝဲလီၤ.

^၂ ဖဲတၢ်အဆၢကတီၢ်အကီအခဲအံၤအခါ တၢ်မၢဖိစီၤပီလူးစ့ၢ်ကီး ဘၣ်တၢ်ဒၢနုာ်အီၤဆူဃိာ်ပူၤလီၤ. အဝဲသ့ၣ်နီၣ်ထီၣ်က့ၤ ဖဲအဘၣ်ကီဘၣ်ခဲလၢညါတဘျီအခါန့ၣ် ပှၤမၤစၢၤအီၤတအိၣ်ဘၣ်အဃိ ဘၣ်သ့ၣ်သ့ၣ် စီၤပီလူးကဆိကမိၣ်ဘၣ်ဝဲလၢ ခဲအံၤတဘျီစ့ၢ်ကီး ခရံာ်ဖိဒီပုၢ်ဝဲၢ်တဖၣ် ဘၣ်ကဟဲမၤစၢၤအီၤဧါ. ဘၣ်ဆၣ် စီၤပီလူးဒိးန့ၢ်ဘၣ်တၢ်မၤစၢၤလၢ ယဟိဝၤယွၤအအိၣ်ခီဖျိယ့ၣ်ၡူးန့ၣ်လီၤ. စီၤပီလူးကွဲးဝဲလၢ “ကစၢ်ဆၢထၢၣ်ဒီးယၤ ဒီးဒုးဆူၣ်ထီၣ်ယဂံၢ်ယဘါ” လီၤ. ယ့ၣ်ၡူးဟ့ၣ် စီၤပီလူးတၢ်ဂံၢ်တၢ်ဘါလၢ အလိၣ်ဘၣ်ဝဲန့ၣ်လီၤ. စီၤပီလူးကွဲးစ့ၢ်ကီးဝဲလၢယ “ထူၣ်ဖျဲးထီၣ်လၢခ့ယုၢ်­အထးခိၣ်” လီၤ.​—၂ တံၤမသ့း ၄:၁၆, ၁၇.a

^၃ စီၤပီလူး သ့ၣ်နီၣ်ထီၣ်က့ၤဝဲလၢ အပူၤကွံာ် ယဟိဝၤယွၤမၤစၢၤတ့ၢ်အီၤဒ်လဲၣ်အဂ့ၢ်န့ၣ်လီၤ. လၢတၢ်န့ၣ်အဃိ အဝဲနာ်ဝဲလၢ ယဟိဝၤယွၤကဟ့ၣ်အီၤ တၢ်ဂံၢ်တၢ်ဘါလၢအလိၣ်ဘၣ်ဝဲ ဒ်သိးတူၢ်ဝဲတၢ်ကီတၢ်ခဲလၢအဘၣ်အီၤ အခဲအံၤမ့ၢ်ဂ့ၤ, ခါဆူညါမ့ၢ်ဂ့ၤကန့ၢ်အဂီၢ်န့ၣ်လီၤ. အဝဲနာ်ဝဲတၢ်န့ၣ် ­သပှၢ်တၢၢ်အဃိ ကွဲးဝဲလၢ- “ကစၢ်ကထုးထီၣ်န့ၢ်ယၤလၢ ကယဲၢ်တၢ်မၤလၢအအၢ” လီၤ. (၂ တံၤမသ့း ၄:၁၈) စီၤပီလူးသ့ၣ်ညါဝဲလၢ တၢ်အိၣ်သးလၢ ဒီပုၢ်ဝဲၢ်တဖၣ်မၤစၢၤအီၤတသ့ဒၣ်လဲာ် ယဟိဝၤယွၤ ဒီးယ့ၣ်ၡူးမၤစၢၤအီၤသ့ဝဲထီဘိလီၤ. ­အသးတဒ့ဒီနီတစဲးဘၣ်.

တၢ်ခွဲးတၢ်ယာ်တဖၣ်လၢ ပကပာ်ဖျါထီၣ် တၢ်နာ်န့ၢ်ယဟိဝၤယွၤ

၄, ၅. (က) ဖဲနလိၣ်ဘၣ်တၢ်မၤစၢၤအခါ မတၤတဂၤမၤစၢၤနၤသ့ထီဘိလဲၣ်. (ခ) နမၤဂၢၢ်ကျၢၤဒိၣ်ထီၣ် နတၢ်ရ့လိာ်သးဒီး ယဟိဝၤယွၤကသ့ဒ်လဲၣ်.

^၄ ဖဲနကွၢ်ဆၢၣ်မဲာ်ဘၣ် တၢ်ကီတၢ်ခဲဒိၣ်ဒိၣ်မုၢ်မုၢ်အခါ နတူၢ်ဘၣ်လၢ ပှၤကမၤစၢၤနၤတအိၣ်နီတဂၤဘၣ်န့ၣ် အိၣ်တဘျီဘျီဧါ. ဘၣ်သ့ၣ်သ့ၣ် နတၢ်မၤတအိၣ်လၢၤဘၣ် မ့တမ့ၢ် နကကွၢ်ဆၢၣ်မဲာ်ဘၣ် တၢ်ဆီၣ်သနံးလၢကၠိလီၤ. ဘၣ်သ့ၣ်သ့ၣ် နကဆိးက့နးနးကလဲာ် မ့တမ့ၢ် နကဘၣ်ကွၢ်ဆၢၣ်မဲာ် တၢ်မၤကွၢ်ကီခဲအဂုၤအဂၤတဖၣ်လီၤ. ဘၣ်ဆၣ် ဖဲနဃ့တၢ်မၤစၢၤလၢ ပှၤဂၤအအိၣ်အခါ နတဒိးန့ၢ်ဘၣ်တၢ်မၤစၢၤဘၣ်. မ့ၢ်လီၤ, တၢ်ကီတၢ်ခဲတနီၤန့ၣ် ပှၤဟီၣ်ခိၣ်ဖိတဖၣ်မၤစၢၤနၤတသ့ဘၣ်. နကမၤဒ်လဲၣ်. လံာ်စီဆှံစံးဘၣ်ပှၤလၢ “သန့ၤနသးလၢယွၤ . . . တက့ၢ်” လီၤ. (ကတိၤဒိ ၃:၅, ၆) ဘၣ်ဆၣ် မ့ၢ်နနာ်သပှၢ်ကတၢၢ်လၢ ကစၢ်ယွၤကမၤစၢၤနၤဧါ. နနာ်သ့ဝဲလီၤ. ပကဖးဘၣ် တၢ်အဒိအတဲာ်လၢ လံာ်စီဆှံပူၤ လၢဒုးသ့ၣ်ညါပှၤ ဘၣ်ဃးယဟိဝၤယွၤမ့ၢ် ကစၢ်တဂၤလၢအမၤစၢၤ အပှၤဂီၢ်မုၢ်နီၢ်နီၢ်န့ၣ်လီၤ.

^၅ ဖဲနလိၣ်ဘၣ်တၢ်မၤစၢၤလၢ ပှၤဂၤအိၣ်အခါ နမ့ၢ်တဒိးန့ၢ်ဘၣ်အီၤန့ၣ် တဘၣ်သးဆါအဝဲသ့ၣ်တဂ့ၤ. ဒ်စီၤပီလူးအသိး နကဘၣ်ထံၣ် တၢ်မၤကွၢ်တဖၣ်အံၤလၢအမ့ၢ် တၢ်ခွဲးတၢ်ယာ်လၢ နကပာ်ဖျါထီၣ် နတၢ်နာ်ယဟိဝၤယွၤ လၢလၢပှဲၤပှဲၤလီၤ. တၢ်အံၤမ့ၢ်တၢ်ခွဲးတၢ်ယာ်လၢ နကထံၣ်ဘၣ် ယဟိဝၤယွၤ အတၢ်အံးထွဲကွၢ်ထွဲနၤ လၢနတၢ်အိၣ်မူအပူၤလီၤ. နမ့ၢ်မၤဒ်န့ၣ်န့ၣ် နတၢ်နာ် ယဟိဝၤယွၤ ဒီးနတၢ်ရ့လိာ်သးဒီးအီၤ ကဂၢၢ်ကျၢၤဒိၣ်ထီၣ်ဝဲလီၤ.

ပကဘၣ်ပာ်ဖျါထီၣ် ပတၢ်နာ်န့ၢ် ယဟိဝၤယွၤ

၆. ဖဲနကွၢ်ဆၢၣ်မဲာ်ဒီး တၢ်ကီတၢ်ခဲအခါ ဘၣ်မနုၤအဃိ နကနာ်ယဟိဝၤယွၤအဂီၢ် တမ့ၢ်တၢ်လၢအညီဘၣ်လဲၣ်.

^၆ ဘၣ်သ့ၣ်သ့ၣ် နကဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲလၢ ကမၤသးအုးနၤလီၤ. နဂုာ်ကျဲးစၢးအဂ့ၤကတၢၢ်လၢ နကမၤဘၣ်ဂီၢ်က့ၤတၢ်ကီတၢ်ခဲဒီး နကဃ့တၢ်မၤစၢၤ လၢယဟိဝၤယွၤအအိၣ်လီၤ. နနာ်လၢကစၢ်ယွၤကမၤစၢၤနၤအဃိ နသးမုာ်ထီၣ်စ့ၢ်ကီးဧါ. ကမုာ်ထီၣ်ဝဲလီၤ. (ဖး စံးထီၣ်ပတြၢၤ ၆၂:၈; ၁ ပ့းတရူး ၅:၇ တက့ၢ်.) နမ့ၢ်အဲၣ်ဒိးလၢ နတၢ်ရ့လိာ်သးဒီးယဟိဝၤယွၤ ကဂၢၢ်ကျၢၤထီၣ်ဝဲအဂီၢ်န့ၣ် အရ့ဒိၣ်လၢနကဘၣ်နာ် ယဟိဝၤယွၤလီၤ. ဘၣ်ဆၣ် နကမၤဒ်န့ၣ်အဂီၢ် တညီဝဲထီဘိဘၣ်. ဘၣ်မနုၤအဃိလဲၣ်. ဘၣ်သ့ၣ်သ့ၣ် ကမ့ၢ်ဝဲလၢ ယဟိဝၤယွၤ တစံးဆၢ နတၢ်ထုကဖၣ်တဘျီဃီအဃိလီၤ.​—စံးထီၣ်ပတြၢၤ ၁၃:၁, ၂; ၇၄:၁၀; ၈၉:၄၆; ၉၀:၁၃; ဃဘးကူာ် ၁:၂.

၇. ဘၣ်မနုၤအဃိယဟိဝၤယွၤ တစံးဆၢပတၢ်ထုကဖၣ်တဘျီဃီလဲၣ်.

^၇ ဘၣ်မနုၤအဃိယဟိဝၤယွၤ တစံးဆၢပတၢ်ထုကဖၣ် တဘျီဃီလဲၣ်. လံာ်စီဆှံပာ်ဖျါထီၣ်ဝဲလၢ ယဟိဝၤယွၤမ့ၢ်ပပၢ် ဒီးပမ့ၢ်အဖိတဖၣ်လီၤ. (စံးထီၣ်ပတြၢၤ ၁၀၃:၁၃) ပၢ်တဂၤန့ၣ် တၢ်လၢအဖိဃ့ဝဲကိးမံၤဒဲးန့ၣ် တဟ့ၣ်ဝဲတဘျီဃီဘၣ်. ပၢ်တဂၤအံၤသ့ၣ်ညါဝဲလၢ တၢ်တမံၤမံၤလၢ အဖိသးလီဝဲလၢအဆိအချ့န့ၣ် လၢခံတသးလီဝဲလၢၤဘၣ်လီၤ. သ့ၣ်ညါဝဲ တၢ်အဂ့ၤကတၢၢ်လၢအဖိအဂီၢ် ဒီးအဝဲမ့ၢ်ဟ့ၣ်တၢ်လၢအဖိဃ့ဝဲန့ၣ် ကကဲဘျုးလၢပှၤဂၤအဂီၢ်ဒ်လဲၣ် ဒီးကမၤဘၣ်ဒိပှၤဂၤဒ်လဲၣ်န့ၣ်သ့ၣ်ညါစ့ၢ်ကီးဝဲလီၤ. အဝဲသ့ၣ်ညါ ဝဲအဖိအတၢ်လိၣ်ဘၣ်တဖၣ်ဒီး ကဘၣ်ဟ့ၣ်ဝဲလၢ ဆၢကတီၢ်ဖဲလဲၣ်န့ၣ်သ့ၣ်ညါဝဲလီၤ. တၢ်လၢအဖိဃ့ဝဲကိးမံၤဒဲး မ့ၢ်ဟ့ၣ်ဝဲတဘျီဃီန့ၣ် အဝဲကကဲထီၣ်အဖိအကုၢ်လီၤ. ပပၢ်ယဟိဝၤယွၤ အိၣ်လၢမူခိၣ်န့ၣ်အဲၣ်ပှၤဒိၣ်မးလီၤ. ဒ်တၢ်ဘၣ်တ့ကစၢ်လၢ အိၣ်ဒီးတၢ်ကူၣ်သ့တဂၤအသိး ကစၢ်သ့ၣ်ညါဝဲ ပတၢ်လိၣ်ဘၣ်ဒီးကြၢးစံးဆၢ ပတၢ်ထုကဖၣ်လၢ အဆၢကတီၢ်ဖဲလဲၣ်န့ၣ် သ့ၣ်ညါဝဲလီၤ. လၢတၢ်န့ၣ်အဃိ ကြၢးလၢပအိၣ်ခိးကွၢ်လၢ် ယဟိဝၤယွၤကစံးဆၢ ပတၢ်ထုကဖၣ်လၢကျဲဒ်လဲၣ်န့ၣ်လီၤ.​—ထိၣ်သတြီၤအီၤဒီး ယၡါယၤ ၂၉:၁၆; ၄၅:၉ တက့ၢ်.

၈. ဘၣ်ဃးပတူၢ်တၢ်ကကဲဝဲထဲလဲၣ်အဂ့ၢ်န့ၣ် ယဟိဝၤယွၤ အၢၣ်လီၤတ့ၢ်ဝဲတၢ်မနုၤလဲၣ်.

^၈ ပကဘၣ်သ့ၣ်နီၣ်ထီၣ်လၢ ယဟိဝၤယွၤသ့ၣ်ညါဝဲ ပဝဲဒၣ်တဂၤစုာ်စုာ် တၢ်လၢပတူၢ်ကဲ ဒီးတၢ်လၢပတူၢ်တကဲအဂ့ၢ်န့ၣ်လီၤ. (စံးထီၣ်ပတြၢၤ ၁၀၃:၁၄) လၢတၢ်န့ၣ်အဃိ အဝဲကဟ့ၣ်ပှၤတၢ်ဂံၢ်တၢ်ဘါလၢ ပလိၣ်ဘၣ်တဖၣ်လီၤ. တဘျီတခီၣ်ပကဆိကမိၣ်ဘၣ်လၢ ပတူၢ်တၢ်တကဲလၢၤဘၣ်အဆၢကတီၢ် ကအိၣ်ဝဲလီၤ. ဘၣ်ဆၣ်ယဟိဝၤယွၤအၢၣ်လီၤပှၤလၢ တၢ်မၤကွၢ်မ့ၢ်ဆူၣ်တလၢ လၢပဂီၢ်န့ၣ်အဝဲ ‘ကမၤထီၣ်ကျဲဒ်သိး ပကပူၤဖျဲး’ အဂီၢ်လီၤ. (ဖး ၁ ကရံၣ်သူး ၁၀:၁၃ တက့ၢ်.) ပနာ်သ့လၢယဟိဝၤယွၤ သ့ၣ်ညါဝဲပတူၢ်တၢ်ကကဲထဲလဲၣ်န့ၣ်လီၤ.

၉. ပဃ့တၢ်မၤစၢၤလၢ ယဟိဝၤယွၤအအိၣ်ဘၣ်ဆၣ် အဝဲမ့ၢ်တစံးဆၢပတၢ်ထုကဖၣ်တဘျီဃီန့ၣ် ပကြၢးမၤဒ်လဲၣ်.

^၉ ပမ့ၢ်ဃ့ဘါထုကဖၣ်ဆူ ယဟိဝၤယွၤအအိၣ်ဒီး အဝဲမ့ၢ်တစံးဆၢ ပတၢ်ထုကဖၣ်တဘျီဃီန့ၣ် ပကဘၣ်အိၣ်ဒီး တၢ်သးစူၤလီၤ. သ့ၣ်နီၣ်ထီၣ်လၢ ယဟိဝၤယွၤအသူၣ်ဆူၣ်အသးဆူၣ်လၢ ကမၤစၢၤပှၤန့ၣ်တက့ၢ်. ဘၣ်ဆၣ်လၢတၢ်သူၣ်ဆူၣ်သးဆူၣ်အပူၤ အဝဲအိၣ်ခိးတၢ်ဆၢကတီၢ်လၢ အဂ့ၤကတၢၢ်ဒ်သိးကဟ့ၣ်ပှၤ တၢ်လၢပလိၣ်ဘၣ်န့ၣ်လီၤ. လံာ်စီဆှံတဲပှၤလၢ “ယွၤကအိၣ်ခိးဒ်သိး အကသးကညီၤသု, ဒီးမၤသးဒ်န့ၣ်ဒီး ကဂဲၤဆၢထၢၣ်ဒ်သိး အကသးအိၣ်သုလီၤ. အဂ့ၢ်ဒ်အံၤ, ယွၤမ့ၢ်တၢ်စံၣ်ညီၣ်အကစၢ်လီၤ. ပှၤလၢအကွၢ်လၢ်အကျဲန့ၣ် ဘၣ်ဆိၣ်ဂ့ၤခဲလၢာ်လီၤ.”​—ယၡါယၤ ၃၀:၁၈.

“ခ့ယုၢ်အထးခိၣ်”

၁၀–၁၂. (က) ပကအံးထွဲကွၢ်ထွဲ ပပှၤဟံၣ်ဖိလၢ အဆိးက့မံနီၤအဂီၢ် ဘၣ်မနုၤအဃိ ကီခဲဝဲလဲၣ်. (ခ) ဖဲနကွၢ်ဆၢၣ်မဲာ်ဒီး တၢ်ကီတၢ်ခဲအခါ နမ့ၢ်ပာ်ဖျါထီၣ် နတၢ်နာ်ယဟိဝၤယွၤန့ၣ် တၢ်အံၤအဘျုးကအိၣ်လၢ နတၢ်ရ့လိာ်သးဒီးအီၤဒ်လဲၣ်. ဟ့ၣ်တၢ်အဒိတမံၤတက့ၢ်.

^၁၀ ဒ်စီၤပီလူးအသိးနကတူၢ်ဘၣ်လၢ နတၢ်အိၣ်သးကီခဲဝဲဒိၣ်မး ဒီးနကလိၣ်ဘၣ်တၢ်မၤပူၤဖျဲးနၤလၢ “ခ့ယုၢ်အထးခိၣ်” လီၤ. (၂ တံၤမသ့း ၄:၁၇) ဖဲန့ၣ်အဆၢကတီၢ် နတၢ်နာ်ယဟိဝၤယွၤန့ၣ် မ့ၢ်တၢ်လၢအရ့ဒိၣ်ကတၢၢ်လီၤ. အဒိ နကဘၣ်ကွၢ်ထွဲ နဟံၣ်ဖိဃီဖိလၢ အဆိးက့တဂၤလီၤ. လၢတၢ်န့ၣ်အဃိ နကဃ့ဘါထုကဖၣ် ဆူယဟိဝၤယွၤအအိၣ် ဒ်သိးကမၤစၢၤနၤ လၢနကအိၣ်ဒီး တၢ်ဆၢတဲာ်လၢအဂ့ၤ ဒီးနသးကဆူၣ်ထီၣ်အဂီၢ်လီၤ.b ဖဲနသ့ၣ်ညါလၢယဟိဝၤယွၤ ထံၣ်ဒီးနၢ်ပၢၢ်နတၢ်အိၣ်သးအခါ နသးကမုာ်ထီၣ်ဝဲလီၤ. ကစၢ်ယွၤကမၤစၢၤနၤ ဒ်သိးနတူၢ်တၢ်ခီၣ်တၢ်ကကဲ ဒီးနဆဲးတီဒီးအီၤကန့ၢ်အဂီၢ်လီၤ.​—စံးထီၣ်ပတြၢၤ ၃၂:၈.

^၁၁ တဘျီတခီၣ် နကတူၢ်ဘၣ်လၢ ယဟိဝၤယွၤတမၤစၢၤနၤဘၣ်. ဘၣ်သ့ၣ်သ့ၣ် တၢ်ကူစါယါဘျါအဂီၢ် ကသံၣ်သရၣ်တဖၣ် အတၢ်သးလီၤပလိာ်တအိၣ်ဘၣ်. နမုၢ်လၢ်လၢ နဘူးနတံၢ်တဖၣ် ကဟဲမၤမုာ်ထီၣ်က့ၤနသးဘၣ်ဆၣ် အဝဲသ့ၣ်မၤနးထီၣ် နတၢ်အိၣ်သးလီၤ. လၢတၢ်န့ၣ်အဃိ ထီဘိနကဘၣ်သန့ၤနသးလၢ ယဟိဝၤယွၤ ဒ်သိးကဟ့ၣ်နၤ တၢ်ဂံၢ်တၢ်ဘါလီၤ. ဒီးသုးဘူးနသးဆူ ယဟိဝၤယွၤအအိၣ်ထီဘိတက့ၢ်. (ဖး ၁ ၡမူၤအ့လး ၃၀:၃, ၆ တက့ၢ်.) လၢခံဖဲနသ့ၣ်ညါထီၣ်လၢ ယဟိဝၤယွၤမၤစၢၤနၤအခါ နတၢ်ရ့လိာ်သးဒီးအီၤကဂၢၢ်ကျၢၤထီၣ်ဝဲလီၤ.

^၁၂ ဒီပုၢ်ဝဲၢ်မုၣ်လ့ဒၣ် ကွၢ်ဆၢၣ်မဲာ်ဘၣ်ဝဲတၢ်သ့ၣ်တဖၣ်အံၤလီၤ.c (ကွၢ်တၢ်ဂ့ၢ်အဘျဲၣ်.) တချုးလၢ အမိၢ်အပၢ်လၢ အဆိးက့ခံဂၤသံဒံးဘၣ်န့ၣ် အဝဲဘၣ်ကွၢ်ထွဲဝဲ ဖးယံာ်ညါလီၤ. အဝဲတဲဝဲလၢ “တၢ်အိၣ်သးအဝဲအံၤ, ယၤဒီးယဝၤ, ဒီးယဒီပုၢ်ဝဲၢ်ခွါ ပကဘၣ်မၤဒ်လဲၣ် ပတသ့ၣ်ညါဘၣ်. တဘျီတခီၣ် ပတူၢ်ဘၣ်လၢ ပမၤတၢ်တဘၣ်နီတမံၤလၢၤဘၣ်. ဘၣ်ဆၣ် ဖဲပဆိကမိၣ်က့ၤ တၢ်လၢအလဲၤပူၤကွံာ်တဖၣ်အခါ ပထံၣ်ဘၣ်လၢ ယဟိဝၤယွၤမၤစၢၤပှၤလီၤ. ဖဲပတၢ်မုၢ်လၢ်တအိၣ်လၢၤဘၣ်အခါ အဝဲဟ့ၣ်ဂံၢ်ဟ့ၣ်ဘါပှၤဒီး ဟ့ၣ်ပှၤတၢ်လၢ ပလိၣ်ဘၣ်တဖၣ်လီၤ.”

၁၃. ရီဒၤသန့ၤအသးလၢ ယဟိဝၤယွၤအဃိ လဲၤခီဖျိဝဲ တၢ်ကီတၢ်ခဲတခါဝံၤတခါသ့ဒ်လဲၣ်.

^၁၃ ပမ့ၢ်နာ်ယဟိဝၤယွၤ တုၤလီၤတီၤလီၤန့ၣ် ဖဲပမ့ၢ်ကွၢ်ဆၢၣ်မဲာ်ဒီး တၢ်သူၣ်အုးသးအုးအခါ ပတူၢ်တၢ်ခီၣ်တၢ်ကကဲဝဲလီၤ. ဒီပုၢ်ဝဲၢ်မုၣ် ရီဒၤတူၢ်ဘၣ်ဝဲတၢ်ဒ်အံၤလီၤ. အဝၤလၢတမ့ၢ် ယဟိဝၤပှၤအုၣ်အသးတဂၤ ကမၤလီၤဖးအသးဒီးအီၤ ဒီးတကတီၢ်ဃီန့ၣ် အဒီပုၢ်ဝဲၢ်ခွါအိၣ်ဒီး တၢ်ဆါနးနးကလဲာ်တခါလၢအမ့ၢ် လူဖၢးတၢ်ဆါလီၤ. စှၤလါအတီၢ်ပူၤန့ၣ် အဒီပုၢ်ဝဲၢ်ခွါအမါသံဝဲလီၤ. အဝဲကွၢ်ဆၢၣ်မဲာ်ဘၣ် တၢ်သးအုးဖးဒိၣ်ဝံၤအလီၢ်ခံ အသးမုာ်ထီၣ်က့ၤဝဲအခါ စးထီၣ်မၤဝဲ ပှၤလဲၤလၢညါတၢ်မၤလီၤ. ဘၣ်ဆၣ် တၢ်န့ၣ်ဝံၤအလီၢ်ခံ အမိၢ်သံကဒီးန့ၣ်လီၤ. ဖဲရီဒၤ ကွၢ်ဆၢၣ်မဲာ်ဘၣ် တၢ်လီၤသးအုးတဖၣ်အံၤအခါ အဝဲလဲၤခီဖျိဝဲသ့ဒ်လဲၣ်. အဝဲတဲဝဲလၢ “ယဃ့ဘါထုကဖၣ် ဆူယဟိဝၤယွၤအအိၣ် ကိးနံၤဒဲးဘၣ်ဃးတၢ်ဆၢတဲာ်လၢ အဆံးဖိဒၣ်လဲာ်န့ၣ်လီၤ. ယမၤဒ်န့ၣ်အဃိ ယဟိဝၤယွၤကဲထီၣ် ပှၤနီၢ်ကီၢ်တဂၤလၢယဂီၢ်လီၤ. ယဒိးန့ၢ်ဘၣ်တၢ်မၤလိလၢ ယကဘၣ်သန့ၤယသးလၢ ယဟိဝၤယွၤဒိၣ်န့ၢ် ယနီၢ်ကစၢ်ဒီးပှၤဂၤန့ၣ်လီၤ. တၢ်မၤစၢၤလၢ ယွၤဟ့ၣ်ယၤန့ၣ် မ့ၢ်တၢ်နီၢ်ကီၢ်လၢယဂီၢ် ဒီးမၤလၢပှဲၤန့ၢ် ယတၢ်လိၣ်ဘၣ်ခဲလၢာ်လီၤ. ဖဲယလဲၤခီဖျိတၢ်သ့ၣ်တဖၣ်အံၤအခါ ယလဲၤတၢ်ဒီးယဟိဝၤယွၤလီၤ.”

၁၄. နဟံၣ်ဖိဃီဖိတဂၤ မ့ၢ်ဘၣ်တၢ်ဟီထီၣ်ကွံာ်အီၤန့ၣ် ယဟိဝၤယွၤမၤစၢၤနၤကသ့ဒ်လဲၣ်.

^၁၄ ဆိကမိၣ်ကွၢ် တၢ်အိၣ်သးအကီအခဲလၢအဂၤတမံၤတက့ၢ်. ဘၣ်သ့ၣ်သ့ၣ် ပှၤလၢနဟံၣ်ဖိဃီဖိအကျါတဂၤ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤလီၤ. လံာ်စီဆှံစံးတၢ်လၢဘၣ်ဃးဒီး နကဘၣ်ရ့ဒီးပှၤလၢ ဘၣ်တၢ်ဟီထီၣ်ကွံာ်အီၤတဖၣ်ဒ်လဲၣ်အဂ့ၢ်န့ၣ် နသ့ၣ်ညါလီၤ. (၁ ကရံၣ်သူး ၅:၁၁; ၂ ယိၤဟၣ် ၁၀) ဘၣ်ဆၣ် ခီဖျိလၢနအဲၣ်ပှၤတဂၤန့ၣ်ဒိၣ်မးအဃိ နကတူၢ်ဘၣ်လၢ နကမၤထွဲ လံာ်စီဆှံတၢ်သိၣ်တၢ်သီအဂီၢ်န့ၣ်ကကီဝဲ မ့တမ့ၢ် နမၤထွဲအီၤတသ့ဘၣ်လီၤ. မ့ၢ်နနာ်လၢ နပၢ်အိၣ်လၢမူခိၣ် ကဟ့ၣ်နၤတၢ်ဂံၢ်တၢ်ဘါလၢ နကဒိကနၣ်အကလုၢ်န့ၣ်ဧါ. မ့ၢ်နဆိကမိၣ်လၢ တၢ်အိၣ်သးဒ်အံၤ မ့ၢ်တၢ်ခွဲးတၢ်ယာ်တခါလၢ နကသုးဘူးနသးဆူ ယဟိဝၤယွၤအအိၣ်န့ၣ်ဧါ.

၁၅. ဘၣ်မနုၤအဃိ စီၤအၤဒၣ်တဒိကနၣ် ယဟိဝၤယွၤအကလုၢ်ဘၣ်လဲၣ်.

^၁၅ တၢ်အံၤပထိၣ်သတြီၤအီၤဒီး ပှၤအဆိကတၢၢ်စီၤအၤဒၣ် အတၢ်အိၣ်သးကသ့ဒ်လဲၣ်. မ့ၢ်စီၤအၤဒၣ်နာ်ဝဲလၢ အဝဲမ့ၢ်တဒိကနၣ် ယဟိဝၤယွၤအကလုၢ်သနာ်က့ ဆဲးအိၣ်မူဝဲကသ့န့ၣ်ဧါ. တမ့ၢ်ဘၣ်. စီၤအၤဒၣ်တဘၣ် “တၢ်လီန့ၢ်” အီၤဘၣ်. (၁ တံၤမသ့း ၂:၁၄) ဘၣ်မနုၤအဃိ အဝဲတဒိကနၣ် ယဟိဝၤယွၤအကလုၢ်ဘၣ်လဲၣ်. စီၤအၤဒၣ်အီၣ်သ့ၣ်သၣ်လၢ အမါဟ့ၣ်အီၤ ခီဖျိလၢအအဲၣ်အမါဒိၣ်န့ၢ် အအဲၣ်ယဟိဝၤယွၤအဃိန့ၣ်လီၤ. အဝဲဒိကနၣ်အမါ အကလုၢ်ဒိၣ်န့ၢ် ယဟိဝၤယွၤအတၢ်မၤလိာ်န့ၣ်လီၤ.​—၁ မိၤၡ့ ၃:၆, ၁၇.

၁၆. ပကဘၣ်အဲၣ်မတၤဒိၣ်ကတၢၢ်လဲၣ်. ဘၣ်မနုၤအဃိလဲၣ်.

^၁၆ စီၤအၤဒၣ် အတၢ်ဆၢတဲာ်န့ၣ် သိၣ်လိပှၤလၢ ပကြၢးအဲၣ် ယဟိဝၤယွၤဒိၣ်န့ၢ်ပအဲၣ်ပှၤဂၤန့ၣ်လီၤ. (ဖး မးသဲ ၂၂:၃၇, ၃၈ တက့ၢ်.) ပတၢ်အဲၣ်ယဟိဝၤယွၤ မ့ၢ်ဒိၣ်သပှၢ်ကတၢၢ်န့ၣ် ပဘူးပတံၢ်လၢ အမၤယဟိဝၤယွၤအတၢ်မၤမ့ၢ်ဂ့ၤ တမၤဘၣ်မ့ၢ်ဂ့ၤ ပမၤစၢၤအဝဲသ့ၣ်လၢ ကျဲလၢအဂ့ၤကတၢၢ်သ့န့ၣ်လီၤ. လၢတၢ်န့ၣ်အဃိ မၤဒိၣ်ထီၣ် နတၢ်အဲၣ်ယဟိဝၤယွၤထီဘိ ဒီးတၢ်နာ်န့ၢ်အီၤတက့ၢ်. နမ့ၢ်ဘၣ်ယိၣ်တၢ်ဘၣ်ဃးဒီး နဟံၣ်ဖိဃီဖိလၢ ဘၣ်တၢ်ဟီထီၣ်ကွံာ်အီၤလၢတၢ်အိၣ်ဖှိၣ်ပူၤတဂၤန့ၣ် ဃ့ဘါထုကဖၣ်ဆူ ယဟိဝၤယွၤအအိၣ် ဒီးတဲဘၣ်အီၤ နတၢ်တူၢ်ဘၣ်ခဲလၢာ်တက့ၢ်.d (ရိမ့ၤ ၁၂:၁၂; ဖံလံးပံၤ ၄:၆, ၇) နသးမ့ၢ်ဘၣ်ဒိဖးဒိၣ်ဒၣ်လဲာ် ဆိကမိၣ်တၢ်အိၣ်သးအဝဲအံၤ ဒ်အမ့ၢ်တၢ်ခွဲးတၢ်ယာ်လၢ နကမၤဂၢၢ်ကျၢၤထီၣ် နတၢ်ရ့လိာ်သးဒီးယဟိဝၤယွၤန့ၣ်တက့ၢ်. ခီဖျိနမၤဒ်န့ၣ်အဃိ နတၢ်နာ်ယွၤကအါထီၣ် ဒီးနကသ့ၣ်ညါလၢတၢ်ဒိကနၣ် ကစၢ်ယွၤအကလုၢ်န့ၣ် ကဒုးအိၣ်ထီၣ်တၢ်ဘျုးတၢ်ဖှိၣ်လၢအဂ့ၤကတၢၢ်န့ၣ်လီၤ.

ဖဲပအိၣ်ခိးတၢ်အခါ

၁၇. ပတၢ်မၤမ့ၢ်အါလၢ တၢ်စံၣ်တဲၤတဲလီၤတၢ်မၤအပူၤန့ၣ် ပနာ်သ့လၢယဟိဝၤယွၤ ကမၤန့ၢ်ပှၤတၢ်မနုၤလဲၣ်.

^၁၇ ဘၣ်မနုၤအဃိ ယဟိဝၤယွၤမၤပူၤဖျဲး စီၤပီလူးလၢ “ခ့ယုၢ်အထးခိၣ်” န့ၣ်လဲၣ်. စီၤပီလူးတဲဝဲလၢ “လၢယဃိ, တၢ်စံၣ်တဲၤတဲလီၤ ကဘၣ်တၢ်ပာ်ဖျါထီၣ်အီၤလၢလၢပှဲၤပှဲၤ” လီၤ. (၂ တံၤမသ့း ၄:၁၇) ယဟိဝၤယွၤ ဟ့ၣ်ပှၤမူဒါလၢ ပကဘၣ် စံၣ်တဲၤတဲလီၤ “တၢ်သးခုကစီၣ်” ဒီးကစၢ်ကိးပှၤလၢအ “ပှၤမၤသကိးတၢ်” လီၤ. (၁ သ့းစၤလနံ ၂:၄; ၁ ကရံၣ်သူး ၃:၉) ပတၢ်မၤမ့ၢ်အါလၢ တၢ်သးခုကစီၣ်တၢ်မၤအပူၤန့ၣ် ပနာ်သ့လၢ ယဟိဝၤယွၤကဟ့ၣ်ပှၤ တၢ်လၢပလိၣ်ဘၣ်အီၤ ကိးမံၤဒဲးန့ၣ်လီၤ. (မးသဲ ၆:၃၃) ဒီးကညီထီၣ်လၢ ပကအိၣ်ခိးယဟိဝၤယွၤ ကစံးဆၢဝဲပတၢ်ထုကဖၣ်န့ၣ်လီၤ.

၁၈. နသူၣ်ထီၣ်နတၢ်နာ်ယဟိဝၤယွၤ ဒီးနမၤဂၢၢ်ကျၢၤထီၣ် နတၢ်ရ့လိာ်သးဒီးအီၤကသ့ဒ်လဲၣ်.

^၁၈ လၢတၢ်န့ၣ်အဃိ ဂုာ်ကျဲးစၢးမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤကိးနံၤဒဲးတက့ၢ်. ဖဲနကွၢ်ဆၢၣ်မဲာ်ဘၣ် တၢ်မၤကွၢ်ဒီးတၢ်ဘၣ်ယိၣ်ဘၣ်ဘီအခါ ပာ်တၢ်အံၤဒ်တၢ်ခွဲးတၢ်ယာ်လၢ နကသုးဘူးနသးဆူ ယဟိဝၤယွၤအအိၣ်တက့ၢ်. ဖးကစၢ်ယွၤအကလုၢ်ကထါလံာ်စီဆှံ, မၤလိအီၤ ဒီးဆိကမိၣ်ထံအဂ့ၢ်တက့ၢ်. ဃ့ဘါထုကဖၣ်ဆူ ယဟိဝၤယွၤအအိၣ်ထီဘိ ဒီးနတၢ်မၤကဘၣ်အါလၢ တၢ်စံၣ်တဲၤတဲလီၤတၢ်မၤအဂီၢ်န့ၣ်လီၤ. နမ့ၢ်မၤတၢ်သ့ၣ်တဖၣ်အံၤန့ၣ် နနာ်သ့သပှၢ်ကတၢၢ်လၢ ယဟိဝၤယွၤ ကမၤစၢၤနၤ ဒ်သိးနတူၢ်ကကဲ ကယဲၢ်တၢ်မၤကွၢ် လၢအဘၣ်နၤခဲအံၤ ဒီးဆူညါန့ၣ်လီၤ.