ပှၤအါဂၤကပူၤဖျဲးဝဲ ဖဲတၢ်အကတၢၢ်ဟဲဝဲအခါ နပူၤဖျဲးသ့စ့ၢ်ကီးလီၤ

လံာ်စီဆှံဒုးသ့ၣ်ညါပှၤလၢ ဖဲတၢ်အကတၢၢ်အဆၢကတီၢ်န့ၣ် တၢ်ဟးဂူာ်ဟးဂီၤကအိၣ်ထီၣ်ဝဲလီၤ. “အခါဖဲန့ၣ် တၢ်နးတၢ်ဖှီၣ်ဖးဒိၣ်ကအိၣ်ဝဲလီၤ. တၢ်ဒ်န့ၣ်အသိးလၢဟီၣ်ခိၣ်ကဲထီၣ်သီတုၤခဲကနံၣ်အံၤ, တအိၣ်ဘၣ်နီတခီၣ်ဘၣ် . . . ဒီးတၢ်မ့ၢ်တမၤစှၤလီၤဘၣ် မုၢ်နံၤတဖၣ်န့ၣ်ဒီး, တၢ်ဖံးတၢ်ညၣ်တတုၤဘၣ်လၢ တၢ်အုၣ်က့ၤခီၣ်က့ၤနီတဂၤဘၣ်.” (မးသဲ ၂၄:၂၁, ၂၂) ဘၣ်ဆၣ်ကစၢ်ယွၤအၢၣ်လီၤပှၤလၢ ပှၤဟီၣ်ခိၣ်ဖိအါဂၤကပူၤဖျဲးဝဲလီၤ. “ဟီၣ်ခိၣ် . . . ဒံကွံာ်ဝဲ, မ့မ့ၢ်ပှၤမၤဖဲယွၤအသးန့ၣ်, ကအိၣ်ကဆိးလီၤထူလီၤယိာ်လီၤ.”—၁ ယိၤဟၣ် ၂:၁၇.

နမ့ၢ်အဲၣ်ဒိးပူၤဖျဲးဖဲဟီၣ်ခိၣ်အံၤဒံကွံာ်ဝဲအဆၢကတီၢ်ဒီး ‘အိၣ်ဝဲဆိးဝဲလီၤထူလီၤယိာ်’ န့ၣ်နကဘၣ်မၤတၢ်မနုၤလဲၣ်. မ့ၢ်နကြၢးကတဲာ်ကတီၤတၢ်လၢ နီၢ်ခိအတၢ်လိၣ်ဘၣ်တခီဧါ. တမ့ၢ်ဘၣ်. လံာ်စီဆှံဆီၣ်ထွဲပှၤဒ်သိး ပကပာ်ဆိပတၢ်ရ့လိာ်သးဒီး ကစၢ်ယွၤလၢညါလီၤ. “မၤသးဒ်န့ၣ်ဒီး, တၢ်တဖၣ်န့ၣ်ကဒံကွံာ်ခဲလၢာ်သတ:ဒီး, . . . လၢတၢ်ကွၢ်လၢ်ဒီး တၢ်ဆၢသပှၢ်ပှၢ်ယွၤအမုၢ်နံၤကဟဲဝဲ . . . လၢတၢ်ဖံးတၢ်မၤစီဆှံအပူၤ, ဒီးလၢတၢ်ယူးယီၣ်ယွၤ အပူၤသုဂ့ၤကဲထီၣ်လၢပှၤဒ်လဲၣ်တကလုာ်လဲၣ်.” (၂ ပ့းတရူး ၃:၁၀-၁၂) လံာ်စီဆှံအဆၢဖိလၢအမဲာ်ညါတဖၣ် ပာ်ဖျါထီၣ်ဝဲလၢ “တၢ်တဖၣ်” လၢအကဒံကွံာ်ဝဲ “ခဲလၢာ်” န့ၣ်အဲၣ်ဒိးစံးဝဲဒၣ် ဟီၣ်ခိၣ်အအၢအသီအံၤအတၢ်ပၢတၢ်ပြးတဖၣ် ဒီးပှၤလၢအတတူၢ်လိာ်ကစၢ်ယွၤအတၢ်ပၢ ဒီးဒိးပၢအသးလၢဟီၣ်ခိၣ်တၢ်ပၢတၢ်ပြးတဖၣ်အံၤ အဖီလာ်လီၤ. ဖျါတြၢၢ်ကလာ်လၢ ပမ့ၢ်ပာ်ဖှိၣ်တၢ်လၢနီၢ်ခိအတၢ်လိၣ်ဘၣ်တဖၣ်န့ၣ် ဖဲတၢ်ဟးဂူာ်ဟးဂီၤအံၤအိၣ်ထီၣ်ဝဲအဆၢကတီၢ် တၢ်သ့ၣ်တဖၣ်အံၤမၤပူၤဖျဲးပသးသမူတသ့ဘၣ်.

နီၢ်နီၢ်န့ၣ် ဒ်သိးပသးသမူကပူၤဖျဲးအဂီၢ် ပကဘၣ်ဟ့ၣ်လီၤပသးဆူယဟိဝၤယွၤအအိၣ် ဒီးဂုာ်ကျဲးစၢးဃုသ့ၣ်ညါကစၢ်အတၢ်ဘၣ်သးလီၤ. (စဖါနယၤ ၂:၃) ပတဘၣ်ကွၢ်ကပာ်မုၢ်နံၤခံကတၢၢ်အတၢ်ပနီၣ် ဒ်ပှၤအါတက့ၢ်ကွၢ်ကပာ်ဝဲအသိးဘၣ်. ပကဘၣ် ‘ကွၢ်လၢ်ဒီးဆၢသပှၢ်ပှၢ် ယွၤအမုၢ်နံၤ’ လီၤ. ဒ်သိးနကပူၤဖျဲးလၢ မုၢ်စံၣ်ညီၣ်အနံၤအဂီၢ် နကဘၣ်မၤဒ်လဲၣ်န့ၣ် ယဟိဝၤပှၤအုၣ်အသးတဖၣ် ဒုးနဲၣ်နၤလၢလံာ်စီဆှံအပူၤသ့ဝဲလီၤ.