မုၢ်မဆါတနံၤအံၤ မ့ၢ်လံာ်စီဆှံအတၢ်ဟံးစုနဲၣ်ကျဲန့ၣ် ကဲဘျုးဒံးဧါ
ပှၤတနီၤတဲဝဲလၢ တကဲဘျုးလၢၤဘၣ်. ကသံၣ်သရၣ်တဂၤ တဲဝဲလၢ နမ့ၢ်သူလံာ်စီဆှံလၢ ကဟံးစုနဲၣ်ကျဲနၤအဂီၢ်န့ၣ် လီၤဂာ်ဒ်နသူ ကၠိအလံာ်လၢ ၁၉၂၀ လၢနကသိၣ်လိ စဲအ့ၣ်လၢစိၤခဲအံၤအဂီၢ်လီၤ. မ့ၢ်နကသူ လံာ်တၢ်နဲၣ်ကျဲလၢပျၢၤတဘ့ၣ် ဒ်သိးကမၤစၢၤနၤလၢ နကသူခီၣ်ဖၠူထၢၣ်လၢ ပှၤတ့ထီၣ်အီၤလၢ ပစိၤခဲအံၤအဂီၢ်ဧါ. ပမ့ၢ်တဲလိၤလိၤန့ၣ် အဝဲသ့ၣ်အဲၣ်ဒိးတဲဝဲလၢ လံာ်စီဆှံန့ၣ် တချုးစိၤခဲအံၤအဃိ အဘျုးတအိၣ်လၢၤဘၣ်.
တကးဒံးဘၣ် ပှၤတနီၤဆိကမိၣ်လၢ မုၢ်မဆါတနံၤအံၤ တၢ်လဲၤထီၣ်လဲၤထီအိၣ်ဝဲဒီဒူၣ် ဒီးလၢပှာ်ယဲၤသန့အပူၤ သနာ်က့ တၢ်ဟံးစုနဲၣ်ကျဲအိၣ်ဝဲအါမးအဃိ တလိၣ်လၢပကဘၣ်သူ လံာ်စီဆှံ အတၢ်ဟံးစုနဲၣ်ကျဲတဖၣ်လၢၤဘၣ်. ဒီးလၢတၢ်ဂီၤမူ (TV) အပူၤန့ၣ် ကသံၣ်သရၣ်, ပှၤကူၣ်ဘၣ်ကူၣ်သ့ ဒီးပှၤကွဲးလံာ်ဖိတဖၣ် ပာ်ဖျါထီၣ်ဝဲ တၢ်ဟံးစုနဲၣ်ကျဲအကလုာ်ကလုာ် လၢပှၤအါဂၤအဂီၢ်န့ၣ်လီၤ. တကးဒံးဘၣ် လံာ်လဲၢ်လၢပှၤထုးထီၣ်ရၤလီၤအီၤလၢ ကဟံးစုနဲၣ်ကျဲ ပတၢ်အိၣ်မူအဂီၢ်န့ၣ် ပှၤဆါအီၤန့ၢ် စ့ဒီလၣ်အကကွဲၢ်လၢ အကထိတဖၣ်လီၤ.
မ့မ့ၢ်လံာ်စီဆှံန့ၣ် ပှၤကွဲးအီၤဝံၤလၢ အပူၤကွံာ်အနံၣ် ၂,၀၀၀ ဃၣ်ဃၣ်လီၤ. ဒီးခီဖျိလၢ ပှၤထုးထီၣ်တၢ်ဟံးစုနဲၣ်ကျဲလၢ မုၢ်မဆါတနံၤအံၤ အိၣ်ဝဲအါမးအဃိ ပှၤတနီၤဆိကမိၣ်လၢ ပတလိၣ်ကွၢ် လံာ်စီဆှံ အတၢ်ဟံးစုနဲၣ်ကျဲလၢၤဘၣ်. ဒီးဒ်ပပာ်ဖျါလၢ ထးအသိး ပှၤလၢအတနာ် လံာ်စီဆှံန့ၣ် အဝဲသ့ၣ်ထိၣ်သတြီၤလံာ်စီဆှံ ဒီးစဲအ့ၣ်အလံာ်လီၢ်လံၤတဘ့ၣ် မ့တမ့ၢ် ခီၣ်ဖၠူထၢၣ်အလံာ်တၢ်နဲၣ်ကျဲ လၢပျၢၤတဘ့ၣ်လီၤ. ဘၣ်ဆၣ် အဝဲသ့ၣ် ထိၣ်သတြီၤဝဲဒ်န့ၣ် မ့ၢ်အဘၣ်ဝဲစ့ၢ်ကီးဧါ. လ့ၤတက့ၤ တဘၣ်ဘၣ်. ဒ်တၢ်ဆၢကတီၢ်လဲၤပူၤကွံာ်အသိး စဲအ့ၣ်ဒီးစဲးဖီကဟၣ် လဲၤထီၣ်လဲၤထီချ့မးလီၤ. မ့မ့ၢ်ပှၤဟီၣ်ခိၣ်ဖိ အတၢ်လိၣ်ဘၣ်န့ၣ် မ့ၢ်အဆီတလဲဝဲဧါ. တဆီတလဲဘၣ်. လၢပျၢၤမ့ၢ်ဂ့ၤ ခဲအံၤမ့ၢ်ဂ့ၤ ပှၤဟီၣ်ခိၣ်ဖိအဲၣ်ဒိးလၢ အဝဲသ့ၣ်အတၢ်အိၣ်မူ ပှဲၤဒီးတၢ်သးခု, အိၣ်ဒီးတၢ်ဘံၣ်တၢ်ဘၢ, အဲၣ်ဒိးဝဲလၢအဟံၣ်ဖိဃီဖိ အိၣ်ဒီးတၢ်ရ့လိာ်မုာ်လိာ်လၢအဂ့ၤ ဒီးအိၣ်ဒီးတံၤသကိးလၢအဂ့ၤတဖၣ်န့ၣ်လီၤ.
လံာ်စီဆှံ မ့မ့ၢ်လံာ်လၢပျၢၤသနာ်က့ ကဲဘျုးလၢ ပှၤဟီၣ်ခိၣ်ဖိအဂီၢ် သပှၢ်ကတၢၢ်လီၤ. ဒီးယွၤအကလုၢ်ကထါပာ်ဖျါထီၣ်န့ၢ်ပှၤ လီၤတံၢ်လီၤဆဲးလၢ လံာ်စီဆှံအံၤဘၣ်တၢ်ကွဲးအီၤ ခီဖျိယွၤအသးစီဆှံလီၤ. လံာ်စီဆှံအိၣ်ဒီး တၢ်ဟံးစုနဲၣ်ကျဲလၢ အကဲဘျုးလၢ ပတၢ်အိၣ်မူပူၤကိးသနၢၣ်ဒဲးလီၤ. ဒီးဖဲပထံၣ်ဘၣ် တၢ်ကီတၢ်ခဲအခါ ကမၤစၢၤပှၤဒ်သိး ပလဲၤခီဖျိအီၤကန့ၢ်အဂီၢ်န့ၣ်လီၤ. (၂ တံၤမသ့း ၃:၁၆, ၁၇) တကးဒံးဘၣ် လံာ်စီဆှံတဲဝဲလၢ “ယွၤအကလုၢ်ကထါန့ၣ် မူဝဲ” အဃိ လၢညါမ့ၢ်ဂ့ၤခဲအံၤမ့ၢ်ဂ့ၤ လံာ်စီဆှံ အတၢ်ဟံးစုနဲၣ်ကျဲန့ၣ် ကဲဘျုးဝဲထီဘိလီၤ.—ဧ့ၤဘြံၤ ၄:၁၂, ခ့ခါစှီၤကျိာ်.
ဘၣ်ဆၣ် မ့မ့ၢ်နၤန့ၣ် နဆိကမိၣ်ဒ်လဲၣ်. မုၢ်မဆါတနံၤအံၤ မ့ၢ်လံာ်စီဆှံ အတၢ်ဟံးစုနဲၣ်ကျဲန့ၣ် ကဲဘျုးလၢပဂီၢ်ဒံးဧါ မ့တမ့ၢ် မၤစၢၤပှၤလၢပတၢ်အိၣ်မူပူၤ ကသ့စ့ၢ်ကီးဧါ. တၢးထီခိးတၢ် တဘ့ၣ်အံၤန့ၣ် ကပာ်ဖျါထီၣ်န့ၢ်နၤ တၢ်သံကွၢ်တဖၣ်အံၤ အတၢ်စံးဆၢန့ၣ်လီၤ.