ကစၢ်ယွၤကမၤန့ၢ်ပှၤ တၢ်မနုၤတဖၣ်လဲၣ်

နမ့ၢ်ထံၣ်ဘၣ်တၢ်ကီတၢ်ခဲန့ၣ်​ နကမုၢ်လၢ် နတံၤသကိးလၢအဂ့ၤတဂၤ အတၢ်မၤစၢၤသပှၢ်တၢၢ်လီၤ. ခီဖျိလၢတၢ်ပာ်သူၣ်ပာ်သးဒ်အံၤအဃိ ပှၤတနီၤတဲဝဲလၢ ကစၢ်ယွၤန့ၣ်တမ့ၢ် တံၤသကိးလၢအဂ့ၤတဂၤဘၣ်. မ့ၢ်လၢအဝဲသ့ၣ်တူၢ်ဘၣ်ဝဲလၢကစၢ်ယွၤ တမၤစၢၤအဝဲသ့ၣ်နီတစဲးဘၣ်အဃိလီၤ. နီၢ်ကီၢ်န့ၣ်​ ကစၢ်ယွၤမၤန့ၢ်ပှၤ တၢ်လၢအကဲဘျုးလၢပဂီၢ်အါမးလီၤ. တကးဒံးဘၣ်​ အဝဲကမၤလီၤမၢ်ကွံာ်ပတၢ်ကီတၢ်ခဲ ဒီးတၢ်နးတၢ်ဖှီၣ်လၢပတူၢ်ဘၣ်ခဲအံၤတဖၣ်လီၤ. ကစၢ်ယွၤကမၤတၢ်မနုၤလဲၣ်.

ကမၤကတၢၢ်ကွံာ် တၢ်အၢတၢ်သီခဲလၢာ်

ကစၢ်ယွၤကမၤလီၤမၢ်ကွံာ်ဝဲ တၢ်အၢတၢ်သီခဲလၢာ်ခဲဆ့လီၤ. လံာ်စီဆှံတဲဝဲလၢ “ဟီၣ်ခိၣ်ခဲလၢာ်မံလီၤဝဲလၢ တၢ်အၢတၢ်သီတဂၤန့ၣ်အပူၤ” အဃိ တၢ်အံၤမ့ၢ်ဒၣ်အပာ်ဖျါထီၣ်ဝဲ ပှၤလၢဒုးအိၣ်ထီၣ်​ တၢ်အၢတၢ်သီတဂၤအဂ့ၢ်န့ၣ်လီၤ. (၁ ယိၤဟၣ်​ ၅:၁၉) “တၢ်အၢတၢ်သီတဂၤန့ၣ်” မ့ၢ်ဝဲ မုၣ်ကီၤလံၢ်လၢ ယ့ၣ်ၡူးကိးအီၤလၢ “ဟီၣ်ခိၣ်အခိၣ်” လီၤ. (ယိၤဟၣ်​ ၁၂:၃၁) ဟီၣ်ခိၣ်အတၢ်အိၣ်သး အၢထီၣ်နးထီၣ်ဝဲန့ၣ်​ မ့ၢ်လၢမုၣ်ကီၤလံၢ်ပၢအီၤအဃိလီၤ. ကစၢ်ယွၤ ကမၤဝဲတၢ်မနုၤလဲၣ်.

တယံာ်လၢၤဘၣ်န့ၣ်​ ယဟိဝၤယွၤ ကမၤဟးဂီၤကွံာ် “ပှၤအိၣ်ဒီးတၢ်သံအစိအကမီၤ, ဒ်ပစံးတၢ်အသိး, မုၣ်ကီၤလံၢ်” ခီဖျိအဖိခွါ ယ့ၣ်ၡူးခရံာ်လီၤ. (ဧ့ၤဘြံၤ ၂:၁၄; ၁ ယိၤဟၣ်​ ၃:၈) လံာ်စီဆှံတဲဝဲလၢ မုၣ်ကီၤလံၢ်သ့ၣ်ညါဝဲလၢ “အဆၢအကတီၢ်အိၣ်ထဲ တစိၢ်ဖိ” လၢအကဘၣ်တၢ်မၤဟးဂီၤအီၤလီၤ. (လီၣ်ဖျါ ၁၂:၁၂) ကစၢ်ယွၤကမၤဟးဂီၤကွံာ်စ့ၢ်ကီး ပှၤလၢအဒုးအိၣ်ထီၣ်​ တၢ်အၢတၢ်သီခဲလၢာ်န့ၣ်လီၤ.—စံးထီၣ်ပတြၢၤ ၃၇:၉; ကတိၤဒိ ၂:၂၂.

ကမၤကဲထီၣ်ဟီၣ်ခိၣ်လၢ ပၤရဒံစူး

ပတၢ်ဘၣ်တ့ကစၢ်န့ၣ်​ ကမၤလီၤမၢ်ကွံာ် တၢ်အၢတၢ်သီခဲလၢာ်လၢဟီၣ်ခိၣ်ချၢ မ့ၢ်ဝံၤအဝဲကမၤကဲထီၣ်လိၣ်ထီၣ်​ အတၢ်တိာ်ပာ်လၢ ဟီၣ်ခိၣ်ဒီးပှၤဟီၣ်ခိၣ်ဖိအဂီၢ်လီၤ. ပမုၢ်လၢ် တၢ်မနုၤသ့လဲၣ်.

ပကအိၣ်ဒီးတၢ်ဃူတၢ်ဖိး ဒီးတၢ်ဘံၣ်တၢ်ဘၢ. “ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ, ဒီးကမုာ်လၤတၢ်လၢ တၢ်ဃူတၢ်ဖိးအါအါကလဲာ်အပူၤလီၤ.”—စံးထီၣ်ပတြၢၤ ၃၇:၁၁.

တၢ်အီၣ်တၢ်အီလၢ အန့ၢ်ဂံၢ်န့ၢ်ဘါ ကအိၣ်လၢလၢပှဲၤပှဲၤ. “ဘုတစှီၤကအိၣ်လၢ ဟီၣ်ခိၣ်အပူၤလၢကစၢၢ်ခိၣ်, ဒီးအသၣ်ကဟူးဝးဒ် လဘၤနိၣ်အသိးန့ၣ်လီၤ.”—စံးထီၣ်ပတြၢၤ ၇၂:၁၆.

ကအိၣ်ဒီးဟံၣ်လၢအဂ့ၤ ဒီးတၢ်မၤလၢ အလီၤသးခု. “ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ. . . . ယပှၤဃုထၢဖိ ကမုာ်လၤတၢ်လၢအမၤဝဲလၢ အစုဃဲးဃဲးလီၤ.”—ယၡါယၤ ၆၅:၂၁, ၂၂.

မ့ၢ်နအဲၣ်ဒိးထံၣ်ဘၣ်​ တၢ်အိၣ်သးဒ်အံၤတဖၣ်ဧါ. တယံာ်လၢၤဘၣ်န့ၣ်​ ပှၤကိးဂၤဒဲးကထံၣ်ဘၣ်ဝဲ တၢ်သ့ၣ်တဖၣ်အံၤ ကိးနံၤဒဲးလီၤ.

တၢ်ဆူးတၢ်ဆါ ဒီးတၢ်သံ ကမၤလီၤမၢ်ကွံာ်

ဆၢကတီၢ်ခဲအံၤ ပှၤကိးဂၤဒဲးန့ၣ်​ ဘၣ်ဆူးဘၣ်ဆါ ဒီးဘၣ်သံဝဲဒၣ်လီၤ. ဘၣ်ဆၣ်တယံာ်လၢၤဘၣ်န့ၣ်​ တၢ်သ့ၣ်တဖၣ်အံၤ ကလီၤမၢ်ကွံာ်ဝဲလီၤ. တယံာ်လၢၤဘၣ်​ ကစၢ်ယွၤကသူဝဲ ယ့ၣ်ၡူးအတၢ်ပှ့ၤက့ၤလၢ “ကယဲၢ်ပှၤလၢ အစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်” အဂီၢ်လီၤ. (ယိၤဟၣ်​ ၃:၁၆) ကကဲဘျုးဝဲဒ်လဲၣ်.

တၢ်ဆူးတၢ်ဆါ တအိၣ်လၢၤဘၣ်. “ပှၤအိၣ်ဝဲဆိးဝဲတဖၣ်န့ၣ် တစံး, ယမၤတကဲဘၣ်န့ၣ်ဘၣ်. ပှၤအိၣ်ဝဲဆိးဝဲလၢအပူၤန့ၣ်​ အတၢ်ဒဲးဘးပျၢ်လံလီၤ.”—ယၡါယၤ ၃၃:၂၄.

တၢ်သံတအိၣ်လၢၤဘၣ်. “တၢ်သံလီၤဘျၢလံလီၤထူလီၤယိာ်လံ, ဒီးကစၢ်ယွၤထွါကွံာ်မဲာ်ထံလၢ ကယဲၢ်ပှၤအမဲာ်” လီၤ.—ယၡါယၤ ၂၅:၈.

ပှၤကညီကအိၣ်မူဘၣ်လီၤထူလီၤယိာ်. “ယွၤအတၢ်ဟ့ၣ်န့ၣ်, မ့ၢ်တၢ်မူအထူအယိာ် လၢပကစၢ်ယ့ၣ်ၡူးခရံာ်အဃိန့ၣ်လီၤ.”—ရိမ့ၤ ၆:၂၃.

ပှၤလၢအသံတ့ၢ်တဖၣ်န့ၣ်​ ကဂဲၤဆၢထၢၣ်သမူထီၣ်က့ၤ. “ပှၤသံအတီမ့ၢ်ဂ့ၤ, တတီဘၣ်မ့ၢ်ဂ့ၤ, ကဂဲၤဆၢထၢၣ်က့ၤလီၤ.” (မၤတၢ် ၂၄:၁၅) အဝဲသ့ၣ်ကဒိးန့ၢ်ဘၣ်အဘျုး လၢကစၢ်ယွၤအတၢ်ဟ့ၣ်​ လၢအမ့ၢ်တၢ်ပှ့ၤက့ၤ အဃိန့ၣ်လီၤ.

ကစၢ်ယွၤကမၤန့ၢ်ပှၤ တၢ်သ့ၣ်တဖၣ်အံၤဒ်လဲၣ်.

ကဒုးအိၣ်ထီၣ်ဝဲ တၢ်ပၢတၢ်ပြး လၢအဂ့ၤကတၢၢ်တခါ

ကစၢ်ယွၤ ကမၤလၢပှဲၤထီၣ်​ အတၢ်တိာ်ပာ်လၢ ဟီၣ်ခိၣ်ဒီး ပှၤဟီၣ်ခိၣ်ဖိအဂီၢ် ခီဖျိ အတၢ်ပၢတၢ်ပြးလၢမူခိၣ်​ လၢယ့ၣ်ၡူးပၢဝဲန့ၣ်လီၤ. (စံးထီၣ်ပတြၢၤ ၁၁၀:၁, ၂) တၢ်ပၢတၢ်ပြးအံၤမ့ၢ်ဝဲ ဘီမုၢ်လၢယ့ၣ်ၡူးသိၣ်လိဝဲ အပျဲၢ်အဘီၣ်တဖၣ်လၢ ကဃ့ဘါထုကဖၣ်လၢ “အိၣ်လၢမူခိၣ်ပပၢ်ဧၢ, . . . နဘီနမုၢ်န့ၣ်​ မ်အဟဲတက့ၢ်” န့ၣ်လီၤ.—မးသဲ ၆:၉, ၁၀.

ယွၤအဘီအမုၢ်န့ၣ်​ ကပၢဟီၣ်ခိၣ်ဒီဘ့ၣ်​ ဒီးကမၤလီၤမၢ်ကွံာ်ဝဲ တၢ်ကီတၢ်ခဲ ဒီးတၢ်နးတၢ်ဖှီၣ်ခဲလၢာ်လၢ ဟီၣ်ခိၣ်ချၢလီၤ. ဘီမုၢ်အံၤကမ့ၢ် တၢ်ပၢတၢ်ပြးအဂ့ၤကတၢၢ်လၢ ပှၤဟီၣ်ခိၣ်ဖိတဖၣ်အဂီၢ်လီၤ. လၢတၢ်န့ၣ်အဃိ ဖဲယ့ၣ်ၡူးစံၣ်တဲၤတဲလီၤတၢ်လၢ ဟီၣ်ခိၣ်အဆၢကတီၢ် အဝဲဂုာ်ကျဲးစၢး စံၣ်တဲၤတဲလီၤဝဲ “ဘီမုၢ်အတၢ်သးခုအကစီၣ်” တကးဒံးဘၣ်​ ဟ့ၣ်ဂံၢ်ဟ့ၣ်ဘါအပျဲၢ်အဘီၣ်လၢ ကမၤဝဲဒ်န့ၣ်အသိးလီၤ.—မးသဲ ၄:၂၃; ၂၄:၁၄.

မ့ၢ်လၢယဟိဝၤယွၤအဲၣ်ဝဲ ပှၤဟီၣ်ခိၣ်ဖိလၢ အတ့လီၤဝဲတဖၣ်အံၤ ဒိၣ်မးအဃိ အဝဲအၢၣ်လီၤဝဲလၢ ကမၤန့ၢ်ဝဲတၢ်လၢ အဂ့ၤဒိၣ်မးတဖၣ်အံၤလီၤ. လၢတၢ်န့ၢ်အဃိ နတအဲၣ်ဒိးသ့ၣ်ညါအါထီၣ်အဂ့ၢ် ဒီးသုးဘူးနသးဆူအအိၣ်ဘၣ်ဧါ. နမ့ၢ်ဃုသ့ၣ်ညါအါထီၣ်​ ကစၢ်ယွၤအဂ့ၢ်န့ၣ်​ ကကဲဘျုးလၢနဂီၢ်ဒ်လဲၣ်. တၢ်မၤလိလၢခံတခါ ကပာ်ဖျါထီၣ်န့ၢ်ပှၤလီၤ.