ဘၣ်မနုၤအဃိ နကြၢးဆဲးအိၣ်မူဒံးလဲၣ်
တၢ်ဂ့ၢ်လၢ ပဖးဘၣ်လၢအမဲာ်ညါတဖၣ်န့ၣ် ပာ်ဖျါထီၣ်န့ၢ်ပှၤတၢ်အိၣ်သးအိၣ်ဝဲ အကလုာ်ကလုာ်လၢ ပတူၢ်ဘၣ်လၢ ပလဲၤခီဖျိတၢ်တန့ၢ်လၢၤဘၣ်. ဒီးဖဲနလဲၤခီဖျိဘၣ် တၢ်ကီတၢ်ခဲလၢ နနီၢ်ကစၢ်အခါန့ၣ် နကဆိကမိၣ်ဘၣ်လၢ မ့ၢ်ယတၢ်အိၣ်မူအံၤ အလုၢ်အပှ့ၤအိၣ်ဒံးဧါ မ့တမ့ၢ် မ့ၢ်ပှၤသူၣ်အိၣ်သးအိၣ်ယၤ တဂၤဂၤဒံးဧါ. နမ့ၢ်ပှၤလၢအလုၢ်ဒိၣ်ပှ့ၤဒိၣ် လၢကစၢ်ယွၤအဂီၢ် အဃိကစၢ်ယွၤန့ၣ် ပာ်သူၣ်ပာ်သး တၢ်ကိၢ်တၢ်ဂီၤလၢနတူၢ်ဘၣ်တဖၣ်န့ၣ်လီၤ.
ပှၤလၢအကွဲးထါ စံးထီၣ်ပတြၢၤ ၈၆ န့ၣ် အနာ်ကစၢ်ယွၤနီၢ်ကီၢ် ဒီးပာ်ဖျါထီၣ်ဝဲ “လၢယဘၣ်တၢ်ကိၢ်တၢ်ဂီၤ အမုၢ်တနံၤန့ၣ် ယကကိးထီၣ်နၤလီၤ. အဂ့ၢ်ဒ်အံၤ, နကစံးဆၢယၤလီၤ.” (စံးထီၣ်ပတြၢၤ ၈၆:၇) နကဆိကမိၣ်ဘၣ် “လၢယဘၣ်တၢ်ကိၢ်တၢ်ဂီၤအမုၢ်တနံၤန့ၣ်” မ့ၢ်ယွၤကစံးဆၢယၤလၢကျဲဒ်လဲၣ်.
ကစၢ်ယွၤ မ့ၢ်တမၤလီၤမၢ်န့ၢ်ပှၤ တၢ်ကီတၢ်ခဲ တဘျီဃီသနာ်က့ အဝဲအၢၣ်လီၤပှၤ လၢအကလုၢ်ကထါလံာ်စီဆှံ လၢအကဟ့ၣ်ပှၤတၢ်သူၣ်မံသးမုာ် ဒ်သိးပလဲၤခီဖျိတၢ်ကန့ၢ်အဂီၢ်လီၤ. လံာ်စီဆှံတဲဝဲလၢ “သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ်လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါ နၢ်ပၢၢ်တၢ်န့ၣ်ကပၢၤသုသူၣ်သုသးဒီး သုဆိကမိၣ်တၢ်.” (ဖံလံးပံၤ ၄:၆, ၇) ဝံသးစူၤဆိကမိၣ်ထံ လံာ်စီဆှံအဆၢလၢလာ်တဖၣ်အံၤ လၢကမၤစၢၤပှၤ ဒ်သိးပကသ့ၣ်ညါလၢ ကစၢ်ယွၤသူၣ်အိၣ်သးအိၣ်ပှၤအဂီၢ်န့ၣ်တက့ၢ်.
ကစၢ်ယွၤ သူၣ်အိၣ်သးအိၣ်နၤနီၢ်ကီၢ်
“[ထိၣ်ဖှံးဖိ] တဘ့ၣ်ဒၣ်လဲာ်တၢ်တသးပ့ၤနီၣ်ဘၣ်အီၤ လၢယွၤအမဲာ်ညါနီတဘ့ၣ်ဘၣ် . . . သုဂ့ၤန့ၢ် ထိၣ်ဖှံးအဂီၢ်မုၢ်တက့ၢ်လီၤ.”—လူၤကၣ် ၁၂:၆, ၇.
ဆိကမိၣ်ကွၢ်. ထိၣ်ဆံးဆံးဖိ ဒ်ထိၣ်ဖှံးဖိအသိးန့ၣ် လၢပှၤအါဂၤအဂီၢ် အလုၢ်အပှ့ၤတအိၣ်ဘၣ်, ဘၣ်ဆၣ် ကစၢ်ယွၤသူၣ်အိၣ်သးအိၣ်အဝဲသ့ၣ်လီၤ. ဒီးကစၢ်ယွၤသ့ၣ်ညါထိၣ်ဖှံးဖိ တဘ့ၣ်စုာ်စုာ် ဒီးအလုၢ်ဒိၣ်ပှ့ၤဒိၣ်လၢအဂီၢ်ခဲလၢာ်လီၤ. လၢအတၢ်ဘၣ်တ့တဖၣ်အကျါ ပှၤဟီၣ်ခိၣ်ဖိန့ၣ်အလုၢ်အပှ့ၤအိၣ်ဒိၣ်န့ၢ်ဒံး ထိၣ်ဖှံးဖိစၢၢ်တလၢၢ်လီၤ. ပှၤဟီၣ်ခီၣ်ဖိတဖၣ်န့ၣ် အလီၤဆီန့ၢ်ဒံး တၢ်ဘၣ်တ့ခဲလၢာ်လၢဟီၣ် ခိၣ်ချၢ မ့ၢ်လၢကစၢ်ယွၤတ့လီၤအဝဲသ့ၣ်ဒ်အ “ဂီၤဒၣ်ဝဲ” အသိးန့ၣ်လီၤ. အဃိ အဝဲသ့ၣ်ပာ်ဖျါထီၣ် ဒီးမၤဒိၣ်ထီၣ်အါထီၣ်ဝဲ အတၢ်ဂ့ၤတၢ်ဝါတဖၣ်သ့န့ၣ်လီၤ.—၁ မိၤၡ့ ၁:၂၆, ၂၇.
“ယွၤဧၢ, ဃုကွၢ်ထံယၤ, ဒီးနသ့ၣ်ညါယၤလီၤ . . . နနၢ်ပၢၢ် ယတၢ်ဆိကမိၣ် . . . မၤကွၢ်ယၤ, ဒီးသ့ၣ်ညါ ယတၢ်ဆိကမိၣ်တက့ၢ်.”—စံးထီၣ်ပတြၢၤ ၁၃၉:၁, ၂, ၂၃.
ဆိကမိၣ်ကွၢ်. ကစၢ်ယွၤသ့ၣ်ညါနၤနီၢ်ကီၢ် ဒီးအဝဲသ့ၣ်ညါ နတၢ်တူၢ်ဘၣ် လၢအဒိၣ်အယိာ် ဒီးနတၢ်သူၣ်ကိၢ်သးဂီၤတဖၣ်န့ၣ်လီၤ. ဖဲပှၤအါဂၤ မ့ၢ်တနၢ်ပၢၢ်နတၢ်ကီတၢ်ခဲ ဒီးနတၢ်သူၣ်ကိၢ်သးဂီၤဒၣ်လဲာ်န့ၣ် ကစၢ်ယွၤသးအိၣ်နၤ ဒီးအဲၣ်ဒိးမၤစၢၤနၤန့ၣ်လီၤ. အဃိ မၤစၢၤနၤလၢ နကအဲၣ်ဒိးဆဲးအိၣ်မူဒံးန့ၣ်လီၤ.
နတၢ်အိၣ်မူန့ၣ် အိၣ်ဒီးအလုၢ်အပှ့ၤ
“ယွၤဧၢ, ဒိကနၣ်ယဘါထုကဖၣ်တၢ်, ဒီးမ်ယတၢ်ဃ့ကညး ဟဲထီၣ်ဆူနအိၣ်တက့ၢ် . . . ဒိးနနၢ်လၢယၤတက့ၢ်. မုၢ်တနံၤလၢ ယကိးထီၣ်တၢ်ဒီး, စံးဆၢယၤချ့ချ့တက့ၢ် . . . ဃၣ်အသးဆူ ပှၤဖှီၣ်ဖိယာ်ဖိ အတၢ်ထုကဖၣ်အအိၣ်.”—စံးထီၣ်ပတြၢၤ ၁၀၂:၁, ၂, ၁၇.
ဆိကမိၣ်ကွၢ်. စးထီၣ်လၢအခီၣ်ထံးလံၤလံၤန့ၣ် ပှၤဟီၣ်ခိၣ်ဖိခဲလၢာ် တူၢ်ဘၣ် တၢ်နးတၢ်ဖှီၣ်ဒီးတၢ်မဲာ်ထံမဲာ်နိန့ၣ် လီၤဂာ်လၢ ယဟိဝၤယွၤမၤနီၣ်ဃာ်ဝဲ ခဲလၢာ်န့ၣ်လီၤ. (စံးထီၣ်ပတြၢၤ ၅၆:၈) နမဲာ်ထံတဖၣ် ကစၢ်ယွၤမၤနီၣ်ဝဲစ့ၢ်ကီးလီၤ. နမ့ၢ်ပှၤလုၢ်ဒိၣ်ပှ့ၤဒိၣ်လၢကစၢ်ယွၤအဂီၢ်အဃိ အသ့ၣ်နီၣ်ထီၣ်ဝဲ တၢ်လၢနလဲၤခီဖျိဘၣ်ဒီး မၤနီၣ်ဝဲနမဲာ်ထံမဲာ်နိတဖၣ်လီၤ.
“ကွၢ်တရံးတၢ်တဂ့ၤ, အဂ့ၢ်ဒ်အံၤ, ယမ့ၢ်နကစၢ်လီၤ. ယဒုးဆူၣ်ထီၣ်လံနဂံၢ်နဘါလံ, မ့ၢ်မးယမၤစၢၤလံနၤလံ . . . ယဲဒၣ်ယွၤ နကစၢ်အံၤ . . . စံးလၢနၤ, ပျံၤတၢ်တဂ့ၤ. ယမၤစၢၤလံနၤလံ.”—ယၡါယၤ ၄၁:၁၀, ၁၃.
ဆိကမိၣ်ကွၢ်. ကစၢ်ယွၤ သးအိၣ်မၤစၢၤနၤထီဘိလီၤ. နမ့ၢ်လီၤဃံၤန့ၣ် အကဝံၣ်ဆၢထၢၣ်က့ၤနၤလီၤ.
တၢ်မုၢ်လၢ်လၢ ခါဆူညါအဂီၢ်အိၣ်ဝဲ
“ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.”—ယိၤဟၣ် ၃:၁၆.
ဆိကမိၣ်ကွၢ်. ကစၢ်ယွၤအဲၣ်နၤ တုၤဒၣ်လဲာ် အဟ့ၣ်လီၤကွံာ် အဖိခွါယ့ၣ်ၡူး လၢကဟ့ၣ်လုၢ်ထီၣ်အသးလၢနဂီၢ်န့ၣ်လီၤ. ခီဖျိလၢ အတၢ်ဟ့ၣ်လုၢ်ထီၣ်သးအဃိ ပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လီၤထူလီၤယိာ် ပှဲၤဝဲဒီးတၢ်သူၣ်ခုသးခုန့ၣ်လီၤ.a
နမ့ၢ်ထံၣ်ဘၣ်တၢ်ကိၢ်တၢ်ဂီၤဒီး နမ့ၢ်ဆိကမိၣ်လၢ နတူၢ်တၢ်တန့ၢ်လၢၤဘၣ်သနာ်က့ နမ့ၢ်မၤလိကစၢ်ယွၤအကလုၢ်ကထါလီၤတံၢ်လီၤဆဲးန့ၣ် နကမၤဒိၣ်ထီၣ်နတၢ်နာ်ဘၣ်ဃးဒီး ကစၢ်ယွၤအတၢ်အၢၣ်လီၤအီလီၤတဖၣ်န့ၣ်လီၤ. ဒီးနမ့ၢ်မၤဒ်န့ၣ်န့ၣ် နကအိၣ်ဒီးတၢ်သးခု ဒီးနကနာ်သပှၢ်ကတၢၢ်လၢ နကြၢးဆဲးအိၣ်မူဒံးလီၤ.
a ဒ်သိးနကသ့ၣ်ညါအါထီၣ်ဘၣ်ဃးဒီး နဒိးန့ၢ်တၢ်အဘျုးလၢ ယ့ၣ်ၡူးအတၢ်ဟ့ၣ်လုၢ်ထီၣ်သးကသ့ဒ်လဲၣ်န့ၣ် ကွၢ်တၢ်ဂီၤမူလၢအမ့ၢ် သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ လၢ www.jw.org/ksw န့ၣ်တက့ၢ်. ကွၢ်လၢ ဘၣ်ဃးဒီပှၤ > တၢ်သ့ၣ်နီၣ်ထီၣ်က့ၤအမူး.